Lekzion 7

Gott em Jebäd noda komen

Wuarom es daut wichtich räajelmässich to bäden? (1)

To wäm sell wie bäden, un woo? (2, 3)

Waut kaun eena em Jebäd erwänen? (4)

Wanea sust du bäden? (5, 6)

Horcht Gott no aule Jebäda? (7)

1. To bäden meent deemootich met Gott to räden. Du sust räajelmässich to Gott bäden. Dan feelst du die no am hanjetrocken, soo aus no eenen gooden Frint. Jehova es soo groot un majchtich, un doch hieet hee too, wan wie bäden! Bätst du räajelmässich to Gott? (Psalm 65:3; 1. Tessalonicha 5:17).

2. Daut Jebäd es een Poat von onse Aunbädunk. Doawäajen sull wie bloos to Jehova Gott bäden. Aus Jesus oppe Ieed wia, bäd hee emma to sienen Voda un to sest kjeenen. Wie sullen dautselwje doonen (Matäus 4:10; 6:9). Wie motten oba aule onse Jebäda en Jesus sienen Nomen moaken. Daut es een Bewies von onsen Respakjt fa Jesus siene Stalunk un von onsen Gloowen aun sien Looskjeepopfa (Johanes 14:6, 1. Johanes 2:1, 2).

3. Wan wie bäden doonen, sull wie Gott ons Hoat utschedden. Wie sullen nich utwendich jelieede Jebäda oppsajen ooda daut Jebäd ut een Jebädbuak väaläsen (Matäus 6:7, 8). Wie kjennen en irjent eene respakjtvolle Hoolunk bäden, to irjent eene Tiet, un aun irjent eene Städ. Gott kaun ons mau rajcht hieren, soogoa wan wie opp stelles en ons Hoat to am bäden (1. Samuel 1:12, 13). Wan wie fa ons perseenlich bäden, dan es daut goot eene stelle Städ to sieekjen, wua wie auleen sennen kjennen (Markus 1:35).

4. Äwa waut kaust du bäden? Äwa aules, waut diene Frintschoft met Gott beenflussen kunn (Filippa 4:6, 7). Daut Unser Vater wiest, daut wie om Jehova sienen Nomen un Väasauz bäden sellen. Wie kunnen uk doarom bäden, daut wie jenuach toom Läwen haben, om Vejäwunk von onse Sinden, un om Help Vesieekjungen to wadastonen (Matäus 6:9-13). Onse Jebäda sullen nich selfstsichtich sennen. Wie sullen bloos om Dinja bäden, waut met Gott sienen Wellen envestonen sent (1. Johanes 5:14).

5. Du kaust krakjt dan bäden, wan dien Hoat doano feelt Gott to danken ooda am to preisen (1. Chronik 29:10-13). Du sust bäden, wan du Schwierichkjeiten hast un dien Gloowen oppe Proow jestalt woat (Psalm 55:23; 120:1). Daut es aunjebrocht, wan du ver de Moltieden bätst (Matäus 14:19). Jehova deit ons enloden bie jieda Jeläajenheit to bäden (Efeesa 6:18).

6. Wie motten besondasch bäden, wan wie eene schwoare Sind begonen haben. En soone Tieden sull wie om Jehova siene Erboarmunk un Vejäwunk prachren. Wan wie onse Sinden ver am bekjanen un ons werkjlich aunstrenjen dee nich mea to doonen, es Gott „reed to vejäwen“ (Psalm 86:5; Spricha 28:13).

7. Jehova horcht bloos no jerajchte Menschen äare Jebäda. Wan du west, daut Gott diene Jebäda erhieren saul, motst du die aunstrenjen no siene Jebooten to läwen (Spricha 15:29; 28:9). Du motst met eene deemootje Jesennunk bäden (Lukas 18:9-14). Uk motst du die bemäajen aun daut to oabeiden, wuarom du bätst. Doamet bewiest du, daut du Gloowen hast un daut du daut werkjlich meenst waut du sajchst. Bloos dan woat Jehova onse Jebäda erhieren (Hebräa 11:6).