Ieeschte Petrus
1 Dis Breef kjemt von Petrus, Jesus Christus sien Apostel, un es aun aul dee jeschräwen, waut bloos een Stootje en dise Welt wonen un en Po̱ntus, Gala̱zien, Kapado̱zien, A̱sien un Bitienien vestreit sent. Jie sent utjewält worden, 2 soo aus Gott, de Voda, daut aul em Verut wist. Hee haft junt derch dän Jeist jeheilicht, doaropp daut jie wudden jehuarsom sennen un met Jesus Christus sien Bloot besprezt woaren:
Mucht junt noch mea grootet Metleet* un Fräd jejäft woaren.
3 Mucht onsen Harn Jesus Christus sien Gott un Voda jepreist woaren, wiels wäajen sien grootet Metjefeel haft hee ons eene niee Jeburt jejäft fa eene läwendje Hopninj, derch Jesus Christus sien Oppstonen vom Doot. 4 Daut es een Oafgoot, waut nich vegonen kaun un nich veorreinicht es un uk nich vewalkjt. Dauts em Himmel fa junt oppbewoat, 5 dee jie von Gott siene Krauft derch Gloowen beschizt sent fa eene Radunk, waut reed es, en de latste Tiet openboat to woaren. 6 Wäajen dit hab jie groote Freid, wan jie uk fa eene korte Tiet wäajen veschiedne Proowen lieden, wan daut soo sennen mott. 7 Dit es doatoo, daut jie wäajen junen aufjeproowden Gloowen jepreist woaren un Iea un Harlichkjeit kjrieen, wan Jesus Christus openboat woat. Soon Gloowen es väl mea wieet aus Golt, waut vejeit, wan daut uk met Fia jetest* wort. 8 Wan jie am uk noch kjeenmol jeseenen haben, leew jie am oba. Wan jie am nu uk nich seenen, wies jie doch Gloowen aun am un jie sent sea schaftich met june harliche un groote Freid, waut nich uttospräakjen jeit, 9 wäajen jie de Beloonunk von junen Gloowen kjrieen, aulsoo june Radunk*.
10 De Profeeten, waut daut groote Metleet* bekauntmuaken, waut fa junt wia, haben äwa dise Radunk krakjt nojeforscht un nojesocht. 11 Gott brukt sienen Jeist toom aul em Verut sajen, daut de Christus wudd lieden motten un dan wudd veharlicht woaren. Doawäajen hieeden dee nich opp notoforschen, waut met dän Christus passieren wudd un wanea daut passieren wudd. 12 Gott leet de Profeeten daut weeten, daut dee nich fa sikj selfst profezeien deeden, oba fa junt. Un nu sent junt dise Sachen bekauntjemoakt worden derch dän heiljen Jeist, waut vom Himmel jeschekjt wort. Krakjt äwa dise Sachen wenschen de Enjel sikj sea de Kloarheit to haben.
13 Doawäajen, moakt jun Denkjen reed fa schwoare Oabeit; blieft bie gaunz kloaret Vestaunt. Sat june Hopninj opp daut groote Metleet*, waut junt woat jewäsen woaren, wan Jesus Christus openboa woat. 14 Aus jehuarsome Kjinja, hieet opp, junt von june Wenschen formen to loten, waut jie hauden, aus jie noch nich bäta wisten. 15 Oba soo aus de Heilja, dee junt jewält haft, heilich es, soo sell jie uk heilich woaren en jun gaunzet Vehoolen, 16 wiels daut steit jeschräwen: “Jie sellen heilich sennen, wäajen ekj heilich sie.”
17 Un wan jie dän Voda aunroopen, waut jieda eenem no siene Woakjen no recht un kjeenen Unjascheet moakt, dan vehoolt junt soo, daut jie wiesen, daut jie Gott ferchten en de Tiet, waut jie hia een Stootje en dise Welt wonen. 18 Wiels jie weeten: Jie sent von jun onnutzboaret Läwen, waut jie fieeden un waut jie von june Väavodasch* metjekjräajen haben, friejemoakt* worden. Oba daut wia nich met soont, waut vegonen kaun, soo aus Selwa un Golt. 19 Daut wia met wieetvollet Bloot, waut soo wia aus daut Bloot von een fälalooset Schopkje onen schwiensche Plaken, aulsoo Christus sien Bloot. 20 Daut stemt, Gott haud Christus aul ea jewält, aus daut met de Welt aunfunk*, oba om junt haulwen wort hee mau opp Enj von de Tieden openboat. 21 Derch am jleew jie aun Gott, dee am vom Doot oppwuak un am Harlichkjeit jeef, soo daut jie junen Gloowen un june Hopninj kjennen opp Gott saten.
22 Nu hab jie junt* jereinicht, wäajen jie de Woarheit jehuarsom sent, un daut haft daut bat doa jebrocht, daut jie Broodaleew haben, waut nich jeheichelt es. Doawäajen habt unjarenaunda von Hoaten groote Leew. 23 Wiels junt wort eene niee Jeburt jejäft; nich derch soone Sot*, waut vegonen kaun, oba derch soone, waut nich vegonen kaun. Dauts derch dän Gott sien Wuat, dee doa läft un blift. 24 Wiels “aule Menschen sent* soo aus Grauss un äare Harlichkjeit es soo aus een Blieechsel oppe Stap; daut Grauss vedrieecht un de Bloom felt auf. 25 Oba waut Jehowa* sajcht*, blift fa emma.” Un dit, waut hee “sajcht”*, es de goode Norecht, waut junt bekauntjemoakt wort.