Lia, soo to denkjen aus Jehowa un Jesus

1-2. (a) Waut es doa aules met en, Jehowa to leewen? (b) Woo wees Jesus, daut hee Jehowa met sien gaunzet Vestaunt leewd?

“LEEW Jehowa, dienen Gott, met dien gaunzet Hoat, met diene gaunze Seel, met aul diene Krauft un met dien gaunzet Vestaunt” (Luk. 10:27). Jesus wia daut dietlich, daut dit daut wichtichste Jeboot von daut Jesaz Moses wia. Soo, wie sellen Jehowa leewen met aules, waut wie haben un waut wie sent. Doa sent onse Wenschen, onse Jefeelen un onse Krauft met en. Oba wie motten Jehowa uk met ons Vestaunt leewen – doa es met en, woo wie äwa Sachen denkjen. Wan wie uk nich gaunz krakjt vestonen kjennen, woo Jehowa denkjt, sell wie oba proowen, soo to denkjen aus hee. Wäajen Jesus krakjt soo docht aus sien Voda, kjenn wie bäta vestonen, woo Gott denkjt, wan wie ons daut unjastonen, woo Jesus docht (1. Kor. 2:16 un de Erkjläarunk toom studieren “Wir … haben die Denkweise Christi”).

² Jesus leewd Jehowa met sien gaunzet Vestaunt. Hee wist, waut Gott von am haben wull, un hee wia sikj eenich, daut to doonen, wan hee doafäa uk lieden must. Wiels hee doano ut wia, sienen Voda sienen Wellen to doonen, leet hee sikj von nuscht aufhoolen.

3. Waut fa een Väarajcht haud Petrus, un to waut muntad hee de aundre Christen opp? (1. Petrus 4:1).

³ Petrus un de aundre Apostel hauden daut Väarajcht, met Jesus toop to sennen un daut perseenlich to seenen, woo hee aundre lieed. Aus Petrus sienen ieeschten Breef schreef, muntad hee de Christen opp, deeselwje Enstalunk to kjrieen, waut Christus haud (läs 1. Petrus 4:1).a Daut griechische Wuat fa “doaropp schaufen”, waut Petrus hia brukt, wort fa Soldoten jebrukt, waut äa Kjrichsjereetschoft reedmuaken fa dän Kjrich. Soo, wan Christen Jesus siene Enstalunk, ooda sien Denkjen, nodoonen, dan haben dee daut baste Jereetschoft, om jäajen schlajchte Wenschen un jäajen dän Soton siene Welt to kjamfen (2. Kor. 10:​3-5; Efs. 6:12).

4. Waut woa wie en disen Artikjel seenen?

⁴ Wie woaren ons unjastonen, woo Jesus docht un woo wie am nodoonen kjennen. Wie woaren uk seenen, woo wie kjennen (1) soo denkjen aus Jehowa, (2) deemootich sennen un (3) kloa denkjen.

PROOW, SOO TO DENKJEN AUS JEHOWA

5. Woo wees Petrus opp eene Sauz, daut hee nich soo docht aus Jehowa?

⁵ Opp eene Sauz wees Petrus, daut hee äwa de Sachen nich soo docht aus Jehowa. Jesus haud to siene Apostel jesajcht, daut hee wudd motten no Jerusalem gonen un de Gloowesleidasch äwajäft woaren un daut hee wudd jekjwält un dan dootjemoakt woaren (Mat. 16:21). Petrus wist, daut Jesus de vesproakna Messias wia, waut Gott sien Volkj raden wudd. Doawäajen kunn hee daut meist nich jleewen, daut Jehowa daut tooloten wudd, daut Jesus wudd omjebrocht woaren (Mat. 16:16). Dan neem Petrus Jesus oppoat un säd to am: “Sie nich soo strenj met die selfst, Har; soont woat die kjeenmol passieren” (Mat. 16:22). Wäajen Petrus äwa dise Sach nich soo docht aus Jehowa, stemd daut uk nich met daut, woo Jesus docht.

6. Woo wees Jesus, daut hee krakjt soo docht aus Jehowa?

⁶ Jesus docht krakjt soo aus sien himlischa Voda. Doawäajen säd hee to Petrus: “Go hinja mie, Soton! Du best mie em Stich; wiels du denkjst soo aus de Menschen un nich soo aus Gott” (Mat. 16:23). Jesus wist, daut hee wudd lieden un stoawen motten, om Jehowa sienen Wellen to doonen. Doawäajen neem hee Petrus sienen Rot nich aun, wan Petrus daut uk goot meend. Von dit lieed Petrus, daut hee soo denkjen must, aus Gott docht. Es dit nich eene wichtje Sach, waut wie aula lieren motten?

7. Woo wees Petrus lota, daut hee soo denkjen wull aus Jehowa? (See daut Bilt oppe väaschte Sied.)

⁷ Petrus wees lota, daut hee daut lieren wull, soo to denkjen aus Jehowa. Aus daut bat doa wia, daut de onbeschnädne Nichjuden uk wudden kjennen to Gott sien Volkj jehieren, wort Petrus jeschekjt, Kornelius to prädjen, dee eena von de ieeschte Nichjuden wia, waut Christen worden. De Juden hauden tosajen nuscht met de Nichjuden to doonen. Doawäajen es daut nich toom wundren, daut Petrus sien Denkjen ieescht mol enstalen must, soo daut hee de Nichjuden prädjen kunn. Oba aus Petrus vestunt, waut Gott sien Wellen wia, endad hee sien Denkjen. Doawäajen wäad hee sikj nich, no Kornelius to komen, aus se am komen leeten (Apj. 10:​28-29). Hee prädijd Kornelius un dän siene Famielje, un dee leeten sikj aula deepen (Apj. 10:​21-23, 34-35, 44-48).

8. Woo kjenn wie wiesen, daut wie soo denkjen aus Jehowa? (1. Petrus 3:8 un Footnoot).

⁸ Joaren lota rood Petrus siene Gloowesbreeda too, “äwareen to stemmen em Denkjen” (läs 1. Petrus 3:8 un Footnoot). Derch de Schreft kjenn wie aula lieren, soo to denkjen aus Jehowa, un opp dee Wajch kjenn wie met onse Gloowesbreeda veeent em Denkjen sennen. Biejlikj rood Jesus siene Nofolja too, daut ieeschte no Gott sien Kjennichrikj to sieekjen (Mat. 6:33). Doawäajen woat sikj veleicht wäa von diene Vesaumlunk eenich, opp irjenteene Wajch em Voltietdeenst to sennen. Wie sellen dänjanjen daut lowen un Help aunbeeden, enne Städ dän to sajen, daut hee een jemieteljet Läwen haben kaun.

SIE DEEMOOTICH

9-10. Woo wees Jesus, daut hee sea deemootich wia?

⁹ Dän latsten Owent, ea Jesus storf, lieed hee Petrus un de aundre Apostel eene wichtje Sach äwa deemootich sennen. Jesus haud Petrus un Johanes jeschekjt, aules reedtomoaken fa de latste Moltiet, waut hee met äant toop äten wudd. Bie dit Reedmoaken wia secha met en, daut see doa eene Komm un Haundieekja hauden, wua de Jast sikj dan wudden loten de Feet wauschen, ea dee eeten. Oba wäa wudd soo deemootich sennen toom dise Oabeit doonen?

¹⁰ Fa Jesus wia daut kjeene groote Sach. Hee deed daut un wees doaderch, woo deemootich hee wia. De Apostel motten sikj secha jewundat haben, daut Jesus dise Oabeit deed, waut jeweenlich een Deena deed. Jesus läd sienen Äwarock tosied, neem een Haunduak un neem sikj daut rom de Lint. Dan goot hee Wota en eene Komm nenn un funk aun, de Jinja de Feet to wauschen (Joh. 13:​4-5). Daut mott secha een Stoot jedieet haben, aule 12 Apostel de Feet to wauschen, wua uk Judas met en wia, waut am veroden wudd. Oba Jesus wia deemootich un deed dise Oabeit. Dan säd hee gaunz jeduldich to dee: “Es junt daut dietlich, waut ekj junt jedonen hab? Jie räden mie met ‘Liera’ un ‘Har’ aun, un jie sent rajcht, wiels dauts, waut ekj sie. Doawäajen, wan ekj de ‘Har’ un de ‘Liera’ sie un junt de Feet jewoschen hab, dan wudd jie junt uk sellen unjarenaunda de Feet wauschen” (Joh. 13:​12-14).

11. Woo wees Petrus, daut hee jelieet haud, deemootich to sennen? (1. Petrus 5:5 un Footnoot). (See uk daut Bilt.)

¹¹ Petrus lieed von Jesus, deemootich to sennen. Aus Jesus trigj nom Himmel jefoaren wia, muak Petrus derch een Wunda eenen Maun jesunt, waut von de Jeburt aun lom wia (Apj. 1:​8-9; 3:​2, 6-8). Eene groote Häad sagen daut Wunda un saumelden sikj rom am (Apj. 3:11). Petrus wia en eene Kultua oppjewossen, wua de Menschen daut jleichten, Väarajchten to haben un aunjeseenen to sennen. Waut wudd Petrus nu doonen? Wudd hee de Oppmoakjsomkjeit nu opp sikj lenkjen? Nä, Petrus wia deemootich un jeef Jehowa un Jesus aul de Iea, waut dee troff, un säd: “Derch [Jesus] sienen Nomen un wäajen onsen Gloowen aun sienen Nomen es dis Maun nu stoakj jemoakt” (Apj. 3:​12-16). Lota schreef Petrus eenen Breef aun de Christen, om dee dietlich to moaken, daut see sullen deemootich sennen. De Wieed, waut hee doa brukt, halpen ons veleicht aun daut denkjen, waut Jesus dän latsten Owent ver sienen Doot deed; hee neem sikj daut Haunduak rom de Lint un wosch de Apostel de Feet (läs 1. Petrus 5:5 un Footnoot).

12. Woo kjenn wie wieda lieren, deemootich to sennen soo aus Petrus?

¹² Wan wie ons aunstrenjen, deemootich to sennen, dan doo wie Petrus sien Biespel no. Denkj doaraun, daut bie de woare Deemoot mea met en es, aus bloos waut to sajen, waut sikj deemootich hieet. Bie daut Wuat, waut Petrus fa Deemoot brukt, es met en, woo wie äwa ons selfst un äwa aundre denkjen. Wie doonen waut fa aundre, wäajen wie Jehowa un de Menschen leewen, un nich wiels wie wellen jeloft woaren. Wan wie Jehowa schaftich deenen un soo väl aus mäajlich fa onse Breeda doonen, endoont aus daut oppfelt ooda nich, dan wies wie, daut wie deemootich sent (Mat. 6:​1-4).

“DOO KLOA DENKJEN”

13. Waut es bie “kloa denkjen” aules met en?

¹³ Waut es bie “kloa denkjen” aules met en? (1. Pet. 4:7). Een Christ, waut kloa denkjt, deit sien Bastet, om goode Entscheidungen to moaken, waut wiesen, daut hee soo denkjt aus Jehowa. Soon Christ weet, daut et nuscht Wichtjeret jeft aus sien Veheltnis met Jehowa. Hee denkjt uk nich too väl von sikj selfst un es sikj em Kloaren doaräwa, daut hee nich aules weet. Un hee wiest uk, daut hee sikj opp Jehowa velat, doaderch daut hee foaken om siene Help bät.b

14. Aun waut es to seenen, daut Petrus sikj opp eene Sauz nich opp Jehowa veleet?

¹⁴ Aun Jesus sienen latsten Owent ver sienen Doot, woarnd hee siene Apostel un säd: “Dise Nacht woa jie aula wäajen mie tofaulkomen”. Petrus auntwuad gaunz äwazeicht: “Wan de aundre uk aula woaren wäajen die tofaulkomen, ekj woa kjeenmol tofaulkomen!” Aun dän Owent jeef Jesus de Apostel dän Rot: “Blieft waka un bät eendrajchtich” (Mat. 26:​31, 33, 41). Wan Petrus Jesus sienen Rot nojekomen wia, wudd hee veleicht äwanäment jewast sennen un daut toojestonen haben, daut hee Jesus sien Apostel wia. Oba enne Städ daut vestreet Petrus daut, daut hee Jesus kjand, un lota beschod hee daut sea (Mat. 26:​69-75).

15. Waut holp Jesus, aun sienen latsten Owent kloa to denkjen?

¹⁵ Jesus veleet sikj gaunz opp Jehowa. Hee bäd foaken, wan hee uk volkomen wia. Daut jeef am dän Moot, daut to doonen, waut Jehowa von am haben wull (Mat. 26:​39, 42, 44; Joh. 18:​4-5). Petrus woat daut secha kjeenmol vejäten haben, woo foaken Jesus aun sienen latsten Owent bäd.

16. Woo wees Petrus, daut hee jelieet haud, kloa to denkjen? (1. Petrus 4:7).

¹⁶ Met de Tiet lieed Petrus emma dolla, sikj derch daut Jebäd opp Jehowa to veloten. Aus Jesus vom Doot oppstunt, vesechad hee Petrus un de aundre Apostel, daut see dän heiljen Jeist kjrieen wudden, soo daut see de goode Norecht prädjen kunnen. Oba Jesus säd to äant, daut see en Jerusalem bliewen sullen, bat hee dän heiljen Jeist schekjen wudd (Luk. 24:49; Apj. 1:​4-5). Waut deed Petrus en dee Tiet, aus hee luad? Hee un de aundre Christen “deeden aunhoolent bäden” (Apj. 1:​13-14). Lota, en sienen ieeschten Breef, rood Petrus siene Gloowesbreeda too, kloa to denkjen un sikj derch daut Jebäd opp Jehowa to veloten (läs 1. Petrus 4:7). Petrus lieed daut, sikj opp Jehowa to veloten, un deed de Breeda un Sestren Moot toospräakjen (Gal. 2:9).

17. Waut sell wie emma doonen, endoont met waut wie ons aules vestonen? (See uk daut Bilt.)

¹⁷ Daut wie kloa denkjen kjennen, mott wie foaken to Jehowa bäden. Dauts wichtich, daut wie eendrajchtich to Jehowa bäden, endoont met waut wie ons aules vestonen. Besonda wan wie wichtje Entscheidungen trafen motten, sell wie Jehowa om Aunleidunk bäden un doaropp vetruen, daut hee emma weet, waut daut Baste fa ons es.

18. To waut saust du die eenich sennen?

¹⁸ Sent wie nich dankboa, daut Jehowa ons soo jemoakt haft, daut wie siene Ieejenschoften nodoonen kjennen? (1. Mo. 1:26). Secha kjenn wie Jehowa nich volkomen nodoonen (Jes. 55:9). Oba soo aus Petrus well wie wieda doaropp schaufen, soo to denkjen, aus Jehowa denkjt, un proowen, deemootich to sennen un kloa to denkjen.