Timotäus woat Paulus sien Helpa

DE JUNG, waut hia met dän Apostel Paulus toop es, heet Timotäus. Dee wont bie siene Famielje en Liestra. Siene Mutta heet Eunike un siene Grootmutta heet Lois.

Paulus wia nu aul toom dredde Mol en Liestra. Ojjefäa een Joa trigj wia Paulus hia toom ieeschte Mol jewast, aus hee met Barnabas toop opp eene Prädichtreis wia. Un nu wia Paulus toop met sienen Frint Silas wada hia.

Weetst du, waut Paulus hia jroz to Timotäus sajcht? Hee frajcht am: ‘West du nich met mie un Silas metkomen? Du wurscht ons kjennen halpen, wan wie en aundre Lenda prädjen doonen.’

‘Jo’, auntwuad Timotäus, ‘ekj wudd wellich metgonen.’ Kort nodäm veleet Timotäus dan von Tus un reisd met Paulus un Silas met. Oba ea wie mea doavon lieren, well wie mol seenen, waut Paulus bat hiatoo beläft haud. Daut wieren nu aul 17 Joa von don, aus Jesus am oppem Wajch no Damaskus bejäajent haud.

Weetst du noch, Paulus wia je no Damaskus jekomen, om Jesus siene Jinja to vefoljen. Oba dan wort hee selfst een Jinja! Lota wullen Paulus siene Fiend am dootmoaken, wiels dee daut nich jleichten, daut hee von Jesus prädjen deed. Oba de Jinja holpen Paulus, wajchtokomen. See leeten am en eenen Korf butakaunt von de Stautsmia rauf.

Lota jinkj Paulus no Antiochia toom dort prädjen. Doa worden Jesus siene Nofolja daut ieeschte Mol ‘Christen’ jenant. Dan worden Paulus un Barnabas opp eene Prädichtreis no Lenda wiet auf jeschekjt. Eent von de Städa, wua see hanreisden, wia Liestra, wua Timotäus wond.

Ojjefäa een Joa lota kjeem Paulus opp siene tweede Reis wada no Liestra. Von hia jinkj Timotäus met Paulus un Silas met. Weetst du, wua see hanreisden? Well wie ons daut mol opp de Launtkoat beseenen.

Daut ieeschte kjeemen see no de Nobastaut Ikonion, un von doa no eene Staut, waut uk Antiochia heet. Dan reisden see wieda no Troas, dan no Filippi, Tessalonich un no Beria. Kaust du Ateen opp de Launtkoat finjen? Paulus deed uk doa prädjen. Nodäm deeden see eentunhaulf Joa en Korint prädjen. Tolatst bleewen see noch een kortet Stootje en Efesus. Dan fuaren see met een Schepp trigj no Cäsarea un reisden von doa no Antiochia, wua Paulus wond.

Timotäus reisd väle hundade Kilomeeta met Paulus toop un holp am, de goode Bootschoft to prädjen un väle Christenvesaumlungen opptostalen. Wan du ieescht jrata best, west du Gott dan uk soo tru deenen, aus Timotäus deed?