Woo de Vesaumlunk de Bibelstudiums halpen kaun, sikj deepen to loten

1-2. Wäa kaun methalpen, daut een Bibelschiela veraunkjemt un sikj deepen lat?

AMY, waut en Fidschi wont, sajcht: “Ekj jleicht daut, waut ekj lieed, aus ekj de Bibel studieed, un ekj wist, daut et de Woarheit wia. Oba aus ekj aunfunk, met de Breeda un Sestren toop to sennen, kunn ekj mie endren un met de Tiet deepen loten.” Von dit kjenn wie waut wichtjet lieren: Eenen Bibelschiela woat daut leichta sennen, verauntokomen un sikj deepen to loten, wan aundre von de Vesaumlunk dän halpen.

² Jieda Vekjindja kaun methalpen, daut de Vesaumlunk jrata woat (Efs. 4:16). Eene Pionia-Sesta, waut Leilani heet un en Vanuatu wont, sajcht: “Eenjemol woat doa jesajcht, daut brukt eene Häad Menschen toom een Kjint opptrakjen. Ekj jleew, bie daut Jinja moaken es daut krakjt soo. Jeweenlich brukt daut eene gaunze Vesaumlunk toom wäm halpen en de Woarheit nentokomen.” Bat een Kjint groot es, haben de Famielje, de Frind un de Liera aula metjeholpen, wiels dee daut Kjint Moot toospruaken un wichtje Sachen lieeden. Biejlikj soo kjennen de Vekjindja de Bibelschiela Rot jäwen, Moot toospräakjen un een goodet Biespel fa dee sennen. Soo halpen dee an verauntokomen, daut dee sikj kjennen deepen loten (Spr. 15:22).

3. Waut kjenn wie von Ana, Dorin un Leilani lieren?

³ Wuarom saul een Bibelliera daut wellich aunnämen, wan aundre sien Bibelstudium halpen wellen? Ana, eene Sondapionia en Moldawien, sajcht: “Wan een Bibelschiela veraunkjemt, dan brukt dee väl Help un daut es sea schwoa fa eenen auleen.” Dorin es en dautselwje Launt Sondapionia. Hee sajcht: “Foaken sajen aundre Vekjindja waut, waut dän Bibelschiela to Hoaten jeit un wua ekj kjeenmol wudd aun jedocht haben.” Un Leilani sajcht noch: “Wan de Breeda un Sestren dän Bibelschiela Leew wiesen un om dän bekjemmat sent, dan woat dee leichta enwoaren, daut wie werkjlich Jehova siene Deena sent” (Joh. 13:35).

4. Waut woa wie en disen Artikjel seenen?

⁴ Veleicht denkj wie: “Woo kaun ekj een Bibelstudium halpen, wan ekj doch goanich met dän studia?” Well wie mol seenen, waut wie doonen kjennen, wan wie bie een Bibelstudium met bie sent ooda wan een Bibelstudium no de Toopkomes kjemt. Un wie woaren uk seenen, woo de Eltestasch de Bibelschiela halpen kjennen.

WAN WIE BIE EEN BIBELSTUDIUM MET BIE SENT

5. Waut sell wie doonen, wan wie bie een Bibelstudium met bie sent?

⁵ Bie een Bibelstudium es daut ieeschte de Liera doafäa veauntwuatlich, Gott sien Wuat fein uttolajen. Wan dee die metnemt, dan best du dän sien Poatna un saust dän unjastetten (Liera 4:9-10). Oba waut kaust du doonen toom een feina Poatna sennen?

6. Woo kjenn wie daut nokomen, waut Spricha 20:18 sajcht, wan wie bie een Bibelstudium met bie sennen woaren?

⁶ Moak die fa daut Bibelstudium reed. Froag dän Liera waut äwa daut Studium (läs Spricha 20:18). Du wurscht biejlikj kjennen froagen: “Waut weetst du äwa dän Bibelschiela? Waut fa een Teema woa jie derchgonen? Waut west du dän ditmol lieren? Es doa waut, waut ekj sajen ooda doonen saul ooda waut ekj bie dit Studium nich sajen un nich doonen saul? Woo wudd ekj dän kjennen Moot jäwen, daut dee veraunkjemt?” Eene Missionoa-Sesta, waut Joy heet, rät met dee, waut see met no äare Bibelstudiums nemt, äwa soone Froagen. See sajcht: “Daut halpt miene Poatna, daut see sikj fa dän Bibelschiela intressieren un daut see weeten, woo see mie bie daut Studium halpen kjennen.” Daut, waut de Liera to sienen Poatna sajcht, kaun eene groote Help sennen, oba dee wudd kjeenmol soont wiedasajen, waut aundre nuscht aunjeit.

7. Wuarom sell wie ons fein reedmoaken, wan wie bie een Bibelstudium met bie sent?

⁷ Wan du bie een Bibelstudium met bie sennen kaust, dan wudd daut fein sennen, wan du die em verut reedmoaken kust (Esra 7:10). Dorin, de Brooda, wua wie aul ea von räden, sajcht: “Ekj jleich daut, wan mien Poatna sikj fa daut Studium reedjemoakt haft. Dan kaun hee doa fein metmoaken.” Un de Bibelschiela woat daut secha moakjen, daut jie junt beid fein reedjemoakt haben, un daut es een goodet Biespel fa dän. Wan daut mol nich mäajlich es, die fein reedtomoaken, dan nemm die weens een beskje Tiet toom die met de Hauptjedanken aufjäwen.

8. Waut kjenn wie doonen, daut wie bie een Bibelstudium fein bäden kjennen?

⁸ Daut Jebäd es sea wichtich bie een Bibelstudium. Doawäajen denkj em verut doaräwa no, waut du sajen kaust, wan se die froagen, aus du nich bäden west. Dan woat dien Jebäd secha mea enhoolen (Psa. 141:2). Hanae, waut en Jaupaun wont, denkjt daut noch emma, woo dee Sesta bäden deed, waut met äaren Bibelliera toop no ar kjeem. See sajcht: “Ekj wort en, woo sea dee Jehova toom Frint haud, un ekj wull soo sennen aus dee. Un wan dee biem bäden mienen Nomen brukt, dan feeld ekj mie jeleeft.”

9. Woo kjenn wie no Jakobus 1:19 no bie een Bibelstudium een feina Poatna sennen?

⁹ Halp dän Bibelliera bie daut Studium. Omamuyovbi, eene Sondapionia en Nigeria, sajcht: “Een feina Poatna horcht bie daut Studium goot too. Dee sajcht uk waut, waut doa biepaust, oba dee rät nich selfst too väl, wiels daut es dän Liera siene Oppgow.” Woo kaun eena weeten, wanea eena waut sajen saul un waut? (Spr. 25:11). Horch goot too, wan de Liera un de Bibelschiela vetalen (läs Jakobus 1:19). Soo woascht du halpen kjennen, wan daut paussent es. Denkj goot no, ea du waut sajchst. Wie wudden biejlikj nich wellen selfst too väl räden ooda dän Bibelliera doa mankräden, wan dee waut utlajcht, ooda von een gaunz aundret Teema räden. Oba wie kjennen halpen, waut uttolajen, wan wie doa een bät waut too sajen ooda een Jlikjnis brucken ooda eene Froag stalen. Eenjemol späat sikj ons daut veleicht soo, daut wie doa goanich väl doonen kjennen. Oba wan wie dän Bibelschiela lowen un om dän bekjemmat sent, dan kaun dän daut eene groote Help sennen, verauntokomen.

10. Woo kaun eenen Bibelschiela daut halpen, waut wie beläft haben?

¹⁰ Vetal, waut du beläft hast. Wan daut paussent es, dan wurscht du dän Bibelschiela een bät vetalen kjennen, woo du de Woarheit kjanen jelieet hast ooda woo du met eenen Trubbel kust foadich woaren ooda woo Jehova die mol jeholpen haft (Psa. 78:4, 7). Daut kaun krakjt daut sennen, waut dän Bibelschiela fält. Daut kaun dän em Gloowen stoakjen ooda Moot jäwen, daut dee wiedamoakt un sikj deepen lat. Un veleicht halpt am daut uk, met siene ieejne Trubbels foadich to woaren (1. Pet. 5:9). Gabriel, een Pionia en Brasilien, weet noch, waut am holp, aus hee de Bibel studieed. Hee sajcht: “Aus ekj daut hieed, waut de Breeda beläft hauden, wort ekj en, daut Jehova sitt, waut wie derchmoaken. Un wan dee met äare Schwierichkjeiten foadich woaren kunnen, dan kaun ekj daut uk.”

WAN EEN BIBELSCHIELA NO DE TOOPKOMES KJEMT

11-12. Wuarom sell wie de Bibelstudiums fein oppnämen, wan dee no de Toopkomes komen?

¹¹ Daut een Bibelschiela sikj kaun deepen loten, mott dee pinkjlich no de Toopkomes komen. Daut woat dän halpen, verauntokomen (Heb. 10:24-25). Jeweenlich woat dän sien Liera dän daut ieeschte doa hankroagen. Wan dee dan nom Vesaumlungshus kjemt, dan kjenn wie aula waut doatoo doonen, daut dee wadakomen well. Waut wudd wie biejlikj doonen kjennen?

¹² Nemm dän Bibelschiela leeftolich opp (Reem. 15:7). Wan wie dän bie de Toopkomes leeftolich oppnämen, dan woat dän daut dolla jankren, wada nom Vesaumlungshus to komen. Bejreess dän leeftolich un saj dän, wäa de aundre sent, oba äwadriew daut nich. Räd een bät met dän, wiels woomäajlich es dän sien Bibelliera noch nich doa ooda mott waut aundret doonen. Horch dän Bibelschiela goot too un wies, daut du om dän bekjemmat best. Waut kaun daut aun dän doonen? Dmitrii, waut sikj een poa Joa trigj deepen leet un nu een Deenstaumthelpa es, denkjt daut noch von sien ieeschtet Toopkomen. Hee sajcht: “Een Brooda sach, daut ekj doa gaunz nerwees verem Vesaumlungshus stunt, un bejreest mie leeftolich un jinkj met mie toop doa nenn. Väle kjeemen un bejreesten mie. Daut wundad mie sea. Ekj jleicht daut soo sea, daut ekj daut leefste jieda Dach wudd bie een Toopkomen jewast sennen. Soont haud ekj noch kjeenmol ea beläft.”

13. Waut kjennen onse goode Woakjen aun eenen Bibelschiela doonen?

¹³ Sie een goodet Biespel. Onse goode Woakjen kjennen eenen Bibelschiela halpen to vestonen, daut hee dän woaren Gloowen jefungen haft (Mat. 5:16). Vitalii, een Pionia en Moldawien, sajcht: “Ekj sach, woo de aundre von de Vesaumlunk läwden un dochten un woo dee sikj oppstalden. Daut wees mie, daut Jehova siene Zeijen werkjlich Gott siene Deena sent.”

14. Woo kaun ons Biespel aundre halpen verauntokomen?

¹⁴ Daut een Bibelschiela sikj kaun deepen loten, mott dee daut nokomen, waut dee lieet. Daut es nich emma leicht. Oba wan dee sitt, woo ons daut togood kjemt, no biblische Gruntsauzen to läwen, dan well dee daut secha uk (1. Kor. 11:1). Soo wia daut bie Hanae, wua wie aul von jerät haben. See sajcht: “De Breeda un Sestren deeden aul krakjt daut, waut ekj lieed. Aun dee sach ekj, woo ekj aundre Moot toospräakjen un vejäwen un Leew wiesen kunn. Dee räden emma goot von aundre un ekj wull krakjt soo sennen aus dee.”

15. Wuarom sell wie no Spricha 27:17 no met soone Bibelstudiums Frind woaren, waut no de Toopkomes wanken?

¹⁵ Moak die dän Bibelschiela toom Frint. Intressia die fa dän, wan dee no de Toopkomes kjemt (Filip. 2:4). Wie wudden biejlikj kjennen met dän vetalen. Wie wudden dän kjennen lowen fa daut, waut dee jeendat haft, un froagen, woo daut met sien Bibelstudium un met siene Famielje un siene Oabeit jeit, oba nich soo, daut dee sikj doa schlajcht äwa feelt. Opp dee Wajch kjenn wie met dän Frind woaren un dän halpen verauntokomen un sikj deepen to loten (läs Spricha 27:17). Hanae es nu Pionia. Woo wia daut, aus see aunfunk no de Toopkomes to wanken? See sajcht: “Aus ekj en de Vesaumlunk Frind kjrieech, freid ekj mie emma to de Toopkomes un wankt doa mau rajcht dan han, wan ekj meed wia. Mie jinkj daut scheen, met miene niee Frind toop to sennen, un daut holp mie, dee Frind tochtoloten, waut Jehova nich deenden. Ekj wull Jehova un de Breeda un Sestren noda komen un wort mie eenich mie deepen to loten.”

16. Woo kjenn wie eenen Bibelschiela halpen, daut dee sikj aus Poat von de Vesaumlunk feelt?

¹⁶ Wan een Bibelschiela veraunkjemt un sikj endat, dan wies dän, daut dee Poat von de Vesaumlunk es. Du wurscht dän mol kjennen no junt kroagen (Heb. 13:2). Denis, waut en Moldawien wont, denkjt daut noch goot, woo daut wia, aus hee de Bibel studieed. Hee sajcht: “De Breeda deeden mie un miene Fru ieremol hankroagen. Dee vetalden, woo Jehova an jeholpen haud, un daut jeef ons väl Moot. Daut brocht ons bat doa, daut wie Jehova uk deenen wullen, un wees ons, woo scheen daut gonen wudd.” Wan een Bibelschiela Vekjindja woat, dan wudd wie uk kjennen met dän toop prädjen. Diego, een Vekjindja von Brasilien, sajcht: “Väl Breeda fruagen mie, aus ekj wull met an toop em Deenst gonen. Soo kunn ekj dee fein kjanen lieren un väl von dee lieren un kjeem Jehova un Jesus noda.”

WAUT KJENNEN DE ELTESTASCH DOONEN?

17. Woo kjennen de Eltestasch de Bibelschiela halpen?

¹⁷ Nämt junt Tiet fa de Bibelstudiums. Jie Eltestasch kjennen de Bibelstudiums halpen verauntokomen un sikj deepen to loten, wan jie leeftolich om dee bekjemmat sent. Wudd jie bie de Toopkomes pinkjlich met dee vetalen kjennen? Dee woaren enwoaren, daut jie dee waut räakjnen, wan jie dee äaren Nomen em Denkj hoolen, besonda wan dee aul Auntwuaten jäwen. Wudd jie junt bieaun kjennen Tiet nämen toom met de Vekjindja toop dee äare Bibelstudiums moaken? Daut kaun mea aun de Bibelschiela doonen, aus jie jleewen. Eene Pionia-Sesta, waut Jackie heet un en Nigeria wont, sajcht: “Väl Bibelschiela kjennen daut nich jleewen, daut de Brooda, waut met mie toop no an kjemt, een Eltesta es. Een Bibelschiela säd: ‘Ons Priesta wudd soont kjeenmol doonen! Dee foat bloos no de Rikje un bloos, wan dee am betolen.’” Dit Bibelstudium kjemt nu no de Toopkomes.

18. Woo kjennen de Eltestasch daut doonen, waut Aposteljeschicht 20:28 sajcht?

¹⁸ Lieet de Vekjindja ut un spräakjt dee Moot too. Jie Eltestasch haben de wichtje Oppgow, daut jie de Vekjindja halpen, sikj em Deenst to vebätren un aundre bäta to lieren (läs Aposteljeschicht 20:28). Wan sikj daut wäa nich woacht, een Bibelstudium to leiden, wan jie doabie sent, dan froacht dän, aus jie daut dan leiden sellen. Jackie, wua wie aul von jerät haben, sajcht: “De Eltestasch froagen mie emma wada, woo daut met miene Bibelstudiums steit. Un wan doa waut oppkjemt, dan jäwen dee mie gooden Rot.” De Eltestasch kjennen de Bibelliera väl Moot jäwen, daut dee nich oppjäwen (1. Tess. 5:11). Jackie sajcht noch: “Ekj frei mie, wan de Eltestasch mie Moot toospräakjen un mie fa miene hoade Oabeit lowen. Daut es soo aus een Kuffel met koldet Wota aun eenen heeten Dach. Daut jeft mie väl Moot un halpt mie, noch mea Freid to haben met miene Bibelstudiums” (Spr. 25:25).

19. Waut fa eene Freid kjenn wie aula haben?

¹⁹ Veleicht hab wie nu jroz nich selfst een Bibelstudium, oba wie kjennen doawäajen wäm halpen em jeisteljen verauntokomen. Wan wie bie een Bibelstudium met bie sent, dan kjenn wie ons fein reedmoaken un dän Bibelliera unjastetten, onen daut wie selfst too väl sajen. Wie kjennen ons de Bibelschiela uk to Frind moaken, wan dee nom Vesaumlungshus komen, un een goodet Biespel fa dee sennen. De Eltestasch kjennen de Bibelschiela Moot toospräakjen, wan dee sikj fa dee Tiet nämen. Un dee kjennen de Bibelliera halpen, wan see dee utlieren un lowen. Daut jeft kjeene jratre Freid aus to weeten, daut wie uk een bät waut doatoo doonen kunnen, daut doa wäa aunfangt Jehova to leewen un to deenen.