Make We Dey Encourage Each Other, Especially Now
“Make we dey think about how we go take help each other . . . , make we dey encourage ourself, especially as the day don dey near.”—HEB. 10:24, 25.
1. Why apostle Paul tell Hebrew Christians to encourage each other pass before?
WHY e good make we dey encourage each other pass before? Apostle Paul tell us the answer for the letter wey e write give Hebrew Christians. E tell dem sey: “Make we dey think about how we go take help each other so that we go show love and do better work. Make we no dey miss our meeting as some people dey do, but make we dey encourage ourself, especially as the day don dey near.” (Heb. 10:24, 25) Wetin make Paul give dem this advice? E no reach five years before dem know why. Jehovah day to destroy Jerusalem don dey near. And when the brothers see the things wey dey happen, dem come know sey time don reach for dem to run comot from Jerusalem, as Jesus talk. (Acts 2:19, 20; Luke 21:20-22) Na for 70 C.E. “Jehovah day” reach, when Rome people come destroy Jerusalem.
2. Why e good make we dey think about how to dey encourage each other, especially now?
2 Today, we still believe sey Jehovah day don near. That day “no go easy and fear go dey well well.” (Joel 2:11) Prophet Zephaniah talk sey Jehovah “day don near! E don near, and e dey come with full speed!” (Zeph. 1:14) Wetin that Bible verse talk still concern us today. Jehovah day don near well well. Na im make Paul talk sey make we “dey think about how we go take help each other so that we go show love and do better work.” (Heb. 10:24, ftn.) So e good make we get our brothers for mind. This one go make us fit encourage dem when dem need am.
WHO NEED PERSON TO ENCOURAGE AM?
3. From wetin apostle Paul talk, who need person to encourage am? (Go check the first picture.)
3 Proverbs 12:25 talk sey: “Things wey dey worry person for mind dey make am weak but better word dey make am happy.” The truth be sey, all of us need person wey go encourage us sometimes. Paul let us know sey, even person wey dey always encourage people still need who go encourage am. E write letter to the Christians for Rome, sey: “E dey hungry me well well to see una, so that I go fit give una some of the better things wey God dey dash person, wey go make una strong; or, so that we go fit dey help each other make our faith strong both una own and my own.” (Rom. 1:11, 12) Na true sey Paul sabi encourage people. But sometimes, e still need person to tell am better word wey go help am.—Read Romans 15:30-32.
4, 5. Who we fit encourage today, and why?
4 Brothers and sisters wey dey use their life do Jehovah work need person wey go tell dem better word. Some of dem don pioneer for long time. Many of dem don leave some things so that dem go fit pioneer. Na the same thing with missionary, people wey dey work for Bethel and remote translation office, and circuit overseer and their wife. All of dem don leave some things for life, so that dem go fit get more time to serve Jehovah. So we suppose dey encourage dem. E still get some brothers and sisters wey dey full-time service before, but something later make dem stop. We still need to encourage this brothers and sisters.
5 E still get some brothers and sisters wey never marry because dem want marry only person “wey dey serve God,” as Bible talk. We need to encourage dem. (1 Cor. 7:39) Women wey dey work well well still dey like am when their husband tell dem well done for their work. (Prov. 31:28, 31) E still get some brothers wey dey sick. And dem dey suffer some of our brothers as dem dey serve Jehovah. But even with that one, dem still dey hold Jehovah tight. E good make we dey encourage dem. (2 Thess. 1:3-5) Jehovah and Jesus dey care for all this brothers and sisters.—Read 2 Thessalonians 2:16, 17.
ELDERS DEY ENCOURAGE US
6. Wetin Isaiah 32:1, 2 talk wey elders dey do?
6 Read Isaiah 32:1, 2. Life for this our time no easy at all. E fit make us no dey happy, and we fit tire. Jesus Christ dey use the “prince dem” wey Bible talk about take encourage us. The prince dem na elders wey be anointed and elders wey be other sheep. This elders ‘no dey control our faith,’ but dem dey work with us to make us happy.—2 Cor. 1:24.
7, 8. Apart from to tell person better word wey go help am, which other thing elders fit do?
7 Apostle Paul show us better example wey we go copy. When dem dey suffer the brothers for Thessalonica, e write letter to dem. E tell dem sey: ‘Because we love una, no be only the good news of God we come give una. We still give una our life, because una be people wey we love well well.’—1 Thess. 2:8.
8 To encourage person no be just to tell am better word. Na im make apostle Paul tell the elders for Ephesus sey: “Una must help people wey no strong, and make una dey always remember wetin our Lord Jesus talk, when e talk sey: ‘Na when we give, we dey happy pass when dem give us.’” (Acts 20:35) Paul no only ready to encourage im brothers, but e still want ‘use everything wey e get to help dem. And e even ready to add imself join.’ (2 Cor. 12:15) Na so elders suppose dey do today. Dem no go only dey tell their brothers wetin go give dem strong mind and make their mind come down. But, dem still need to show sey dem really care about dem.—1 Cor. 14:3.
9. How elders fit give correction so that e go help people?
9 Elders fit use correction take help people for congregation. But dem need to follow the correct way wey Bible sey make dem do am. After Jesus die and God resurrect am, e come show us better example for this matter. E get some congregation for Asia Minor wey need strong correction. But you know how Jesus take correct dem? Before e start to correct the congregation for Ephesus, Pergamum, and Thyatira, e first praise dem for their better work. (Rev. 2:1-5, 12, 13, 18, 19) E tell the congregation for Laodicea sey: “I dey correct everybody wey I love, and I dey tell dem if dem dey do bad thing. So make you serious, and make you repent.” (Rev. 3:19) Make elders try copy Jesus example when dem want give correction.
NO BE ONLY ELDERS NEED TO ENCOURAGE OTHER PEOPLE
Papa and mama, una dey teach una children to dey encourage other people? (Check paragraph 10)
10. How all of us fit use better word help each other?
10 Paul tell everybody sey make dem “talk better word wey go fit help person stand well.” E sey make dem ‘give the person wetin go help am,’ if e need help. So no be only elders need to encourage other people. (Eph. 4:29) E good make all of us dey think of wetin we fit do to help other people. Paul tell Hebrew Christians sey: “Make una make the hand and leg wey don weak, strong. And make una no stop to dey make straight road for una leg, so that wetin don weak no go break comot but e go heal.” (Heb. 12:12, 13) Whether we be young person or we don mature, to use better word help each other na wetin all of us fit do.
11. When Martha no dey happy, wetin help am?
11 E get one time wey one sister no dey happy. The sister name na Martha.a E talk sey: “One day, I pray for wetin go make my mind come down. E no tey, I come meet one sister wey senior me, and e really pity me and show me love. And na wetin I really need that time. This sister come tell me im own story. Some of the things wey dey happen to me don happen to am before. As I hear im story, e come make me feel sey I no dey alone.” The sister fit no know sey wetin e talk help Martha well well.
12, 13. How we fit follow apostle Paul advice for Philippians 2:1-4?
12 Paul advice the Christians for Philippi sey make dem get one mind as Christians. E sey make dem dey encourage each other, dey love each other, dey do things together, and dey pity for each other. E come still sey: “Make una no use trouble or oversabi do anything, but carry yourself down when you dey do things, with the mind sey other people better pass you. No think about wetin go favor only yourself, but still dey think about wetin go favor other people.”—Phil. 2:1-4.
13 So, all of us need to look for how we fit help other people. And as Paul talk, make we dey encourage each other, dey show love, dey do things together, and dey pity for each other. All this things go really help our brothers and sisters.
THINGS WEY DEY ENCOURAGE US
14. Wetin fit encourage person and make am happy?
14 When we hear sey people wey we help before continue to serve Jehovah well, we dey happy well well. Na so apostle John happy when e talk sey: “Wetin dey make me happy pass na, when I hear sey my children dey follow the truth.” (3 John 4) Many pioneers don help many people start to serve Jehovah. E dey sweet dem if dem hear sey this people dey serve Jehovah well or dem even become pioneer. So, if you know any pioneer wey don dey tire, e good make you remind am of all the better things wey e don do before.
15. Which thing we fit do to encourage people wey dey serve Jehovah well?
15 Many circuit overseer talk sey dem and their wife dey happy well well even if na small letter person write to thank dem for their visit. We fit encourage elders, missionary, pioneer, and Bethelites if we dey thank dem for the work wey dem dey do. This one go make dem happy.
HOW ALL OF US FIT ENCOURAGE EACH OTHER
16. Which small small things we fit do to encourage person?
16 If e dey hard you to tell people wetin you think about dem, you fit dey feel sey you no go fit encourage person. Make you no dey think like that. The truth be sey, e no hard to encourage person. E fit be small thing like to smile when you dey greet person. If the person no smile back, e fit be sey problem dey. And you fit make im mind come down if you just listen to am.—Jas. 1:19.
17. Wetin make one young brother mind come down, when e no happy?
17 E get one young brother wey im name na Henry. E no happy at all as some of im family people stop to serve Jehovah. One of dem na im papa, wey be elder before. One circuit overseer come carry Henry go out go drink coffee. The circuit overseer allow am talk everything wey dey im mind, and im mind come down. Henry come see sey the only way to help im family start to serve Jehovah again, na for am to continue to serve Jehovah well. Im mind come down well well when e read Psalm 46; Zephaniah 3:17; and Mark 10:29, 30.
All of us fit help and encourage each other (Check paragraph 18)
18. (a) Wetin King Solomon talk about better word? (b) Wetin apostle Paul talk sey we fit do?
18 Martha and Henry story show sey, we fit encourage any brother or sister wey need person to encourage am. King Solomon write for Bible sey: “Word wey person talk for the correct time, good well well! Smile dey make person heart happy. Good news dey give person power.” (Prov. 15:23, 30, ftn.) Another thing be sey, when person no happy, we fit still read something from Watchtower or our website for the person. This one fit make am happy again. Paul talk sey make we continue to dey use song tell each other better word. So, when we sing with person wey no happy, e fit make im mind come down.—Col. 3:16; Acts 16:25.
19. Why we go need to dey encourage each other more more as time dey go? And wetin we suppose dey do?
19 As Jehovah day “dey near,” we go need to dey encourage each other more more. (Heb. 10:25) Na wetin Paul tell Christians for im time be that. E sey: “Make una continue to dey support each other and dey make each other strong, as una dey do now.”—1 Thess. 5:11.
a We change some people name.