Waut fa eene Hopninj jeft daut fa leewe Menschen, dee jestorwen sent?
„Wan een Mensch stoaft, kaun dee noch wada läwen?“ fruach Hiob lange Tiet trigj (Hiob 14:14). Veleicht hast du die daut uk aul emol jefroacht. Wurscht du daut jleichen to weeten, daut du leewe Menschen, dee jestorwen sent, wada hia oppe Ieed unja de baste Omstend seenen kust?
De Bibel vesprakjt: „Oba diene Vestorwne . . . woaren läwen, diene Doodes woaren oppstonen“. Un de Bibel sajcht uk: „De jerajchte woaren daut Launt oawen un eewich doabennen bliewen“ (Jesaja 26:19; Psalm 37:29).
Om daut wie werkjlich aun dise Vespräakjen jleewen kjennen, mott wie ieescht de Auntwuaten opp eenje wichtje Froagen kjanen lieren: Wuarom stoawen de Menschen? Wua sent de Doodes? Wuarom kjenn wie secha sennen, daut dee wada woaren läwen kjennen?
Waut es de Doot, un waut passieet met ons, wan wie stoawen?
De Bibel wiest gaunz kloa, daut Gott aum Aunfank nich haben wull, daut de Menschen storwen. Hee muak de ieeschte Menschen, Adam un Eva, un sad an en een Paradies oppe Ieed nenn, daut ‚de Goaden Eden‘ jenant wort. Hee jeef an de Oppgow, daut see sullen Kjinja haben un de gaunze Ieed to een Paradies moaken. See wudden mau bloos dan stoawen, wan see siene Jebooten nich jehorchen wudden (1. Mose 1:28; 2:15-17).
Adam un Eva schazten daut nich, daut Gott an soo toojedocht wia, un wieren ojjehuarsom. Doawäajen musten see de Strof betolen, soo aus daut aunjeordnet wia. „Schlieslich woascht du stoawen“, säd Gott to Adam, „un wada to Ieed woaren. Du best von de Ieed jenomen, un du woascht wada Ieed woaren“ (1. Mose 3:19). Ea Adam erschaufen wort, wia hee nich doa; hee wia bloos Ieed. Un wiels hee ojjehuarsom wia, ooda sindijd, wort hee doatoo veuadeelt, wada Ieed to woaren, daut es een Toostaunt onen Doasennen.
Doot sennen bediet aulsoo, onen Läwen to sennen. De Bibel wiest dän Jäajensauz: „De Loon dän de Sind tolt es de Doot; Gott oba schenkjt daut eewje Läwen“ (Reema 6:23). De Bibel wiest, daut de Doot een Toostaunt es, wua eena äwahaupt nuscht weet. Dee sajcht: „Dee waut läwen, weeten daut see stoawen; oba de Vestorwne weeten nuscht“ (Liera 9:5). Wan een Mensch stoaft, passieet daut, waut de Bibel sajcht: „Sien Jeist jeit ut, hee jeit trigj no sienen Ieedboddem; aun dän Dach vegonen siene Jedanken gaunz secha“ (Psalm 146:3-4, NW).
Oba, wuarom stoaw wie aula, wan doch bloos Adam un Eva jäajen Gott sien Jeboot ojjehuarsom wieren? Daut es soo, wiels wie aula jebuaren sent, no däm daut Adam ojjehuarsom wia. Doawäajen hab wie aula de Sind un dän Doot von am jeorwen. De Bibel sajcht, daut „soo aus derch eenen Mensch de Sind en de Welt nenn kjeem un derch de Sind de Doot, soo haft sikj de Doot äwa aule Menschen jespreet“ (Reema 5:12; Hiob 14:4, NW).
Eenje wudden nu veleicht froagen: „Oba haft de Mensch nich eene onstoafelje Seel, dee nom Doot wiedaläft?“ Väle behaupten daut un sajen soogoa, daut de Doot een Äwagonen to een aundret Läwen es. Oba dise Iedee staumt nich von de Bibel. De Bibel lieet, daut du eene Seel best, daut diene Seel werkjlich du selfst best, met dienen Kjarpa un dienen Vestaunt (1. Mose 2:7; Spricha 2:10; 1. Korinta 15:45). De Bibel sajcht uk: „De Seel, dee sindicht — see selfst woat stoawen“ (Hesekiel 18:4, NW). De Bibel lieet kjeenmol, daut de Mensch eene onstoafelje Seel haft, waut nom Doot vom Kjarpa wiedaläft.
Woo de Menschen wada woaren läwen kjennen
No däm, daut de Sind un de Doot en de Welt nenjekomen wieren, openboad Gott sien Väanämen, daut hee de Doodes derch een Oppstonen wada toom Läwen brinjen well. De Bibel sajcht doawäajen: „Abraham . . . veleet sikj doaropp, daut Gott uk kunn [sienen Sän Isaak von de] Doodes oppwakjen“ (Hebräa 11:17-19). Abraham veleet sikj nich onen Grunt doaropp, wiels de Bibel sajcht äwa dän Aulmajchtjen: „Hee es nich de doodje äa Gott, oba de läwendje äara, wiels en am [ooda „fa am“, NW] läwen dee aula“ (Lukas 20:37-38).
De aulmajchtja Gott haft de Macht, oba uk dän Wunsch, de Doodes opptowakjen, waut doatoo wirdich sent. Jesus Christus säd: „Lot junt daut nich wundren. De Tiet kjemt, daut aul dee, dee en de Jräwa ligjen, siene Stemm hieren woaren. See woaren dan verendach komen“ (Johanes 5:28-29; Aposteljeschicht 24:15).
Nich lang no däm, daut hee daut säd, troff Jesus eene Truajesalschoft aun, waut jrod eenen Dooden ut de israelitische Staut Nain rut druach. De Vestorwna wia een junga Maun un de eensja Sän von eene Wätfru. Aus Jesus sach, woo bettalich de Fru lieden deed, jaumad am daut äwa ar. Dan befool hee dän Dooden: „Junga Maun, ekj saj die, sto opp!“ Un de Maun recht sikj opp, un Jesus jeef de Mutta äaren Sän trigj (Lukas 7:11-17).
Krakjt soo aus bie dise Wätfru, soo jeef daut uk eene groote Freid, aus Jesus daut Hus von Jairus besocht, dee een Leida von de Judenschool wia. Dän siene 12-joasche Dochta wia jestorwen. Oba aus Jesus no Jairus sien Hus kjeem, jinkj hee no de doodje Mejal un säd: „Kjint, sto opp!“ Un de Mejal stunt opp! (Lukas 8:40-56).
Lota storf Jesus sien Frint Lazarus. Aus Jesus no Lazarus sien Darp kjeem, wia dee aul vea Doag doot. Uk wan dän siene Sesta Marta sea truarich wia, haud see doch de Hopninj nich veloaren un säd: „Ekj weet goot, daut hee aum jinjsten Dach oppstonen woat, wan de Doodes oppstonen.“ Oba Jesus jinkj nom Grauf, befool, daut see dän Steen sullen wajchnämen, un roopt: „Lazarus, komm rut!“ Un hee kjeem rut! (Johanes 11:11-44).
Nu denkj emol doaräwa no: En waut fa eenen Toostaunt wia Lazarus, aus hee dise vea Doag doot wia? Lazarus vetald nuscht doavon, daut hee seelich em Himmel wia ooda en eene Hal jekjwält wort. Wudd hee werkjlich sennen dort jewast, dan haud hee gaunz secha doavon vetalt. Oba Lazarus wia gaunz onen bewust, aus hee doot wia. Wudd Jesus am donn nich haben toom Läwen oppjewakjt, wia hee en disen Toostaunt jebläwen bat toom „jinjsten Dach . . ., wan de Doodes oppstonen.“
Daut es kloa, daut dise Wunda von Jesus kjeenen duarhauften Nutzen hauden, wiels deejanje, waut hee vom Doot oppwuak, lota wada storwen. Oba hee bewees doamet aul mea aus 1 900 Joa trigj, daut de Doodes derch Gott siene Macht werkjlich wada läwen kjennen. Derch siene Wunda wees Jesus em Kjlienen, waut unja de Harschoft von Gott sien Kjennichrikj oppe gaunze Ieed passieren woat.
Wan een leewa Mensch stoaft
Wan wäa stoaft, kaun ons daut sea truarich moaken, soogoa wan wie de Hopninj haben, daut de Doodes oppstonen woaren. Abraham jleewd doaraun, daut siene Ehefru wada toom Läwen komen wudd, oba doch läs wie: „Abraham hield aus see storf un truad ne Tietlank äwa ar“ (1. Mose 23:2). Un woo wia daut met Jesus? Aus Lazarus storf, „wort hee en sienem Jeist sea oppjeräacht un am foll daut sea schwoa“, un een kjlienet Stootje lota „hield“ hee (Johanes 11:33, 35). Wan wäa stoaft, dän du goot wieescht, dan es daut kjeen Bewies von Schwakheit, wan du hielst.
Wan een Kjint stoaft, es daut besonda schwoa fa de Mutta. De Bibel rät von de bettaliche Trua, dee eene Mutta feelen kaun (2. Kjennichs 4:27). Oba daut es uk fa dän Voda schwoa, wan sien Kjint stoaft. „Wan ekj doch haud kunt en diene Städ stoawen“, kloagd de Kjennich David, aus sien Sän Absalom jestorwen wia (2. Samuel 19:1).
Oba wan du gaunz doavon äwazeicht best, daut de Doodes oppstonen woaren, woascht du enne Lenjd nich soo truarich sennen, daut du die nich treesten latst. Soo aus de Bibel sajcht, woascht du „nich truaren brucken, soo aus dee, dee kjeene Hopninj haben“ (1. Tessalonicha 4:13). Enne Städ daut woascht du die Gott em Jebäd nodren, un de Bibel vesprakjt, daut hee „fa die sorjen [woat]“ (Psalm 55:23).
Wan nich aundasch aunjejäft, sent de Bibeltakjsten ut De Bibel (United Bible Societies un Kindred Productions, Utgow von 2007) jenomen. En eenje Bibeltakjsten hab wie de Schreft schroz jemoakt, om wichtje Wieeda to betoonen. NW bediet, daut de Takjst ut de huachdietsche Neue-Welt-Übersetzung der Heiligen Schrift – mit Studienverweisen jenomen ooda äwasat es.