E Punto Di Bista Biblico

Bijbel Ta Contra Educacion?

“Ta e ignorante so ta desprecia educacion.”—Publilio Syro, Moral Sayings, siglo un P.E.C.

BIJBEL ta urgi nos pa “protehá sabiduria práctico i abilidad di pensa.” (Proverbionan 3:21) Jehova, e Dios di conocimentu, kier pa su adoradónan ta hende educá. (1 Samuel 2:3; Proverbionan 1:5, 22) Tog tin algun declaracion den Bijbel cu lo por lanta pregunta. Por ehempel, refiriendo n’e cosnan cu ántes el a dedicá su mes na dje, incluyendo su educacion avansá, apostel Pablo a skirbi: “Tur cos [mi] ta considerá . . . como un monton di basura.” (Filipensenan 3:3-8) Den un otro carta inspirá, el a sigurá: “E sabiduria dje mundu aki ta bobedad cerca Dios.”—1 Corintionan 3:19.

Pues, Bijbel ta contra educacion? Con leu un cristian mester bai den pone meta pa haña educacion seglar? E mínimo di educacion escolar cu ley ta rekerí ta suficiente, of mester sigui busca educacion adicional?

Educacion den Promé Siglo

Entre cristiannan di promé siglo, tabatin un gran variedad di antecedente educacional. Cierto hombernan prominente a considerá e apostelnan galileo Pedro i Juan como “iletrá i gewoon.” (Echonan 4:5, 6, 13) Esaki tabata kier men cu e dos hombernan aki tabata analfabeta of hende sin scol? No. Simplemente el a nificá cu nan no a haña educacion n’e scolnan hebreo di siñansa avansá na Jerusalem. E skirbimentunan dje dos exponentenan balente aki di cristianismo despues a duna prueba dje echo cu nan tabata hombernan bon educá i inteligente, capas pa splica e Scritura di un manera cla. Nan educacion a encerá instruccion práctico pa percurá p’e necesidadnan material di nan famia. Nan tabata socio den loke evidentemente tabata un negoshi di pisca lucrativo.—Marco 1:16-21; Lucas 5:7, 10.

Na contraste, Lucas, e disipel cu a skirbi un dje Evangelionan i tambe e buki di Echonan, a ricibí un educacion mas avansá. E tabata dokter. (Colosensenan 4:14) Su antecedente médico a duna su skirbimentunan inspirá un tono distintivo.—Mira Lucas 4:38; 5:12; Echonan 28:8.

Promé cu el a bira cristian, apostel Pablo a ser instruí den e ley hudiu dor di un dje eruditonan mas briyante di su tempu, Gamaliel. (Echonan 22:3) Lo por compará Pablo su educacion cu un educacion universitario djawe. Ademas, den e sociedad hudiu tabata onorabel pa hóbennan siña un ofishi, asta ora nan tabata di sigui educacion avansá mas den futuro. Evidentemente Pablo a ricibí entrenamentu como trahadó di tent ora e tabata mucha ainda. E abilidad ei a capacit’é pa sostené su mes den su ministerio di tempu completo.

No obstante, Pablo a reconocé cu, compará cu e balor superior dje conocimentu di Dios, educacion seglar—aunke necesario—ta di balor limitá. Na armonia cu esei, Bijbel ta duna e mayor importancia na adkerí conocimentu di Dios i di Cristo. Cristiannan awe ta haci bon di adoptá e punto di bista realístico aki di educacion seglar.—Proverbionan 2:1-5; Juan 17:3; Colosensenan 2:3.

Evaluá e Asuntu Cuidadosamente

Algun cristian a haña cu, dor di obtené educacion adicional, sea den forma di estudio académico of di ofishi, nan por a percurá pa e necesidadnan material di nan famia. Ta apropiado pa un hende percurá pa su famia, pasobra ‘percurá pa esnan cu ta di bo mes’ ta un deber sagrado. (1 Timoteo 5:8) Adkerí e abilidadnan necesario pa haci esaki ta un asuntu di sabiduria práctico.

Sin embargo, esnan cu ta sinti cu nan mester adkerí mas cu e educacion básico pa cumpli cu e obhetivo aki mester evaluá tantu e bentaha como e desbentahanan. Posibel bentahanan ta, entre otro, cu un persona ta ser ekipá pa haña trabou cu ta yud’é mantené su mes i un famia adecuadamente, miéntras e ta participá celosamente den e ministerio. Ademas, lo e por yuda otronan den un sentido material, ‘teniendo algu pa parti cu un hende den necesidad.’—Efesionan 4:28.

Kico ta algun posibel desbentaha? Esakinan por ta, entre otro, cu bo ta ser exponé na siñansanan cu poco-poco ta caba cu bo fe den Dios i den Bijbel. Pablo a consehá cristiannan pa tene cuidou cu “loke falsamente ta ser yamá ‘conocimentu’ ” i “e filosofia i engaño bano segun e tradicion di hende.” (1 Timoteo 6:20, 21; Colosensenan 2:8) Ta innegabel cu ser exponé na algun forma di educacion por ta perhudicial pa e fe di un cristian. Esnan cu ta pensa pa tuma entrenamentu of estudio adicional lo mester ta conciente dje rísico di influencianan dañino asina.

Moises, cu a ser “instruí den tur e sabiduria dje egipcionan,” a mantené un fe fuerte apesar di a haña educacion cu sin duda a enbolbé siñansanan politeista cu a desonrá Dios. (Echonan 7:22) Di igual manera, cristiannan awe ta tene cuidou pa nan no sucumbí na influencianan insaludabel den sea cual sea e ambiente cu nan haña nan aden.

Un otro posibel peliger den sigui tras di educacion adicional ta cu conocimentu ta halsa hende, esta, ta fomentá orguyo. (1 Corintionan 8:1) Hopi hende ta busca conocimentu mediante educacion pa motibunan egoista, i asta esun cu motivacion sincero pa haña conocimentu lo por haña sintimentunan di superioridad i importancia propio. Actitudnan asina ta desagradá Dios.—Proverbionan 8:13.

Tuma, por ehempel, e fariseonan. Miembronan dje secta religioso prominente aki tabata masha orguyoso di nan erudicion i supuesto husticia. Nan tabata bon versá den e coleccion grandi di tradicionnan rabínico, i nan a menospreciá e hendenan comun cu tabata ménos educá, considerando nan como ignorante, despreciabel, asta maldicioná. (Juan 7:49) Ademas di esaki, nan a stima placa. (Lucas 16:14) Nan ehempel ta mustra cu ora hende ta busca educacion pa motibunan robes, nan por bira orguyoso of por resultá cu nan ta bira stimadó di placa. P’esei, ora di determiná ki clase i cuantu educacion e mester sigui, un cristian lo haci bon di puntra su mes: ‘Kico ta mi motibunan?’

Un Decision Personal

Mescos cu tabata cierto den promé siglo, awe tin un gran variedad di antecedente educacional entre cristiannan. Bou dje guia di nan mayornan, hóbennan cu ta completá nan educacion escolar obligatorio lo por scoge pa sigui educacion seglar adicional. Di igual manera, adultonan cu ta interesá den mehorá nan manera di percurá pa nan famia, lo por mira un educacion adicional asina como un manera pa yega n’e meta ei.a Algun aspecto di educacion académico tradicional ta pone énfasis riba desaroyá e capacidad intelectual en general mas bien cu abilidadnan specialisá of di ofishi. Pues, un persona lo por haña cu asta despues di a invertí hopi tempu pa haña un educacion asina, e ta falta e abilidadnan práctico cu por yud’é haña un trabou. P’e motibu aki, algun ta scoge pa sigui programanan di ofishi of scolnan técnico, cu e meta pa satisfacé mas fácilmente berdadero demandanan riba e mercado laboral.

Con cu bai bin, decisionnan asina ta di un caracter personal. Cristiannan no mag criticá ni condená otro riba e asuntu aki. Santiago a skirbi: “Ken bo ta pa husga bo próhimo?” (Santiago 4:12) Si un cristian ta pensando pa busca educacion adicional, lo e haci bon di examiná su mes motibunan pa haci sigur cu no ta interesnan egoista i materialista ta e forsa motivador.

Ta bisto cu Bijbel ta animá pa nos tin un punto di bista balansá di educacion. Mayornan cristian ta reconocé e balor superior di un educacion spiritual basá riba e Palabra inspirá di Dios i ta duna nan yunan conseho balansá tocante educacion adicional. (2 Timoteo 3:16) Bibando cu realidad di bida, nan ta reconocé cu educacion seglar ta di balor pa haña e abilidadnan necesario pa nan yunan percurá pa nan mes i nan futuro famia ora nan bira grandi. P’esei, ora di determiná si mester busca educacion adicional, i te na ki grado, cada cristian por tuma decisionnan personal sano basá riba debocion na Jehova Dios, loke ta “beneficioso pa tur cos, ya cu e ta encerá promesa dje bida djawor i di esun pa bini.”—1 Timoteo 4:8.

[Nota]

[Komentario na página 14]

“Protehá sabiduria práctico i abilidad di pensa.”—Proverbionan 3:21

[Komentario na página 15]

Ora di considerá si e mester busca educacion adicional, un cristian lo haci bon di puntra su mes: ‘Kico ta mi motibunan?’