Confiansa Por Ser Restorá!

AUNKE e actual crísis di confiansa ta un señal di “e último dianan,” falta di confiansa a bira bisto miles di aña pasá tambe. (2 Timoteo 3:1) El a surgi promé un caminda cu ménos bo ta spera—den un paradijs. Bijbel ta bisa dje sitio: “Dios a planta un hofi den Eden, parti oost, i ei el a pone e homber cu el a forma. Asina Jehova Dios a laga crece for dje suela tur palu deseabel na bista di hende i bon pa cuminda i tambe e palu di bida meimei dje hofi i e palu di conocimentu di bon i malu.”—Génesis 2:8, 9.

E versículonan cu ta sigui ta tira lus riba e relacion cu esaki tin cu e actual crísis di confiansa. Nos ta lesa: “Tambe Jehova Dios a imponé e mandamentu aki riba e homber: ‘Bo por come di tur palu dje hofi te na satisfaccion. Pero, en cuanto e palu di conocimentu di bon i malu, bo no mag come di dje, pasobra den e dia cu bo come di dje lo bo muri positivamente.’” (Génesis 2:16, 17) Adam tabatin motibu pa duda loke Jehova a bisa?

Nos ta sigui lesa: “Awor e colebra a resultá di ta esun mas cauteloso di tur bestia salbahe di campo cu Jehova Dios a traha. Pues, el a cuminsá bisa e muher: ‘Di berdad ta asina cu Dios a bisa cu boso no mag come di tur palu dje hofi?’ Cu esei e muher a bisa e colebra: ‘Nos por come fruta di tur palu dje hofi. Pero, en cuanto comementu di fruta dje palu cu ta meimei dje hofi, Dios a bisa: “Boso no mag come di dje, no, boso no mag mishi cuné pa boso no muri.”’ Cu esei e colebra a bisa e muher: ‘Boso positivamente lo no muri. Pasobra Dios sa cu riba e mésun dia cu boso come di dje, boso wowonan lo tin cu habri i boso lo tin cu ta manera Dios, conociendo bon i malu.’ P’esei, e muher a mira cu e palu tabata bon pa cuminda i cu e tabata algu pa wowo anhelá, sí, e palu tabata deseabel pa wak. Di manera cu el a cuminsá tuma di su fruta i com’é. Despues el a duna algu di dje na su esposo tambe ora e tabata cuné i e esposo a cuminsá com’é.”—Génesis 3:1-6.

Dor di ignorá e spiertamentu cla di Dios, Adam i Eva a desplegá un falta di confiansa den Jehova. Nan a reflehá e mésun cualidadnan cu Satanas, e adversario di Dios, kende a papia cu Eva mediante un colebra literal. Satanas no tabatin confiansa den Jehova su manera di goberná. Pa motibu di esaki i un curason orguyoso i ambicioso, el a rebelá contra Dios i a engañá hende pa haci mescos. El a influenciá nan pa pensa cu Dios no tabata di confia.

E Resultado? Relacionnan Tenso

Tal bes bo a ripará cu personanan cu no ta confia otronan ta haña ta difícil pa mantené amistad. Publilio Siro, un escritor latin dje promé siglo P.E.C., a skirbi: “Confiansa ta e único vínculo di amistad.” Dor di nan acto di rebelion, Adam i Eva a mustra cu nan no a confia Dios. P’esei, Dios sigur no tabatin motibu pa confia nan. Como resultado di un kiebro den confiansa, e promé sernan humano a perde e amistad di Dios. No tin ningun indicacion cu Jehova hamas a papia cu nan despues cu el a condená nan pa nan rebelion.

E relacion entre Adam i Eva tambe a daña. Jehova a spierta Eva: “Cu dolor di parto lo bo duna lus na yunan, i bo deseo intenso lo ta pa bo esposo, i lo e dominá bo.” (Génesis 3:16) The Jerusalem Bible ta bisa: “Lo a manda riba bo.” En bes di ehercé hefatura amoroso riba su esposa, manera Dios tabata kier, awor Adam a bira su doño, mandando riba dje.

Despues cu nan a peca, Adam a purba tira e culpa riba su esposa. Na su opinion tabata debí na loke Eva a haci cu nan a ser sacá for di un hofi perfecto i mandá pa un tera no-acabá, condená na trabou duru bou di condicionnan ménos ideal promé cu nan bolbe na stof. (Génesis 3:17-19) Nos por wel imaginá cu esaki tabata un fuente di friccion entre e dosnan ei. Kisas Adam a reaccioná di un manera exagerá, bisando cu nunca mas lo e bai tras di Eva. Probablemente el a sinti su mes hustificá pa bis’é prácticamente: ‘Di awor padilanti, t’ami ta manda!’ Di otro banda, kisas Eva a mira cu Adam a faya cu su papel como cabes di famia, poniend’e perde confiansa den dje. Di tur manera, dor di expresá un falta di confiansa den Dios, hende a perde nan amistad cuné i a daña nan relacion cu otro.

Ken Nos Por Confia?

Manera e ehempel di Adam i Eva ta ilustrá, no ta tur hende ta merecé nos confiansa. Con nos por sa ken sí i ken no ta merecé nos confiansa?

Salmo 146:3 ta consehá nos: “No pone bo confiansa den e noblenan, ni den e yu di hende terenal, na ken ningun salbacion ta pertenecé.” I na Jeremías 17:5-7, nos ta lesa: “Maldicioná ta e homber físicamente fuerte cu ta pone su confiansa den hende terenal i cu realmente ta haci su brasa carni, i kende su curason ta apartá di Jehova mes.” Di otro banda, “bendicioná ta e homber físicamente fuerte cu ta pone su confiansa den Jehova, i kende su confiansa Jehova a bira.”

No cu semper ta malu pa pone confiansa den hende. E textonan ei ta djis mustra cu semper ta bon pa confia den Dios, pero cu confiansa den hende imperfecto tin bes por hiba na desaster. Por ehempel, hende cu ta confia cu ser humano por logra loke Dios so por haci—percurá salbacion i trece pas i siguridad completo—lo haña un gran decepcion.—Salmo 46:9; 1 Tesalonicensenan 5:3.

Realmente, bo por confia hende i institucionnan humano solamente n’e grado cu nan ta actua na armonia cu e propósitonan di Dios i ta desplegá principionan divino. Pues, si nos tin cu inspirá otronan pa nan tin confiansa den nos, nos tin cu papia e berdad, ser onesto i confiabel. (Proverbionan 12:19; Efesionan 4:25; Hebreonan 13:18) Solamente si nos comportá nos mes na armonia cu principionan di Bijbel, e confiansa cu otronan ta pone den nos lo ta hustificá i lo resultá di ta un fuente di fortalesa i animacion mutuo.

Restorá Confiansa

Testigonan di Jehova tin un base sólido pa pone confiansa den Dios i animá otronan pa haci mescos. Jehova ta fiel i leal, un persona cu semper bo por stèns ariba cu e ta haci loke e bisa, pasobra “ta imposibel pa Dios gaña.” Confiansa poné den e Dios di amor lo no hiba nunca na decepcion.—Hebreonan 6:18; Salmo 94:14; Isaías 46:9-11; 1 Juan 4:8.

Hende cu ta uní den tene confiansa den Jehova i cu ta biba na armonia cu su principionan ta fuertemente motivá pa mustra confiansa den un i otro. Den un mundu cu ta sufri di un crísis di confiansa, ta ki un goso pa haña hende cu ta confiabel! Imaginá bo ki diferente e mundu lo tabata si nos por tabatin confiansa absoluto den loke tur otro hende ta bisa of haci! Den e binidero mundu nobo cu Dios a primintí, esaki lo ta e caso. Hamas lo tin un crísis di confiansa!

Lo bo tin gana di biba den e tempu ei? Si ta asina, Testigonan di Jehova ta invitá bo awor pa fortalecé bo confiansa den Dios i den su promesanan dor di siña mas tocante su rekisitonan pa bida. Un studio di Bijbel ta ofrecé prueba cu Dios ta existí, cu e ta interesá den e bienestar di humanidad, i cu pronto lo e actua pa corigí problemanan di mundu pa medio di su Reino. Miyones di hende a siña pone confiansa den Dios i den su Palabra, Bijbel. Gustosamente Testigonan di Jehova lo duná bo un demostracion di e sirbishi público di un curso di studio di Bijbel cu nan ta ofrecé grátis. Of skirbi e publicadónan dje revista aki pa mas informacion.

[Komentario na página 5]

Falta di confiansa den Dios ta hiba na mal relacionnan humano

[Komentario na página 6]

Ser humano ta digno di confiansa solamente n’e grado cu nan ta actua na armonia cu principionan divino