Halp dienen Bibelschiela, fa de Woarheit entostonen

1-2. (a) Waut helt eenje Bibelschiela doavon auf, fa de Woarheit entostonen? (b) Waut woa wie en disen Artikjel derchgonen?

WIA doa waut, waut die Sorjen muak un die doavon aufhilt, eent von Jehowa siene Zeijen to woaren? Veleicht hautst du Angst, daut diene Oabeitspoatna, Frind ooda Famielje wudden jäajen die sennen. Ooda du dochst, daut du kjeenmol wurscht soo läwen kjennen, aus Gott daut fa rajcht talt. Wan daut soo wia, dan kaust du soone Bibelschiela vestonen, waut sikj meist nich eenich woaren kjennen, fa de Woarheit entostonen.

² Jesus wist, daut dise Sorjen wäm leicht doavon aufhoolen kunnen, em Jeisteljen verauntokomen (Mat. 13:​20-22). Oba hee jeef nich opp met soone, waut sikj nich fuaz eenich worden, am notofoljen. Derch sien Biespel wees hee ons, woo wie soone Menschen halpen kjennen (1) ruttofinjen, waut äant doavon aufhelt, em Jeisteljen verauntokomen, (2) eene jratre Leew fa Jehowa to kjrieen, (3) Jehowa aune ieeschte Städ to stalen un (4) met Jäajenstaunt foadich to woaren. En disen Artikjel woa wie seenen, woo wie Jesus nodoonen kjennen, wan wie eenen Bibelschiela met daut Buak Een scheenet Läwen fa emma! halpen, fa de Woarheit entostonen?

HALP DIENEN BIBELSCHIELA TO SEENEN, WAUT AM DAUT SCHWOA MOAKT VERAUNTOKOMEN

3. Waut haft Nikodemus daut woomäajlich schwoa jemoakt, eent von Jesus siene Nofolja to woaren?

³ Nikodemus wia een wichtja judischa Leida. Aus Jesus noch mol sas Moonat met sienen Deenst aunjefongen haud, wist Nikodemus aul, daut Jesus de Messias wia (Joh. 3:​1-2). Oba doa wia waut, waut Nikodemus daut schwoa muak, am notofoljen. Dee troff sikj em Plietschen met Jesus, “wäajen dee Angst haud fa de Juden” (Joh. 7:13; 12:42). Hee haft veleicht jedocht, daut hee väl too väl oppjäwen must, wan hee wudd eent von Jesus siene Nofolja woaren.a

4. Woo holp Jesus Nikodemus to vestonen, waut Gott von am velangd?

⁴ Nikodemus kjand daut Jesaz Moses, oba am fäld Help toom vestonen, waut Jehowa von am velangd. Woo holp Jesus am? Jesus wia nich jiezich met siene Tiet; hee räd met Nikodemus, mau rajcht wan daut uk aul diesta wia. Un Jesus säd Nikodemus gaunz kloa, waut dee doonen must, daut dee kunn eent von siene Jinja woaren: Hee must een Leetsennen haben äwa siene Sinden, sikj em Wota deepen loten un Gloowen wiesen aun Gott sienen Sän (Joh. 3:​5, 14-21).

5. Woo kjenn wie eenen Bibelschiela halpen to vestonen, waut am trigjhelt, em Jeisteljen verauntokomen?

⁵ Mau rajcht wan een Bibelschiela een deel von de Schreft kjant, fält am veleicht Help toom vestonen, waut am doavon aufhelt verauntokomen – veleicht es daut siene Oabeit ooda Famielje. Soo, nemm die Tiet fa dienen Bibelschiela. Kroag am biejlikj fa eenen Koffe ooda toom waut toop spälen. En soone Omstend moakt hee sikj veleicht wellich op, doaräwa to räden, waut am schwoa es. Moak dienen Bibelschiela uk Moot, daut hee aules endat, waut doa needich es. Moak am oba dietlich, daut hee daut nich wäajen die doonen saul, oba wäajen hee Jehowa wiesen well, daut hee am leeft.

6. Woo kaust du eenen Bibelschiela halpen, dän Moot to kjrieen, fa de Woarheit entostonen? (1. Korinta 16:13).

⁶ Wan een Bibelschiela sikj secha es, daut Jehowa am halpen woat, no de Gruntlieren ut de Bibel to läwen, dan woat hee uk dän Moot haben, daut notokomen, waut hee lieet (läs 1. Korinta 16:13). Daut kaun eena mol met eenen Schoolliera vejlikjen. Wan du mol soo trigjdenkjst, waut von Schoolliera hast du daut dolste jejleicht, aus du no de School jinjst? Veleicht wia daut dee, waut die jeduldich holp, een Selfstvetruen to kjrieen, daut du waut doonen kust. Krakjt soo es daut uk met eenen gooden Bibelliera. Dee lieet sienen Bibelschiela nich bloos, waut Gott von ons haben well, oba vesechat dän uk, daut Jehowa am halpen woat, daut to endren, waut am fält. Woo kaust du soon gooda Bibelliera sennen?

HALP DIENEN BIBELSCHIELA, EENE JRATRE LEEW FA JEHOWA TO KJRIEEN

7. Woo holp Jesus siene Toohorcha, eene jratre Leew fa Jehowa to kjrieen?

⁷ Jesus wist, daut de Leew, waut siene Jinja fa Gott hauden, äant bat doa brinjen wudd, daut notokomen, waut see lieeden. Doawäajen lieed hee foaken waut, waut siene Jinja holp, eene jratre Leew fa sienen himlischen Voda to kjrieen. Biejlikj säd hee, daut Jehowa soo wia aus een Maun, waut siene Kjinja Goodet jeft (Mat. 7:​9-11). Eenje von dee, waut Jesus toohorchten, hauden veleicht nich eenen leeftoljen Voda jehaut. Stal die väa, woo dee sikj motten jefeelt haben, aus Jesus daut Jlikjnis von dän metfeelenden Voda vetald, dee sienen Sän wada oppneem, waut väl Schlajchtet jedonen haud. Doaderch kunnen de Menschen kloa vestonen, waut fa een grootet Metjefeel Jehowa fa dee haud (Luk. 15:​20-24).

8. Woo kaust du dienen Bibelschiela halpen, eene jratre Leew fa Jehowa to kjrieen?

⁸ Du kaust de Bibelschiela halpen, eene jratre Leew fa Jehowa to kjrieen, wan du foaken von siene Ieejenschoften rätst. Halp dän bie jieda Studium to vestonen, woo Jehowa siene Leew aun daut to seenen es, waut jie jroz derchjegonen sent. Wan jie äwa daut Leesjelt räden, dan moak dän dietlich, daut Jehowa daut betold, wäajen hee am leeft (Reem. 5:8; 1. Joh. 4:10). Wan eenen Bibelschiela daut kloa woat, daut Jehowa am perseenlich leeft, kaun am daut halpen, eene jratre Leew fa Jehowa to kjrieen (Gal. 2:20).

9. Waut holp Michael, sikj to endren?

⁹ See wie mol de Erfoarunk von Michael von Indoneesien. Hee wort enne Woarheit oppjetrocken, oba hee leet sikj nich deepen. Aus hee 18 Joa wia, trock hee nom Utlaunt, om doa aus een Trock-Foara to schaufen. Lota befried hee sikj en Indoneesien, oba schauft wieda em Utlaunt. Doawäajen wia hee nich met siene Fru un Dochta toop. Äwadäm fungen siene Fru un siene Dochta aun, de Bibel to studieren, un kjeemen goot veraun. Nodäm daut Michael siene Mutta jestorwen wia, trock hee trigj no Indoneesien toom sikj om sienen Voda kjemren un hee neem uk een Bibelstudium aun. Aus dee daut Poat “Dolla unjastonen” en daut 27. Kapitel von daut Buak Een scheenet Läwen fa emma! derchneemen, jinkj Michael daut sea to Hoaten. Aus hee doaräwa nodocht, woo schwoa daut fa Jehowa mott jewast sennen to seenen, woo sea sien Sän lieden must, funk Michael eefach aun to roaren. Hee wia sea dankboa fa daut Leesjelt un daut brocht am bat doa, sikj to endren un sikj deepen to loten.

HALP DIENEN BIBELSCHIELA, JEHOWA AUNE IEESCHTE STÄD TO STALEN

10. Woo holp Jesus eenje Jinja, Jehowa aune ieeschte Städ to stalen? (Luk. 5:​5-11). (See uk daut Bilt.)

¹⁰ Jesus siene Jinja worden daut fuaz en, daut hee de vesproakna Messias wia, oba dee fäld doawäajen Help, om dän Prädichtdeenst daut ieeschte en äa Läwen to stalen. Petrus un Andreas biejlikj wieren aul fa eene jewesse Tiet Jesus siene Jinja jewast, aus hee äant fruach, jieda Dach met am mettokomen (Mat. 4:​18-19). Dee wieren Fescha un hauden een Jeschaft met Jakobus un Johanes toop, waut goot wiedakjeem (Mar. 1:​16-20). Aus Petrus un Andreas “äare Nats” veleeten, plonden dee secha, woo see wieda fa de Famielje sorjen wudden en dee Tiet, wan see met Jesus toop wieren. Waut brocht äant bat doa, äa Jeschaft to veloten? De Jeschicht en Lukas wiest, daut Jesus een Wunda muak, waut äa Vetruen stoakjt, daut Jehowa fa äant oppkomen wudd (läs Lukas 5:​5-11).

11. Waut vonne Erfoarungen kjennen dienen Bibelschiela dän Gloowen stoakjen?

¹¹ Wie kjennen nich soone Wunda moaken, aus Jesus deed, oba wie kjennen Erfoarungen vetalen, woo Jehowa soone unjastett, waut am aune ieeschte Städ stalen. Weetst du biejlikj noch, woo Jehowa die holp, aus du aunfungst, no de Toopkomes to wanken? Veleicht must du met dienen Wieet räden un dän daut sajen, daut du nich mea kust Äwastunden schaufen aun dee Doag, wua du Toopkomes hautst. Vetal dienen Bibelschiela, woo daut dienen Gloowen stoakjt, aus du sachst, woo Jehowa die holp, wäajen du am aune ieeschte Städ stalsd.

12. (a) Wuarom wurscht du sellen veschiedne Breeda un Sestren met no dienen Bibelschiela nämen? (b) Woo kjennen de Videos die halpen, dienen Bibelschiela bäta to lieren? Jeff een Biespel.

¹² Dienen Bibelschiela woat daut uk togood komen, wan aundre Breeda un Sestren dän vetalen, waut dee musten doonen, om Jehowa aune ieeschte Städ to stalen. Nemm aulsoo veschiedne Breeda un Sestren met no dienen Bibelschiela. Lot dee vetalen, woo dee enne Woarheit nennjekomen sent un waut dee musten doonen, om Jehowa sienen Deenst aune ieeschte Städ to stalen. Nemm die uk Tiet, met dienen Bibelschiela toop de Videos to kjikjen, waut bie “Dolla unjastonen” ooda “Mea nosieekjen” sent en daut Buak Een scheenet Läwen fa emma! Wan jie biejlikj daut 37. Kapitel studieren, dan rät toop äwa eenjet von daut Video Jehowa woat fa ons sorjen.

HALP DIENEN BIBELSCHIELA, MET JÄAJENSTAUNT FOADICH TO WOAREN

13. Woo muak Jesus siene Jinja fa Jäajenstaunt reed?

¹³ Jesus säd emma wada to siene Nofolja, daut see wudden Jäajenstaunt haben – mau rajcht von äare Famielje (Mat. 5:11; 10:​22, 36). Aus Jesus sien Deenst meist to Enj wia, säd hee to siene Jinja, daut see mau rajcht wudden kjennen dootjemoakt woaren (Mat. 24:9; Joh. 15:20; 16:2). Hee rood äant too, väasechtich to sennen en äaren Deenst. Hee säd, daut see sikj nich sullen met de Menschen strieden, waut jäajen äant wieren, un daut see sullen oppaussen, waut see säden un deeden, soo daut see wieda prädjen kunnen.

14. Woo kaust du dienen Bibelschiela halpen, fa Jäajenstaunt reed to sennen? (2. Timotäus 3:12).

¹⁴ Wie kjennen eenen Bibelschiela fa Jäajenstaunt reedmoaken, wan wie dän sajen, waut hee veleicht woat to hieren kjrieen von siene Oabeitspoatna, Frind un Frintschoft (läs 2. Timotäus 3:12). Eenje Oabeitspoatna woaren veleicht Spos moaken, äwa woo hee nu läft. Aundre ooda soogoa daut Frintschoft woaren veleicht schlajcht äwa sienen Gloowen räden. Je ea du dienen Bibelschiela fa Jäajenstaunt reedmoakst, je bäta woat dee doamet omgonen kjennen, wan daut ieescht bat doa es.

15. Waut woat dienen Bibelschiela halpen, met Jäajenstaunt en de Famielje foadich to woaren?

¹⁵ Wan dien Bibelschiela Jäajenstaunt von de Famielje haft, dan halp dän, doaräwa notodenkjen, wuarom sien Frintschoft sikj soo oppräacht. Dee denkjen veleicht, daut hee sikj haft veleiden loten, ooda dee jleewen daut, waut aundre äwa Jehowa siene Zeijen sajen. Mau rajcht eenje von Jesus siene Famielje wieren nich tofräd met daut, waut hee deed (Mar. 3:21; Joh. 7:5). Doawäajen lia dienen Bibelschiela, siene Famielje un aundre leeftolich to behaundlen.

16. Woo kjenn wie eenen Bibelschiela halpen, opp eene leeftolje Wajch von sienen Gloowen to räden?

¹⁶ Mau rajcht wan sien Frintschoft uk nieschierich es, wudd daut oba kluak sennen, wan de Bibelschiela dee nich fuaz aules vetald, waut hee wist. Aundasch kunnen dee sikj äwafoddat feelen un lota nich mea waut von am hieren wellen, waut hee jleeft. Rod dienen Bibelschiela too, opp dee Wajch von sienen Gloowen to räden, daut hee lota wada met dee vetalen kaun (Kol. 4:6). Veleicht kaun dee sien Frintschoft uk bloos de JW.ORG-Websied wiesen. Doaderch kjennen dee sikj dan selfst mea von Jehowa siene Zeijen unjastonen, wanemma dee ieescht wellen.

17. Woo kaust du dienen Bibelschiela lieren, de Froagen to beauntwuaten, waut aundre veleicht äwa Jehowa siene Zeijen haben? (See uk daut Bilt.)

¹⁷ Veleicht kaust du uk de Artikjels “Waut foaken jefroacht woat” opp jw.org brucken, om dienen Bibelschiela to halpen, sikj eefache Auntwuaten reedtomoaken opp soone Froagen, waut sien Frintschoft ooda Oabeitspoatna veleicht haben (2. Tim. 2:​24-25). Got jiedatsmol opp Enj von daut Bibelstudium daut Hock derch “Waut eenje sajen” en daut Buak Een scheenet Läwen fa emma! Rod dienen Bibelschiela too, daut to eewen, woo hee dise Froagen met siene ieejne Wieed beauntwuaten kaun. Hool die nich trigj, dienen Bibelschiela Rot to jäwen, woo hee daut noch vebätren kaun, woo hee sienen Gloowen utlajcht. Dit to eewen, woat dän halpen, äwanäment fa sienen ieejnen Gloowen entostonen.

18. Woo kaust du dienen Bibelschiela halpen, een ojjedeepta Vekjindja to woaren? (Matäus 10:27).

¹⁸ Jesus jeef siene Jinja daut Jeboot, aundre de goode Norecht to vetalen (läs Matäus 10:27). Je ea dien Bibelschiela doamet aunfangt, von sienen Gloowen to räden, je ea lieet hee daut, sikj opp Jehowa to veloten. Woo kaust du dienen Bibelschiela halpen, bat doa to komen? Wan doa bekauntjemoakt woat, daut diene Vesaumlunk bie een besondret Prädjen metmoaken woat, dan rod dienen Bibelschiela too, doaräwa notodenkjen, waut hee doonen kaun, om een ojjedeepta Vekjindja to woaren. Vetal dän uk, wuarom daut leichta es, met dän Prädichtdeenst auntofangen, wan daut een besondret Prädjen jeft. Hee kaun sikj daut uk väanämen, bie de Toopkomes enne Wäakj Schiela-Oppgowen to moaken. De Schiela-Oppgowen woaren am halpen, met Sechaheit äwa sienen Gloowen to räden.

WIES DIENEN BIBELSCHIELA, DAUT DU OPP AM VETRUST

19. Woo wees Jesus, daut hee opp siene Jinja vetrud; un woo kjenn wie am nodoonen?

¹⁹ Een Stoot ea Jesus trigj nom Himmel fua, säd hee to siene Jinja, daut see noch mol wada wudden met am toop sennen. Dee kunnen daut nich vestonen, daut Jesus doavon räd, daut dee uk wudden em Himmel läwen. Wan siene Apostel uk nich aules vestonen kunnen, wia Jesus sikj oba secha, daut dee Jehowa jefaulen wullen (Joh. 14:​1-5, 8). Hee wist, daut äant Tiet fäld, eenjet to vestonen – biejlikj de himlische Hopninj (Joh. 16:12). Wie kjennen Jesus nodoonen un onsen Bibelschiela wiesen, daut wie ons secha sent, daut dee Jehowa jefaulen well.

20. Woo wees eene Sesta en Malawi, daut see opp äaren Bibelschiela vetrud?

²⁰ Wie vetruen doaropp, daut ons Bibelschiela daut Rajchte doonen well. See wie mol de Erfoarunk von Chifundo, eene Sesta en Malawi. See funk aun, met eene junge katoolsche Fru, waut Alinafe heet, daut Buak Een scheenet Läwen fa emma! to studieren. Aus see daut 14. Kapitel studieet hauden, fruach Chifundo äaren Bibelschiela, waut see doaräwa docht, Bilda bie de Aunbädunk to brucken. Alinafe wort iewalich un auntwuad: “Dauts miene Sach!” Chifundo docht, daut Alinafe opphieren wudd to studieren; oba see deed nich. Doawäajen muak Chifundo jeduldich wieda un veleet sikj doaropp, daut Alinafe dise Lia noch vestonen wudd. Een poa Moonat lota stald Chifundo ar de Froag, waut en daut 34. Kapitel en daut Buak es: “Woo haft die daut bat nu jeholpen, von de Schreft un von dän woaren Gott Jehowa to lieren?” Chifundo sajcht, waut Alinafe dan auntwuad: “See räd von een deel scheene Sachen, biejlikj daut Jehowa siene Zeijen nuscht doonen, waut de Bibel fa orrajcht talt.” Een Stootje nodäm hieed Alinafe opp, Bilda bie de Aunbädunk to brucken, un kunn sikj deepen loten.

21. Woo kjenn wie onsen Bibelschiela halpen, fa de Woarheit entostonen?

²¹ Jehowa es dee, “waut daut em Waussen moakt”, oba wie kjennen onsen Bibelschiela halpen verauntokomen (1. Kor. 3:7). Wie lieren dän nich bloos, waut Gott von am haben well, oba halpen dän uk, eene jratre Leew fa Jehowa to kjrieen. Wie moaken dän uk Moot, siene Leew fa Jehowa to wiesen, doaderch daut hee am aune ieeschte Städ stalt. Un wie lieren dän, sikj opp Jehowa to veloten, wan hee Jäajenstaunt haft. Woo kjemt onsen Bibelschiela daut togood, wan wie am daut wiesen, daut wie ons secha sent, daut hee daut Rajchte doonen well? Opp dise Wajch halp wie dän, de Sechaheit to haben, daut hee soo läwen kaun, aus Jehowa daut haben well, un äwanäment fa de Woarheit entostonen.