Feebawoa

Aus de Kjennich Hiskia sea krank wort, prachad hee Jehowa doano, am jesunt to moaken. Un Jehowa deed daut (2. Kjen. 20:1-6). Oba aus de Apostel Paulus Jehowa doano fruach, am dän “Spekja em Fleesch” wajchtonämen, deed Jehowa daut nich (2. Kor. 12:7-9). De Kjennich Herodes wull de Apostel Jakobus un Petrus beid loten dootmoaken. Jakobus wort dootjemoakt un Petrus wort derch een Wunda jerat (Apj. 12:1-11). Veleicht wunda wie nu: “Wuarom deed Jehowa Petrus raden, oba Jakobus nich?” De Schreft sajcht daut nich. Oba wie kjennen ons secha sennen, daut aules, waut Jehowa deit, “kjeenmol ojjerajcht es” (5. Mo. 32:4). Veleicht kaun daut sennen, daut Jehowa onse Jebäda bieaun nich soo beauntwuat, aus wie ons daut wudden wenschen. Oba wiels wie doaropp vetruen, daut Jehowa emma leeftolich un jerajcht haundelt, woa wie nich doaräwa grunzen, woo hee onse Jebäda beauntwuaten well (Hiob 33:13). w23.11 21 V. 6

Jehowa leet derch Jakobus oppschriewen, daut weise Menschen “reed to jehorchen” sent. Waut bediet daut? Wie sellen wellich reed sennen, deejanje to jehorchen, waut Jehowa äwa ons aunjestalt haft. Oba daut bediet nich, daut Jehowa von ons velangt, daut wie uk dan jehorchen motten, wan dee von ons waut haben wellen, waut jäajen Jehowa es (Apj. 4:18-20). Veleicht späat sikj ons daut leichta, Jehowa to jehorchen enne Städ Menschen. Jehowa jeft ons emma dän basten Rot, wäajen hee volkomen es (Psa. 19:8). Oba Menschen, waut een Aumt haben, sent nich volkomen. Un doch haft ons himlischa Voda de Elren, Beaumte un Eltestasch eene jewesse Macht jejäft (Spr. 6:20; 1. Tes. 5:12; 1. Pet. 2:13-14). Wan wie dee jehorchen, dan jehorch wie enne Werkjlichkjeit Jehowa. w23.10 6 V. 2-3

Eent, waut onsen Gloowen stoakjt, es, daut wie äwa Jehowa siene Krauft nodenkjen. Hee haft de Macht, aules to doonen, waut hee vesprakjt. Hee es je de aulmajchtja Gott (Hiob 42:2; Mar. 10:27; Efs. 3:20). Hee vespruak Abraham un Sara, daut dee en äare oole Joaren een Kjint haben wudden (1. Mo. 17:15-17). Hee säd to Abraham, daut siene Nokomen daut Launt Kanaan oawen wudden. Oba Abraham siene Nokomen, de Israeliten, wieren fa väl Joaren Sklowen en Ägipten. Daut mott soo jeloten haben, aus wan daut kjeenmol passieren wudd! Oba daut deed. Hee säd uk, daut Maria, eene Junkfru, sienen ieejnen Sän to Welt brinjen wudd. Soo erfeld sikj daut, waut Jehowa aul dusende Joaren trigj em Goaden Eden vesproaken haud! (1. Mo. 3:15). Wie stoakjen onsen Gloowen aun Jehowa siene Macht, wan wie doaräwa nodenkjen, waut hee aules vesproaken haft un woo hee daut erfelt haft (Jos. 23:14; Jes. 55:10-11). w23.04 28 V. 10-12

Jehowa deed David siene Jebäda beauntwuaten (1. Sam. 19:10, 18-20; 2. Sam. 5:17-25). Un wie kjennen ons doaräwa uk gaunz secha sennen (Psa. 145:18). Daut kaun oba sennen, daut Jehowa onse Jebäda nich soo beauntwuat, aus wie ons daut wudden wenschen. Paulus haud eenen “Stachel en daut Fleesch” un fruach Gott doano, am disen Trubbel wajchtonämen. Hee deed dree Mol krakjt wäajen daut bäden. Haft Jehowa dise Jebäda beauntwuat? Jo, oba nich soo, aus Paulus sikj daut jedocht haud. Jehowa haft am disen Trubbel nich wajchjenomen, oba hee jeef am de Krauft, waut am fäld, om tru to bliewen (2. Kor. 12:7-10). Ons kaun daut bieaun uk soo gonen, daut wie eene aundre Auntwuat kjrieen, aus wie jedocht hauden. Oba wie kjennen gaunz doaropp vetruen, daut Jehowa daut baste weet, woo hee ons halpen kaun. Hee kaun “grulich sea väl mea doonen …, aus wua wie no froagen ooda waut wie foten kjennen” (Efs. 3:20). Krakjt doawäajen kjennen de Auntwuaten opp onse Jebäda eenjemol to soone Tiet ooda opp soone Wajch sennen, waut wie nich jedocht hauden. w23.05 8-9 V. 4-6

Daut es goot, daut wie ons noch mol Tiet nämen, äwa daut Vespräakjen notodenkjen, daut de Doodes vom Doot oppstonen woaren. Wuarom? Wäajen wie nich weeten kjennen, aus wie eene schlemme Krankheit kjrieen woaren ooda aus wie wäm em Doot velieren woaren, dän wie väl räakjnen (Liera 9:11; Jak. 4:13-14). Onse Hopninj aun daut Oppstonen kaun ons halpen, met dise Schwierichkjeiten foadich to woaren (1. Tes. 4:13). De Schreft wiest kloa, daut ons himlischa Voda ons sea goot kjant un ons sea leeft (Luk. 12:7). Denkj mol han, woo goot Jehowa ons kjant. Wan hee ons wada toom läwen brinjt, woa wie soo sennen aus ea un woaren uk noch daut weeten waut ea. Jehowa leeft ons soo sea, daut hee doano jeseenen haft, daut wie fa emma läwen kjennen. Un wan wie oba doch stoawen motten, woat hee ons mau rajcht wada toom läwen brinjen. Wuarom kjenn wie aun daut Oppstonen vom Doot jleewen? Wiels wie kjennen ons secha sennen, daut deejanja, wäa ons daut vesprakjt, dän Wensch uk de Macht haft, daut to doonen. w23.04 8-9 V. 2-4

Josef un Maria deeden toop waut, om äaren Gloowen to stoakjen. Dee wisten, daut daut sea wichtich wia, daut dee Jehowa aus Famielje toop aunbäden deeden (Luk. 2:22-24; 4:16). Dee sent werkjlich een sea goodet Biespel fa Lied! Wan jie, soo aus Josef un Maria, uk Kjinja haben, dan kaun daut noch mol schwoa sennen, bie de Toopkomes to sennen ooda sikj Tiet to nämen fa daut Famieljenstudium. Un daut kunn noch väl schwanda sennen, daut jie junt aus Lied Tiet nämen toom studieren un toop bäden. Oba denkjt emma aun daut: Wan jie Jehowa toop aunbäden, dan woa jie Jehowa emma noda komen uk junt unjarenaunda. Seet doawäajen doano, daut Jehowa deenen daut Väaschte bie junt es. Wan jie nich goot delenjd komen, hieet sikj daut veleicht nich sea no Scheengonen, daut jie sullen Famieljenstudium haben. Wan junt daut soo jeit, dan fangt doamet aun, een bät waut to studieren, waut jie beid jleichen. Daut kaun junt halpen, daut jie junt wada mea räakjnen un daut jie Jehowa toop aunbäden wellen. w23.05 22 V. 7-8

Woo holp Obadja daut, Ieaforcht fa Gott to haben? Doaderch wia hee tru un opp to veloten, un doawäajen stald de Kjennich am aus Oppsechta äwa sienen Hushault aun (see uk Nehemia 7:2). De Gottesforcht holp Obadja uk, daut hee sea äwanäment wia. Am fäld daut uk sea needich, wiels hee en dee Tiet läwd, aus de beesa Kjennich Ahab rejieed (1. Kjen. 16:30). Ahab siene Fru Isebel deed Baal aunbäden. See kunn Jehowa soo schlajcht lieden, daut see de woare Aunbädunk en daut Nuadkjennichrikj utriemen wull. Un see haft mau rajcht väle von Gott siene Profeeten dootjemoakt (1. Kjen. 18:4). Aus Isebel no Gott siene Profeeten socht, om dee doottomoaken, vestuak Obadja 100 von dee. De Schreft sajcht, daut hee “50 en eene Heel un 50 en eene aundre aum Läwen hilt un dee met Broot un Wota vesorjd” (1. Kjen. 18:13-14). Wan daut wäa wia enjeworden, dan wudd disen äwanämenden Obadja daut gaunz secha daut Läwen jekost haben! Secha wull Obadja nich stoawen un am wia angst. Oba hee räakjend Jehowa un dän siene Deena mea aus sien ieejnet Läwen. w23.06 16 V. 9-10

Jehowa leit sien Volkj vondoag dän Dach, krakjt soo aus hee daut ieeschtemma deed. Daut deit hee derch sien Wuat un sienen Sän, waut daut Haupt von de Vesaumlunk es. Kjenn wie dän Bewies seenen, daut Jehowa vondoag dän Dach noch emma Menschen brukt toom ons aunleiden? Gaunz kloa. See wie mol eenje Sachen, waut no daut Joa 1870 passieeden. Charles Taze Russell un siene Poatna kunnen daut enseenen, daut daut Joa 1914 wudd een besondret Joa sennen, wua sikj de biblische Profezeiungen erfellen wudden, daut Gott sien Kjennichrikj wudd oppjestalt woaren (Dan. 4:22-23). Dee fungen daut rut, wäajen dee sea de Bibel studieeden un doaropp vetruden, daut de Profezeiungen doabennen sikj erfellen wudden. Wia daut Jehowa, waut dise Mana aunleiden deed? Jo, daut wia. Daut, waut aune 1914 enne Welt passieed, bewees kloa, daut Gott sien Kjennichrikj aunfunk to rejieren. Dan bruak de Ieeschta Weltkjrich ut un doahinja jeef daut veschiedne Krankheiten, Ieedbäben un Hungaschnoot (Luk. 21:10-11). Jehowa brukt werkjlich dise opprechtje Christen toom sien Volkj leiden. w24.02 22 V. 11

Wäajen wie Jehowa deenen, weet wie, daut hee ons sea väl räakjent un daut hee haben well, daut wie daut scheenste Läwen haben, waut nu mäajlich es (Reem. 8:35-39). Wie weeten uk, daut daut emma goot es fa ons, wan wie ons no biblische Gruntsauzen rechten (Jes. 48:17-18). Oba waut es, wan doa haustich waut oppkjemt, wua wie nich met jeräakjent haben? Eenje worden veleicht von wäm enne Famielje aunjeschmäat. Aundre haben groote Trubbels met de Jesuntheit un kjennen nich mea soo väl fa Jehowa doonen. Noch aundre haben must beläwen, waut von grooten Schoden een Owwada aunrechten kaun. Un noch aundre woaren wäajen äaren Gloowen vefolcht. Wan wie soont beläwen motten, dan wunda wie veleicht: “Wuarom es mien Läwen soo aus dit? Hab ekj irjentwaut orrajcht jedonen? Meent daut, Jehowa säajent mie nich?” Hast du die mol soo aus dit jefeelt? Wan jo, dan woa nich mootloos. Väle von Jehowa siene true Deena haben aul must met soone Jefeelen kjamfen (Psa. 22:2-3; Hab. 1:2-3). w23.04 14 V. 1-2

Wan doa eene Vesieekjunk oppkjemt, waut Orrajchtet to denkjen ooda to doonen, dan wies wie daut fuaz auf, wiels wie nich wellen, daut ons Frind sennen met Gott en Jefoa kjemt. Jehowa well, daut wie am “von Hoaten jehuarsom” sent (Reem. 6:17). Wie kjennen nich utwälen, woone Jesazen wie hoolen wellen un woone nich. Oba wie motten doaraun denkjen, daut daut, waut hee von ons velangt, fa ons emma toom Gooden es (Jes. 48:17-18; 1. Kor. 6:9-10). De Soton deit ons hunjsch behaundlen un unja Druck saten, om ons daut schwoa to moaken. Hee well ons “verieten”, daut wie nich mea Frind met Jehowa kjennen sennen (1. Pet. 5:8). De ieeschtemmasche Christen wort daut uk schwoa jemoakt. Väle worden vekjielt un soogoa dootjemoakt, wiels dee faust opp Jehowa siene Sied stonen wullen (Apj. 5:27-28, 40; 7:54-60). De Soton vefolcht Gott siene Deena noch emma. Daut es doaraun to seenen, woo ommenschlich onse Breeda un Sestren en Russlaunt un en aundre Lenda jekjwält woaren un woo de Jäajna sikj opp veschiedne Wäaj jäajen ons stalen. Oba de Soton deit ons nich bloos jlikjtoo aunjriepen; hee brukt uk “hinjalestje Faulen”, ooda jript ons hinjalestich aun (Efs. 6:11). w23.07 15-16 V. 6-9

Je mea du de Bibel studieescht, je jratra woat diene Leew fa Jehowa. Daut brinjt die bat doa, daut uk notokomen, waut du lieescht. De Rot ut de Schreft halpt die, bätre Entscheidungen to moaken. Du lieescht uk, aundasch to denkjen un daut Rajchte to doonen, wäajen du Gott jefaulen west. Krakjt soo aus een Kjint siene leeftolje Elren nodeit, krakjt soo deist du dienen himlischen Voda no (Efs. 5:1-2). Wie kjennen mol doaräwa nodenkjen: “Es miene Leew fa Jehowa nu aul stoakja jeworden aus don, aus ekj mie deepen leet? Denkj ekj nu dolla soo aus Jehowa un bewies daut besonda doaderch, daut ekj miene Breeda un Sestren leew?” Wan diene “ieeschte Leew” uk een bät nojeloten haft, dan woa nich mootloos. Eenje von de ieeschte Christen jinkj daut krakjt soo. Un Jesus jeef nich opp met dee, un dee woat met die uk nich (Opb. 2:4, 7). Hee weet, daut wie dise Leew, waut wie hauden, aus wie de Woarheit kjanen lieden, wada trigjkjrieen kjennen. w23.07 8 V. 2-3

De Apostel Petrus muak veschiedne Fäla. Daut Ieeschte wia, daut Petrus too sea opp sikj selfst vetrud. Hee säd, wan aule aundre Apostel Jesus uk veloten wudden, hee wudd nich (Mar. 14:27-29). Lota schleep Petrus emma wada en un bleef nich waka (Mar. 14:32, 37-41). Dan, aus de Grupp Menschen kjeemen, om Jesus fausttonämen, leet Petrus am auleen (Mar. 14:50). Un dan kjeem daut bat doa, daut Petrus Jesus dree Mol veluach. Hee säd mau rajcht, daut doa een Fluch opp am komen sull, wan hee nich de Woarheit säd (Mar. 14:66-71). Waut deed hee nu, aus hee enwort, daut hee eene growe Sind begonen haud? Hee bruak ennalich toop un funk aun, sea to roaren (Mar. 14:72). Enne Städ daut Jesus Petrus fa siene Fäla trajchtwees, säd hee to siene Frind, daut Petrus noch mea Veauntwuatunk kjrieen wudd (Joh. 21:15-17). Waut es de Lia fa ons? Jehowa well, daut wie ons doaräwa em Kloaren sent, daut hee ons leeft un reed es, ons to vejäwen (Reem. 8:38-39). w24.03 18-19 V. 13-15

Wan wäa Huararie bejeit, kaun daut sennen, daut dee sikj doahinja schämt ooda wieetloos feelt. Daut kaun uk passieren, daut doa wäa schwanga woat ooda daut Famieljes uteneengonen. Un buta daut dee em Jeisteljen stoawen, schlapen sikj eenje soone Krankheiten opp, wua dee werkjlich aun stoawen kjennen. Daut es gaunz kloa, daut kluake Menschen de Enlodunk von de onkluake Fru nich aunnämen. Dee gonen nich no dee “äa Hus” (Spr. 7:23). Spricha, Kapitel 9, Varsch 18 sajcht opp Enj, “daut äare Jast deep em Grauf ligjen”. Wan daut met dee uk soo schlemm utkjemt, wuarom nämen dan soo väl Menschen de onkluake Fru äare Enlodunk aun? (Spr. 9:13-18). Eenje denkjen, daut baudat nuscht, wan eena sikj schwiensche Bilda aunkjikjt. Oba daut stemt nich! Daut es eene groote Jefoa, waut wie utem Stich gonen motten, wiels soone Menschen achten sikj selfst un aundre weinich un dee woaren uk aufhenjich doavon. Schwiensche Bilda saten sikj en de Jedanken soo faust, daut eena doa nich leicht von vejäten kaun. Un dan noch: Orreine Jedanken woaren doavon uk nich weinja, oba bloos noch oaja, wan eena sikj schwiensche Bilda besitt (Kol. 3:5; Jak. 1:14-15). Väl Menschen, waut sikj Schwienschet beseenen, doonen dan uk selfst onmoralische Sachen. w23.06 23 V. 10-11

Wan aundre Lenda uk jäajen Enjlaunt un Stäts komen, woat daut nich eene fresche Weltmacht jäwen. Wie weeten daut, wiels “de Steen”, waut Gott sien Kjennichrikj väastalt, jäajen de Feet däwren woat, waut de Weltmacht Enjlaunt un Stäts väastalt (Dan. 2:34-35, 44-45). Best du die secha, daut Daniel siene Profezeiunk von de Feet, waut von Iesa un jebrenden Leem jemoakt sent, werkjlich soo es? Wan jo, dan woat daut waut aun die doonen. Du woascht nich no Jelt ooda no tietelje Sachen hinjaraun sennen, wiels du weetst, daut dise Welt boolt woat venicht woaren (Luk. 12:16-21; 1. Joh. 2:15-17). Dan woascht du uk seenen, woo wichtich daut es, to prädjen un Jinja to moaken (Mat. 6:33; 28:18-20). Nodäm daut du dise Profezeiunk studieet hast, äwalaj mol: “Es daut aun miene Entscheidungen to seenen, daut ekj mie secha sie, daut Gott sien Kjennichrikj met aule Rejierungen een Enj moaken woat?” w23.08 11 V. 13-14

Sie bescheiden un denkj doaraun, daut du wäajen dien Ella, diene Jesuntheit ooda diene Omstend veleicht nich soo väl doonen kaust, aus du west. Soo aus Barsillai motst du veleicht uk een Väarajcht aufsajen, wan daut wäajen diene Jesuntheit ooda dien Ella schwoa sennen wudd, daut to doonen (2. Sam. 19:36-37). Nemm Help aun, soo aus Moses deed, un jeff aundre von diene Veauntwuatunk, wan daut paussent es (2. Mo. 18:21-22). Wan du bescheiden best, woat die daut halpen, daut du nich daut Jefeel hast, kjeenmol jenuach to doonen. Dan woascht du nich utporren. Wie brucken ons uk nich veauntwuatlich feelen, wan aundre schlajchte Entscheidungen moaken. Wie kjennen nich fa aundre waut entscheiden un wie kjennen dee uk nich emma von de Foljen bewoaren, waut doavon komen, wan dee schlajchte Entscheidungen moaken. Biejlikj kaun daut bat doa komen, daut een Sän ooda Dochta nich mea well Jehowa deenen. Daut kaun de Elren sea toosaten. Oba wan de Elren sikj schuldich feelen fa de Entscheidunk, waut äa Kjint jemoakt haft, dan droagen dee eene sea schwoare Laust met sikj. Jehowa velangt nich, daut dee dise Laust droagen motten (Reem. 14:12). w23.08 29 V. 11-12

Simson wia krakjt soo onvolkomen aus wie un muak eenjemol schlajchte Entscheidungen. Eene schlajchte Entscheidunk, waut Simson muak, haud sea schlemme Foljen. Aus Simson fa een Stoot aus Rechta jedeent haud, “leewd hee eene Fru em Tol Sorek, äa Nomen wia Delila”. Aul ea wull Simson sikj mol met eene Fru von de Filista befrieen, un daut kjeem “vom HARN”, wiels Jehowa “socht eene Uasoak jäajen de Filista”. Lota bleef Simson mol bie eene Hua äa Hus en de Filista äare Staut Gaza. Opp dise Sauz jeef Gott Simson de Krauft, daut dee de Stautspuaten kunn rutrieten, wuaderch de Staut nich mea von äare Jäajna beschizt wia (Rech. 14:1-4; 16:1-3). Oba bie Delila wia daut aundasch, wiels see woomäajlich eene israelitische Fru wia. Daut Simson sikj met ar aufjeef, jeef am nich de Jeläajenheit, jäajen de Filista to kjamfen. Delila leet sikj von de Filista met eene groote Somm Jelt bekjeepen toom Simson veroden. w23.09 5 V. 12-13

Weisheit kaun ons halpen, leeftolich to sennen. Een weisa Mensch kaun sikj beoabeiden, wan doa wäa met am äwa sienen Gloowen strieden well. Well wie daut mol vejlikjen: Wan wie eenen Ies-Boajch oppem Wota seenen, dan see wie bloos een kjlienet Poat doavon; daut jratste Poat es unja Wota un jeit nich to seenen. Krakjt soo es daut, wan een Mensch ons eene Froag stalt. Foaken weet wie nich krakjt, ut waut von Senn dee ons de Froag stalt. Ea wie dän auntwuaten, mott wie em Denkj hoolen, daut wie veleicht nich krakjt weeten, waut werkjlich hinja siene Froag stakjt (Spr. 16:23). Well wie mol seenen, woo Gideon met de Mana von Efraim omjinkj. Dee deeden am doll aunräden, wuarom hee äant nich haud ea jesajcht, daut see met am toop sullen jäajen de Israeliten äare Fiend kjamfen gonen. Oba wuarom wieren dee soo doll? Feelden dee sikj met eenst beleidicht? Krakjt endoont woont de Uasoak wia, Gideon wia weis un proowd to vestonen, woo dee sikj feelden, un jeef äant eene leeftolje Auntwuat. Woo kjeem daut ut? De Schreft sajcht, dan “leet äa Oaja äwa am no” (Rech. 8:1-3). w23.09 15-16 V. 8-9

Daut jeft nich noch eenen Voda un eenen Sän, waut soo enj vebungen sent aus Jehowa un Jesus. Kjeen Twiewel, daut Jehowa daut wee deed, aus hee sach, daut sien Sän schlajcht behaundelt, aufjewäsen un aufjeprooft wort. Jieda Poa Elren, waut daut beläft haft, daut äa Kjint jestorwen es, weeten, woo schwoa daut es. Wie jleewen faust doaraun, daut de Doodes oppstonen woaren, oba doavon gonen de Weedoag nich wajch, daut wäa jestorwen es. Dit Biespel wiest, woo Jehowa sikj dän Dach aune 33 n. Chr. mott jefeelt haben, aus hee sach, daut sien leewa Sän lieden un stoawen must (Mat. 3:17). Proow von nu bat daut Owentmol en dien perseeneljet ooda en daut Famieljenstudium mea äwa daut Leesjelt to lieren. Un vejät uk nich, aun dän Dach von daut Owentmol de besondre Morjenaundacht to kjikjen. Wan du die fein reedmoakst fa daut Owentmol, woascht du uk aundre halpen kjennen, daut dee doa eenen Nutzen von haben kjennen (Esra 7:10). w24.01 11 V. 10-12

Eene Wajch, woo wie von Jehowa Krauft kjrieen kjennen, es, wan wie to am bäden. Un Jehowa kaun onse Jebäda biejlikj doaderch beauntwuaten, daut hee ons “de butajeweenelje Krauft” jeft (2. Kor. 4:7). Wie kjennen uk jestoakjt woaren, wan wie sien Wuat läsen un doaräwa nodenkjen (Psa. 86:11). Jehowa siene Norecht, waut wie enne Schreft finjen, “es kjraftich” (Heb. 4:12). Wan du to Jehowa bätst un sien Wuat läst, woascht du dee Krauft kjrieen, waut die fält toom uthoolen, diene Freid bewoaren ooda uk toom eene schwoare Oppgow utfieren. Well wie nu mol seenen, woo Jehowa dän Profeet Jona Krauft jeef. Jona haud Angst, doahan to gonen, wua Jehowa am hanjeschekjt haud, un doawäajen jinkj hee no een Schepp un brocht sikj fuat. Oba wäajen hee daut jedonen haud, kjeemen hee un de aundre Mana opp daut Schepp meist en eenen grooten Storm todood. Aus de Mana am em Mäa nennschmeeten, wort hee von eenen grooten Fesch oppjeschlukt. Dan wia Jona en dän Fesch, wua aules diesta wia. Waut deed Jona, om Krauft to kjrieen, aus hee gaunz auleen en dän Fesch sienen Pans wia? Hee bäd to Jehowa (Jona 2:2-3, 8). w23.10 13 V. 4-6

De Apostel Petrus schreef siene Breew aun de Christen ieeschtemma, oba Jehowa sach doano, daut dee Poat von sien Wuat worden. Doawäajen kjenn wie doa uk eenen Nutzen von haben (Reem. 15:4). Menschen vondoag dän Dach jleewen daut nich, waut de Bibel verutsajcht. Jäajna spotten veleicht äwa ons, wiels wie aul fa väl Joaren jesajcht haben, daut daut Enj boolt komen woat. Un eenje sajen mau rajcht, daut et kjeenmol komen woat (2. Pet. 3:3-4). Wan een Oabeitspoatna, wäa von onse Famielje ooda wäa em Prädichtdeenst soont sajcht, dan kaun daut onsen Gloowen oppe Proow stalen. Oba Petrus sajcht, waut ons halpen kaun. Daut lat veleicht soo, daut Jehowa too lang wacht met daut Enj von dise Welt brinjen. Oba Petrus siene Wieed halpen ons, doa rajcht nauntokjikjen, wiels dee wiesen ons, daut Jehowa de Tiet aundasch sitt aus wie Menschen (2. Pet. 3:8-9). Fa Jehowa sent dusent Joa soo aus een Dach. Jehowa es jeduldich un well nich, daut doa wäa veloaren jeit. Oba wan sien Dach komen woat, woat hee een Enj moaken met dise Welt. w23.09 26-27 V. 2-5

Wuarom schreef de Apostel Paulus disen Breef aun de hebräische Christen en Judäa? Woomäajlich wäajen twee Uasoaken. Ieeschtens: toom dee Moot jäwen. De mieeschte von dee wieren en dän Judengloowen oppjetrocken. De judische Gloowesleidasch hauden sikj veleicht domm äwa dee, wäajen see Christen worden. Wuarom? Wiels de Christen hauden nich eenen Tempel, wua see kunnen Gott aunbäden; nich mol eenen Aultoa, wua see kunnen een Opfa moaken fa Gott; uk nich Priesta, waut äant bedeenden. Dit wudd Christus siene Nofolja haben kunt mootloos moaken un dee wudden haben kunt schwak em Gloowen woaren (Heb. 3:12, 14). Eenje von dee dochten veleicht mau rajcht doaräwa no, trigjtogonen no dän judischen Gloowen. Tweedens: Paulus säd to dise hebräische Christen, daut see sikj nich aunstrenjen deeden, de niee ooda deepe jeistelje Lieren to vestonen, waut “stoakje Kost” von Gott sien Wuat es (Heb. 5:11-14). Dit wiest, daut eenje sikj noch emma aun Moses sien Jesaz hilden. w23.10 24-25 V. 3-4

Eenje Sestren wälen sikj, onbefriet to bliewen (Mat. 19:10-12). Du kaust die secha sennen, daut Jehowa un Jesus de onbefriede Christen nich fa weinja wieet talen. Oppe gaunze Welt sent soone Sestren eene groote Help en äare Vesaumlunk. Väle seenen dee aus Sestren un Mitta aun, wiels dee aundre Leew wiesen un om aundre bekjemmat sent (Mar. 10:29-30). Eenje Sestren sent Voltietdeena. De Sestren doonen de mieeschte Oabeit en daut Prädichtwoakj äware gaunze Welt (Psa. 68:11). Kaust du die daut nu aul väanämen, Voltietdeena to woaren? Du wurscht kjennen Pionia sennen ooda die fa een Buwoakj aunjäwen ooda fa dän Beteldeenst. Bäd doarom, waut du die väajenomen hast. Räd met aundre doaräwa, waut daut aul jedonen haben, un finj ut, waut du doatoo noch doonen kaust. Un dan doo die daut krakjt äwakalendren. Wan du een Voltietdeena woascht, woascht du väl Scheenet em Deenst fa Jehowa beläwen kjennen. w23.12 22 V. 16-17

Wiels de groote Liedenstiet emma noda kjemt, mott wie em Denkj hoolen, daut et sea needich es, daut wie prädjen. Veleicht es ons daut oba schwoa, wäajen wie Jelttrubbels haben ooda wäajen wie Jäajenstaunt em Prädichtwoakj haben. Waut kaun ons halpen, daut Kjennichrikj aune ieeschte Städ to stalen? Wie kjennen ons doaropp veloten, daut Jehowa opp onse Sied es. Hee woat ons biestonen, wan wie daut Kjennichrikj wieda aune ieeschte Städ stalen un nich onsen ieejnen Nutzen sieekjen. Wie brucken werkjlich kjeene Angst haben (Hag. 2:4). Jehowa well, daut wie ons gaunz doahinja lajen biem Jinja moaken, wäajen daut Läwes rat. Hagai rod Jehowa siene Deena too, fresch aun de heilje Oabeit nauntogonen un wieda aun dän Tempel to buen. Wan dee daut doonen wudden, vespruak Jehowa: “Ekj [woa] junt säajnen” (Hag. 2:18-19). Wie kjennen ons uk gaunz secha sennen, daut Jehowa ons säajnen woat, wan wie dee Oabeit, waut Jehowa ons oppjejäft haft, aun de ieeschte Städ stalen. w23.11 16 V. 8; 17 V. 11

En sienen Breef aun de Reema säd de Apostel Paulus, daut aule Menschen Sinda sent. Woo kjenn wie dan bie Jehowa jerajcht ooda schultloos sennen un am doaderch jefaulen? Om de Christen to halpen, eene Auntwuat opp dise Froag to kjrieen, brukt de Apostel Paulus Abraham aus Biespel. Jehowa säd, daut Abraham jerajcht wia, aus dee noch en Kanaan wond. Wuarom kunn Jehowa daut von Abraham sajen? Wia daut, wäajen Abraham daut Jesaz Moses krakjt nokjeem? Secha nich (Reem. 4:13). Daut Volkj Israel kjrieech daut Jesaz Moses 400 Joa nodäm Gott jesajcht haud, daut Abraham jerajcht wia. Wuarom tald Gott Abraham dan aus jerajcht? Daut wia soo aus een Jeschenkj von Gott, wiels dee eenen stoakjen Gloowen haud (Reem. 4:2-4). w23.12 3 V. 4-5

En deeselwje Nacht, wua Natan dän Kjennich David dit jesajcht haud, säd Jehowa to Natan, daut David dän Tempel nich buen wudd (1. Chr. 17:3, JHF; 17:4, 11-12). Waut deed David, aus hee daut hieed? Hee neem sikj väa, aul dän Toorot un daut Jelt tooptoschaufen, waut sienen Sän Salomo fälen wudd, wan dee ieescht dän Tempel buen wudd (1. Chr. 29:1-5). Fuaz nodäm daut Jehowa to David säd, daut nich hee dän Tempel buen wudd, muak Jehowa eenen Bunt met am. Hee vespruak David, daut eent von siene Nokomen fa emma harschen wudd (2. Sam. 7:16). Denkj mol han, woo schaftich David sennen woat, wan hee ieescht en daut dusentjoasche Rikj es un enwoat, daut Jesus sien Kjennich es, waut von siene Famielje aufstaumt. Jeit die daut uk noch mol soo, daut du nich emma soo väl fa Jehowa doonen kaust, aus du wurscht wellen? Dan woat die de Jeschicht von David halpen to seenen, daut Gott ons aundre goode Sachen jeft, wua wie kjeenmol met jeräakjent hauden. w23.04 15-16 V. 8-10

Eenje Bibelbieekja kjennen die besonda treesten, wan du Angst hast. Du kaust biejlikj Moot kjrieen derch daut Bibelbuak Hiob, Psalm, Spricha ooda Jesus siene Wieed en Matäus, Kapitel 6. Wan du to Jehowa bätst un sien Wuat läst, dan woascht du Troost kjrieen. Wie kjennen ons secha sennen, daut Jehowa ons emma halpen woat, wan wie Schlemmet beläwen. Wie woaren kjeenmol auleen sennen (Psa. 23:4). Jehowa vesprakjt, daut hee ons bewoaren woat un daut hee ons nich faulen loten woat un daut hee ons unjastetten un treesten woat. En Jesaja 26:3 sajcht daut von Jehowa: “Wäa dän Gloowen aun die helt, un sikj gaunz opp die velat, däm jefst du Fräd, ennare Fräd.” Vetru aulsoo opp Jehowa un nutz aul daut ut, waut hee brukt toom die halpen. Wan du daut deist, dan woascht du mau rajcht en schwoare Tieden wada Krauft kjrieen. w24.01 25 V. 16-17

Dise Profezeiunk erfelt sikj vondoag dän Dach. De Bibel rät noch von eene aundre Profezeiunk fa onse Tiet, waut ons Moot jeft. Daut sajcht: “Aul diene Kjinja woaren sikj vom HARN lieren loten, un dee woaren tofräd un sea jlekjlich sennen. Daut woat bie die von Grunt opp rajcht häagonen. Doa woat kjeena sennen waut die unjadrekjt, die woat kjeena enjsten ooda grulen” (Jes. 54:13-14). Mau rajcht de Soton, “de Gott von dise Welt”, woat daut nich opphoolen kjennen, daut Gott siene Deena aundre von Jehowa lieren woaren (2. Kor. 4:4). Nu deen wie Jehowa wada soo, aus hee daut haben well, un daut woat soo bliewen bat en aule Eewichkjeit. Kjeena kaun soont häastalen, waut ons venichten woat! w24.02 4 V. 10

Daut, waut wie Jehowa bie onse Hangow vespruaken, näm wie sea iernst. Wie denkjen doaraun, wan wie waut entscheiden, waut met de Famielje to doonen haft, un wan wie met dee omgonen. Wie kjemren ons doarom, daut dee daut Needje haben. Oba wie stalen emma daut, waut Jehowa von ons velangt, ver daut, waut eenje von onse Famielje sikj wudden wenschen (Mat. 10:35-36; 1. Tim. 5:8). Doawäajen moak wie veleicht eenjemol Entscheidungen, wuaräwa eenje von ons Frintschoft veleicht nich schaftich sent, oba waut Jehowa tofräd moaken. Hee es dee, waut de Famielje jemoakt haft, un hee well, daut wie sellen een scheenet Famieljenläwen haben (Efs. 3:14-15). Wan wie wellen opp iernst schaftich sennen, mott wie daut doonen, waut Jehowa von ons velangt. Du kaust die gaunz secha sennen, daut Jehowa daut sea schazt, wan du die aunstrenjst, am to deenen, un uk fa diene Famielje sorchst un dee met Leew un Respakjt behaundelst (Reem. 12:10). w24.02 18 V. 11, 13