Pregunta di Lector

Con e beneficionan di Jesucristo su sirbishi como Sumo Sacerdote, mencioná na Hebreonan 4:15, 16 ta aplicá n’e “otro carnénan” awor aki?

Aunke e papel di Jesucristo como Sumo Sacerdote tin importancia primario pa esnan cu lo ta cuné den cielu, cristiannan cu speransa terenal ta beneficiá asta awor aki for di Jesus su sirbishi sacerdotal.

For di Adam, hende a sufri bou dje peso di picá. Nos ta sufri di imperfeccion heredá, mescos cu e israelitanan. Nan a recurí na un fila largu di sumo sacerdote i sacerdote socio, kendenan a ofrecé sacrificio pa nan mes picánan i tambe pa esnan dje pueblo. Cu tempu, Jesus a ser ungí como un sacerdote “segun e manera di Melkísedec.” Despues cu el a ser resucitá, Jesus a aparecé dilanti Jehova pa presentá e balor di su sacrificio humano perfecto.—Salmo 110:1, 4.

Kico esaki ta nificá pa nos awe? Den su carta n’e Hebreonan, Pablo a considerá Jesus su sirbishi como Sumo Sacerdote. Na Hebreonan 5:1, nos ta lesa: “Tur sumo sacerdote tumá for di entre humanidad ta ser nombrá na fabor di hende riba e cosnan cu tin di haber cu Dios, p’e por ofrecé ofrenda i sacrificio pa picá.” Anto den versículo 5 i 6, Pablo a mustra cu Jesus a bira un sumo sacerdote, locual por hiba na beneficionan pa nos.

Con asina? Pablo a skirbi: “Aunke e tabata un Yu, el a siña obedencia for di loke el a sufri; i despues cu el a ser hací perfecto el a bira responsabel p’e salbacion eterno di tur esnan cu ta obedec’é.” (Hebreonan 5:8, 9) Na promé instante, e versículo ei por haci nos pensa con nos lo por beneficiá den e mundu nobo, ora esnan leal na Dios i Jesus lo ser limpiá di nan estado pecaminoso i lo gana bida eterno. Esei ta un prospecto bálido, basá riba e balor redentor di Jesus su sacrificio i su sirbishi como Sumo Sacerdote.

No obstante, en realidad, nos por beneficiá awor aki mes for di su papel of sirbishi como Sumo Sacerdote. Tuma nota di Hebreonan 4:15, 16: “Nos tin como sumo sacerdote no unu cu no por compadecé cu nos debilidadnan, sino unu cu a ser probá di tur manera mescos cu nos mes, pero sin picá. P’esei, laga nos acudí cu frankesa di expresion n’e trono di bondad inmerecí, pa nos por obtené misericordia i haña bondad inmerecí pa yudansa n’e tempu apropiado.” Ki ora lo ta “e tempu apropiado”? Esei ta ora nos mester di misericordia i bondad inmerecí. Nos tur, debí na nos imperfeccion, mester sinti e necesidad aki awor.

Hebreonan 4:15, 16 ta haci cla cu Jesus—awor un sacerdote den cielu—tambe tabata un ser humano, di manera cu e por ta empático. Pa cu ken? Pa cu nos. Na ki tempu? Awor. Ora e tabata un ser humano, Jesus a experenciá tensionnan cu ta comun pa hende. Tabatin bes cu Jesus tabatin hamber i sed. I apesar cu e tabata perfecto, e tabata cansa. Esei mester trankilisá nos. Pakico? Debí cu Jesus a experenciá cansancio natural, e ta conciente di con nos ta sinti nos hopi biaha. Corda, tambe, cu Jesus tabatin cu lidia cu pleitu di yalursheid entre su apostelnan. (Marco 9:33-37; Lucas 22:24) Sí, e tabatin su decepcionnan. Esei no mester duna nos confiansa cu e ta comprendé ora nos keda decepcioná i desanimá? Siguramente.

Ora bo ta desanimá, kico bo por haci? Pablo a bisa cu bo tin cu djis warda te ora, den e mundu nobo, bo Sumo Sacerdote, Jesus, yudá bo bira perfecto den mente i curpa? No. Pablo a bisa: “Nos por obtené misericordia i haña bondad inmerecí pa yudansa n’e tempu apropiado,” i esei ta incluí e tempu actual. Ademas, ora Jesus tabata un ser humano, el a experenciá sufrimentu i dificultad, siendo “probá di tur manera mescos cu nos mes.” Pues ora nos ta enfrentá cosnan asina, e ta cla pa yuda nos, basá riba su comprension pa loke nos ta experenciando. Esei no ta atraé bo na dje?

Awor tuma nota di versículo 16. Pablo ta bisa cu nos—i esaki ta incluí tantu e ungínan como esnan dje otro carnénan—por acercá Dios cu frankesa di expresion. (Juan 10:16) E apostel no tabata kier men cu den oracion nos por djis bisa cualkier cos cu nos kier, asta cosnan rabioso i ireverente. Mas bien, riba base di Jesus su sacrificio i su papel como Sumo Sacerdote, nos por acercá Dios apesar cu nos ta pecador.

Un otro manera cu nos por beneficiá asta awor aki for dje sirbishi di nos Sumo Sacerdote, Jesucristo, ta enbolbé nos picánan, of erornan. Siguramente nos no ta spera cu den e sistema actual Jesus lo aplicá na nos e pleno mérito di su sacrificio. Asta si e haci’é mes, ainda nos lo no haña bida eterno. Bo ta corda e caso registrá na Lucas 5:18-26, cu a enbolbé e homber paralítico kende su cama a ser bahá dor di un buracu den dak? Jesus a bis’é: “Homber, bo picánan ta pordoná na bo.” Esei no tabata kier men algun picá specífico cu a causa e parálisis. E mester tabata kier men e homber su picánan en general, i te na un cierto grado e por a enbolbé su imperfeccion heredá, cu ta causa afliccion.

Basá riba e sacrificio cu lo e ofrecé, Jesus por a kita picá di hende, mescos cu e cabritu pa Azalel a kita e picánan di Israel riba e Dia di Expiacion. (Levítico 16:7-10) Sin embargo, ainda e homber paralítico tabata un ser humano. El a peca atrobe, i cu tempu el a muri, mescos cu tur pecador. (Romanonan 5:12; 6:23) Loke Jesus a bisa no a nificá cu e homber a haña bida eterno mesora. Pero e homber tabata bendicioná cu un grado di pordon n’e tempu ei.

Awor considerá nos situacion. Siendo imperfecto, nos ta hera tur dia. (Santiago 3:2) Kico nos por haci tocante esei? Wel den cielu, nos tin un Sumo Sacerdote misericordioso mediante ken nos por “acudí cu frankesa di expresion na [Dios su] trono di bondad inmerecí, pa nos por obtené misericordia i haña bondad inmerecí pa yudansa n’e tempu apropiado.” Consecuentemente, awe tur cu ta dje otro carnénan siguramente ta ganando beneficionan maraviyoso, incluyendo un concenshi limpi, for dje sirbishi di Cristo como Sumo Sacerdote.

Tur cristian cu speransa terenal por anticipá beneficionan mas magnífico den e binidero mundu nobo. N’e tempu ei nos Sumo Sacerdote celestial lo aplicá plenamente e mérito di su sacrificio, hibando na pordon completo di picá. Tambe lo e extendé mayor beneficionan dor di percurá p’e salú físico i spiritual dje pueblo. I Jesus lo expandé sobresalientemente e educacion dje pueblo di Dios riba tera, ya cu siñamentu dje Ley tabata un responsabilidad principal dje sacerdotenan den Israel. (Levítico 10:8-11; Deuteronomio 24:8; 33:8, 10) P’esei, miéntras nos ta beneficiá for di Jesus su sirbishi sacerdotal awor, hopi mas ta warda nos!