Jakob haft eene groote Famielje

KJIKJ mol dise groote Famielje hia! Daut es Jakob met siene twalf Junges. Hee haud uk noch waut Dajchta. Weetst du, woo eenje von siene Kjinja heeten? Well wie mol seenen.

Lea haud vea Säns: Ruben, Simeon, Levi un Juda. Rahel haud oba kjeene Kjinja un wia sea truarich doaräwa. Doawäajen jeef see Jakob äare Kjäakjsche Bilha to Fru, un dee haud dan twee Säns. Daut wieren Dan un Naftali. Lota jeef uk Lea Jakob äare Kjäakjsche Silpa to Fru. Dise haud uk twee Säns, dee heeten Gad un Asser. Tolatst haud Lea noch eemol twee Säns. Daut wieren Isachar un Sebulon.

Schlieslich kunn Rahel uk een Kjint haben. Daut wia een Junkje un see nand daut Josef. Lota woa wie noch väl von Josef lieren, wiels daut wort een huach aunjeseena Maun. Dise alf Junges worden jebuaren, aus Jakob noch bie Rahel äaren Voda Laban wond.

Jakob haud uk noch waut Dajchta. Oba enne Bibel woat bloos eene met Nomen jenant. Dee heet Dina.

Eenen Dach wort Jakob sikj eenich, hee wull Laban veloten un trigj no Kanaan trakjen. Hee pakt met siene groote Famielje opp, hold aul siene Schop un Vee toop un muak sikj opp de lange Reis.

Aus Jakob un siene Famielje aul een Stoot trigj en Kanaan wieren, kjrieech Rahel noch een Junkje. Daut wia, aus see jroz opp eene Reis wieren. Rahel haud daut bie de Jeburt soo schwoa, daut see storf. Oba daut Bäbe wia gaunz koasch. Jakob nand daut Benjamin.

De Nomes von Jakob siene twalf Säns well wie em Denkj hoolen, wiels von dee staumd daut gaunze Volkj Israel auf. De twalf Stam Israel worden no tieen von Jakob siene Säns un no de twee Säns von Josef jenant. Isaak, de Junges äare Groospape, läwd noch väle Joaren un wia secha sea schaftich, daut hee soo väl Grootsäns haud. Oba well wie nu mol seenen, waut met siene Grootdochta Dina wort.