Waut passieet, wan doa wäa stoaft?

Es doa mol wäa jestorwen, dän du väl jeräakjent hast? En soone schwoare Tiet wundascht du veleicht: Waut passieet dan, wan doa wäa stoaft? Woa wie dän noch mol wadaseenen? En dit un en daut näakjste Kapitel woa wie seenen, waut de Schreft doatoo sajcht un daut woat ons Troost jäwen.

1. Waut passieet dan, wan doa wäa stoaft?

Jesus vejlikjt dän Doot met schlopen. Wuarom? Na, een Mensch, waut schlapt, dee woat nuscht en, waut rom am aunjeit. Dee kaun nuscht mea späaren un feelt sikj uk nich auleen, wan dee siene Frind un Famielje uk väl jeräakjent haft. De Schreft sajcht: “De Vestorwne weeten nuscht” (läs Liera 9:5).

2. Woo kjemt ons daut togood, de Woarheit äwa dän Doot to weeten?

Väl Menschen haben Angst fa dän Doot ooda fa dee, waut aul doot sent! Oba waut de Schreft äwa dän Doot sajcht, jeft ons Troost. Jesus säd: “De Woarheit woat junt frie moaken” (Johanes 8:32). De Schreft lieet nich, daut een Mensch eene onstoafelje Seel haft, wan eenje Gloowesleidasch uk soont lieren. Doawäajen brukt uk kjeena nom Doot lieden. Un wäajen de Doodes rein nuscht enwoaren, kjennen dee ons uk nuscht aundoonen. Eena doaf dee uk nich ieren ooda aunbäden. Un daut es uk nich needich, fa dee to bäden.

Daut jeft Menschen, waut sajen, daut see met de Doodes räden kjennen. Oba soont jeit nich mol. Wiels soo aus wie jelieet haben: “De Vestorwne weeten nuscht”. Wan doa wäa jleeft, daut hee met de Doodes räden kaun, dan kunn daut sennen, daut dee mau rajcht met beese Jeista rät, waut sikj soo doonen, aus wudden see de Doodes sennen. Doawäajen, wan wie de Woarheit äwa de Doodes weeten, beschizt ons daut fa de beese Jeista. Jehova woarnt ons, daut wie nich sellen proowen, met de Doodes to räden, wiels hee weet, daut de beese Jeista ons dan schoden woaren (läs 5. Mose 18:10-12).

3. Lia, woo daut werkjlich met de Doodes steit

De Menschen von aulawäajen oppe Welt haben veschiedne Gloowes doaräwa, waut met eenen Mensch passieet, wan dee ieescht jestorwen es. Oba gaunz secha kaun daut nich aula rajcht sennen.

• Waut jleewen de Menschen en diene Jäajent äwa de Doodes?

VIDEO: Waut es met dee, waut jestorwen sent? (Een Biet) (1:19)

Läst Liera 3:20 un dan got toop dise Froagen derch:

• No disen Varsch no, waut passieet met eenen Mensch, wan dee stoaft?

• Läft doa irjentwaut von eenen Mensch wieda, wan dee stoaft?

De Schreft rät von Lazarus sienen Doot. Daut wia Jesus sien gooda Frint. Läst Johanes 11:11-14 un dan denkjt doaräwa no, waut Jesus säd, woo daut met Lazarus stunt. Dan got toop dise Froagen derch:

• Met waut vejlikjt Jesus dän Doot?

• Waut wiest ons daut doaräwa, woo daut met de Doodes steit?

• Waut denkjst du doaräwa, waut de Schreft von dän Doot sajcht?

4. De Woarheit äwa dän Doot to weeten, es ons toom gooden

Wan wie de Woarheit weeten äwa dän Doot, dan derw wie nich mea Angst haben fa de Doodes. Läst Liera 9:10 un dan got toop dise Froag derch:

• Kjennen de Doodes ons Schoden aundoonen?

Wan wie de Woarheit ut de Schreft jleewen, dan woa wie nich denkjen, daut wie de Doodes motten ieren ooda mau rajcht aunbäden. Läst Jesaja 8:19 (JHF) un Openboarunk 4:11 un dan got toop dise Froag derch:

• Waut helt Jehova doavon, wan een Mensch de Doodes aunbät ooda dee no Help frajcht?

5. De Woarheit äwa dän Doot to weeten, treest ons

Väl Menschen woat jelieet, daut wan dee stoawen, daut dee dan woaren lieden motten wäajen daut schlajchte, waut dee ea jedonen haben. Oba daut es een Troost to weeten, daut doa kjeena nom Doot lieden mott, nich mol dee, waut sea schlajchtet jedonen haben.a Läst Reema 6:7 un dan got toop dise Froag derch:

• Wan de Schreft sajcht, daut een Mensch nom Doot frie es von Sind, wuarom wudd dee dan sellen lieden wäajen de Sinden, waut dee ea jedonen haft?

Je bäta wie Jehova kjanen, je dietelja woat ons daut, daut hee daut kjeenmol wudd tooloten, daut de Doodes kunnen jekjwält woaren. Läst 5. Mose 32:4 un 1. Johanes 4:8 un dan got toop dise Froagen derch:

• Wudd soon Gott, aus dise Bibelvarzhen wiesen, daut loten, daut Menschen nom Doot kunnen jekjwält woaren?

• Treest die daut, de Woarheit äwa dän Doot to weeten? Wuarom?

KAPITEL TOOPJEFOT

Wan een Mensch stoaft, dan weet dee nuscht mea. Dee, waut jestorwen sent, derwen nich lieden un dee kjennen uk nich dee waut aundoonen, waut doa läwen.

Waut hast du jelieet?

• Waut passieet dan, wan doa wäa stoaft?

• Woo es ons daut toom gooden, de Woarheit äwa dän Doot to weeten?

• Woo treest ons daut, de Woarheit äwa dän Doot to weeten?

MEA NOSIEEKJEN

See, waut daut Wuat “Seel” meent, soo aus de Schreft daut brukt.

“Waut es de Seel?” (Artikjel opp jw.org)

Unjasto die daut, aus Gott de Schlajchte enne Hal kjwält.

Jeft daut opp iernst eene Hal, wua jekjwält woat? (3:07)

Mott wie fa de Doodes Angst haben?

Geister von Verstorbenen: Können sie dir helfen oder dir schaden? Gibt es sie wirklich? (Heft)

See mol, woo een Maun sikj kunn ruich feelen, aus hee ieescht wist, woo daut met de Doodes werkjlich wia.

“Ekj must mie wundren, woo kloa un dietlich de Schreft daut utlajcht” (De Woaktorm, 1. Feebawoa 2015)