15. ARTIKJEL FA DAUT STUDIUM
LEET 30 Mien Voda, mien Gott un Frint
Daut es goot fa ons, Gott noda to komen!
“Fa mie es daut goot dicht bie Gott to sennen” (PSA. 73:28)
OM WAUT DAUT JEIT
Woo wie kjennen Jehowa noda komen un woo ons daut toom Gooden es, wan wie daut doonen.
1-2. (a) Waut mott wie doonen, daut wie kjennen met wäm goode Frind woaren? (b) Von waut woa wie en disen Artikjel räden?
HAST du eenen gooden Frint? Woo wortst du een Frint met am? Du wieescht veleicht met am toop un wortst en, waut dee beläft haud un waut dee jleicht un nich jleicht. Du wortst uk en, daut hee sea goode Ieejenschoften haud, waut du uk wurscht jleichen to haben. Du fungst am eefach aun to leewen.
2 Met wäm goode Frind woaren, brukt Tiet un Aunstrenjunk. Krakjt soo es daut, wan wie wellen met Jehowa Gott perseenlich goode Frind woaren. En disen Artikjel woa wie doavon räden, woo wie Jehowa noda komen kjennen un wuarom daut toom Gooden es, wan wie daut doonen. Daut ieeschte woa wie doavon räden, wuarom daut soo goot es, onsen basten Frint, Jehowa, noda to komen.
3. Wuarom sell wie doaräwa nodenkjen, woo goot daut es, Jehowa noda to komen? Met waut jeit daut to vejlikjen?
3 Du wurscht doa gaunz secha met envestonen sennen, daut ons daut toom Gooden es, Jehowa noda to komen. Oba wan wie doa mol krakjt äwa nodenkjen, woo goot daut es, kaun ons daut bat doa brinjen, am noch noda to komen (Psa. 63:7-9). Biejlikj weet wie, daut et sea goot es, jesunt to äten, Ekserseis to moaken, jenuach to schlopen un jenuach Wota to drinkjen. Un doch jäwen väle doa nuscht om rom un doawäajen sent dee nich soo jesunt, aus dee wudden kjennen sennen. Oba je foakna wie doaräwa nodenkjen, woo ons dise Sachen togood komen, je bäta woa wie dee uk nokomen. Krakjt soo weet wie, daut et sea goot es, een gooda Frint met Jehowa to sennen, oba wan wie doaräwa nodenkjen, woo ons daut krakjt togood kjemt, dan woa wie ons wellen aunstrenjen, noch een bätra Frint met am to woaren (Psa. 119:27-30).
4. Waut säd de Psalmenschriewa en Psalm 73:28?
4 Läs Psalm 73:28. De Schriewa von dän 73. Psalm wia een Levit un wia aus Musikjspäla en Jehowa sienen Tempel aunjestalt. Hee haud Jehowa woomäajlich aul fa Joaren tru jedeent. Oba hee wort doawäajen en, woo needich daut fa am un fa aundre wia, “dicht bie Gott to sennen”, aulsoo dän noch noda komen. Wuarom kjemt ons daut soo sea togood?
GOTT NODA TO KOMEN, MOAKT ONS SCHAFTICH
5. (a) Wuarom moakt ons daut schaftich, Jehowa noda to komen? (b) No Spricha 2:6-16 no woo halpt un beschizt de Weisheit ons, waut Jehowa ons jeft?
5 Je noda wie Jehowa komen, je schaftja woa wie sennen (Psa. 65:5). Doa sent väle Jrind, wuarom wie woaren schaftich sennen. Biejlikj wan wie de Schreft läsen un daut nokomen, waut hee ons doaderch sajcht, woa wie weis. Dise Weisheit beschizt ons fa soont, waut ons schoden kaun, un halpt ons, daut wie nich groote Fäla moaken (läs Spricha 2:6-16). Doawäajen sajcht de Bibel: “Woo jesäajent [ooda schaftich] es doch een Mensch dee Weisheit finjt, un een Mensch dee vestendich woat” (Spr. 3:13).
6. Wuarom velua de Psalmenschriewa siene Freid?
6 Mau rajcht Jehowa siene Frind sent to Tieden truarich. Biejlikj de Schriewa von dän 73. Psalm velua mol siene Freid, wäajen hee aunfunk, äwa soont notodenkjen, waut fa am to beseenen ojjerajcht wia. Hee wia doll un aufjenstich, wäajen hee docht, daut de schlajchte Menschen een goodet Läwen hauden, wan dee uk nuscht om Gott romjeewen un am nich jehorchten. Hee docht, daut de grausome un stolte Menschen väl rikja un jesunda wieren un nich mol lieden musten (Psa. 73:3-7, 12). Opp eene Sauz twieweld de Psalmenschriewa mau rajcht, aus sikj daut äwaheipt loond, sikj auntostrenjen, Jehowa to deenen. Hee wia truarich un säd: “Daut haft nuscht jeholpen, daut ekj nich en Sind läwd ... daut ekj mien Hoat un miene Henj hab rein jehoolen” (Psa. 73:13).
7. Woo kjenn wie doamet foadich woaren, wan wie truarich sent? (See uk daut Bilt.)
7 Wan de Psalmenschriewa uk sea truarich wia, deed hee oba waut. Hee jinkj “en Gott sien Heilichtum nenn”, aulsoo en sienen Tempel, wua Jehowa sien Denkjen dan trajchtstald (Psa. 73:17-19). Ons basta Frint Jehowa weet daut, wan wie truarich sent. Wan wie om siene Aunleidunk bäden un de Help aunnämen, waut hee ons derch sien Wuat un de Vesaumlunk jeft, dan woa wie de Krauft kjrieen, daut wie kjennen doamet foadich woaren, wan wie truarich sent. Mau rajcht wan wie äwafoddat sent wäajen aul onse Sorjen, woat Jehowa ons treesten un berujen (Psa. 94:19, NW).a
De Levit, waut dän 73. Psalm schreef, steit “en Gott sien Heilichtum”, aulsoo en sienen Tempel (See Varsch 7)
GOTT NODA TO KOMEN, JEFT ONS EENEN SENN EM LÄWEN UN EENE HOPNINJ
8. Woo kjemt ons daut noch togood, Gott noda to komen?
8 Gott noda to komen, kjemt ons noch opp twee aundre Wäaj togood. Ieeschtens, ons Läwen helt werkjlich waut en. Tweedens, wie haben eene sechre Hopninj (Jer. 29:11). Well wie ons dise beid Sachen een bät neiwa unjastonen.
9. Wuarom helt ons Läwen waut en, wan wie Jehowa noda komen?
9 Jehowa noda to komen, jeft ons eenen Senn em Läwen. Väle bie dise Tiet, waut nich jleewen, daut et eenen Gott jeft, denkjen, daut daut Läwen nuscht enhelt un daut de Menschen met de Tiet utstoawen woaren. Oba wiels wie Gott sien Wuat studieren, sent wie ons secha, “daut et am jeft un daut hee dee beloont, waut am iernstlich sieekjen” (Heb. 11:6). Wie haben nu aul een scheenret Läwen, wiels wie daut doonen, wuatoo wie jemoakt sent – aulsoo onsen himlischen Voda Jehowa deenen (5. Mo. 10:12-13).
10. Waut vesprakjt Jehowa deejanje en Psalm 37:29, waut opp am vetruen?
10 Väl Menschen haben nich werkjlich eene Hopninj. Dee schaufen bloos, haben eene Famielje un moaken sikj fa dee Tiet reed, wan dee nich mea schaufen kjennen. Dee weeten daut nich, waut Gott fa lota vesproaken haft. Oba bie Jehowa siene Deena es daut aundasch; dee saten äare Hopninj opp am (Psa. 25:3-5; 1. Tim. 6:17). Wie vetruen dän Gott, dee ons Frint es, un wie sent ons secha, daut hee siene Vespräakjungen erfellen woat. Wie freien ons aul to een deel Sachen – besonda am fa emma em Paradies to deenen (läs Psalm 37:29).
11. Woo kjemt daut ut, wan wie Gott noda komen; un waut deit daut aun am?
11 Gott noda to komen, kjemt ons noch opp väl aundre Wäaj togood. Biejlikj vesprakjt Jehowa, deejanje äare Sinden to vejäwen, waut een Leetsennen haben (Jes. 1:18). Doaderch bruck wie ons nich lenja schuldich feelen äwa de Sinden, waut wie ea mol jedonen haben (Psa. 32:1-5). Un wie haben soogoa de Iea, Jehowa schaftich to moaken (Spr. 23:15). Secha sent doa noch aundre Säajnungen, waut doavon komen, een gooda Frint met Gott to sennen. Oba waut mott wie doonen, om am noch noda to komen?
WOO WIE GOTT NOCH NODA KOMEN KJENNEN
12. Waut hast du jedonen, om Gott noda to komen?
12 Wan du die aul aus eent von Jehowa siene Zeijen hast deepen loten, hast du secha aul väl jedonen, om Jehowa noda to komen. Du hast de Woarheit äwa Jehowa Gott un Jesus Christus kjanen jelieet un hast een Leetsennen jehaut äwa diene Sinden; du wees, daut du Gloowen aun Gott hautst un deetst dien Bastet, om Jehowa sienen Wellen to doonen. Om noch een bätra Frint met Gott to woaren, mott wie dise Sachen oba wieda doonen (Kol. 2:6).
13. Woone dree Sachen kjennen ons halpen, Jehowa noch noda to komen?
13 Waut woat ons halpen, Jehowa noch noda to komen? (1) Wie motten wieda de Bibel läsen un studieren. Met daut sell wie proowen, mea von Gott to lieren un nich bloos bie daut stonen bliewen, waut wie aum Aunfank jelieet haben. Oba wie sellen proowen to vestonen, waut Gott sien Wellen fa ons es, un proowen, no siene Gruntsauzen to läwen, waut hee en sien Wuat haft loten oppschriewen (Efs. 5:15-17). (2) Wie motten onsen Gloowen doaderch stoakjen, daut wie äwa aul daut nodenkjen, woo Jehowa ons siene Leew wiest. (3) Wie motten uk wieda daut haussen, waut Jehowa nich jleicht, un nich met soone Menschen Frind sennen, waut soone Sachen doonen (Psa. 1:1; 101:3, NW).
14. Waut kjenn wie jieda Dach doonen, daut Jehowa schaftich es, soo aus 1. Korinta 10:31 wiest? (See uk de Bilda.)
14 Läs 1. Korinta 10:31. Dauts wichtich, daut wie soone Sachen doonen, waut Jehowa jleicht. Doa es met en, daut wie mea doonen, aus bloos prädjen gonen un bie de Toopkomes sennen. Daut, waut wie jieda Dach doonen, saul Jehowa uk jefaulen. Biejlikj moak wie Jehowa schaftich, wan wie en aules opprechtich sent un friejäwrich sent (2. Kor. 8:21; 9:7). Hee well uk, daut wie daut Läwen achten, waut een Jeschenkj es. Wie kjennen dän, waut ons daut Läwen jejäft haft, noch noda komen, wan wie doano oppaussen, woo väl wie äten un woo väl Stoakjet wie drinkjen, un wan wie aundre Sachen doonen, wuaderch wie jesunt bliewen. Aules, waut wie doonen toom Jehowa jefaulen – mau rajcht de kjliene Sachen –, brinjt am bat doa, ons noch dolla to leewen (Luk. 16:10).
Wie kjennen Jehowa schaftich moaken, wan wie väasechtich foaren un friejäwrich sent un no onse Jesuntheit oppaussen, doaderch daut wie jesunt äten un Ekserseis moaken (See Varsch 14)
15. Waut velangt Jehowa, woo wie aundre behaundlen sellen?
15 Jehowa es to de Jerajchte uk to de Ojjerajchte leeftolich (Mat. 5:45). Un hee velangt, daut wie aundre krakjt soo leeftolich behaundlen aus hee. Biejlikj sell wie “äwa kjeenem schlajcht räden, nich opp strieden hoolen” un “wiesen, daut wie äwa aulem eene ruje Enstalunk haben” (Tit. 3:2). Wan wie dit em Denkj hoolen, dan woa wie nich jleewen, daut wie bäta sent aus aundre, wäajen dee nich dautselwje jleewen aus wie (2. Tim. 2:23-25). Wie komen Jehowa uk doaderch noda, wan wie aulem emma leeftolich behaundlen.
WIE KJENNEN JEHOWA NODA KOMEN, WAN WIE UK EENEN FÄLA MOAKEN
16. Woo feeld de Schriewa von dän 73. Psalm sikj, nodäm daut hee Jehowa fa een Stoot jedeent haud?
16 Feelst du die eenjemol soo, daut du daut nich wieet best, daut Jehowa die leeft? Soo aus wie aul jeseenen haben, feeld de Schriewa von dän 73. Psalm sikj krakjt soo. Hee säd: “Miene Feet hauden meist jejlept; ekj wia sea meist jefollen” (Psa. 73:2). Hee stunt too, daut hee “truarich” un “vebettat” wia un ver Jehowa soo wia “aus een Tia”, waut bloos no siene Jefeelen haundelt (Psa. 73:21-22). Docht hee nu, daut doa kjeene Rot mea fa am wia wäajen siene schlajchte Enstalunk un daut hee daut nich wieet wia, daut Jehowa am leewd?
17. (a) Waut deed de Psalmenschriewa, aus hee sikj gaunz dol feeld? (b) Waut kjenn wie von dän siene Erfoarunk lieren? (See uk daut Bilt.)
17 Wan de Psalmenschriewa sikj uk soo jefeelt haud, daut Jehowa am veloten haud, wia daut secha bloos fa eene korte Tiet soo. Daut späat sikj soo, daut am daut kloa wia, daut hee Gott doawäajen noda komen must, wan hee sikj uk gaunz dol feeld. Doawäajen säd hee: “Un doch hool ekj mie emma bie die opp; du [Jehowa] helst mie aun de rajchte Haunt. Du woascht mie met dienen Rot väastonen, un mie nohäa met Ieren aunnämen” (Psa. 73:23-24). Wie motten Jehowa uk om Krauft froagen, wan wie enwoaren, daut ons Gloowen schwak es ooda daut wie mootloos sent (Psa. 73:26; 94:18). Uk wan wie groote Fäla moaken, kjenn wie trigj no Jehowa komen un ons gaunz secha sennen, daut hee “reed to vejäwen” es (Psa. 86:5). Besonda wan wie ons gaunz dol feelen, sell wie proowen, Jehowa noch noda to komen (Psa. 103:13-14).
Wan wie ons em Jeisteljen schwak feelen, dan sell wie Jehowa noch noda komen, doaderch daut wie foakna to am bäden un emma bie de Toopkomes sent (See Varsch 17)
WIE KJENNEN GOTT FA EMMA NODA KOMEN
18. Wuarom kjenn wie Jehowa fa emma noda komen?
18 Wie kjennen Jehowa fa emma noda komen un emma mea äwa am lieren. De Bibel sajcht, daut Jehowa siene Erkjantnis, siene Weisheit un siene Wäaj “väl wieda gonen, aus eena vestonen kaun” (Reem. 11:33).
19. Waut vonne Sechaheit kjrie wie derch de Psalmen?
19 Psalm 79:13 sajcht: “Wie oba, dien Volkj un Schop opp diene Weid, woaren niemols opphieren die to danken, un woaren emma wada to onse Nokomen doavon räden, waut du jedonen hast.” Wan du Gott emma noda kjemst, kaust du die uk secha sennen, daut hee die fa emma säajnen woat, un du kaust met vollet Vetruen sajen: “Gott ... es mien Groota Steen un mien Oafgoot fa emma” (Psa. 73:26).
LEET 32 Stot en fa Jehowa!
a Eenje, waut fa eene lange Tiet truarich ooda dol sent ooda Angst un Sorjen haben, brucken veleicht Help von eenen Dokta. Wan du mea doaräwa weeten west, dan see dän Woaktorm, Num. 1 2023.