Woo kaust du eenen gooden Ehepoatna finjen?

1-2. (a) Äwa waut sellen de Onbefriede nodenkjen, ea dee aunfangen, met wäm to spazieren? (b) Waut bediet daut, met wäm to spazieren? (See “Wieed utjelajcht”.)

WURSCHT du die wellen befrieen? Wan daut uk nich needich es, sikj to befrieen toom schaftich sennen, wellen väl Breeda un Sestren, aus junk ooda oolt, sikj befrieen. Oba ea du met eenen Jung ooda eene Mejal spazieren deist, saust du em Jeisteljen stoakj sennen, em Denkjen riep sennen un reed sennen, de Onkosten to betolen, waut eene Ehe met sikj brinjt (1. Kor. 7:36).a Opp dee Wajch woat daut leichta sennen, eene schaftje Ehe to haben.

² Oba dauts nich emma leicht, eenen gooden Ehepoatna to finjen (Spr. 31:10). Un wan du uk wäm finjst, wäm du wurscht wellen bäta kjanen lieren, kaun daut oba schwoa sennen, met dän aunfangen to spazieren.b En disen Artikjel woa wie seenen, waut de Onbefriede halpen kaun, wäm to finjen, waut doa kunn een gooda Ehepoatna sennen un aunfangen, met dän to spazieren. Wie woaren uk seenen, woo de aundre von de Vesaumlunk soone unjastetten kjennen, waut sikj befrieen wellen.

WAUT KAUN DIE HALPEN, EENEN GOODEN EHEPOATNA TO FINJEN?

3. Äwa waut saul een Onbefrieda nodenkjen, wan dee eenen Ehepoatna sieekjt?

³ Wan du die befrieen west, dan saust du aul weeten, waut vonne Ieejenschoften dien Ehepoatna haben saul, ea du aunfangst, met wäm to spazieren.c Aundasch fangst du veleicht aun, met wäm to spazieren, waut nich met die tooppaust ooda du wurscht uk wäm äwaseenen kjennen, waut doa wudd kjennen een feina Ehepoatna sennen. Secha mott deejanja wäa sennen, waut jedeept es (1. Kor. 7:39). Oba nich jieda eena, waut jedeept es, woat een feina Ehepoatna sennen fa die. Doawäajen denkj mol äwa dise Froagen no: “Waut hab ekj mie em Läwen väajenomen? Waut vonne Ieejenschoften sent mie wichtich bie eenen Ehepoatna? Velang ekj nich too väl?”

4. Om waut haben eenje jebät?

⁴ Wan du die befrieen west, dan hast du secha aul doaräwa jebät (Filip. 4:6). Jehowa vesprakjt nich, daut jieda eena von siene Deena eenen Ehepoatna finjen woat. Oba hee es doawäajen doarom todoonen, waut die fält un woo die daut jeit, un hee kaun die doamet halpen, eenen Ehepoatna to finjen. Doawäajen saj Jehowa wieda, waut du west un woo du die feelst (Psa. 62:9). Bäd uk om Jedult un Weisheit (Jak. 1:5). Een onbefrieda Brooda vonne Stäts, waut Johnd heet, sajcht, om waut hee aules bät. Hee sajcht: “Ekj saj to Jehowa, waut ekj mie wensch, woo mien Ehepoatna sennen saul. Ekj bäd uk om Jeläajenheiten toom wäm kjanen lieren, waut doa kunn een gooda Ehepoatna sennen. Un ekj froag Jehowa uk, daut dee mie halpt, aun soont to schaufen, waut mie halpen woat, een feina Ehemaun to sennen.” Tanya, eene Sesta von Sri Lanka, sajcht: “Ekj bäd Jehowa doarom, daut hee mie halpt, am tru to bliewen, goot enjestalt un uk schaftich to sennen.” Jehowa vesprakjt, daut hee die daut Needje jäwen woat un die halpen woat, die jeleeft to feelen, mau rajcht wan du uk nich fuaz wäm finjst, waut doa kunn een gooda Ehepoatna sennen (Psa. 55:23).

5. Woo kjennen Onbefriede aundre Onbefriede kjanen lieren, waut uk Jehowa leewen? (1. Korinta 15:58). (See uk daut Bilt.)

⁵ De Bibel rot ons too: “Nämt emma too en june Oabeit fa dän Harn” (läs 1. Korinta 15:58). Wan du drock best em Deenst fa Jehowa un väl met veschiedne Breeda toop best, dan woascht du nich bloos goode Frind haben, oba du woascht uk väl Jeläajenheiten haben toom aundre Onbefriede kjanen lieren, waut uk äa Bastet em Deenst doonen. Wan du die sea aunstrenjst, Jehowa schaftich to moaken, dan woascht du uk selfst woare Freid haben.

6. Aun waut sellen Onbefriede denkjen, waut sikj befrieen wellen?

⁶ Pauss bloos opp, daut et nich daut Wichtichste en dien Läwen woat, eenen Ehepoatna to kjrieen (Filip. 1:10). Woare Freid kjemt nich doavon, daut eena befriet ooda onbefriet es, oba doavon, daut eena een gooda Frint met Jehowa es (Mat. 5:3). Un wan du noch onbefriet best, dan es die daut leichta, mea em Deenst to doonen (1. Kor. 7:​32-33). Doawäajen nutz dise Tiet ut. Jessica es eene Sesta, waut sikj befried, aus see hinjen enne 30 wia. See sajcht: “Ekj hilt mie drock em Deenst, un daut holp mie, tofräd to sennen, wan ekj uk dän Wunsch haud, mie to befrieen.”

NEMM DIE TIET, DÄN AUNDREN TO BEOOBACHTEN

7. Wuarom es daut kluak, wäm ieescht to beoobachten, ea eena dee daut sajcht, daut eena waut von ar well? (Spricha 13:16).

⁷ Waut es, wan du denkjst, daut du wäm jefungen hast, waut doa kunn een gooda Ehepoatna sennen? Wurscht du dee fuaz sellen sajen, daut du waut von dee west? De Schreft sajcht, daut een kluaka Mensch emma weis haundelt (läs Spricha 13:16). Daut wudd weis sennen, dee ieescht fa eene Tiet to beoobachten, onen daut et oppfelt, ea du dee daut sajchst, daut du waut von ar west. Edwin, waut von Hollaunt es, sajcht: “Jefeelen kjennen leicht oppkomen, oba dee kjennen uk leicht veschwinjen. Soo, wan du die Tiet nemst, wäm to beoobachten, dan woascht du nich bloos no diene Jefeelen tekjen un met wäm aunfangen to spazieren.” Un dan noch, wan du wäm beoobachst, dan woascht du veleicht en, daut dee Persoon nich de rajchta Ehepoatna fa die es.

8. Woo kaun een Onbefrieda wäm beoobachten? (See uk daut Bilt.)

⁸ Woo wurscht du wäm beoobachten kjennen, onen daut et oppfelt? Veleicht bie de Vesaumlunk ooda wan de Breeda jrodsoo wua toop sent, wurscht du seenen kjennen, woo de Persoon daut haft un woo dee em Jeisteljen es, woo dee sikj oppstalt, wäm dee to Frind haft un äwa waut dee rät (Luk. 6:45). Haft dee sikj biejlikj soo waut väajenomen, aus du hast? Du wurscht kjennen met de Eltestasch von dee äare Vesaumlunk räden ooda uk met aundre riepe Breeda un Sestren, waut dee goot kjanen (Spr. 20:​18, NW). Du wurscht uk kjennen froagen, waut fa goode Sieden dee haft un wuafäa dee bekaunt es (Rut 2:11). Wan du wäm beoobachten deist, dan doo daut soo, daut et fa ar nich ommaklich es. Doo dee äare Jefeelen respakjten. Proow nich, dän gaunzen Tiet rom ar to sennen un uk nich aules to weeten äwa ar.

9. Äwa waut saust du die secha sennen, ea du met ar rätst?

⁹ Woo lang wurscht du dee sellen beoobachten, ea du dee daut sajchst, daut du waut von ar west? Wan du dee daut too bosich sajchst, dan wudd see denkjen kjennen, daut du nich goot doaräwa nodenkjst, ea du eene Entscheidunk moakst (Spr. 29:20). Oba wan du too lang wachst, dan wudd see denkjen kjennen, daut du die nich kaust to waut eenich woaren, besonda wan see daut aul enjeworden es, daut du waut von ar west (Liera 11:4). Denkj doaraun, daut du die noch nich brukst secha sennen, aus du die woascht met ar befrieen, ea du met ar rätst. Oba du saust die secha sennen, daut du reed best, die to befrieen un daut dee wudd kjennen een gooda Ehepoatna sennen fa die.

10. Waut wurscht du sellen doonen, wan du enwoascht, daut doa wäa waut von die well, un du oba nich met dän spazieren west?

¹⁰ Oba waut es, wan du enwoascht, daut doa wäa waut von die well? Wan du nich west met dän spazieren, dan proow die soo opptostalen, daut et to seenen es. Daut wudd nich leeftolich sennen, dänjanjen daut Jefeel to jäwen, daut du veleicht wurscht wellen met dän spazieren, wan du oba nich west (1. Kor. 10:24; Efs. 4:25).

11. Aun waut saust du denkjen, wan du fa wäm eene Mejal ooda eenen Jung sieekjen saust ooda eene Kjast plonen?

¹¹ En eenje Lenda doonen de Elren un aundre von äa Frintschoft eenen Ehepoatna sieekjen fa eenen Onbefrieden. En aundre Lenda doonen de Famielje ooda Frind wäm sieekjen, waut doa kunn een gooda Ehepoatna sennen, un dan beräden dee daut, daut de Jung un de Mejal sikj kjennen tooptrafen toom seenen, aus dee wellen spazieren. Wan du saust fa wäm eene Mejal ooda eenen Jung sieekjen ooda eene Kjast plonen, dan denkj doaraun, waut dee jleichen un waut dee fält. Wan du denkjst, daut du wäm jefungen hast, waut doa kunn een gooda Ehepoatna sennen, dan lia de Persoon goot kjanen, waut fa goode Sieden dee haft un besonda, woo dee em Jeisteljen es. Met Jehowa een gooda Frint sennen, es väl wichtja aus Jelt, huach utjelieet ooda aunjeseenen sennen. Oba hool em Denkj, daut een onbefrieda Brooda un eene onbefriede Sesta tolatst selfst entscheiden motten, aus dee sikj wellen befrieen (Gal. 6:5).

WOO KAUST DU AUNFANGEN, MET WÄM TO SPAZIEREN?

12. Woo wurscht du wäm sajen kjennen, daut du wurscht jleichen, met ar to spazieren?

¹² Woo kaust du wäm daut sajen, daut du wurscht jleichen met ar to spazieren?e Du kaust die daut met dee beräden, daut jie junt wua trafen, wua Menschen rom sent ooda dee daut äwa Fon sajen. Saj daut dietlich, daut du ar wurscht jleichen bäta kjanen to lieren (1. Kor. 14:9). Wan daut fält, dan jeff dee Tiet, daut dee doaräwa nodenkjen kaun (Spr. 15:28). Un wan dee nich well met die spazieren, dan respakjt daut.

13. Waut kaust du doonen, wan doa wäa met die spazieren well? (Kolossa 4:6).

¹³ Waut, wan doa wäa sajcht, daut dee wudd jleichen met die to spazieren? Secha wia dän daut nich leicht, met die doaräwa to räden, doawäajen saust du leeftolich un respakjtvoll sennen (läs Kolossa 4:6). Wan die ieescht mol Tiet fält toom doaräwa nodenkjen, dan saj dän daut. Oba proow soo schwind aus mäajlich, dän eene Auntwuat to jäwen (Spr. 13:12). Wan du nich west met dän spazieren, dan saj dän daut leeftolich un dietlich. Eene Sesta fruach Hans, eenen Brooda von Oostareich, aus hee wudd jleichen met ar to spazieren. Hee sajcht doaräwa: “Ekj säd ar leeftolich un dietlich, to waut ekj mie eenich jeworden wia. Ekj deed daut fuaz, wiels ekj nich haben wull, daut see denkjen sull, daut ekj ar uk wull bäta kjanen lieren. Doawäajen paust ekj uk sea opp, woo ekj doahinja met ar omjinkj.” Oba wan du west met dän spazieren, dan rät toop äwa june Jefeelen, un woo jie daut doonen woaren en dee Tiet, wan jie junt bäta kjanen lieren. Waut jie en dee Tiet doonen wellen, kaun veschieden sennen, doano von wua jie häakomen ooda wäajen waut aundret.

WOO KJENNEN AUNDRE DE ONBEFRIEDE UNJASTETTEN?

14. Woo kjenn wie de Onbefriede unjastetten met daut, waut wie sajen?

¹⁴ Woo kjenn wie aula de Onbefriede unjastetten, waut sikj befrieen wellen? Eene Wajch, woo wie daut doonen kjennen es, wan wie oppaussen, waut wie sajen (Efs. 4:29). Wie wudden kjennen äwa nodenkjen: “Doo ekj soone nerkjen, waut sikj befrieen wellen? Wan een onbefrieda Brooda un eene onbefriede Sesta vetalen, denkj ekj dan fuaz, daut dee sikj jleichen?” (1. Tim. 5:13). Wie wudden de Onbefriede uk kjeenmol wellen daut Jefeel jäwen, daut met äant waut orrajcht es, wäajen dee nich befriet sent. Hans, wua wie aul ea von räden, sajcht: “Eenje Breeda sajen: ‘Wuarom deist du die nich mol befrieen? Du best aul nich mea sea junk.’ Wan doa wäa soont sajcht, dan denkjen de Onbefriede, daut see nich wieetvoll sent un denkjen veleicht noch dolla soo, daut see sikj motten befrieen.” Dauts väl bäta, wan wie no Jeläajenheiten sieekjen toom de Onbefriede lowen! (1. Tes. 5:11).

15. (a) Äwa waut saust du nodenkjen, ea du wäm halpst, eenen Ehepoatna to finjen? (Reema 15:2). (See uk daut Bilt.) (b) Waut fa Wichtjet hast du en dit Video jelieet? (See uk de Footnoot.)

¹⁵ Oba waut es, wan wie denkjen, daut een Brooda ooda eene Sesta wudden fein tooppaussen? De Schreft sajcht, daut wie sellen aun aundre äare Jefeelen denkjen (läs Reema 15:2). Een deel Onbefriede wellen nich, daut aundre äant halpen, wäm kjanen to lieren, waut doa kunn een gooda Ehepoatna sennen; un wie wellen daut respakjten (1. Pet. 4:15). Wada aundre wudden daut veleicht jleichen, daut wie äant halpen, oba wie wellen daut nich doonen, wan dee ons nich doano froagen (Spr. 3:27).f Un noch aundre Onbefriede wudden daut jleichen, daut wie äant opp eene aundre Wajch halpen. Lydia, eene onbefriede Sesta von Dietschlaunt, sajcht: “Du wurscht kjennen eenen Brooda un eene Sesta un noch aundre enloden. Du wurscht eefach kjennen halpen, daut dee de Jeläajenheit haben, sikj kjanen to lieren, un dee loten selfst daut äwaje doonen.”

16. Waut sellen de Onbefriede em Denkj hoolen?

¹⁶ Wie aula kjennen een tofrädnet un schaftjet Läwen haben, aus wie befriet sent ooda nich! (Psa. 128:1). Soo, wan du die befrieen west un oba noch nich wäm jefungen hast, dan doo wieda dien Bastet em Deenst fa Jehowa. Eene Sesta von Macao, waut Sin Yi heet, sajcht: “Dee Tiet, waut wie onbefriet sent, es ernoa kort, wan wie daut met dee Tiet vejlikjen, waut wie wudden kjennen met onsen Ehepoatna em Paradies haben. Lot die dee Tiet scheen gonen, un nutz dee goot ut.” Oba waut es, wan du aul wäm jefungen hast, waut doa kunn een gooda Ehepoatna sennen un jie aul spazieren? En dän näakjsten Artikjel woa wie seenen, woo een Jung un eene Mejal kjennen eene goode Entscheidunk moaken, wan dee spazieren.