POAT 18

Paussendet fa de Toohiera

1. Korinta 9:19-23

TOOPFOTUNK: Doo daut soo, daut dee doaräwa nodenkjen motten, om waut daut doa jeit, soo daut dee daut späaren, see haben werkjlich waut jelieet.

Denkj doaräwa no, woo väl diene Toohiera aul weeten. Enne Städ bloos wada daut to sajen, waut dee aul jehieet haben, halp de Toohiera, daut dee daut Teema mol vonne aundre Sied beseenen.

Soont, waut de Toohiera aul kjanen, kaust du een bät bosja derchgonen, oba soont, waut fa dee noch nie es, een bät sachta.
Unjasto die daut un denkj doaräwa no. Wan daut jeit, dan nemm doa soont mank, waut de Toohiera veleicht noch nich ea jehieet haben, ooda soont, waut korz passieet es, om de wichtje Iedeeen to erkjläaren. Denkj sea äwa de Sach no, von waut du räden west, un waut daut doamet to doonen haft, waut du doa noch manknämen west.

Wan du die reedmoakst, dan jrebbel doa fa die selfst äwa no: “Waut?”, “Wuarom?”, “Wanea?”, “Wua?”, “Wäa?” ooda “Woo?” Wan du bieaun waut von dise Froagen brukst un uk sajchst, woont de Auntwuaten sent, dan woat daut daut läwendja moaken, waut du dee lieescht.
Wies, wuarom daut wichtich es, waut du sajchst. Wies, woo de Bibel an en äa däacheljet Läwen halpen kaun. Räd von eene Loag ooda Enstalunk ooda von eenen bestemden Waundel, waut fa de Toohiera paussent es.