De tweeda Breef aun de Korinta

6 Aus siene Metoabeida fodda wie junt uk opp, soo to läwen, daut jie Gott sien grootet Metleet* nich vejäfs aunjenomen haben. 2 Wiels hee sajcht: “To eene paussende Tiet horcht ekj no die, un aun eenen Dach toom raden holp ekj die.” Kjikjt! Nu es de besonda paussende Tiet. Kjikjt! Nu es de Dach toom raden.

3 Wie jäwen opp kjeene Wajch wäm eene Uasoak, tofaultokomen, soo daut kjeena schlajcht äwa onsen Deenst räden kaun. 4 Enne Städ daut bewies wie en aule Stekjen, daut wie Gott siene Deena sent: Wie hoolen een deel Schwoaret ut, wie motten lieden, ons jeit daut knaup, haben Schwierichkjeiten, 5 woaren vekjielt, enjestopt, beläwen Orru, wie schaufen schwoa, haben schloploose Nachten un haben eenjemol nuscht to äten. 6 Wie fieren een reinet Läwen, wie läwen no de Woarheit äwa Gott, wie sent jeduldich, wie sent leeftolich, wie loten ons von dän heiljen Jeist leiden un onse Leew es nich jeheichelt. 7 Wie räden de Woarheit, wie veloten ons opp Gott siene Krauft, wie hoolen de Jewäaren von de Jerajchtichkjeit enne rajchte Haunt un uk enne linkje. 8 Ons woat veharlicht un veacht; äwa ons woat Goodet jerät un uk Schlajchtet jerät. De Menschen talen ons fa soone, waut aundre veleiden, un doch räd wie de Woarheit. 9 Dee talen ons fa Onbekaunde, oba Gott kjant ons; de Menschen talen ons fa soone, waut meist doot sent, oba doch sent wie aum Läwen; dee talen ons fa soone, waut jestroft woaren, oba wie woaren nich dootjemoakt. 10 De Menschen denkjen, daut wie truarich sent, oba wie sent emma schaftich, daut wie oam sent, oba wie moaken väle rikj, daut wie nuscht haben un doch hab wie aules.

11 Wie haben ons Mul opjemoakt un to junt Kori̱nta jerät*, un wie haben ons Hoat wiet opjemoakt. 12 Wie hoolen onse Leew nich trigj fa junt. Oba jie hoolen june Leew trigj fa ons. 13 Doawäajen moakt june Hoaten uk wiet op* (ekj räd to junt soo, aus wan jie miene Kjinja wieren).

14 Lot junt nich met dee toopspaunen, waut nich em Gloowen sent; daut paust nich toop. Wiels waut haft de Jerajchtichkjeit met de Jesazloosichkjeit to doonen? Ooda waut haft Licht met Diestret äwareen? 15 Un dan uk noch: En waut stemmen Christus un de Soton* äwareen? Ooda waut haben dee, waut em Gloowen sent*, met dee äwareen*, waut nich em Gloowen sent? 16 Waut haft Gott sien Tempel met Aufjetta to doonen? Wiels wie sent eenen läwendjen Gott sien Tempel, krakjt soo aus Gott säd: “Ekj woa mank dee wonen un mank dee gonen, un ekj woa dee äa Gott sennen un dee woaren mien Volkj sennen.” 17 “‘Doawäajen got von mank dee rut un deelt junt von dee’, sajcht Jehowa*, ‘un schieet daut Orreine nich mea aun’”, “‘un ekj woa junt oppnämen.’” 18 “‘Un ekj woa een Voda woaren fa junt un jie woaren Säns un Dajchta woaren fa mie’, sajcht Jehowa*, de Aulmajchtja.”