“Wält junt …, wäm jie deenen wellen”

1. Waut mott wie doonen, om werkjlich schaftich to sennen; un wuarom? (Jesaja 48:​17-18).

ONS himlischa Voda leeft ons sea un hee well, daut ons daut nu saul scheen gonen un uk enne Tookunft (Liera 3:​12-13). Hee haft ons soo jemoakt, daut wie veschiednet volbrinjen kjennen, oba hee haft ons nich soo jemoakt, daut wie äwa ons selfst rejieren kjennen ooda selfst entscheiden sellen, waut rajcht un orrajcht es (Liera 8:​9, NW; Jer. 10:​23, NW). Wan wie opp iernst wellen schaftich sennen, mott wie am deenen un am jehorchen (läs Jesaja 48:​17-18, NW).

2. Waut well de Beesa Fient, daut wie jleewen sellen, un waut haft Jehowa doamet jedonen?

² De Beesa Fient well haben, daut wie jleewen sellen, daut de Menschen sikj selfst rejieren kjennen un daut ons daut goanich aun Jehowa fält toom schaftich sennen (1. Mo. 3:​4-5). Toom wiesen, daut de Fient een Läajna es, haft Jehowa daut toojeloten, daut Menschen fa eene jewesse Tiet äwa aundre Menschen rejieren kjennen. Un dauts nu gaunz kloa to seenen, daut daut nich schauft. Oba enne Bibel jeft daut een deel Biespels von Mana un Frues, waut een feinet Läwen hauden, wiels dee sikj daut wälden, Jehowa to deenen. Daut baste Biespel es Jesus Christus. En disen Artikjel woa wie nu seenen, wuarom hee sikj daut wäld, Jehowa to deenen. Dan woa wie doaräwa räden, wuarom ons himlischa Voda daut vedeent, daut wie am aunbäden. Un tolatst woa wie äwa eenje Jrind nodenkjen, wuarom wie ons daut jewält haben, Jehowa to deenen.

WUAROM JESUS SIKJ DAUT WÄLD, JEHOWA TO DEENEN

3. Waut bood de Soton Jesus aun, un woo entscheid Jesus sikj?

³ Aus Jesus oppe Ieed wia, must hee sikj entscheiden, wäm hee deenen wudd. Nich lang no siene Doop bood de Soton am aule Kjennichrikjs von de Ieed aun, wan Jesus am bloos een Mol aunbäden wudd. Oba Jesus säd to am: “Fuat met die, Soton! Wiels daut steit jeschräwen: ‘Du saust Jehowa, dienen Gott, aunbäden un bloos fa am heiljen Deenst doonen’” (Mat. 4:​8-10). Wuarom entscheid Jesus sikj soo aus dit? See wie mol een poa Jrind.

4-5. Waut wieren eenje Jrind, wuarom Jesus sikj daut wäld, Jehowa to deenen?

⁴ De jratste Uasoak, wuarom Jesus sikj daut wäld, Jehowa to deenen, wia Leew. Jesus haud eene groote Leew fa sienen Voda un räakjend dän väl (Joh. 14:31). Un dan uk noch deend Jesus Jehowa, wäajen daut daut Rajchte wia (Joh. 8:​28-29; Opb. 4:11). Hee wist, daut daut Läwen von Jehowa kjemt un daut Jehowa opp to veloten un friejäwrich es (Psa. 33:4; 36:10; Jak. 1:17). Jehowa haud Jesus emma de Woarheit jesajcht un aules, waut Jesus haud, kjeem von Jehowa (Joh. 1:14). Oba de Soton es gaunz aundasch. Hee brocht de Menschen bat doa to sindjen, un doawäajen storwen dee. Hee es een Läajna, es bejierich un bloos om sikj selfst todoonen (Joh. 8:44). Wiels Jesus dit aules wist, wudd hee sikj nich mol veleicht soo aus de Soton jäajen Jehowa jestalt haben (Filip. 2:​5-8).

⁵ Doa wia noch een Grunt, wuarom Jesus sikj daut wäld, Jehowa to deenen: Hee wist, woo goot daut utkomen wudd (Heb. 12:2). Wan hee tru bleef, wudd hee sienen Voda sienen Nomen heiljen, un hee wudd daut mäajlich moaken, daut aul daut Lieden, waut de Fient veuasoakt haft, wada goot jemoakt wort.

WUAROM JEHOWA DAUT VEDEENT, DAUT WIE AM AUNBÄDEN

6-7. (a) Wuarom deenen Jehowa vondoag dän Dach väle nich? (b) Wuarom vedeent Jehowa daut, daut wie am aunbäden?

⁶ Väl Menschen bie dise Tiet deenen Jehowa doawäajen nich, wiels dee dän noch nich kjanen jelieet haben. Dee weeten nich, woo dee es un waut hee aul aules fa dee jedonen haft. Krakjt soo wia daut bie eenje Menschen en Ateen, aus Paulus dee prädijd (Apj. 17:​19-20, 30, 34).

⁷ Paulus säd to de Menschen en Ateen, daut de woara Gott dee es, waut “aule Menschen daut Läwen un dän Odem un aule Sachen” jeft. Un hee säd noch: “Wäajen am hab wie daut Läwen un bewäajen ons un sent hia”. Gott es de Schepfa un “hee haft von eenen Maun aule Sorten Menschen jemoakt”. Doawäajen vedeent bloos hee daut, daut wie am aunbäden (Apj. 17:​25-26, 28).

8. Waut woat Jehowa kjeenmol doonen? Laj daut ut.

⁸ Wäajen Jehowa de Schepfa es un de bowaschta Harscha, wudd hee de Menschen goot kjennen bemotten, am to deenen. Oba soont wudd Jehowa kjeenmol doonen. Hee lat ons opp veschiedne Wäaj weeten, daut hee doa es un daut hee jieda eenem von ons sea leeft. Hee well, daut soo väl Menschen aus mäajlich siene Frind woaren un fa emma bliewen (1. Tim. 2:​3-4). Krakjt doawäajen haft Jehowa ons utjelieet, aundre von sien Väanämen to vetalen un von aul daut Scheene, waut hee fa de Menschen doonen woat (Mat. 10:​11-13; 28:​19-20). Un hee haft uk Vesaumlungen oppjestalt un doafäa jesorcht, daut leeftolje Eltestasch sikj om ons kjemren (Apj. 20:28).

9. Woo wiest Jehowa, daut hee aule Menschen leeft?

⁹ Jehowa siene groote Leew es doaraun to seenen, woo hee to dee es, waut nich aun am jleewen wellen. Denkj mol äwa dit no: Von dan aus daut Menschen jeft, haben Millionende sikj daut jewält, soo to läwen aus dee daut fa rajcht talen, enne Städ Jehowa to jehorchen. Un doch haft Jehowa äant leeftolich daut jejäft, waut äant toom läwen fält un daut äant daut kaun scheen gonen (Mat. 5:​44-45; Apj. 14:​16-17). Dee kjennen Frind haben un Famielje, waut äant väl räakjnen; dee kjennen Kjinja haben; dee kjennen schaufen un Freid haben (Psa. 127:3; Liera 2:24). Aul daut bewiest, daut ons himlischa Voda aule Menschen leeft (2. Mo. 34:6). Well wie nu mol doaräwa nodenkjen, wuarom wie ons daut jewält haben, Jehowa to deenen un woo hee ons doafäa beloont.

WUAROM WIE ONS DAUT JEWÄLT HABEN, JEHOWA TO DEENEN

10. (a) Waut es de jratste Uasoak, wuarom wie Jehowa deenen? (Matäus 22:37). (b) Woo kjeem die daut aul togood, daut Jehowa jeduldich es? (Psalm 103:​13-14).

¹⁰ De jratste Uasoak, wuarom wie Jehowa deenen, es onse groote Leew fa am – krakjt soo aus daut bie Jesus wia (läs Matäus 22:37). Wan wie mea äwa Jehowa siene feine Ieejenschoften lieren, dan well wie am noch noda komen. Een Biespel es Jehowa siene Jedult met ons. Aus de Israeliten am ojjehuarsom wieren, haud Jehowa “väle Joaren Jedult met an” (Neh. 9:30). Krakjt soo sent wie aula onvolkomen un moaken Fäla – un Jehowa denkjt doaraun (läs Psalm 103:​13-14). Wan wie doaräwa nodenkjen, woo jeduldich Jehowa met ons es, un uk äwa siene aundre feine Ieejenschoften, well wie am dan nich fa emma deenen?

11. Waut sent noch aundre Jrind, wuarom wie ons daut jewält haben, onsen Voda em Himmel to deenen?

¹¹ Wie wellen Jehowa uk doawäajen deenen, wiels daut daut Rajchte es (Mat. 4:10). Un wie weeten uk, woo väl Goodet doabie rutkjemt. Wan wie Jehowa tru deenen, dan kjenn wie methalpen, daut Jehowa sien Nomen jeheilicht woat, wie kjennen bewiesen, daut de Soton een Läajna es un wie kjennen onsen Voda schaftich moaken. Un wan wie ons daut nu wälen, Jehowa to deenen, dan hab wie mau rajcht de Hopninj, am noch mol fa emma to deenen (Joh. 17:3).

12-13. Waut kjenn wie von Jenny un Pam äare Erfoarunk lieren?

¹² Mau rajcht sea junge Menschen kjennen daut lieren, Jehowa sea to leewen, un wan dee ella woaren, woat dee äare Leew bloos noch stoakja woaren. See wie mol daut Biespel von Jennya un Pam, waut Sestren sent. Jenny wia 11 un Pam wia 10, aus dee aunfungen, met Jehowa siene Zeijen de Schreft to studieren. Äare Elren wullen nich studieren, oba dee leeten daut, soo lang aus de Mejales wudden utgangs Wäakj met de Famielje toop no Kjoakj gonen. Jenny sajcht: “Waut Jehowa siene Zeijen mie lieeden, holp mie, daut ekj nich aunfunk, Droggs to brucken ooda een onmoralischet Läwen to fieren, soo aus väle von miene Schoolpoatna deeden.”

¹³ Eenje Joaren lota worden de beid Mejales Vekjindja. Met de Tiet fungen dee met dän Pioniadeenst aun un kjemmaden sikj uk om äare Elren, aus dee ella worden. Woo jeit Jenny daut, wan see aun daut denkjt, waut see met Jehowa beläft haft? See sajcht: “Ekj hab daut selfst beläft, daut Jehowa sikj om siene Frind kjemmat, krakjt soo aus 2. Timotäus 2:19 sajcht: ‘Jehowa kjant dee, waut am jehieren’”. Wie kjennen ons gaunz secha sennen, daut Jehowa sikj om dee kjemmat, waut sikj daut wälen, am to leewen un to deenen!

14. Woo kjenn wie fa Jehowa enstonen? (See uk de Bilda.)

¹⁴ Wie wellen haben, de Menschen sellen weeten, woo Jehowa werkjlich es. Stal die mol väa, du hast eenen gooden Frint. Dis Frint es leeftolich, friejäwrich un wellich reed to vejäwen. Oba dan kjemt doa wäa aun un sajcht, dien Frint es grausom un onopprechtich. Waut wurscht du doonen? Na, secha wurscht du fa dienen Frint enstonen! Krakjt soo es daut, wan wie Läajes äwa Jehowa hieren. Dan well wie fa dän enstonen un de Menschen de Woarheit äwa am sajen (Psa. 34:2; Jes. 43:​10, NW). Derch daut, waut wie sajen un waut wie doonen, wies wie, daut wie am von Hoaten deenen wellen.

15. Woo kjeem Paulus daut togood, daut hee reed wia, sien Läwen to endren? (Filippa 3:​7-8).

¹⁵ Wie sent reed, waut en ons Läwen to endren, om daut wie Jehowa jefaulen kjennen un wan wie mea fa am doonen wellen. De Apostel Paulus biejlikj haud een wichtjet Aumt en siene Jemeent, oba hee jeef daut opp, soo daut hee kunn een Jinja von Jesus woaren un Jehowa deenen (Gal. 1:14). Un daut kjeem sea goot ut. Hee kunn väl Scheenet beläwen en sienen Deenst fa Jehowa un kjrieech de Hopninj, met Christus toop em Himmel to rejieren. Am wia daut kjeenmol schod, daut hee sikj daut jewält haud, Jehowa to deenen, un ons woat daut uk nich schod woaren (läs Filippa 3:​7-8).

16. Waut kjenn wie von Julia äare Erfoarunk lieren? (See uk de Bilda.)

¹⁶ Wan Jehowa to deenen fa ons daut Wichtichste es, dan beloont Jehowa ons nu aul un uk enne Tookunft. See wie mol, waut eene Sesta beläwd, waut Julia heet. Aus Mejalkje deed see emma bie äare Kjoakj sinjen. See vestunt daut soo fein to sinjen, daut se aunfungen, ar uttolieren. Boolt wort see aus Sinja sea bekaunt un ar wort enjelot, opp besondre Städen to sinjen. Aus see dan no eene aunjeseene Musikj-School jinkj, räd een Schoolpoatna to ar von Gott un säd ar, daut Gott sien Nomen Jehowa es. Daut dieed nich lang, un Julia studieed twee mol de Wäakj de Schreft. Met de Tiet wort see sikj eenich, daut see äa Läwen fa Jehowa brucken wull, enne Städ aus Sinja wiedatokomen. Daut wia nich eene leichte Entscheidunk. See sajcht: “Väle säden mie, daut et onkluak wia, opptohieren met sinjen, oba ekj wull mien Läwen fa Jehowa brucken”. Daut es nu äwa 30 Joa trigj. Woo jeit ar daut nu, wan see aun äare Entscheidunk denkjt? See sajcht: “Ekj sie schaftich, daut ekj mie daut jewält hab, Jehowa to deenen, un ekj weet, daut hee mie enne Tookunft aules jäwen woat, waut ekj mie wensch” (Psa. 145:​16, NW).

HIA NICH OPP, JEHOWA TO DEENEN

17. Waut bediet daut fa ons un fa de aundre, daut daut Enj von dise Welt boolt komen woat?

¹⁷ Sea boolt woat daut Enj von dise Welt komen. De Apostel Paulus schreef: “Noch ‘een kjlienet Stootje’ un ‘dan woat dee aunkomen, waut doa kjemt, un dee woat nich lot sennen’” (Heb. 10:37). Waut bediet daut dan fa de Menschen? Na, deejanje, waut Jehowa noch nich deenen, blift mau weinich Tiet, om sikj noch fa Jehowa to entscheiden (1. Kor. 7:29). Un waut, wan wie ons aul entschieden haben, Gott to deenen? Wie weeten, daut wie bie dise Tiet noch woaren Schwoaret beläwen, oba daut woat bloos fa “een kjlienet Stootje” sennen.

18. Waut wellen Jesus un Jehowa von ons haben?

¹⁸ Veleicht deen wie Jehowa aul fa Joaren un wellen daut secha uk wieda doonen. Jesus säd to de Menschen nich bloos, daut see siene Jinja woaren sullen, oba uk, daut see am wieda nofoljen sullen (Mat. 16:24). Un Jehowa well, daut wie daut nokomen, waut wie entschieden haben un am fa wieda deenen. Doatoo mott wie ons aunstrenjen, un dauts veleicht nich emma leicht. Oba wan wie daut doonen, woa wie schaftich sennen un mau rajcht nu aul väl Scheenet em Deenst fa Jehowa beläwen! (Psa. 35:27).

19. Waut lia wie von daut, waut Gene beläft haft?

¹⁹ Eenje späat sikj daut soo, daut et too väl opp sikj haft, Jehowa to deenen. Best du noch een junga Mensch? Denkjst du veleicht, du latst die waut derchgonen, wäajen du Jehowa deenst? Een junga Brooda, waut Gene heet, sajcht: “Mie späad sikj daut soo, daut ekj nich kunn Scheengonen haben, wäajen ekj eent von Jehowa siene Zeijen wia. De aundre von mien Ella jinkj daut scheen, wäajen dee Fasten hauden, eene Mejal hauden ooda grausome Video-Gäms spälden. Oba ekj must äwadäm prädjen gonen ooda enne Toopkomes hucken.” Waut deed daut aun Gene, soo aus dit to denkjen? Hee sajcht: “Ekj funk aun, em Plietschen soont to doonen aus de aundre Jugentliche. Un fa een Stootje jinkj mie daut uk scheen. Oba enne Lenjd wia ekj nich schaftich. Dan funk ekj wada aun, aun daut to denkjen, waut ekj von de Bibel jelieet haud un entscheid mie doafäa, Jehowa met mien gaunzet Hoat to deenen. Von dan aun kunn ekj seenen, daut Jehowa aul miene Jebäda beauntwuat haft.”

20. Waut well wie ons eenich sennen to doonen?

²⁰ Een Psalmenschriewa säd en een Leet to Jehowa: “Jesäajent sent dee, dee du die wälst un no die nemst, bie die opp däm Tempelhoff to wonen” (Psa. 65:5). Well wie wieda soo enjestalt sennen aus Josua, waut doa säd: “Ekj oba, un dee waut to mien Hus jehieren, wellen däm HARN deenen.” (Jos. 24:15).