Ieeschte Johanes

5 Jieda eena, waut doa jleeft, daut Jesus de Christus es, es von Gott jebuaren, un jieda eena, waut dän Voda leeft, dee leeft uk dänjanjen, waut von am jebuaren es. 2 Derch dit weet wie, daut wie Gott siene Kjinja leewen: Wan wie Gott leewen un siene Jebooten hoolen. 3 Un dits, waut bie de Leew fa Gott met en es: Daut wie siene Jebooten hoolen, un siene Jebooten sent nich schwoa*. 4 Wiels jieda eena, dee von Gott jebuaren es, jewent de Welt. Met onsen Gloowen hab wie de Welt jewonnen.

5 Wäa kaun de Welt jewennen? Es daut nich deejanja, waut Gloowen doaraun haft, daut Jesus Gott sien Sän es? 6 Dits dee, waut derch Wota un Bloot kjeem, Jesus Christus. Hee kjeem nich bloos met daut Wota, oba hee kjeem met daut Wota un met daut Bloot. Un de Jeist deit doafäa zeijen, wiels de Jeist es de Woarheit. 7 Wiels doa sent dree Stekj, waut doa zeijen: 8 De Jeist un daut Wota un daut Bloot, un dise dree sent sikj eenich.

9 Wie nämen daut Zeichnis von Menschen aun, oba Gott sien Zeichnis es jrata; wiels dit es je daut Zeichnis, waut Gott jeft, daut Zeichnis äwa sienen Sän. 10 De Mensch, waut Gloowen aun Gott sienen Sän haft, haft daut Zeichnis en sikj selfst. De Mensch, waut nich Gloowen aun Gott haft, moakt am toom Läajna, wiels dee haft nich Gloowen aun daut Zeichnis, waut Gott äwa sienen Sän jeef. 11 Un dits daut Zeichnis: Gott haft ons daut eewje Läwen jejäft, un dit Läwen es en sienen Sän. 12 Dee, wäa dän Sän haft, dee haft dit Läwen. Dee, wäa Gott sienen Sän nich haft, dee haft dit Läwen nich.

13 Ekj schriew junt dise Sachen, daut jie weeten kjennen, daut jie daut eewje Läwen haben; jie, dee jie Gloowen haben aun dän Nomen von Gott sienen Sän. 14 Un wie kjennen ons bie am secha sennen*, daut hee ons hieet, wan wie am froagen, no wautemma daut es, soo lang aus daut no sienen Wellen es. 15 Un wan wie weeten, daut hee ons hieet, no wautemma wie am froagen, dan weet wie uk, daut wie daut kjrieen woaren, no waut wie am froagen, wiels daut es hee, wäm wie doano fruagen.

16 Wan irjentwäa daut to seenen kjricht, daut sien Brooda eene Sind bejeit, waut nich toom Doot fieet, dan woat hee fa dän froagen un Gott woat dän Läwen jäwen. Dits bie soone, waut eene Sind begonen, waut nich toom Doot fieet. Daut jeft eene Sind, waut toom Doot fieet, un bie dise Sind saj ekj kjeenem, daut dee fa dise Sind bäden saul. 17 Aule Ojjerajchtichkjeit es Sind, un doch jeft daut eene Sind, waut nich toom Doot fieet.

18 Wie weeten, daut jieda eena, dee von Gott jebuaren es, nich emma wada sindicht, oba dee*, waut von Gott jebuaren es, paust no dän opp, un de Beesa kaun dän nich aunschieren*. 19 Wie weeten, daut wie von Gott staumen. Oba de gaunze Welt es en dän Beesen siene Macht. 20 Wie weeten oba, daut Gott sien Sän jekomen es, un hee haft ons Vestentnis jejäft*, waut ons halpt, dän woaren Gott to kjanen. Un wie sent met dän woaren Gott veeent derch sienen Sän Jesus Christus. Daut es de woara Gott un daut eewje Läwen. 21 Kjliene Kjinja, paust opp fa de Aufjetta.