Lekzion 2
Wäa es Gott?
Wäa es de woara Gott un woo es sien Nomen? (1, 2)
Waut fa eenen Kjarpa haft hee? (3)
Waut sent siene wichtichste Ieejenschoften? (4)
Sull wie bie de Aunbädunk Biltnissen un Simboolen brucken? (5)
Waut sent twee Mäajlichkjeiten Gott kjanen to lieren? (6)
1. De Menschen bäden väle Dinja aun. Oba de Bibel sajcht ons, daut daut mau eenen WOAREN Gott jeft. Hee haft aules jeschaufen, waut em Himmel un oppe Ieed es. Wiels hee ons daut Läwen jejäft haft, es hee dee Eena, dän wie eensich un auleen aunbäden sullen (1. Korinta 8:5, 6; Openboarunk 4:11).
2. Gott haft väle Tietels, oba mau eenen Nomen. Dis Nomen es JEHOVA. Ut de mieeschte Biblen wort de Nomen rutjenomen un fa Tietels soo aus HAR ooda GOTT omje-endat.a Doch aus de Bibel jeschräwen wort, kjeem de Nomen Jehova doa ojjefäa 7.000mol väa (2. Mose 3:15, NW; Psalm 83:18, NW).
3. Jehova haft eenen Kjarpa, oba dee es gaunz aundasch aus onsa. De Bibel sajcht: „Gott es Jeist“ (Johanes 4:24). Een Jeist es eene Läwesform, väl hecha aus onse. Kjeen Mensch haft jeemols Gott jeseenen. Jehova läft em Himmel, oba hee kaun aules seenen (Psalm 11:4, 5; Johanes 1:18). Waut es dan oba de heilja Jeist? Daut es kjeene Persoon soo aus Gott, nä, daut es Gott siene wirkjsome Krauft (Psalm 104:30).
4. De Bibel vetalt ons äwa Jehova siene Perseenlichkjeit. Dee wiest, daut siene wichtichste Ieejenschoften Leew, Jerajchtichkjeit, Weisheit un Macht sent (5. Mose 32:4; Hiob 12:13; Jesaja 40:26; 1. Johanes 4:8). En de Bibel woat uk jesajcht, daut hee erboarment, frintlich, toom Vejäwen reed, friejäwich un jeduldich es. Soo aus jehuarsome Kjinja sull wie vesieekjen, am notodoonen (Efeesa 5:1, 2).
5. Sull wie ons bie de Aunbädunk ver Biltnissen, Bilda, ooda Simboolen kjneeen ooda to an bäden? Nä! (2. Mose 20:4, 5). Jehova sajcht, daut wie bloos am auleen aunbäden motten. Hee es nich reed, siene Iea met irjent sest wäm ooda irjent sest waut to deelen. Biltnissen kjennen ons nich halpen, wiels dee sent machtloos (Psalm 115:4-8; Jesaja 42:8).
6. Woo kjenn wie Gott bäta kjanen lieren? Ieeschtens, wan wie de Dinja, waut hee jemoakt haft, beoobachten un doaräwa nodenkjen, waut dee ons sajen wellen. Gott siene Schepfungswoakjen sent een Bewies von siene groote Macht un siene Weisheit. En aul siene jemoakte Dinja see wie siene Leew (Psalm 19:2-7; Reema 1:20). Tweedens kjenn wie mea äwa Gott lieren, wan wie de Bibel studieren doonen. Doabennen beschrift hee noch krakjta, waut fa een Gott hee es. Hee moakt ons uk met sienen Väasauz bekaunt un sajcht ons, waut hee von ons haben well (Amos 3:7; 2. Timotäus 3:16, 17).
[Footnoot]
a See ‚Har‘ en „Butajeweenelje Wieed“ en dän Toosauz von de Plautdietsche Bibel.
[Bilda oppe Sied 5]
Wie lieren Gott kjanen derch daut waut hee jemoakt haft un derch de Bibel