Wie sent kjeenmol auleen

1-2. (a) Wuarom kjenn wie sajen, daut wie kjeenmol auleen sent, wan wie Schwoaret beläwen? (b) Waut woa wie en disen Artikjel seenen?

WAN wie derch Schwoaret gonen, feel wie ons veleicht soo, aus wan wie gaunz auleen opp een kjlienet Boot sent opp een sea orruijet Mäa. Oba daut es nich soo – wie sent nich auleen. Ons leeftolja, himlischa Voda woat daut en, wan wie Schwoaret beläwen, un hee well ons biestonen. Jehowa vesprakjt ons: “Ekj woa die … halpen” (Jes. 41:10).

² En disen Artikjel woa wie seenen, woo hee ons halpt: Jehowa (1) leit ons, (2) hee sorcht fa ons, (3) hee beschizt ons un (4) hee treest ons. Jehowa woat kjeenmol von ons vejäten, endoont, woo schwoa onse Loag es. Hee woat ons nich veloten. Wie sent niemols auleen.

JEHOWA LEIT ONS

3-4. Woo leit Jehowa ons? (Psalm 48:14).

³ Läs Psalm 48:​14, NW. Jehowa weet, daut wie ons nich selfst leiden kjennen. Hee leit siene true Deena. Woo deit hee daut? Eene Wajch es derch de Schreft (Psa. 119:105). Derch sien heiljet Wuat halpt hee ons, goode Entscheidungen to moaken un soone Ieejenschoften to kjrieen, waut ons nu aul schaftja moaken un ons noch mol toom eewjen Läwen fieren.a Hee lieet ons biejlikj, daut wie aundre vejäwen sellen un dee nich doll bliewen, daut wie en aules sellen opprechtich sennen un aundre von Hoaten leewen (Psa. 37:8; Heb. 13:18; 1. Pet. 1:22). Wan wie Gott nodoonen un soone feine Ieejenschoften kjrieen, dan woa wie bätre Elren woaren, bätre Ehepoatna un uk bätre Frind.

⁴ Jehowa haft en sien Wuat Jeschichten von Menschen oppschriewen loten, waut uk soone Trubbels hauden aus wie un waut daut krakjt soo toosad (1. Kor. 10:13; Jak. 5:17). Wan wie dise Jeschichten läsen un ons doavon Lieren rutnämen, kjemt ons daut oppet Weinichste opp twee Wäaj togood. Ieeschtlich woa wie en, daut wie nich auleen sent. Doa wieren aul aundre, waut sea soont beläwden un daut met Jehowa siene Help derchstonen kunnen (1. Pet. 5:9). Un tweedens lia wie, woo wie met onse Schwierichkjeiten foadich woaren kjennen (Reem. 15:4).

5. Derch wäm leit Jehowa ons?

⁵ Jehowa leit ons uk derch onse Breeda un Sestren.b De Kjreisoppsechtasch biejlikj komen räajelmässich no de Vesaumlungen toom ons Moot toospräakjen. Dee äare Räden stoakjen onsen Gloowen un halpen ons, veeent to bliewen (Apj. 15:40 – 16:5). Uk de Eltestasch enne Vesaumlunk sent om jieda eenselnen Vekjindja sea bekjemmat (1. Pet. 5:​2-3). Elren lieren äare Kjinja, Jehowa kjanen to lieren un woo dee kjennen goode Entscheidungen moaken un feine Jewanheiten kjrieen (Spr. 22:6). Un riepe Sestren halpen jinjre Sestren doaderch, daut dee äant feinen Rot jäwen, een goodet Biespel sent un äant Moot toospräakjen (Tit. 2:​3-5).

6. Waut mott wie doonen, daut Jehowa siene Aunleidunk ons togood kjemt?

⁶ Jehowa haft sien Poat jedonen un ons dee Aunleidunk jejäft, waut ons fält. Woo kjenn wie wiesen, daut wie dankboa sent doafäa? En Spricha 3:​5-6 sajcht daut: “Velot die opp däm HARN met dien gaunzet Hoat, un velot die nich opp dien ieejnet Vestaunt.” Dan woat hee ons “dän rajchten Wajch wiesen”, daut meent, hee woat ons halpen, väle Trubbels utem Stich to gonen un schaftja to sennen. Secha sent wie Jehowa sea dankboa fa aul dän leeftoljen Rot, waut krakjt paussent es fa ons! (Psa. 32:8).

JEHOWA SORCHT FA ONS

7. Woo sorcht Jehowa fa ons? (Filippa 4:19).

⁷ Läs Filippa 4:19. Jehowa leit ons nich bloos em Jeisteljen, oba hee weet uk, daut ons noch aundret fält. Doawäajen halpt hee ons, wan wie ons aunstrenjen, soont to kjrieen aus Ätwoa, Kjleedie un eene Städ toom wonen (Mat. 6:33; 2. Tes. 3:12). Secha, eena moakt sikj bieaun Sorjen, woo eena aul dit towäaj schaufen kaun. Oba Jehowa well nich, daut wie ons doaräwa too väl Sorjen moaken. (See de Erkjläarunk toom studieren en de Studiabibel von Matäus 6:25.) Wuarom nich? Wiels hee ons Voda es un hee woat ons kjeenmol veloten (Mat. 6:8; Heb. 13:5). Hee haft vesproaken, daut hee fa ons sorjen woat, un wie kjennen ons gaunz doaropp veloten.

8. Waut deed Jehowa fa David?

⁸ Well wie mol seenen, woo Jehowa David holp. En aul dee Joaren, waut David sikj vestäakjen must, sorjd Jehowa fa daut, waut am un siene Mana fäld toom äwaläwen. Aus David doaräwa nodocht, woo Jehowa am en dise schwoare Tiet biejestonen haud, schreef hee: “Ekj sie junk jewast un sie nu oolt, oba hab noch niemols jeseenen daut de jerajchta veloten es, ooda siene Kjinja no Broot prachren” (Psa. 37:25). Krakjt soo aus David hast du daut secha uk mol beläft, woo Jehowa fa die ooda fa diene Breeda un Sestren en schwoare Tieden sorjen deed.

9. Woo sorcht Jehowa fa siene Deena, wan doa waut Schlemmet passieet es? (See uk de Bilda.)

⁹ Jehowa sorcht uk fa siene Deena, wan doa een Owwada ooda een Ojjlekj passieet. Aus doa bie de ieeschte Christen biejlikj mol eene Hungaschnoot wia, schekjten de Gloowesbreeda von aundre Lenda doa Sachen han, waut äant needich fälden (Apj. 11:​27-30; Reem. 15:​25-26). Un Gott sien Volkj es bie dise Tiet krakjt soo friejäwrich aus don. Wan irjentwua waut Schlemmet passieet, sorcht Jehowa fa dee, waut daut Ojjlekj troff. Derch siene Deena kjrieen jane Breeda daut, waut äant fält, soo aus Ätwoa, Wota, Kjleedie un Medizien. De Bugruppen repäaren de Hiesa un Vesaumlungshiesa, waut Schoden jekjräajen haben. Oba nich bloos daut: Jehowa siene Deena treesten uk dee, waut aules veloaren haben ooda wäm begrowen musten, un dee stonen dee em Jeisteljen bie.c

10-11. Waut lia wie von daut, waut Borys beläft haft?

¹⁰ Jehowa sorcht uk fa dee friejäwrich, waut am noch nich deenen. Wan wie Jehowa nodoonen, sieekj wie uk no Jeläajenheiten, soone Menschen Leew to wiesen (Gal. 6:10). Doaderch kjenn wie foaken een feinet Zeichnis jäwen. Well wie mol seenen, waut Borys beläwd, waut en Ukranien wont. Hee wia de Väaschta von eene School, wua Schiela wieren, waut Jehowa siene Zeijen sent. Wan hee selfst uk nich eent von Jehowa siene Zeijen es, wia hee oba emma leeftolich to dee Schiela un haud Respakjt fa dee äaren Gloowen. Aus Borys sikj eenich wort, von doa to veloten wäajen dän Kjrich, un no eene Städ von daut Launt to trakjen, wua daut sechra wia, holpen de Breeda am. Lota jinkj Borys no daut Aundenkjen von Jesus sienen Doot. Aus hee soo trigjkjikjt, säd Borys: “De Zeijen wieren sea leeftolich to mie un kjemmaden sikj goot om mie. Ekj sie Jehowa siene Zeijen sea dankboa.”

¹¹ Ons himlischa Voda es sea metliedent, un wie kjennen am nodoonen, wan wie dee Leew bewiesen, waut daut fält, aus daut onse Gloowesbreeda sent ooda nich (Luk. 6:​31, 36). Wie hopen, daut äant daut bat doa brinjt, Jesus siene Nofolja to woaren (1. Pet. 2:12). Oba krakjt endoont aus dee nu aunfangen, Jehowa to deenen ooda nich, wie woaren groote Freid haben, wiels jäwen schaftich moakt (Apj. 20:35).

JEHOWA BESCHIZT ONS

12. Waut von Schutz jeft Jehowa sien gaunzet Volkj? (Psalm 91:​1-2, 14).

¹² Läs Psalm 91:​1-2, 14. Jehowa vesprakjt, sien Volkj vondoag dän Dach em Jeisteljen to beschitzen. Hee woat daut kjeenmol tooloten, daut de Soton de woare Aunbädunk veorreinicht (Joh 17:15). Un wie kjennen ons uk gaunz secha sennen, daut Jehowa en de groote Liedenstiet sien Vespräakjen erfellen woat: Hee woat siene Deena nich bloos em Jeisteljen beschitzen, oba hee woat ons aus Volkj mau rajcht raden (Opb. 7:​9, 14).

13. Woo beschizt Jehowa jieda Eenselnen von ons?

¹³ Woo beschizt Jehowa jieda Eenselnen von ons? Eent es derch de Schreft. Jehowa haft ons de Schreft jejäft, soo daut wie weeten kjennen, waut rajcht un waut orrajcht es (Heb. 5:14). Wan wie daut nokomen, waut wie en Gott sien Wuat lieren, beschizt ons daut em Jeisteljen un wie woaren uk een schaftjeret un jesundret Läwen haben (Psa. 91:4). Un Jehowa beschizt ons uk derch de Vesaumlunk (Jes. 32:​1-2). Wan wie mank soone sent, waut Jehowa leewen, dan moakt ons daut Moot un halpt ons, daut Rajchte to doonen (Spr. 13:20).

14. (a) Wuarom beschizt Gott ons nich fa aule Schwierichkjeiten? (b) Waut vesechat Psalm 9:11 ons? (See uk de Footnoot.)

¹⁴ En de Vegonenheit haft Jehowa siene Deena eenjemol doafäa beschizt, daut dee nuscht wort. Oba hee haft daut nich emma jedonen. De Schreft sajcht, daut wie eenjemol lieden motten, wiels doa “onverhofs waut oppkjemt” (Liera 9:​11, NW). Un eenjemol haft Jehowa daut uk toojeloten, daut siene Deena vefolcht worden ooda mau rajcht omjebrocht, om to bewiesen, daut de Soton een Läajna es (Hiob 2:​4-6; Mat. 23:34). Un Jehowa lat daut bie dise Tiet noch emma too. Hee woat veleicht nich onse Schwierichkjeiten wajchnämen, oba wie kjennen ons gaunz secha sennen, daut hee dee kjeenmol em Stäakj loten woat, waut am leewen (Psa. 9:11).d

JEHOWA TREEST ONS

15. Woo woa wie derch daut Jebäd jetreest, derch Gott sien Wuat un derch onse Breeda un Sestren? (2. Korinta 1:​3-4).

¹⁵ Läs 2. Korinta 1:​3-4. Daut jeft Tieden, wua wie Angst haben, ons groote Sorjen moaken ooda truaren motten. Veleicht jeit die daut nu jroz soo, un doawäajen feelst du die auleen. Späat sikj die daut soo, daut kjeena weet, woo die daut jeit? Oba dauts goanich soo. Jehowa weet daut. Am sat daut sea too, wan du lieden motst; oba nich bloos daut, hee es uk dee, “waut ons en aul onse Proowen treest”. Woo krakjt? Wan wie ons to Jehowa utschedden, dan jeft hee ons sienen “Fräd, waut wieda jeit, aus waut Menschen vestonen kjennen” (Filip. 4:​6-7). Wie woaren uk jetreest, wan wie Gott sien Wuat läsen. Enne Bibel lat Jehowa ons weeten, woo sea hee ons leeft. Hee lieet ons uk, woo wie kjennen weis sennen, un hee jeft ons Hopninj. Un dan sent doa uk noch de Toopkomes, wua wie derch onse leewe Breeda un Sestren jetreest woaren un derch daut, waut wie doa ut de Schreft lieren.

16. Waut lieescht du von daut, waut Nathan un Priscilla beläft haben?

¹⁶ See wie mol een Biespel, woo Jehowa ons derch sien Wuat Troost un Moot jeft. Well wie mol seenen, waut Nathan un Priscilla beläft haben, waut enne Stäts läwen. Miere Joaren trigj worden dee sikj eenich, no eene Städ to trakjen, wua daut aun mea Vekjindja fäld. Nathan sajcht: “Wie veleeten ons doaropp, daut Jehowa onse Plons säajnen wudd.” Oba aus dee doa ieescht aunkjeemen, hauden dee met eenst Trubbels met de Jesuntheit un uk Jeltsorjen. Met de Tiet musten de Lied wada trigjtrakjen, oba dee jinkj daut doawäajen noch emma knaup. Nathan sajcht: “Ekj wundad, wuarom Gott ons nich jesäajent haud, soo aus wie ons daut jedocht hauden. Ekj funk mau rajcht aun to jreblen, aus ekj nich waut orrajcht jedonen haud”. Oba lota kunnen Nathan un Priscilla seenen, daut Gott äant nich veloten haud, aus äant daut schlajcht jinkj. Nathan sajcht: “En dise schwoare Tieden wort de Bibel soo aus een weisa Frint fa ons, waut ons Rot un Moot jeef. Wie haben jelieet, nich too sea aun de Trubbels to denkjen, oba dolla aun daut, woo Jehowa ons holp, dee derchtostonen. Daut jeft ons de Sechaheit, daut Jehowa ons uk fa wieda biestonen woat.”

17. Woo wort eene Sesta jetreest? (See uk daut Bilt.)

¹⁷ Wie kjennen uk noch derch onse Breeda un Sestren Troost kjrieen. See wie mol daut Biespel von Helga, waut en Ungarn läft. Äwa väle Joaren haud see een deel Schwierichkjeiten un doawäajen wia see gaunz vetwiewelt un feeld sikj wieetloos. Wan see aun dise Joaren denkjt, haft see daut gaunz kloa, daut Jehowa ar emma derch de Vesaumlunk treesten deed. See schrift: “Wan ekj mie soo feeld, daut ekj nich mea wieda kunn, wäajen ekj soo väl schaufen must, fa mien kranket Kjint sorjen must un uk wäajen aundre Schwierichkjeiten, haft Jehowa mie emma jeholpen. Jieda eenselna Dach von de latste 30 Joa haft Jehowa sien Vespräakjen jehoolen, mie to treesten. Hee deed daut foaken derch aundre äare leeftolje Wieed, waut mie fresch Moot jeewen. De Breeda un Sestren schreewen mie foaken äwa Fon ooda een Koatje ooda lowden mie krakjt dan, wan mie daut daut needichste fäld.”

18. Woo kjenn wie aundre treesten?

¹⁸ Wie haben daut groote Väarajcht, Gott notodoonen un aundre to treesten. Wie kjennen daut, wan wie dee jeduldich toohorchen, leeftolich to dee räden un dee opp veschiedne Wäaj uthalpen (Spr. 3:27). Wie strenjen ons aun, aule Menschen to treesten, waut doa lieden, uk dee, waut Gott noch nich deenen. Wan onse Nobasch biejlikj äwa wäm truaren motten ooda krank woaren ooda aundre Sorjen haben, wudd wie dee kjennen besieekjen, dee toohorchen un dee Bibelvarzhen wiesen toom dee Moot moaken. Wan wie Jehowa nodoonen, dän “Gott, waut emma treesten deit”, kjenn wie onse Gloowesbreeda halpen, Schwierichkjeiten derchtostonen un wie kjennen mau rajcht aundre Menschen halpen, Gott kjanen to lieren (Mat. 5:16).

JEHOWA WOAT ONS EMMA BIESTONEN

19. Waut deit Jehowa fa ons, un woo kjenn wie am nodoonen?

¹⁹ Jehowa es sea om aul dee todoonen, waut am leewen. Un hee woat ons kjeenmol veloten, wan wie derch Schwoaret gonen. Hee kjemmat sikj om siene true Deena krakjt soo aus een leeftolja Voda om siene Kjinja. Jehowa leit ons, hee sorcht fa ons, beschizt ons un treest ons. Wie kjennen onsen leeftoljen, himlischen Voda nodoonen, wan wie ons unjarenaunda en schwoare Tieden unjastetten un Moot moaken. Wan wie en dise Welt uk woaren motten derch Schwoaret gonen ooda lieden, kjenn wie ons oba gaunz secha sennen, daut Jehowa ons biestonen woat. Hee haft je ons vesproaken: “Enjst die nich, wiels ekj sie met die” (Jes. 41:10). Dit Vespräakjen jeft ons de Garantie, daut wie kjeenmol gaunz auleen sent.