Jeschräwen von Matäus
7 Hieet opp met rechten, daut junt nich jerecht woat. 2 Wiels soo aus jie aundre rechten, soo woat junt jerecht woaren. Un dee Mot, waut jie brucken toom mäten, wan jie aundre waut jäwen, dee Mot woaren dee uk brucken, wan dee junt waut jäwen. 3 Wuarom kjikjst du dan no dän Stroohaulm en dienen Brooda sien Uag un woascht dän Pol* nich en, waut du selfst em Uag hast? 4 Ooda woo kaust du to dienen Brooda sajen: ‘Lot mie dän Stroohaulm ut dien Uag rutnämen’, wan du doch selfst eenen Pol* em Uag hast? 5 Du Heichla! Doo ieescht mol dän Pol* ut dien ieejnet Uag rut, dan woascht du kloa seenen kjennen, woo du dän Stroohaulm ut dienen Brooda sien Uag rutkaust.
6 Jäft daut heilje nich de Hunj un schmiet uk nich de wieetvolle Sachen* ver de Schwien. Wan jie daut doonen, dan woaren dee bloos doabowen romklunjen un daut vemurchlen un dan no junt komen un junt verieten.
7 Froacht Gott emma wada un hee woat junt daut jäwen. Sieekjt emma wada bie am no Help un jie woaren dee kjrieen. Un puttat emma wada aun un hee woat junt de Däa opmoaken. 8 Wiels jieda eena, waut frajcht, dee kjricht, un jieda eena, waut sieekjt, dee finjt, un jieda eena, waut aunputtat, fa dän woat opjemoakt. 9 Wäa von junt wudd sienen Sän eenen Steen jäwen, wan dee no Broot fruach? 10 Un wan dee no eenen Fesch fruach, wudd dee dän dan eene Schlang jäwen? 11 Doawäajen, wan jie, dee jie schlajcht sent, aul weeten, woo jie june Kjinja kjennen goode Sachen jäwen, woo väl mea woat dan jun Voda em Himmel dee goodet jäwen, dee am doano froagen!
12 Doawäajen, siet to aundre krakjt soo, aus jie wellen haben, daut dee sellen to junt sennen. Dits je krakjt daut, waut daut Jesaz un de Profeeten lieren.
13 Got derch de schmaule Däa, wiels de Däa, waut no de Venichtunk fieet, es breet un de Wajch haft väl Rum, un väle gonen derch dee Däa. 14 Oba de Däa, waut nom Läwen fieet, es schmaul un de Wajch haft nich väl Rum, un mau weinich finjen dän.
15 Paust opp fa de faulsche Profeeten, waut en Schopskjleeda no junt komen, oba ennalich utjehungade Wilw sent. 16 Jie woaren dee aun äare Frucht kjanen. Kaun eena Wiendruwen von Spekja-Struck plekjen ooda Fiejen von Spekja-Krut? 17 Krakjt soo drajcht een gooda Boom goode Frucht un een schlajchta Boom drajcht soone Frucht, waut nuscht daucht. 18 Een gooda Boom kaun nich soone Frucht droagen, waut nuscht daucht, un een vefulda Boom kaun nich goode Frucht droagen. 19 Een Boom, waut nich goode Frucht drajcht, woat aufjehakt un em Fia jeschmäten. 20 Doawäajen woa jie soone Menschen aun äare Frucht kjanen.
21 Nich aule, waut to mie sajen: ‘Har, Har*’, woaren en daut Kjennichrikj vom Himmel nennkomen, oba bloos dee, waut daut doonen, waut mien Voda em Himmel haben well. 22 Väle woaren aun janen Dach to mie sajen: ‘Har, Har, hab wie aundre nich von die vetalt* un en dienen Nomen beese Jeista utjedräwen un väl Wunda jedonen en dienen Nomen?’ 23 Un ekj woa dan to dee sajen: ‘Ekj hab junt nienich jekjant! Got wajch von mie, jie Schlajchte!’
24 Doawäajen, wäa daut hieet, waut ekj jesajcht hab, un daut uk deit, woat soo sennen aus een väabedochta Mensch, waut sien Hus opp Steen jebut haft. 25 Un aus daut sea räajend un daut Wota emma hecha kjeem un de Wint sea jäajen daut Hus pust, bruak daut oba nich toop, wiels daut opp Steen jebut wia. 26 Oba deejanja, waut daut hieet, waut ekj jesajcht hab, un daut nich nokjemt, woat soo sennen aus een onkluaka Mensch, waut sien Hus oppem Saunt jebut haft. 27 Un aus daut sea räajend un daut Wota emma hecha kjeem un de Wint sea jäajen daut Hus pust, vebruak daut un kracht toop.”
28 Aus Jesus dit aules jesajcht haud, wieren de Menschen sea vewundat, woo hee aundre lieed, 29 wiels doa wia eene Krauft doahinja, soo aus hee de Menschen lieed. Daut wia aundasch aus bie äare Schreftjelieede*.