Nemm daut deemootich aun, waut du nich weetst

1. Woo muak Jehowa ons; un wuarom?

JEHOWA muak ons soo, daut wie denkjen kjennen, mea lieren kjennen, waut vestonen kjennen un no daut no weis haundlen kjennen. Wuarom muak hee ons soo? Wiels hee well, daut wie “Gotteserkjantnis finjen” un onse Fäichkjeit to denkjen brucken, wan wie am deenen (Spr. 2:​1-5; Reem. 12:1).

2. (a) Äwa waut mott wie ons em Kloaren sennen? (Hiob 37:​23-24). (See uk daut Bilt.) (b) Woo kjemt ons daut togood, wan wie daut aunnämen, daut wie nich aules weeten?

² Wan wie uk emma mea lieren kjennen, es doa doawäajen een deel, waut wie nich weeten (läs Hiob 37:​23-24, NW). See wie mol Hiob sien Biespel. Jehowa stald Hiob väle Froagen, waut am holpen to vestonen, daut dee lang nich aules wist. Dit wees Hiob, daut hee sull deemootich sennen un sien Denkjen endren (Hiob 42:​3-6). Ons kjemt daut uk togood, wan wie daut deemootich aunnämen, daut wie nich aules weeten. Daut halpt ons, doaropp to vetruen, daut Jehowa ons daut sajen woat, waut ons werkjlich fält to weeten, soo daut wie weise Entscheidungen moaken kjennen (Spr. 2:6).

3. Waut woa wie en disen Artikjel derchgonen?

³ En disen Artikjel woa wie äwa eenjet räden, waut wie nich weeten un wuarom ons daut kaun schwoa sennen, dise Sachen nich to weeten. Oba wie woaren uk seenen, wuarom daut toom Gooden es, daut wie eenjet nich weeten. Wan wie mea doaräwa lieren, woa wie een jratret Vetruen doaropp kjrieen, daut Jehowa, “dee aules weet”, ons aules sajcht, waut ons werkjlich fält to weeten (Hiob 37:16).

WIE WEETEN DAUT NICH, WANEA DAUT ENJ KOMEN WOAT

4. Waut es no Matäus 24:36 no eene Sach, waut wie nich weeten?

⁴ Läs Matäus 24:36. Wie weeten nich, wanea daut Enj von dise Welt komen woat. Mau rajcht aus Jesus oppe Ieed wia, wist hee nich dän “Dach un dee Stund”.a Lota säd hee to de Apostel, daut Jehowa dee es, waut daut Rajcht haft, daut fausttosaten, wanea eenje Sachen passieren woaren (Apj. 1:​6-7). Jehowa haft de Tiet faustjesat, wanea daut Enj von dise Welt komen woat, oba wie kjennen daut nich utfinjen, wanea daut krakjt sennen woat.

5. Woo jeit ons daut veleicht, wäajen wie nich krakjt weeten, wanea daut Enj komen woat?

⁵ Wäajen wie nich weeten, wanea daut Enj kjemt, weet wie uk nich, woo lang wie noch luaren motten. Wäajen dit woa wie veleicht ojjeduldich ooda mootloos, besonda wan wie aul fa eene lange Tiet no Jehowa sienen Dach jeluat haben. Ooda ons felt daut schwoa, doamet foadich to woaren, wan wie von de Famielje ooda aundre vespott woaren (2. Pet. 3:​3-4). Veleicht denkj wie soo, daut wan wie krakjt wisten, wanea daut Enj komen wudd, dan wudd wie jeduldja sennen un daut leichta uthoolen kjennen, wan aundre ons vespotten.

6. Wuarom es daut goot, daut nich krakjt to weeten, wanea daut Enj kjemt?

⁶ Wiels Jehowa ons daut nich krakjt weeten lat, wanea daut Enj kjemt, hab wie de Jeläajenheit to wiesen, daut wie am deenen, wiels wie am leewen un opp am vetruen. Wie wellen Jehowa fa emma deenen un nich bloos bat daut Enj kjemt. Enne Städ bloos doaräwa notodenkjen, wanea “Jehowa sien Dach” komen woat, es daut bäta, doaräwa notodenkjen, waut fa Goodet passieren woat, wan dis Dach kjemt. Dit woat ons halpen, Jehowa noch noda to komen un aules to doonen, waut wie kjennen, om am to jefaulen (2. Pet. 3:​11-12).

7. Waut weet wie?

⁷ Wie sellen äwa daut nodenkjen, waut wie weeten. Wie weeten, daut de latste Doag aune 1914 aunfungen. Jehowa leet je en de Bibel Profezeiungen oppschriewen, waut kloa no dit Joa handieden. Hee leet uk väle Eenselheiten oppschriewen, woo daut enne Welt no dit Joa sennen wudd. Doawäajen sent wie ons gaunz secha, daut “de groota Dach fa däm HARN ... dicht bie” es (Zef. 1:14). Wie weeten uk, waut von Woakj Jehowa well, daut wie derchfieren: Hee well, daut wie soo väl Menschen aus mäajlich “de goode Norecht von daut Kjennichrikj” vetalen (Mat. 24:14). Dise Norecht woat en ojjefäa 240 Lenda un opp mea aus 1,000 Sproaken bekauntjemoakt. Wie brucken nich krakjt weeten, wanea “dee Dach un dee Stund” komen woat, om flietich bie dit Woakj mettomoaken.

WIE WEETEN NICH, WOO JEHOWA ONS KRAKJT HALPEN WOAT

8. Waut es met “Gott siene Wäaj” jemeent? (Liera 11:5).

⁸ Wie kjennen nich emma “Gott siene Wäaj” vestonen (läs Liera 11:5). Waut es met “Gott siene Wäaj” jemeent? Doamet es daut jemeent, waut Jehowa selfst deit ooda waut hee toolat, daut sien Wellen kaun jedonen woaren. Wie kjennen nich krakjt weeten, wuarom Jehowa eenjemol waut toolat ooda woo krakjt hee ons halpen woat (Psa. 37:​5, NW). Soo aus Liera wiest, kjenn wie daut nich vestonen, woo een Bäbe em Muttalief waust – nich mol de Forscha komen gaunz doahinja. Krakjt soo schwoa es daut uk fa ons, “Gott siene Wäaj” to vestonen.

9. Woo jeit ons daut veleicht, wiels wie nich weeten, woo Jehowa ons krakjt halpen woat?

⁹ Wiels wie nich weeten, woo Jehowa ons krakjt halpen woat, kaun ons daut veleicht schwoa sennen, eenje Entscheidungen to moaken. Veleicht hool wie ons trigj, eenjet opptojäwen, daut wie mea em Prädichtdeenst doonen kjennen ooda wua hantrakjen kjennen, wua daut aun mea Vekjindja fält. Ooda veleicht twiewel wie doaraun, aus Gott met ons tofräd es – biejlikj wan wie ons en sienen Deenst waut väanämen un daut nich volbrinjen kjennen, wan wie ons em Prädichtdeenst sea aunstrenjen un daut oba soo lat, daut doa nich väl bie rutkjemt, ooda wan wie eene aundre Oppgow en de Organisazion haben un doa väl Schwierichkjeiten oppkomen.

10. En woone Ieejenschoften kjenn wie ons vebätren, wan wie nich weeten, woo Jehowa ons krakjt halpen woat?

¹⁰ Daut nich to weeten, woo Jehowa ons halpen woat, kjemt ons en Werkjlichkjeit togood. Doaderch kjenn wie ons en eenje wichtje Ieejenschoften vebätren – biejlikj en Deemoot. Daut halpt ons to vestonen, daut Jehowa siene Jedanken un siene Wäaj väl bäta sent aus onse (Jes. 55:​8-9). Wie lieren uk, dolla doaropp to vetruen, daut Jehowa sikj daut baste om de Sachen kjemren kaun. Wan wie em Prädichtdeenst väl Studiums aunfangen kjennen ooda eene Oppgow en de Organisazion fein doonen kjennen, dan jäw wie Jehowa de Iea, waut am traft (Psa. 127:1; 1. Kor. 3:7). Oba wan waut nich soo utkjemt, aus wie wudden jejleicht haben, dan mott wie em Denkj hoolen, daut Jehowa doawäajen aules unja Kontroll haft (Jes. 26:12). Wie doonen aules, waut wie kjennen, un veloten ons wieda doaropp, daut Jehowa daut Äwaje doonen woat. Wie sent ons secha, daut hee ons leiden woat, uk wan hee daut nich opp soone butajeweenelje Wajch deit, aus hee daut ieeschtemma jedonen haft (Apj. 16:​6-10).

11. Waut vonne wichtje Sachen weet wie?

¹¹ Denkj äwa daut no, waut wie weeten. Wie weeten, daut Jehowa emma leeftolich, jerajcht un weis haundelt. Wie weeten, daut hee daut väl räakjent, waut wie fa am un onse Gloowesbreeda doonen. Un wie weeten, daut Jehowa deejanje emma beloont, waut am tru sent (Heb. 11:6).

WIE WEETEN NICH, WAUT MORJEN SENNEN WOAT

12. Waut weet wie no Jakobus 4:​13-14 no nich?

¹² Läs Jakobus 4:​13-14. Doa es eenatlei, waut wie aula nich weeten: Wie weeten nich, woo ons Läwen morjen sennen woat. Woosoo nich? Wäajen en dise Welt “bie aulem mol onverhofs waut oppkjemt to eene Tiet, wan eena doa nich met räakjent” (Liera 9:​11, NW). Doawäajen kjenn wie nich weeten, aus onse Plons jlekjen woaren ooda aus wie noch aum Läwen sennen woaren, om dee derchtofieren.

13. Woo feel wie ons veleicht, wäajen wie nich krakjt weeten, waut doa komen woat?

¹³ Daut kaun schwoa sennen uttohoolen, wan wie nich krakjt weeten, waut noch komen woat. Wuarom? Wie duaren veleicht doaräwa, waut noch passieren kaun, un doaderch kjenn wie onse Freid velieren. Ons Läwen kaun sikj uk haustich endren ooda doa kaun onverhofs waut sea Schlemmet passieren un daut kaun ons bat doa brinjen, daut wie truarich un vestalt sent. Un wan daut, waut wie ons wenschen, nich soo romkjemt, kjenn wie enteischt un mootloos woaren (Spr. 13:12).

14. Waut mott wie doonen, daut wie werkjlich kjennen schaftich sennen? (See uk de Bilda.)

¹⁴ Wan wie Schwierichkjeiten uthoolen – endoont waut vonne – wies wie, daut wie onsen himlischen Voda ut Leew deenen un nich, wiels wie waut doabie haben. De biblische Jeschichten wiesen ons, daut wie nich doamet räakjnen kjennen, daut Jehowa ons fa aule Schwierichkjeiten beschitzen woat, un daut hee daut uk nich jeplont haft, woo daut met ons Läwen utkomen woat. Hee weet, daut onse Freid nich doavon aufhenjt, daut wie weeten, waut wie lota noch beläwen woaren. Oba onse Freid kjemt doavon, daut wie Jehowa no siene Aunleidunk froagen un am jehorchen (Jer. 10:​23, NW). Wan wie bie am no Help sieekjen, om Entscheidungen to trafen, dan es daut soo, aus wan wie sajen: “Wan Jehowa well, dan woa wie läwen un dit un daut doonen” (Jak. 4:15).

15. Äwa waut kjenn wie ons secha sennen?

¹⁵ Wie weeten nich, waut jieda Dach sennen woat, oba wie weeten, daut Jehowa ons eewjet Läwen vesproaken haft – endoont aus em Himmel ooda oppe Ieed. Wie weeten, daut hee nich lieejen kaun un daut am nuscht doavon aufhoolen kaun, siene Vespräakjungen to erfellen (Tit. 1:2). Bloos hee kaun verutsajen, “waut passieren saul, un … waut komen woat”. Aules, waut hee en de Bibeltiet verutsäd, erfeld sikj, un daut, waut hee fa lota vesproaken haft, woat sikj uk erfellen (Jes. 46:10). Wie sent ons gaunz secha, daut doa nuscht es, waut Jehowa doavon aufhoolen kaun, ons to leewen (Reem. 8:​35-39). Hee woat ons de Weisheit, Krauft un Troost jäwen, waut ons fält, daut wie aules uthoolen kjennen, waut doa oppkjemt. Wie sent ons secha, daut Jehowa ons halpen un säajnen woat (Jer. 17:​7-8).

WIE KJENNEN DAUT NICH GAUNZ BEJRIEPEN, WOO GOOT JEHOWA ONS KJANT

16. Waut weet Jehowa no Psalm 139:​1-6 no äwa ons, waut wie veleicht nich mol gaunz bejriepen kjennen?

¹⁶ Läs Psalm 139:​1-6. Ons Schepfa weet krakjt, woo wie jemoakt sent un waut wie aules beläft haben. Hee weet, wuarom wie soo denkjen un feelen, aus wie doonen. Hee weet, waut wie sajen un waut wie doamet sajen wellen. Un hee weet, waut wie doonen un wuarom wie daut doonen. De Kjennich David säd, daut Jehowa ons emma em Uag helt un daut hee ons en jieda Loag halpen kaun. Woo jeit die daut, wan du doaräwa nodenkjst, daut de aulmajchtja Gott, de Schepfa von Himmel un Ieed, soo sea om die todoonen es? David säd: “Soone Erkjantnis es too wundavoll fa mie un daut es too huach; ekj kaun daut nich bejriepen” (Psa. 139:6).

17. Wuarom kaun ons daut schwoa sennen to jleewen, daut Jehowa ons werkjlich goot kjant?

¹⁷ Ons kaun daut schwoa sennen, Jehowa aus eenen leeftoljen Voda to seenen, dee om ons bekjemmat es, wäajen daut, waut wie en de Famielje beläft haben, wäajen onse Kultua ooda wäajen dän Gloowen, waut wie ea hauden. Ooda veleicht denkj wie, daut wie väl toone groote Fäla jemoakt haben un daut Jehowa wiet auf von ons es un daut hee kjeenmol wudd wellen ons Frint sennen – mau rajcht David jinkj daut eenjemol soo (Psa. 38:​19, 22). Ooda veleicht wundat eene Persoon, dee jieren een bätret Läwen fieren well un sikj aun Jehowa siene jerajchte Jesazen hoolen well: “Wan Gott mie werkjlich vestonen kunn, wuarom wudd hee dan velangen, daut ekj mie endren sull? Wuarom wudd hee mie nich soo aunnämen, aus ekj sie?”

18. Woo kjemt ons daut togood, daut auntonämen, daut Jehowa ons bäta kjant aus wie selfst? (See uk de Bilda.)

¹⁸ Wie kjennen lieren, daut auntonämen, daut Jehowa ons bäta kjant, aus wie ons selfst kjanen, un daut hee daut Goode en ons sitt, waut wie selfst nich seenen. Wan hee uk onse Fäla sitt, weet hee oba, woo wie ons feelen un wuarom wie soo sent aus wie sent, un hee leeft ons (Reem. 7:15). Waut deit daut aun ons, wan wie daut vestonen, daut Jehowa emma doano kjikjt, waut vonne goode Menschen wie woaren kjennen? Daut jeft ons daut Vetruen, waut ons fält, om am tru un met Freid to deenen.

19. Waut weet wie neiw äwa Jehowa?

¹⁹ Wie weeten, daut Jehowa Leew es; doa es kjeen Twiewel aun (1. Joh. 4:8). Wie weeten, daut hee sikj emma daut Baste fa ons wenscht un daut hee ons Jesazen jeft, wäajen hee ons leeft. Wie weeten, daut Jehowa well, daut wie daut eewje Läwen kjrieen. Doatoo jeef je hee daut Leesjelt. Daut Leesjelt jeft ons de Sechaheit, daut wie Jehowa soo deenen kjennen, aus hee daut haben well, uk wan wie Fäla moaken (Reem. 7:​24-25). Un wie weeten, daut Gott jrata es aus ons Hoat un aules weet (1. Joh. 3:​19-20). Jehowa sitt aules von ons un hee es sikj secha, daut wie am rajcht deenen kjennen.

20. Waut woat ons halpen, ons nich äwamotich Sorjen to moaken?

²⁰ Jehowa sajcht ons aules, waut ons werkjlich fält to weeten. Wan wie deemootich sent un daut aunnämen, dan moakt wie ons nich äwamotich Sorjen äwa soone Sachen, wua wie nich de Macht äwa haben. Enne Städ daut hool wie ons met soont Drock, waut doa werkjlich wichtich es. Doaderch wies wie, daut wie gaunz opp Jehowa vetruen, wiels hee “weet krakjt, woo daut met de Sach es” (Hiob 36:4). Wan wie nu uk nich aules vestonen kjennen, weet wie oba, daut Jehowa ons fa emma Nieet lieren woat. Un wie freien ons, wiels wie kjeenmol opphieren woaren, niee Sachen äwa onsen grooten Gott to lieren (Liera 3:​11, NW).