Woo goot es daut doch, met onse Breeda goode Frind to woaren!

1-2. Waut es fa Jehowa besonda wichtich; un waut velangt hee von ons?

FA Jehowa es daut sea wichtich, woo wie aundre behaundlen. Jesus lieed, daut wie onsen Näakjsten soo sea leewen sellen aus ons selfst (Mat. 22:​37-39). Daut meent, daut wie uk to soone leeftolich sent, waut nich aun daut jleewen waut wie. Wan wie leeftolich sennen, dan doo wie Jehowa Gott no, “wäajens hee lat siene Sonn oppgonen äwa de Schlajchte un uk äwa de Goode un lat daut räajnen äwa de Jerajchte un uk äwa de Ojjerajchte” (Mat. 5:45).

² Jehowa leeft aule Menschen un besonda dee, waut daut Rajchte doonen (Joh. 14:21). Un hee well, daut wie daut uk soo doonen. Hee muntat ons opp, “groote Leew” fa onse Breeda un Sestren to haben, un well, daut wie ons “opp iernst unjarenaunda [leewen]” (1. Pet. 4:8; Reem. 12:10). Dise Leew es een bät soo aus dee Leew, waut wie fa ons Frintschoft ooda fa eenen gooden Frint feelen.

3. Waut sell wie äwa de Leew em Denkj hoolen?

³ Met de Leew es daut soo aus met eene Plaunt, wua eena sikj om kjemren mott, daut dee waussen kaun. De Apostel Paulus jeef de Christen disen Rot: “Leeft junt wieda soo aus Breeda” (Heb. 13:1). Jehowa well, daut wie doaraun schaufen, aundre noch dolla to leewen. Dis Artikjel woat doavon räden, wuarom wie met onse Breeda un Sestren sellen noch jratre Frind woaren un woo wie wieda doaraun schaufen kjennen.

WUAROM WIE SELLEN JRATRE FRIND WOAREN MET ONSE BREEDA UN SESTREN

4. Woo kjenn wie dankboa bliewen fa de Eenichkjeit, waut mank onse Breeda es, no Psalm 133:1 no? (See uk de Bilda.)

⁴ Läs Psalm 133:1. Wie stemmen met dän Psalmenschriewa met, waut schreef, daut et “goot un scheen es”, met dee Frind to sennen, waut Jehowa leewen. Krakjt soo aus wie eenen grooten Boom veleicht nich mea bewundren, waut wie jieda Dach seenen, krakjt soo bewunda wie de Eenichkjeit mank onse Breeda veleicht uk nich mea, wiels wie dee foaken ooda mau rajcht mieremol de Wäakj seenen. Soo woo kjenn wie dankboa bliewen fa dee? Onse Leew fa de Breeda un Sestren woat jrata woaren, wan wie ons Tiet nämen toom doaräwa nodenkjen, woo wieetvoll jieda eena fa de Vesaumlunk un fa ons perseenlich es.

5. Waut kaun daut aun aundre doonen, wan dee seenen, daut wie Leew unjarenaunda haben?

⁵ Eenje, waut daut ieeschte Mol no een Toopkomen komen, bewundren de Leew, waut wie unjarenaunda haben. Daut auleen kaun dee bat doa brinjen, sikj gaunz secha to sennen, daut see de Woarheit jefungen haben. Jesus säd: “Wan jie Leew unjarenaunda haben, dan woaren aule weeten, daut jie miene Nofolja sent” (Joh. 13:35). See wie mol de Erfoarunk von Kaitra, waut no de Uniwersität jinkj un met Jehowa siene Zeijen toop de Bibel studieed. See wort enjelot to eenen dreedoagschen Kongress, un see wankt doahan. Aus de ieeschta Dach derch wia, säd see to äaren Bibelliera: “Miene Elren haben mie noch kjeenmol omjefot. Oba opp disen Kongress haben de Breeda mie en eenen Dach 52 Mol omjefot! Ekj späad Jehowa siene Leew derch siene Deena, un ekj well Poat von dise Famielje sennen.” Kaitra kjeem veraun un leet sikj aune 2024 deepen. Wan de Intressieede onse goode Woakjen seenen – biejlikj de Leew, waut wie unjarenaunda haben –, brinjt dee daut foaken bat doa, Jehowa to deenen (Mat. 5:16).

6. Woo kaun daut fa ons een Schutz sennen, wan wie goode Frind sent met onse Breeda un Sestren?

⁶ Wan wie met onse Breeda un Sestren goode Frind sent, kaun daut fa ons een Schutz sennen. Paulus säd to siene Gloowesbreeda: “Spräakjt junt wieda jieda Dach unjarenaunda Moot too, … soo daut kjeena von junt hoat woat wäajen de Sind, waut eene aunschmäarende Macht haft” (Heb. 3:13). Wan wie soo mootloos woaren, daut ons daut schwoa es, daut Rajchte to doonen, dan kaun Jehowa eenen Gloowesbrooda, waut daut sitt, bat doa brinjen, ons de Help to jäwen, waut ons fält (Psa. 73:​2, 17, 23). Sent wie nich dankboa, wan wie opp dise Wajch Moot kjrieen?

7. Woo paussen Leew un Eenichkjeit toop? (Kolossa 3:​13-14).

⁷ Wie jehieren to eene Grupp Menschen, waut sikj sea aunstrenjen, Leew unjarenaunda to wiesen, un doawäajen kjrie wie väl Säajnungen (1. Joh. 4:11). Biejlikj brinjt de Leew ons bat doa, ons “wieda unjarenaunda” to vedroagen, un daut halpt met, daut manke Breeda Eenichkjeit es (läs Kolossa 3:​13-14; Efs. 4:​2-6). Doawäajen es daut en kjeene Jemeent ooda Grupp äare Toopkomes soo scheen aus en onse.

IEET JUNT UNJARENAUNDA

8. Woo halpt Jehowa ons, met onse Breeda un Sestren veeent to sennen?

⁸ De Eenichkjeit, waut daut manke Breeda un Sestren oppe gaunze Welt jeft, es een Wunda. Jehowa moakt daut mäajlich, wan wie uk onvolkomen sent (1. Kor. 12:25). De Bibel sajcht, daut wie “selfst von Gott jelieet haben, daut wie ons unjarenaunda leewen sellen” (1. Tes. 4:9). Daut meent, daut Jehowa ons derch de Schreft krakjt weeten lat, waut wie doonen motten, om met onse Breeda jratre Frind to woaren. Wie kjennen “selfst von Gott jelieet” woaren, wan wie ons daut krakjt unjastonen, waut hee ons lieren well, un daut dan uk nokomen (Heb. 4:12; Jak. 1:25). Jehowa siene Zeijen strenjen sikj aun, krakjt dit to doonen.

9. Woo halpt Reema 12:​9-13 ons, eena dän aundren Iea to wiesen?

⁹ Woo halpt Gott sien Wuat ons, met onse Breeda jratre Frind to woaren? See wie mol, waut Paulus en Reema 12:​9-13 doaräwa säd (läs). Acht wie besonda mol opp de Wieed: “Siet de Ieeschte, wan daut kjemt, eena dän aundren Iea to wiesen.” Waut meent dit? Wie sellen daut ieeschte waut doonen, om aundre to wiesen, daut wie dee “opp iernst” leewen. Daut kjenn wie biejlikj doaderch, daut wie reed sent to vejäwen un friejäwrich un oppnäment to dee sent (Efs. 4:32). Du brukst nich wachten, bat dien Brooda ooda diene Sesta waut deit, om een feina Frint met die to woaren; du kaust dän Aunfank moaken. Dan woascht du daut beläwen, waut Jesus säd: “Daut jeft mea Freid, wan eena jeft, aus wan eena nemt” (Apj. 20:35).

10. Waut deit eena, waut sikj aunstrenjt, “dän aundren Iea to wiesen”? (See uk daut Bilt.)

¹⁰ Es daut nich oppfaulent, waut Paulus fuaz daut näakjste säd, nodäm daut dee jesajcht haud, wie sullen de Ieeschte sennen, eena dän aundren Iea to wiesen? Paulus muntad de Breeda opp, sea to schaufen un nich ful to sennen. Eena, waut sea schauft, es iewrich un flietich. Wan dän eene Oabeit oppjejäft woat, deit hee daut, soo goot aus hee kaun. En Spricha 3:​27-28 woat ons toojerot: “Hool nich goodet trigj von däm, däm daut traft, wan daut en diene Krauft steit goodet to doonen.” Soo wan wie seenen, daut doa wäa Help brukt, doo wie aules, waut wie kjennen, toom dän uthalpen. Wie veschluaren daut nich un denkjen uk nich, daut sestwäa dän aul halpen woat (1. Joh. 3:​17-18).

11. Waut kaun ons halpen, unjarenaunda jratre Frind to woaren?

¹¹ Woo kjenn wie aundre noch Iea wiesen? Wan wie reed sent, soone to vejäwen, waut ons beleidjen. Efeesa 4:26 sajcht: “Blieft nich soo lang oajalich, bat de Sonn unjajeit.” Wuarom nich? De Varsch 27 wiest, daut wie “dän Beesen Fient kjeene Jeläajenheit” jäwen sellen. Jehowa sajcht ons en sien Wuat emma wada, daut wie ons unjarenaunda vejäwen sellen. Biejlikj en Kolossa 3:13 woat ons oppjemuntat: “Siet … [wieda] wellich reed toom vejäwen”. Aundre äare Fäla to äwaseenen un dee to vejäwen, kaun ons eent von daut baste halpen, met dee goode Frind to woaren. Wan wie daut soo doonen, dan halp wie met, “de Eenichkjeit to bewoaren, waut derch dän Jeist kjemt” (Efs. 4:3). Eefach jesajcht, reed sennen to vejäwen, halpt sea met, daut doa Fräd un Eenichkjeit es.

12. Woo halpt Jehowa ons, aundre to vejäwen?

¹² Daut kaun schwoa sennen, soone to vejäwen, waut ons weejedonen haben. Oba met de Help von Gott sienen Jeist kjenn wie daut. Enne Bibel woat ons toojerot, ons “unjarenaunda opp iernst” to leewen un sea to schaufen. Un doahinja woat dan jesajcht: “Lot dän heiljen Jeist junt iewrich moaken.” Gott sien Jeist kaun ons aulsoo halpen, iewrich to sennen fa daut Rajchte – biejlikj ons unjarenaunda opp iernst to leewen un to vejäwen (see uk de tweede Erkjläarunk toom studieren von Reema 12:11). Doawäajen bäd wie iernstlich doarom, daut Jehowa ons halpen saul (Luk. 11:13).

“JIE SELLEN UNJARENAUNDA NICH JEDEELT SENNEN”

13. Waut kunn ons uteneenbrinjen?

¹³ Enne Vesaumlunk sent “veschiedne Menschen”, waut uk veschieden oppjewossen sent (1. Tim. 2:​3-4). Wäajen dit moaken dee veschiedne Entscheidungen – biejlikj äwa auntrakjen un oppfiksen, Jesuntheit un Tietvedrief. Wan wie nich oppaussen, dan wudden dise Sachen ons bat doa brinjen kjennen, daut wie nich mea soo veeent wieren (Reem. 14:4; 1. Kor. 1:10). Oba wiels Gott ons jelieet haft, daut wie ons unjarenaunda leewen sellen, mott wie oppaussen, daut wie nich doaropp stonen bliewen, daut onse Entscheidungen bäta sent aus aundre äare (Filip. 2:3).

14. Waut sell wie emma proowen to doonen; un wuarom?

¹⁴ Wie kjennen daut uk väabieejen, daut et enne Vesaumlunk nich Spoolungen jeft, wan wie aulentiet proowen, aundre Moot to moaken un opptobuen (1. Tes. 5:11). De latste Joaren kjeemen een deel trigj, waut sikj von de Vesaumlunk trigjjetrocken hauden, un soone, waut doa wieren ut de Vesaumlunk rutjesat worden. Wie nämen soone leeftolich opp! (2. Kor. 2:8). Kjikj mol, woo daut bie eene Sesta wia, waut trigj nom Vesaumlungshus kjeem, nodäm daut see sikj fa tieen Joa von de Vesaumlunk trigjjetrocken haud. See säd: “Aule kjikjten schaftich un jeewen mie de Haunt” (Apj. 3:19). Waut deed dit aun ar? See sajcht: “Ekj feeld mie soo, aus wan Jehowa mie halpen deed, wada schaftich to sennen.” Wan wie proowen, aulem opptobuen, dan kaun Christus ons brucken, om soone Moot to moaken, “waut schwoa schaufen un äwalot sent” (Mat. 11:​28-29).

15. Woo kjenn wie noch methalpen, daut doa Eenichkjeit es? (See uk daut Bilt.)

¹⁵ Wan wie no ons Räden oppaussen, kjenn wie uk methalpen, daut doa Eenichkjeit es. Hiob 12:11 sajcht: “Krakjt soo aus de Tung daut Äten schmakjt, soo mott daut Ua dän Wieet von Wieed aufschazen.” Soo aus een gooda Ätenmoaka daut Äten emma ieescht schmakjt, aus daut goot es, ea dee aundre daut väasat, krakjt soo mott wie ieescht doaräwa nodenkjen, waut wie sajen wellen, ea wie räden (Psa. 141:3). Wie wellen ons emma secha moaken, daut daut, waut wie sajen wellen, aundre Moot moaken un oppbuen woat un “dee toom Gooden” sennen woat (Efs. 4:29).

16. Wäa saul besonda doaropp achten, daut dee aundre derch äa Räden Moot moaken?

¹⁶ Ehemana un Elren sellen besonda doaropp achten, daut see aundre derch äa Räden oppbuen (Kol. 3:​19, 21; Tit. 2:4). De Eltestasch sellen uk, aus Hoads von Jehowa siene Häad, doano seenen, daut see aundre Moot moaken un treesten (Jes. 32:​1-2; Gal. 6:1). En Spricha woat jesajcht: “Woo goot es doch een paussendet Wuat!” (Spr. 15:23).

LEEW “MET WOAKJEN BEWIESEN”

17. Woo kjenn wie ons daut vesechren, daut onse Leew fa onse Breeda un Sestren opprechtich es?

¹⁷ De Apostel Johanes rot ons too, “nich bloos von Leew [to] räden, oba dee en Woarheit met Woakjen [to] bewiesen” (1. Joh. 3:18). Onse Leew fa onse Breeda un Sestren saul aulsoo opprechtich sennen. Woo kjenn wie daut doonen? Je mea wie met onse Breeda un Sestren toop sent, je bätre Frind woa wie met dee un je stoakja woat onse Leew unjarenaunda. Soo sieekj no Jeläajenheiten, met dee toop to sennen – biejlikj bie onse Toopkomes un em Prädichtdeenst. Nemm die uk Tiet, aundre to besieekjen. Wan wie daut doonen, dan wies wie, daut wie daut “selfst von Gott jelieet haben, daut wie ons unjarenaunda leewen sellen” (1. Tes. 4:9). Un wie woaren daut wieda perseenlich beläwen kjennen, “woo goot un scheen ... daut doch [es], wan Breeda en Eenichkjeit toop läwen!” (Psa. 133:1).