56. KAPITEL
Enne Vesaumlunk veeent bliewen
Wan wie mank Gloowesbreeda sent, dan jeit ons daut soo aus dän Kjennich David. Hee säd: “Woo goot un scheen es daut doch, wan Breeda en Eenichkjeit toop läwen!” (Psalm 133:1). Onse Eenichkjeit kjemt nich von veselfst. Jieda eena mott sien Poat doonen.
1. Waut es soo besonda aun Gott sien Volkj?
Wan du en een aundret Launt bie een Toopkomen best, kaust du veleicht nich de Sproak vestonen, oba du woascht die doa doawäajen tusich feelen. Woosoo? Wiels wie aulawäajen deeselwje Bieekja brucken toom de Schreft studieren. Un wie strenjen ons aun, ons unjarenaunda to leewen. Endoont wua wie wonen, wie doonen aula “däm HARN sien Nomen aunroopen un am bestendich [ooda veeent] deenen” (Zefanja 3:9).
2. Waut kaust du doonen, daut doa Eenichkjeit es?
“Siet junt unjarenaunda werkjlich von Hoaten goot” (1. Petrus 1:22). Woo kaust du disen Rot nokomen? Acht nich too sea opp aundre äare Schwakheiten, oba kjikj leewa no dee äare goode Sieden. Proow, soone Breeda un Sestren kjanen to lieren, waut daut aundasch haben aus du. Un sie nich bloos met soone toop, waut dautselwje jleichen aus du. Wie motten ons uk sea aunstrenjen, nich eenen Unjascheet to moaken manke Menschen; nich mol enne Jedanken (läs 1. Petrus 2:17).a
3. Waut woascht du doonen, wan doa eene Oneenichkjeit oppkjemt?
Wie sent veeent, oba nich volkomen. Eenjemol doo wie waut, waut onse Gloowesbreeda velazt ooda enteischt. De Schreft sajcht, wie sellen ons wieda unjarenaunda vejäwen. Dee sajcht uk: “Soo aus de Har junt vejäft haft, soo mott jie uk vejäwen” (läs Kolossa 3:13). Wie haben Jehova aul foaken truarich jemoakt, oba hee haft ons vejäft. Doawäajen well hee uk, daut wie onse Breeda vejäwen. Wan du enwoascht, daut du wäm hast beleidicht, dan proow daut fuaz äwareen to moaken (läs Matäus 5:23-24).b
DOLLA UNJASTONEN
Denkj doaräwa no, waut du kaust doonen, daut doa Fräd un Eenichkjeit enne Vesaumlunk es.
Waut woascht du doonen toom Fräd moaken?
4. Moak kjeenen Unjascheet manke Menschen
Wie wellen aul onse Breeda leewen. Oba eenjemol es ons daut veleicht schwoa, wan dee aundasch sent aus wie. Waut kaun ons halpen? Läst Aposteljeschicht 10:34-35 un dan got toop dise Froagen derch:
Jehova nemt aule Sorten Menschen aus siene Deena aun. Woo sust du dan äwa soone denkjen, waut aundasch sent aus du?
Waut vonne orrajchte Iedeeen west du meiden, waut de Menschen en diene Jäajent äwa aundre haben?
Läst 2. Korinta 6:11-13 un dan got toop dise Froag derch:
Woo kaust du aul diene Breeda un Sestren emma dolla leewen?
5. Vejeff aundre wellich un moak Fräd
Jehova vejeft ons wellich, wan wie am uk kjeenmol brucken vejäwen. Läst Psalm 86:5 un dan got toop dise Froagen derch:
Woo väl vejeft Jehova?
Wuarom best du dankboa, daut hee ons vejeft?
Woone Omstend kjennen ons daut schwoa moaken, met aundre foadich to woaren?
Woo kjenn wie met onse Breeda un Sestren veeent bliewen un soo Jehova nodoonen? Läst Spricha 19:11 un dan got toop dise Froag derch:
Waut kaust du doonen, wan die wäa oajat ooda beleidicht?
Wan wie aundre mol beleidicht haben, waut sull wie dan doonen? Kjikjt daut VIDEO un dan got toop de Froag derch, waut hia aunjejäft es.
Waut deed de Sesta en daut Video toom Fräd moaken?
6. Kjikj no de goode Sieden von de Breeda un Sestren
Wan wie onse Breeda un Sestren bäta kjanen lieren, dan see wie dee äare goode Sieden un dee äare Schwakheiten. Waut halpt ons, dolla no dee äare goode Sieden to kjikjen? Kjikjt daut VIDEO un dan got toop de Froag derch, waut hia aunjejäft es.
Waut halpt die, de goode Sieden von diene Breeda un Sestren to seenen?
Jehova kjikjt no onse goode Sieden. Läst 2. Chronik 16:9a un dan got toop dise Froag derch:
Woo denkjst du doaräwa, daut Jehova dolla no onse goode Sieden kjikjt?
Mau rajcht een diera Rinkj kaun Fäla haben, oba dee es doawäajen sea wieetvoll. Krakjt soo sent aul onse Breeda un Sestren bie Jehova sea wieetvoll, wan dee uk onvolkomen sent.
WAUT EENJE SAJEN: “Ea ekj dän vejäwen woa, woat dee ieescht motten sea aufprachren.”
Wuarom sell wie aundre wellich vejäwen?
KAPITEL TOOPJEFOT
Wan du aule Breeda un Sestren vejefst un leefst, dan woascht du methalpen, daut doa Eenichkjeit enne Vesaumlunk es.
Waut hast du jelieet?
Waut halpt ons, manke Menschen kjeenen Unjascheet to moaken?
Waut woascht du doonen, wan du die met eenen Gloowesbrooda oneenich best?
Wuarom west du Jehova nodoonen, wan daut doarom jeit, aundre to vejäwen?
MEA NOSIEEKJEN
Lia, woo eent von Jesus siene Jlikjnisen ons doamet halpen kaun, aundre nich to rechten.
Sell wie om togoodhoolen froagen, wan wie denkjen, daut wie uk nuscht orrajcht jedonen haben?
“Om togoodhoolen froagen, halpt ons, Fräd to moaken” (De Woaktorm, 1. Nowamba 2002)
See, woo eenje daut haben kunt lieren, nich eenen Unjascheet manke Menschen to moaken.
Aundre nich no daut rechten, waut von buten to seenen es (5:06)
See, woo du daut fiksen kaust, wan du met wäm Trubbel hast, ea de Vesaumlunk noch doarunja to lieden kjemt.