Aungowen fa daut Schoolheft fa Läwen un Deenst
4.-10. NOWAMBA
SCHAZA UT GOTT SIEN WUAT | 1. JOHANES 1-5
“Leeft nich de Welt un daut, waut dee auntobeeden haft”
w05-X 1. 1. 10 V. 13
Nemm die Jesus aus Väabilt
13 Eenje sajen veleicht, daut nich aules en dise Welt orrajcht es. Oba de Welt un daut, waut dee auntobeeden haft, kaun ons doawäajen leicht auflenkjen von Jehova deenen. Nuscht en dise Welt es jemoakt worden, om ons noda no Gott to brinjen. Un wan wie tooloten, daut eene Leew fa de Sachen enne Welt en ons oppkjemt, waut veleicht uk nich onbedinjt schlajcht sent, sent wie opp eenen jefäadeljen Wajch (1. Timotäus 6:9-10). Butadäm es välet en de Welt werkjlich schlajcht un kaun ons vedoawen. Wan wie ons Films ooda Tellewizhen-Programs aunkjikjen wua Jewault, Jeltjia ooda Huararie fa goot jetalt woat, kjennen dise Sachen ons met de Tiet jeweenlich väakomen un dan to eene Vesieekjunk woaren. Wan wie ons mank soone Menschen opphoolen, waut daut ieeschte doarom bedocht sent, em tieteljen wiedatokomen ooda Jeschaften to driewen, kaun daut passieren, daut daut uk fa ons daut wichtichste woat (Matäus 6:24; 1. Korinta 15:33).
w13-X 15. 8. 27 V. 18
Denkj doaraun, waut fa een Mensch du sennen sust
18 Noch eenatlei, waut ons halpt daut to wadastonen, waut de Welt auntobeeden haft, es, daut wie de Wieed em Denkj hoolen, waut Johanes, von Gott enjejäft, säd: “De Welt un waut dee auntobeeden haft woat vegonen. Wäa oba deit waut Gott well, woat eewich bliewen” (1. Johanes 2:17). Dän Soton siene Welt lat soo, aus wudd dee woa sennen un fa emma bliewen. Oba eenen Dach woat dee to Enj komen. Nuscht von daut, waut dän Soton siene Welt aunbitt, es fa emma. Daut em Denkj to hoolen woat ons halpen, daut wie ons nich von dän beesen Fient siene Vesieekjungen enschmeichlen loten.
No jeistelje Schaza sieekjen
w13-X 15. 9. 10 V. 14
Opp Jehova sienen Rot es to vetruen
14 En de Christelje Griechische Schreften woat ons emma wada denkjen jeholpen, daut wie ons sellen unjarenaunda Leew wiesen. Jesus säd, daut tweede von daut jratste Jeboot wia, daut du saust dienen “Noba jrod soo goot sennen aus die selfst” (Mat. 22:39). Un Jesus sien Haulfbrooda Jakobus nand Leew, “daut kjennichliche Jesaz” (Jak. 2:8). De Apostel Johanes schreef: “Leewe Frind, waut ekj junt nu schriew es nich een nieet Jeboot. Daut es daut oole Jeboot, daut jie von Aunfank aun jehieet haben” (1. Joh. 2:7-8). Waut meend Johanes met daut “oole Jeboot”? Hee meend daut Jeboot, daut see sikj sullen leewen. Daut wia oolt, wäajen Jesus haud daut aul aum “Aunfank”, väle Joaren ea jejäft. Oba daut wia uk “nie”, wäajen daut velangd, soone Leew to haben, waut daut ieeschte om aundre bedocht es, waut de Jinja veleicht wudd fälen, wan see ieescht wudden niee Omstend haben. Schaz wie aus Christus siene Nofolja daut nich väl wieet, wan ons fa soone Jesennunk jewoarnt woat, waut bloos fa sikj stritt un en dise Welt sea jeweenlich es un onse Leew fa onsen Näakjsten kolt moaken kaun?
it-2-X 1208 V. 7
Vejäwunk
Daut es rajcht, Gott no Vejäwunk to froagen fa aundre, mau rajcht fa eene gaunze Vesaumlunk. Moses deed daut fa daut gaunze Volkj Israel, hee bekjand dee äare Sind aus Volkj un fruach no Vejäwunk, un Jehova erhieed sien Jebäd (4Mo 14:19-20). Salomo bäd uk, aus de Tempel enjesäajent wort, daut Jehova sien Volkj vejäwen sull, wan dee sindjen wudden un dan omkjieeden von äaren orrajchten Wajch (1Kj 8:30, 33-40, 46-52). Esra räd em Nomen von aul de Juden, waut trigjekomen wieren, un bekjand ver aulemaun, daut dee jesindicht hauden. Sien iernstet Jebäd un siene Vemonunk brocht daut Volkj bat doa, waut to doonen, om Jehova siene Vejäwunk to kjrieen (Esr 9:13–10:4, 10-19, 44). Jakobus muak soone, waut jeistlich krank wieren, Moot, de Eltestasch von de Vesaumlunk to roopen, om fa an to bäden un “wan hee Sind begonen haft, dee woat am vejäft woaren” (Jak 5:14-16). Oba doa es “eene Sind, dee toom Doot fieet”, daut es de Sind jäajen dän heiljen Jeist. Dit bediet, daut eena met fliet dise Sind bejeit, wua daut kjeene Vejäwunk fäa jeft. Een Christ sull nich fa soone bäden, waut opp dise Wajch sindjen (1Jo 5:16; Mat 12:31; Heb 10:26-27; see GEIST; SÜNDE).
11.-17. NOWAMBA
SCHAZA UT GOTT SIEN WUAT | 2. JOHANES 1 – JUDAS
“Wie motten kjamfen toom enne Woarheit bliewen”
w04-X 15. 9. 11-12 V. 8-9
“Sorcht doafäa, daut jie stoakj woaren derch dee Krauft, dee de Har junt jeft”
8 Wie sent nich em onkloaren, waut de Soton väahaft, wiels de Schreft openboat ons, waut dän Soton siene Schlenjen sent (2. Korinta 2:11). Jäajen dän jerajchten Maun Hiob brukt de beesa Fient schlemme Jelttrubbels, dän Doot von siene leewe Aunjehieeje, Wadastaunt von siene Famielje, Krankheiten un ojjerajchte Beschuldjungen von faulsche Frind. Hiob kjeem gaunz rauf un feeld sikj soo, daut Gott am veloten haud (Hiob 10:1-2). Wan de Soton soone Trubbels vondoag dän Dach veleicht uk nich jlikjtoo veuasoakt, saten dee väle Christen oba väl too un de beesa Fient nuzt daut ut un kaun soone Trubbels brucken.
9 Onse jeistelje Jesennunk es en dise latste Tiet en jratre Jefoa, aus jeemols ea. Wie läwen en eene Welt, wua nom Jelt hinjaraun sennen wichtja es, aus no jeisteljet to sträwen. En Films, Tellewizhen un Internet woat emma wada jewäsen, daut vebodnet Jeschlajchtsvekjia jlekjlich moakt enne Städ, daut et väl Sorjen un Trubbels met sikj brinjt. Un de Mierheit haft “daut Vejnieejen leewa . . . aus Gott” (2. Timotäus 3:1-5). Soon Denkjen, kaun ons jeisteljet Jlikjjewicht en Jefoa brinjen, buta wie doonen “fa dän Gloowen . . . kjamfen” (Judas 3).
No jeistelje Schaza sieekjen
it-2-X 220
Jemeenschoftsmolen
De Schreft beschrift nich, woo dise Jemeenschoftsmolen wieren un sajcht uk nich, woo foaken dee jehoolen worden (Jud 12). Dee worden nich von dän Harn Jesus Christus ooda von siene Apostel väajeschräwen, un daut schient kloa to sennen, daut dee nich aus een Jeboot ooda fa emma jedocht wieren. Eenje sajen, daut wieren Fasten, wua dee Christen, waut em Tieteljen goot auf wieren, äare oame Breeda enloden deeden. De Rikje un dee, waut nich soo goot auf wieren un de Wätfrues un Kjinja onen Vodasch, wieren aula toop aun eenen vollen Desch en Eenichkjeit soo aus Breeda.
it-1-X 724
Steen
Een aundret griechischet Wuat, spilás, meent secha een Steen ooda een Biet hoade Ieed, waut unja Wota vestoaken es. Daut woat von Judas aus een Vejlikj jebrukt fa jewesse Mana, waut sikj en de christelje Vesaumlunk nenjeschlikjt hauden met schlajchte Aufsechten. Soo aus vestoakne Steena eene Jefoa fa Schäp wieren, soo wieren dise Mana eene groote Jefoa fa aundre en de Vesaumlunk. Hee sajcht von soone Mana: “Dise Menschen sent [Steena, waut unja Wota sent, NW] . . . bie june Jemeenschoftsmolen, un schmarotzen onen sikj to schämen. See sorjen bloos fa sikj. See sent Wolkjen onen Räajen vom Wint han un häa jeblost. See sent Hoafstbeem onen Frucht, utjeräten un dobbelt doot” (Judas 12).
(Judas 14, NW) Jo, Henoch, de säwenda von Adam, profezeid uk von dee, aus hee säd: “Kjikjt! Jehova kjeem met siene tieendusende Heilje,
(Judas 15, De Plautdietsche Bibel) om Jerecht to hoolen un aule gottloose fa äa gottlooset Läwen to strofen, wuamet see gottloos jewast sent, un uk fa aul dee frajche Wieed, dee de gottloose Sinda jäajen am jerät haben.
wp17.1-X 12 V. 1
Gott haud aun am Jefaulen
Waut wia Henoch siene Profezeiunk? Dee wia soo aus dit: “Kjikj! Jehova kjeem met siene tieendusende Heilje, om Jerecht to hoolen un aule gottloose fa äa gottlooset Läwen to strofen, wuamet see gottloos jewast sent, un uk fa aul dee frajche Wieed, dee de gottloose Sinda jäajen am jerät haben” (Judas 14, NW; Judas 15). Daut ieeschte, waut die veleicht oppfelt, es, daut Henoch en de Vegonenheit rät, aus wan Gott daut aul wudd jedonen haben, waut de Profezeiunk beschrift. Daut es een Moddel, woo lota väle Profezeiungen oppjeschräwen worden. De Iedee es dise: De Profeet rät met soone Sechaheit von waut, waut noch passieren woat, aus wan daut aul wudd passieet sennen! (Jesaja 46:10).
wp17.1-X 12 V. 3
Gott haud aun am Jefaulen
Henoch sien Gloowen brinjt ons veleicht batem nodenkjen, aus wie de Welt, wua wie bennen läwen, soo seenen, aus Gott dee sitt. Daut Jerecht, waut Henoch bekaunt muak, licht noch emma ver ons; daut paust fa de vondoagsche Welt noch krakjt soo, aus fa de Welt to Henoch siene Tiet. Soo aus Henoch daut verutjesajcht haud, brocht Jehova de groote Sintflut jäajen dee gottloose Welt en Noah siene Tiet. Oba jane Venichtunk es een Moddel fa de jratre Venichtunk, waut noch komen woat (Matäus 24:38-39, NW; 2. Petrus 2:4-6). Soo aus don, steit Gott vondoag dän Dach uk reed met siene tieendusende Heilje, om een jerajchtet Jerecht äwa eene gottloose Welt to brinjen. Jieda eena von ons mott Henoch siene Woarnunk to Hoaten nämen un dee met aundre metdeelen. Onse Famielje un Frind gonen ons veleicht utem Stich un wie feelen ons eenjemol velicht auleen. Oba Jehova veleet Henoch kjeenmol un hee woat siene true Deena vondoag dän Dach uk kjeenmol veloten!
18.-24. NOWAMBA
SCHAZA UT GOTT SIEN WUAT | OPENBOARUNK 1-3
“Ekj weet om diene Woakjen om”
w12-X 15. 10. 14 V. 8
Waut wiest du fa eene Enstalunk?
8 Om soone Enstalunk väatobieejen, sell wie em Denkj hoolen, daut Jesus en de Schreft beschräwen woat, daut hee “en siene rajchte Haunt . . . säwen Stierns” haft. De “Stierns” stalen de jesaulwde Oppsechta väa, un em jratren jenomen, aul de Oppsechta von de Vesaumlungen. Jesus kaun de “Stierns” en siene Haunt opp soone Wajch leiden, aus hee daut fa paussent aunsitt (Opb. 1:16, 20). Doawäajen haft Jesus, aus Haupt von de christelje Vesaumlunk, de gaunze Kontroll äwa aul de Gruppen von Eltestasch. Wan eenen Eltesten en eene Grupp Eltestasch fält trajchttostalen, woat dee, waut “Uagen aus eene Fiaflaum” haft, doano seenen, daut daut to de rajchte Tiet un oppe rajchte Wajch jedonen woat (Opb. 1:14). En de Tweschentiet woa wie dee, waut von dän heiljen Jeist enjesat sent, Respakjt wiesen, wiels Paulus schreef: “Horcht no june Liera un schekjt junt to daut waut see junt sajen. Dee woaken äwa june Seelen un motten doafäa Räakjenschoft aufjäwen. Daut es bäta fa junt, wan dee daut met Freid doonen kjennen un nich met stänen” (Heb. 13:17).
w12-X 15. 4. 29 V. 11
Jehova beschizt ons, daut wie jerat woaren
11 En de Vision, waut en Openboarunk Kapitel 2 un 3 oppjeschräwen es, deit de veharlichta Jesus Christus de säwen Vesaumlungen von Kjlien-Asien unjasieekjen. De Vision wiest, daut Christus nich bloos sitt, woo daut em gaunzen steit, oba hee sitt uk jieda eenselne Loag. Eenjemol nant hee soogoa Menschen biem Nomen, un en jieda Faul deit hee, waut doa needich es, entwäda lowen ooda Rot jäwen. Waut wiest ons daut? En de Erfellunk von dise Vision stalen de säwen Vesaumlungen de jesaulwde Christen no 1914 väa, un de Rot, waut de säwen Vesaumlungen jejäft wort, paust en Werkjlichkjeit fa aul de Vesaumlungen von Gott sien Volkj opp de gaunze Ieed. Doawäajen kjenn wie sajen, daut Jehova sien Volkj vondoag dän Dach derch sienen Sän leit. Woo kjenn wie von dise Leidunk Nutzen kjrieen?
w01-X 15. 1. 20-21 V. 20
Go met Jehova siene Organisazion met
20 Wäa met Jehova siene Organisazion metkomen well, mott aunerkjanen, daut Gott Jesus aus Haupt von de Vesaumlunk enjesat haft (Efeesa 5:22-23). Daut es uk to beachten, waut Jesaja 55:4 (Friesenbibel) sajcht: “Tjitj, ekj [Jehova] ha ahm too eenem Zeije fe de Veltja jesat, toom Ferscht en Jebeeda de Natsjoone”. Jesus weet sikj werkjlich met de Leidunk. Hee kjant uk siene Schop un dee äare Woakjen. Aus hee de säwen Vesaumlungen en Kjlien-Asien unjasocht, säd hee fief Mol: “Ekj weet om diene Woakjen” (Openboarunk 2:2, 19; 3:1, 8, 15). Jesus weet uk om onse Bederfnisen, soo aus sien Voda, Jehova. Ea Jesus daut “Unser-Vater”-Jebäd lieed, säd hee: “Jun Voda weet waut jie brucken, ea jie doarom bäden” (Matäus 6:8-13).
No jeistelje Schaza sieekjen
kr-X 226 V. 10
Gott sien Kjennichrikj moakt een Enj met siene Fiend
10 Daut Jerecht woat bekauntjemoakt. Aule Fiend von Gott sien Kjennichrikj woaren dan jedwungen sennen, waut to seenen, waut äare Angst un Lieden noch jrata moaken woat. Jesus sajcht: “Dan woaren de Menschen dän Menschensän en de Wolkjen en groote Krauft un Harlichkjeit komen seenen” (Mar. 13:26). Daut Jesus siene Krauft opp soone butajeweenelje Wajch wiest, woat een Tieekjen doafäa sennen, daut hee jekomen es, om Jerecht bekaunt to moaken. En een aundret Poat von deeselwje Profezeiunk, äwa de latste Tiet, jeft Jesus mea Eenselheiten äwa daut Jerecht, waut to dise Tiet woat bekaunt jemoakt woaren. Daut finj wie en daut Jlikjnis von de Schop un de Bakj (läs Matäus 25:31-33; 25:46, NW). Dee, waut Gott sien Kjennichrikj tru unjastetten, woaren aus “Schop” jetalt woaren un woaren “de Kjap opp[häwen]” un enseenen, daut “sikj [äare] . . . Radunk nodat” (Luk. 21:28). Oba dee, waut jäajen daut Kjennichrikj schaufen, woaren aus “Bakj” jetalt woaren un woaren “jaumareare (sich aun de Brost schlohne)” un enseenen, daut de “eewje Aufschniedunk” fa an reed es (Mat. 24:30, Friesenbibel; Opb. 1:7).
w09-X 15. 1. 31 V. 1
Besondret von daut Buak Openboarunk (Poat 1)
2:7 – Waut es “Gott sien Paradies”? Wäajen dise Wieed aun jesaulwde Christen jerecht sent, mott dit Paradies dän Himmel väastalen – wua Gott selfst wont. De true Jesaulwde woaren doaderch beloont woaren, daut see von dän “Läwensboom” woaren äten kjennen – dee woaren Onstoaflichkjeit kjrieen (1. Kor. 15:53).
25. NOWAMBA – 1. DEZAMBA
SCHAZA UT GOTT SIEN WUAT | OPENBOARUNK 4-6
“Daut rieden von de vea Rittasch”
wp17.3-X 4 V. 3
Wäa sent de vea Rittasch?
Wäa es de Ritta opp daut witte Pieet? Wäa daut es, kjenn wie derch daut vestonen, waut dautselwje Bibelbuak, Openboarunk, sajcht. Doa woat dis himlischa Ritta lota “daut Gotteswuat” jenant (Openboarunk 19:11-13). Dis Tietel, daut Wuat, jehieet Jesus Christus, wiels hee deent aus Gott sien Wuatfiera (Johanes 1:1, 14). Butadäm woat hee “Kjennich äwa de Kjennichs, un Har äwa de Haren” jenant un woat beschräwen aus “Tru un Woarhauftich” (Openboarunk 19:16). Daut es kloa, daut hee aunjestalt es, een Kjrieja-Kjennich to sennen, un hee brukt siene Krauft kjeenmol opp irjenteene orrajchte ooda äwadräwne Wajch. Oba daut brinjt een poa Froagen opp.
wp17.3-X 4 V. 5
Wäa sent de vea Rittasch?
Wanea fungen de Rittasch aun to rieden? Wie motten ons moakjen, daut de ieeschta Ritta, Jesus, loosrieden deit, nodäm daut hee eene Kroon jekjräajen haft (Openboarunk 6:2). Wanea wort Jesus em Himmel eene Kroon aus Kjennich jejäft? Daut wia nich fuaz nodäm daut hee no sienen Doot trigj nom Himmel fua. De Schreft wiest, daut hee don ieescht must fa eene Tiet wachten (Hebräa 10:12-13). Jesus jeef siene Nofolja eene Help, woo see wudden seenen kjennen, daut siene Tiet toom wachten äwa wia un sien harschen em Himmel aunjefongen haud. Hee säd, daut wan hee ieescht wudd aunfangen em Himmel to harschen, wudden de Omstend oppe Welt sikj haustich toom schlajchten veendren. Daut wudd Kjrich, Hungaschnoot un Pestilenz jäwen (Matäus 24:3, 7; Lukas 21:10-11). Boolt nodäm daut de Ieeschta Weltkjrich em Joa 1914 utbruak, wort daut kloa, daut de Menschheit en dise Tiet nenjegonen wia, eene Tiet von Trubbel opp de Ieed. De Schreft nant dee “de latste Doag” (2. Timotäus 3:1-5).
wp17.3-X 5 V. 2
Wäa sent de vea Rittasch?
Dis Ritta stalt Kjrich väa. Dee nemt dän Fräd nich bloos von een poa Lenda wajch, oba von de gaunze Ieed. En 1914 bruak toom ieeschte Mol een Weltkjrich ut. Un hinja dän kjeem de Tweeda Weltkjrich, un dee wia noch väl oaja. Eenje taksieren, daut en Kjriej un Oneenichkjeiten von 1914 aun mea aus 100 Millionen Menschen todood jekomen sent! Butadäm worden väl aundre Menschen schwoa velazt.
wp17.3-X 5 V. 4-5
Wäa sent de vea Rittasch?
“Ekj kjikjt, un sach ver mie een schwoatet Pieet. Un dee doabowen saut, haud eene Wichtschol en de Haunt. Un ekj hieed unja de vea Tieren eene Stemm sajen: Weit fa een Dach fa een Doages Loon, ooda Joascht fa dree Doag fa een Doages Loon. Oba Wien un Eelj doo kjeen Schoden!” (Openboarunk 6:5-6).
Dis Ritta stalt Hungaschnoot väa. Wie finjen hia, daut daut Äten soo knaup toojedeelt woat, daut een bät äwa een Lieta (1 Kwoat) Weit wudd eenen Denarius kosten, daut wia en daut ieeschte Joahundat een gaunzet Dachloon! (Matäus 20:2). Met dautselwje Jeltstekj wudden se haben kunt 3.24 Lieta (3 Kwoat) Joascht kjeepen, een Jeträajd, waut weinja wieet jetalt wort aus Weit. Woo wiet wudd daut rieekjen toom eene groote Famielje feeden? Dan woat de Menschen jesajcht, daut see sellen spoasom sennen, mau rajcht met daut Ätwoa fa jieda Dach. Daut woat hia paussent met soon Ätwoa väajestalt, waut fa de Menschen to jane Tiet un en jane Jäajent gaunz jeweenlich wia, soo aus Olieweneelj un Wien.
wp17.3-X 5 V. 8-10
Wäa sent de vea Rittasch?
De vieeda Ritta stalt dän Doot, derch Ploagen un aundre Uasoaken, väa. Meist fuaz no 1914 muak de Spaunische Jripp Millionende Menschen doot. Daut es mäajlich, daut 500 Millionen Menschen dise Jripp hauden, ojjefäa 1 von jieda 3 Menschen, waut to dee Tiet läwden!
Oba de spaunische Jripp wia mau bloos de Aunfank. De Jelieede taksieren, daut vonne 1900 bat de 2000 hundade Millionen Menschen aun Pocken jestorwen sent. Bat vondoag dän Dach stoawen Millionende Menschen junk, wäajen AIDS (SIDA), Tuberkulose un Malaria, uk wan se aul haben sea äwa Medizien fa soone Krankheiten nojeforscht.
Waut doabie rutkjemt es dautselwje: De Doot – entwäda derch Kjrich, Hungaschnoot ooda Ploagen. Daut Grauf saumelt sikj dee aula toop, waut doaderch stoawen, un wiest kjeen Metleet un jeft kjeene Hopninj.
No jeistelje Schaza sieekjen
re-X 76 V. 8
De Harlichkjeit von Jehova sienen himlischen Troon
8 Johanes wist, daut de Priesta enjesat worden, om en daut oole Aunbädungszelt to deenen. Veleicht wia hee äwarauscht, aus hee daut sach, waut hee nu beschrift: “Un om dän Troon wieren 24 aundre Troons, un opp de Troons sauten 24 Eltestasch, met witte Kjleeda aunjetrocken. Dee hauden goldne Kroonen opp de Kjap” (Openboarunk 4:4). Jo, enne Städ Priesta wieren doa 24 Eltestasch opp Troons un met Kroonen soo aus Kjennichs. Wäa sent dise Eltestasch? Daut sent de Jesaulwde von de Christenvesaumlunk, waut vom Doot oppjestonen sent un de Oppgow em Himmel kjrieen, waut Jehova an vesproaken haft. Woo weet wie daut?
re-X 80 V. 19
De Harlichkjeit von Jehova sienen himlischen Troon
19 Waut stalen dise Tieren, ooda Jeschepfa, väa? Eene Vision von eenen aundren Profeet, Hesekiel, halpt ons de Auntwuat to finjen. Hesekiel sach Jehova opp eenen Troon opp eenen himlischen Woagen. Doa wieren uk läwendje Jeschepfa bie, waut dee änlich wieren, waut Johanes beschrift (Hesekiel 1:5-11, 22-28). Lota sach Hesekiel wada dän Troon opp dän Woagen met de läwendje Jeschepfa. Ditmol nant hee dise läwendje Jeschepfa oba Cheruben (Hesekiel 10:9-15). De vea läwendje Jeschepfa, waut Johanes sitt, motten Gott siene väle Cheruben väastalen – Jeschepfa met een huaget Aumt en siene jeistelje Organisazion. Fa Johanes wudd daut nuscht framdet sennen, Cheruben soo dicht bie Jehova to seenen, wiels en daut Aunbädungszelt wieren twee goldne Cheruben opp daut Dakjsel von de Bundeskjist. De Bundeskjist stald Jehova sienen Troon väa. Von tweschen de beid Cheruben säd Jehova siene Stemm daut Volkj, waut see doonen sullen (2. Mose 25:22; Psalm 80:2).
cf-X 36 V. 5-6
“Kjikj emol! De Leiw von Juda sien Staum”
5 De Leiw woat foaken aus een Bilt fa Moot jebrukt. Hast du mol eenen utjewosnen Leiw en de Uagen jekjikjt? Wan jo, dan es daut meist secha, daut doa een Schutz tweschen die un dän Leiw wia, veleicht de Tun von eenen Tierengoaden. Oba eena kaun mau rajcht dan noch Angst kjrieen. Wan eena soo een grootet un stoakjet Tia em Jesecht kjikjt un daut eenem aungloat, dan kaun eena sikj schlajcht väastalen, daut een Leiw fa irjentwaut ut Angst wudd wajchranen. De Schreft nant dän “Leiw, jewaultich mank de Tieren, dee fa nuscht trigj jeit” (Spricha 30:30). Soo eenen Moot haft Christus.
6 Well wie mol seenen, woo Jesus opp dree Wäaj Moot wees, soo aus een Leiw: Aus hee sikj fa de Woarheit ensad, aus hee fa Jerajchtichkjeit enstunt un aus hee met Wadastaunt to doonen kjrieech. Wie woaren uk seenen, daut jieda eena von ons Jesus nodoonen kaun un Moot wiesen, aus wie nu von kjlien aun äwanäment sent ooda nich.