Wuarom horcht Gott nich no aule Jebäda?

Ons himlischa Voda Jehowa Gott es wellich reed no onse opprechtje Jebäda to horchen. Oba hee horcht nich no aule Jebäda. Wuarom nich? Un waut wudd wie sellen em Denkj hoolen, wan wie bäden? See wie mol, waut de Schreft doatoo sajcht.

Menschen en eene Kjoakj läsen toop een Jebäd utem Jebädbuak

“Wan du bätst, dan saj nich emma un emma wada dautselwje äwa” (Matäus 6:7)

Jehowa well nich, daut wie emma wada de Jebäda utwendich äwasajen ooda dee bloos utem Jebädbuak läsen. Hee well, daut wie am sajen, waut wie em Hoat haben. Wurscht du daut jleichen, wan een Frint die jieda Dach emma dautselwje säd? Goode Frind räden gaunz frie un opprechtich unja sikj. Wan wie en onse ieejne Wieed bäden, dan wies wie onsen himlischen Voda, daut wie wellen siene Frind sennen.

Een Maun haft doa een Loss un kjikjt no Hecht

“Wan jie froagen, dan kjrie jie daut nich, wäajen jie ut eenen orrajchten Senn froagen” (Jakobus 4:3)

Daut es ons dietlich, daut Gott nich no onse Jebäda horcht, wan wie am no waut froagen, waut hee nich fa rajcht talt. Stal die mol väa, doa spält wäa opp Jelt un bät to Gott, daut hee jewennen well. Wudd Gott dän dan halpen? Hee haft je daut loten oppschriewen, daut wie nich sellen bejierich sennen un nich opp Jlekj vetruen (Lukas 12:15; Hebräa 13:5). Woo wudd Jehowa kjennen no soone Jebäda horchen? Wan wie wellen, daut Gott no onse Jebäda horcht, dan mott wie am no soont froagen, waut doamet stemt, woo hee ons daut en de Schreft lieet.

“Wan een Maun nich well Gott sien Jesaz hieren, well Gott däm siene Jebäda uk nich hieren” (Spricha 28:9)

En de ieeschtemmasche Tiet horcht Gott nich no soone Menschen, waut sikj nich aun siene Jebooten hilden (Jesaja 1:15-16). Gott haft sikj nich jeendat (Maleachi 3:6). Wan wie wellen, daut Gott no onse Jebäda horchen saul, dan mott wie ons soo goot aus mäajlich aun siene Jebooten hoolen. Oba woo es daut, wan wie ieeschtemma waut Orrajchtet jedonen haben? Woat Jehowa dan kjeenmol mea no onse Jebäda horchen? Jo, hee woat wada. Hee es leeftolich un woat ons vejäwen, wan wie ons endren un fa wieda soo läwen wellen, aus hee daut haben well (Aposteljeschicht 3:19).