Wuarom sell wie unjadon sennen?

1-2. (a) Woo jeit ons daut eenjemol, wan wie jehorchen sellen? (b) Waut woa wie nu seenen?

HAST du mol jeseenen, waut een kjliena Jung deit, wan dee waut doonen saul, waut dän nuscht jankat? Daut es dän auntoseenen, woo schwoa dän daut felt. Hee haft goot jehieet, waut siene Pape säd, un weet, daut hee jehorchen saul. Oba hee well daut bloos nich. Ons kaun daut eenjemol biejlikj soo gonen aus disen Jung.

² Jehorchen un unjadon sennen es nich emma leicht. Felt die daut uk eenjemol schwoa, die von aundre waut sajen to loten? Dan best du nich de eensja. Wie läwen en eene Welt, wua de Menschen emma dolla jäajenaun sent un sikj nuscht mea wellen sajen loten. Oba de Bibel sajcht gaunz kloa, daut wie dee sellen unjadon sennen, waut äwa ons aunjestalt sent (Spricha 24:21). Wan wie daut nich doonen, kjenn wie nich en Gott siene Leew bliewen. Oba wuarom es daut soo schwoa, unjadon to sennen? Wuarom velangt Jehova daut äwahaupt? Waut kaun ons halpen to jehorchen? Un woo kjenn wie wiesen, daut wie unjadon sent? Well wie mol seenen.

WUAROM ES JEHORCHEN SOO SCHWOA?

3-4. Woo kjeem de Sind un de Onvolkomenheit äwa de Menschen? Wuarom es daut fa onvolkomne Menschen soo schwoa, unjadon to sennen?

³ Daut jeft oppet weinichste tweeatlei, wuarom daut fa ons schwoa es, unjadon to sennen: Ieeschtens, wiels wie selfst onvolkomen sent, un tweedens, wiels de Menschen onvolkomen sent, waut äwa ons waut to sajen haben. De Sind un de Onvolkomenheit kjeem äwa de Menschen, aus Adam un Eva sikj em Goaden Eden jäajen Gott stalden. De Sind funk aulsoo met Ojjehuarsom aun. Un wie aula haben dee metjeorwen. Doawäajen felt ons daut foaken schwoa, to jehorchen (1. Mose 2:15-17; 3:1-7; Psalm 51:7; Reema 5:12).

⁴ Onvolkomne Menschen woaren leicht mol stolt un huachnäsich. Doawäajen mott wie sea doaraun schaufen, daut wie deemootich bliewen. Soogoa wan wäa joarenlank Gott tru jedeent haft, kaun dee stolt un ieejenkoppich woaren. Korach biejlikj haud en schwoare Tieden tru met Jehova sien Volkj toopjeschauft. Oba dan wull hee mea Macht haben un wort soo driest, daut hee sikj met aundre toop jäajen Moses stald, dee don de deemootichsta Mensch wia (4. Mose 12:3; 16:1-3). Un de Kjennich Usija wort soo stolt, daut dee en Jehova sienen Tempel nenjinkj, om doa waut to doonen, waut bloos de Priesta toostunt (2. Chronik 26:16-21). Dise beid Mana kjeem daut dia tostonen, daut see nich unjadon wieren. Waut kjenn wie doarut lieren? Wie motten doano seenen, daut wie nich stolt woaren, wiels sest woat ons daut schwoa faulen, unjadon to sennen.

5. Woo haben onvolkomne Menschen äare Macht mesbrukt?

⁵ Väle wellen uk doawäajen nich unjadon sennen, wiels onvolkomne Menschen äare Macht foaken mesbrucken un aundre grausom behaundlen un unjadrekjen. Aul von jeehäa haben Menschen äare Macht orrajcht jebrukt (läs Liera 4:1). Saul toom Biespel wia opprechtich un deemootich, aus Jehova am toom Kjennich muak. Oba hee wort stolt un aufjenstich un wull soogoa dän truen David dootmoaken (1. Samuel 9:20-21; 10:20-22; 18:7-11). David wort lota eent von de baste Kjennichs en Israel, oba uk hee mesbrukt siene Macht. Hee neem sikj de Fru von Uria dän Hetita un schekjt disen opprechtjen Maun dan em Kjrich gaunz no väaren, soo daut de Jäajna am ombrochten (2. Samuel 11:1-17). Daut wiest, woo schwoa daut fa onvolkomne Menschen es, äare Macht rajcht to brucken. Un wan dee, waut Macht haben, Jehova nich achten, es daut noch väl oaja. Aus een enjlischa Rejierungsmaun doavon schreef, woo jewesse katoolsche Popen aundre vefolcht haben, säd hee: “Wäa Macht haft, woat doavon vedorwen; wäa sea väl Macht haft, woat doavon sea vedorwen.” Wan daut soo es, wuarom sell wie dan äwahaupt unjadon sennen?

WUAROM SELL WIE UNJADON SENNEN?

6-7. (a) Wuarom sent wie Jehova jieren unjadon? (b) Waut es doa met en, Jehova en aules unjadon to sennen?

⁶ Wie leewen Jehova, onsen Näakjsten un uk ons selfst. Daut es de Hauptgrunt, wuarom wie unjadon sent. Wiels wie Jehova dolla jleichen aus irjent sestwaut, well wie am daut Hoat froo moaken (läs Spricha 27:11; Markus 12:29-30). Wie weeten, daut em Goaden Eden aul de Froag oppkjeem, aus Jehova werkjlich daut Rajcht haft, äwa aules to harschen. Un daut von don aun de mieeschte sikj opp dän Fient siene Sied jestalt haben, enne Städ sikj Jehova to unjaordnen. Wie oba stalen ons jieren opp Jehova siene Sied. Wan wie läsen, waut Openboarunk 4:11 äwa onsen Gott sajcht, jeit ons daut sea to Hoaten. Fa ons es doa kjeen Twiewel, aus Jehova daut Rajcht haft, äwa Himmel un Ieed to harschen. Wie nämen am aus onsen Harscha aun un wellen am en aules unjadon sennen.

⁷ Jehova unjadon to sennen bediet, am to jehorchen un sikj am to unjaordnen. Wie jehorchen Jehova jieren, wiels wie am leewen. Oba eenjemol kaun daut sea schwoa sennen, to jehorchen. Dan mott wie daut lieren, ons to unjaordnen, soo aus de kjliena Jung, von dän wie aul jerät haben. Wie weeten, daut Jesus sikj emma unjaordnen deed, uk dan, wan daut fa am sea schwoa wia. Hee säd to sienen Voda: “Daut saul nich soo woaren aus ekj well, oba soo aus du west” (Lukas 22:42).

8. (a) Waut es doa noch met en, wan wie Jehova wellen unjadon sennen? Woo iernst es Jehova daut doamet? (b) Waut moakt ons daut leichta, Rot un Belierunk auntonämen? (See dän Kausten “Horch wan du Rot kjrichst un belieet woascht”.)

⁸ Vondoag rät Jehova nich selfst to ons; hee deit daut derch de Bibel un derch Menschen, waut hee äwa ons aunjestalt haft. Wan wie Jehova wellen unjadon sennen, dan mott wie ons uk dee unjaordnen, waut hee enjesat haft ooda waut hee noch bestonen lat. Wan wie ons jäajen dee stalden, un biejlikj dee äaren biblischen Rot ooda äare Belierunk nich aunneemen, wudd wie ons rajcht jesajcht jäajen Gott stalen. Aus de Israeliten sikj bekloagden un Moses wadastunden, neem Jehova daut soo, aus wudden see am wadastonen (4. Mose 14:26-27).

9. Wuarom bewies wie Leew fa onsen Näakjsten, wan wie unjadon sent? Met waut jeit daut to vejlikjen?

⁹ Wan wie unjadon sent, bewies wie uk Leew fa onsen Näakjsten. Wuarom? Denkj wie mol aun eenen Soldot. Daut dän siene Armee em Kjrich äwaläwen ooda jewennen kaun, mott jieda Soldot de Väaschte achten, dee jehorchen un met dee toopschaufen. Wan mau een Soldot sikj nich aun de Befälen helt, brinjt dee aule aundre en Jefoa. En de vondoagsche Welt rechten menschelje Armeeen väl Schoden aun. Oba Jehova haft Armeeen, waut bloos toom gooden deenen. Hee es de Väaschta äwa een grootet Häa von Enjel, un de Schreft vejlikjt siene Deena eenjemol met een Kjrichshäa ooda met Soldoten (Hesekiel 37:1-10, NW; 2. Timotäus 2:3). Wan wie ons nu wudden jäajen dee stalen, waut Jehova aus Väaschte äwa ons enjesat haft, wudd wie dan nich uk onse Metkjamfa, aulsoo onse Breeda, en Jefoa brinjen? Wan biejlikj een Christ sikj nich de Eltestasch unjaordnen well, motten foaken uk aundre en de Vesaumlunk doarunja lieden (1. Korinta 12:14, 25-26). Un wan een Kjint emma jäajenaun es, schot de gaunze Famielje daut. Wie seenen aulsoo, daut wie werkjlich Leew fa onsen Näakjsten bewiesen, wan wie unjadon sent un met aundre toopschaufen.

10-11. Wuarom es ons daut toom gooden, wan wie unjadon sent?

¹⁰ Daut es uk fa ons selfst toom basten, wan wie unjadon sent. Wan Jehova velangt, daut wie jehorchen sellen, sajcht hee foaken uk, wuarom ons daut toom gooden es. Biejlikj sajcht hee, daut Kjinja daut goot gonen woat un daut dee lang läwen kjennen, wan dee äare Elren jehorchen (5. Mose 5:16; Efeesa 6:2-3). Un hee sajcht, daut wie no de Eltestasch horchen sellen, daut wie em jeisteljen nich Schoden lieden (Hebräa 13:7, 17). Un wan wie de Rejierunk unjadon sent, soo aus Jehova daut velangt, woat ons daut uk toom Schutz deenen (Reema 13:4).

¹¹ Es daut nich väl leichta to jehorchen, wan wie weeten, wuarom Jehova daut von ons velangt? Well wie nu mol dreeatlei seenen, wua daut besonda needich es, daut wie unjadon sent.

EN DE FAMIELJE

12. Waut fa eene Veauntwuatunk haft Jehova dän Maun en de Famielje jejäft? Woo saul dee daut nokomen?

¹² Jehova haft met de Famielje dän Aunfank jemoakt. Hee helt opp Ordnunk un haft daut met de Famielje soo enjerecht, daut daut fein schaufen kaun (1. Korinta 14:33). Dän Maun haft hee aus Haupt von de Famielje bestemt. Dee saul Jesus Christus aus Haupt achten un saul siene Famielje soo behaundlen, aus Jesus de Vesaumlunk behaundelt (Efeesa 5:23). De Ehemaun saul siene Veauntwuatunk aus Haupt iernst nämen un sikj dee nich aufschuwen. Hee mott uk nich hunjsch met siene Famielje omgonen ooda dee unjadrekjen, oba saul leeftolich un frintlich sennen un nich too väl von dee velangen. De Maun saul em Denkj hoolen, daut hee nich äwa aules to bestemmen haft; Jehova steit noch äwa am.

13. Woo kaun eene Fru äare Oppgow en de Famielje soo nokomen, aus Jehova daut väajeseenen haft?

¹³ De Fru saul äaren Maun halpen un am unjastetten. Dee haft en de Famielje uk waut to sajen, wiels de Schreft rät von de Mutta äare Belierunk (Spricha 1:8). Oba de Maun es doawäajen noch emma daut Haupt. De Fru saul am achten un methalpen, daut hee siene Veauntwuatunk en de Famielje nokomen kaun. See woat nich schlajcht äwa äaren Oomkje räden, nich proowen, dän hinjarigjsch to bemaunen, un uk nich selfst wellen de Wieet sennen en de Famielje. Enne Städ daut unjastett see am un schauft met am toop. Wan see mol nich envestonen es met siene Entscheidungen, kaun see am daut leeftolich sajen, oba see stalt sikj doawäajen nich jäajen am. Wan äa Maun Jehova nich deent, haft see daut woomäajlich nich emma leicht. Oba wan see am doawäajen unjadon es, kaun daut sennen, daut hee Jehova veleicht uk well kjanen lieren (läs 1. Petrus 3:1).

14. Woo kjennen Kjinja äare Elren un uk Jehova Freid moaken?

¹⁴ Kjinja kjennen äare Elren doaderch ieren, daut see an jehorchen. Dan freien nich bloos de Elren sikj, oba uk Jehova (Spricha 10:1). Un wan een Voda ooda eene Mutta de Kjinja auleen opptrakjen deit, motten de Kjinja uk jehorchen. En soone Famieljes es daut besonda needich, daut de Kjinja methalpen un aula toopschaufen. Wan jieda eena sien Poat deit, soo aus Jehova daut väajeseenen haft, woat de Famielje veeent sennen un daut woat tus frädlich toogonen. Doaderch woat Jehova jeieet, dee met de Famielje dän Aunfank muak.

EN DE VESAUMLUNK

15. (a) Woo kjenn wie en de Christenvesaumlunk wiesen, daut wie Jehova unjadon sent? (b) Waut fa Gruntsauzen halpen ons, en de Vesaumlunk unjadon to sennen? (See dän Kausten “Horcht no june Liera”.)

¹⁵ Jehova haft sienen Sän Jesus toom Harscha äwa de Christenvesaumlunk jemoakt (Kolossa 1:13). Un Jesus haft dän truen, weisen Kjnajcht de Oppgow jejäft, fa Gott sien Volkj oppe Ieed em jeisteljen to sorjen (Matäus 24:45-47). En de vondoagsche Tiet es “de trua, weisa Kjnajcht” de Väastaunt von Jehova siene Zeijen. Krakjt soo aus em 1. Joahundat kjrieen uk vondoag de Eltestasch derch Breew ooda reisende Oppsechta Aunwiesungen un Rot vom Väastaunt. Un wan wie de Eltestasch unjadon sent, jehorch wie doaderch Jehova (läs 1. Tessalonicha 5:12; Hebräa 13:17).

16. Wuarom kaun eena sajen, daut Eltestasch vom heiljen Jeist bestädicht sent?

¹⁶ De Eltestasch un Deenstaumthelpa sent nich volkomen. Soo aus aule Menschen haben see uk äare Fäla. Oba doawäajen sent de Eltestasch doch “Gowen”, waut de Vesaumlunk jekjräajen haft. Dee sellen dee halpen, em jeisteljen stoakj to bliewen (Efeesa 4:8, 11). De Eltestasch sent vom heiljen Jeist bestädicht (Aposteljeschicht 20:28). Wuarom kaun eena daut sajen? En de Schreft haft Gott derch sienen heiljen Jeist loten oppschriewen, waut von Eltestasch velangt es. Daut mott een Brooda ieescht nokomen, ea dee kaun Eltesta sennen (1. Timotäus 3:1-7, 12; Titus 1:5-9). Un de Eltestasch bäden uk om heiljen Jeist, wan see rotschlussen, aus een Brooda aul soo wiet es, Eltesta to sennen.

17. Wanea sellen Sestren sikj dän Kopp bedakjen? Wuarom sellen dee daut doonen?

¹⁷ Jewesse Oppgowen en de Vesaumlunk woaren jeweenlich von Eltestasch ooda Deenstaumthelpa jedonen, biejlikj een Toopkomen fa dän Prädichtdeenst leiden. Oba waut, wan doa jroz kjeena von dee es? Dan kaun een jedeepta Brooda dise Oppgow äwanämen. Un wan doa uk kjeen jedeepta Brooda es, dan kaun eene jeieejende Sesta daut doonen. Oba wan eene Sesta eene Oppgow äwanemt, waut jeweenlich een jedeepta Brooda deit, saul see sikj dän Kopp bedakjen (1. Korinta 11:3-10).a Dit Jeboot saul nich auntovestonen jäwen, daut Frues weinja wieet sent. Doaderch kjennen Frues wiesen, daut see daut achten, woo Jehova daut en de Vesaumlunk un uk en de Famielje enjerecht haft.

DE REJIERUNK UNJADON SENNEN

18-19. (a) Woo wurscht du Reema 13:1-7 utlajen? (b) Woo wies wie, daut wie fa de Rejierunk un fa Beaumte Respakjt haben?

¹⁸ Woare Christen hoolen sikj aun de Gruntsauzen, waut en Reema 13:1-7 to finjen sent (läs). Soo lang, aus Jehova de weltelje Rejierungen bestonen lat, doonen dee Sachen, waut sea needich sent: Dee sorjen fa jewesse Ordnunk un doonen uk aundre Deensten, waut aulem togood komen. Wie kjennen de Rejierunk doaderch unjadon sennen, daut wie ons aun dee äare Jesazen hoolen. Wie betolen aulen Taks, wie fellen aule Zadels un Papieren opprechtich ut un wie hoolen uk sest aule Jesazen, waut met ons, onse Famielje, onse Oabeit ooda ons Hab un Goot to doonen haben. Oba wan de Rejierunk waut velangt, waut jäajen Gott sien Jesaz es, denkj wie krakjt soo aus de Apostel. Dee säden: “Wie motten Gott mea jehorchen aus Menschen” (Aposteljeschicht 5:28-29; see uk dän Kausten “Wäm saul ekj jehorchen?”).

¹⁹ Daut wie de Rejierunk unjadon sent, es uk doaraun to seenen, daut wie Rejierungsbeaumte Respakjt wiesen. Aus de Apostel Paulus mol met Kjennich Herodes Agrippa un dän Laundesväastona Festus räd, wees hee an Respakjt, wan dee uk nich een goodet Läwen fieeden (Aposteljeschicht 26:2, 25). Krakjt soo well wie uk aule Beaumte achten, aus daut nu een huaga Rejierungsmaun es ooda een jeweenelja Poliez. Un Schoolkjinja sellen de Lierasch, de Leidasch un dee, waut sest noch en de School schaufen, achten. Wie wellen to aule Menschen respakjtvoll sennen, endoont aus dee onsen Gloowen fa goot talen ooda nich (läs Reema 12:17-18; 1. Petrus 3:15).

20-21. Waut kaun daut fa goodet met sikj brinjen, wan wie unjadon sent?

²⁰ Aundre Respakjt wiesen saul fa ons waut sennen, waut wie jieren doonen. De Apostel Petrus schreef: “Jäft aule Menschen Respakjt” (1. Petrus 2:17). Respakjt haben es en de vondoagsche Welt nich mea Mood. Doawäajen woat de Menschen daut oppfaulen, wan wie an opp iernst achten. Soo kjenn wie daut nokomen, waut Jesus säd: “Lot uk jun Licht ver de Menschen schienen, daut see june goode Woakjen seenen un jun Voda em Himmel doafäa lowen” (Matäus 5:16).

²¹ En dise diestre Welt woaren opprechtje Menschen daut seenen, wan wie en de Famielje, en de Vesaumlunk un uk aundatwäajen Respakjt wiesen. Daut kaun dee no daut jeistelje Licht trakjen, soo daut dee veleicht uk de Woarheit aunnämen. Doaräwa wudd wie ons sea freien. Oba uk wan dee daut nich doonen, kjenn wie ons gaunz doaropp veloten, daut Jehova sikj äwa ons freit, wan wie unjadon sent un aundre achten. Un soo kjenn wie uk en siene Leew bliewen. Es daut nich krakjt daut, waut wie aula wellen?