Woo halpt Jehowa ons, staunthauft to bliewen?

1. Wuarom mott wie staunthauft sennen; un wäa woat ons doamet halpen? (1. Petrus 5:10).

EN DISE schwoare latste Doag motten Jehowa siene Deena staunthauft sennen. Wuarom? Eenje haben eene schlemme Krankheit. Aundre haben eenen leewen Mensch em Doot veloaren. Un wada aundre haben Vefoljunk, entwäda von de Famielje ooda von de Menschen enne Rejierunk (Mat. 10:​18, 36-37). Oba du kaust die secha sennen, daut Jehowa die halpen woat uttohoolen, endoont met waut vonne Schwierichkjeit du foadich woaren motst (läs 1. Petrus 5:10).

2. Wuarom kaun een Christ uthoolen?

² Waut meent daut, uttohoolen ooda staunthauft to sennen? Daut meent, daut wie nich oppjäwen un uk nich onse Hopninj velieren, wan wie uk Schwoaret beläwen, Vefoljunk haben ooda aufjeprooft woaren. Een Christ kaun nich met siene ieejne Krauft uthoolen. Dee kaun bloos uthoolen, wiels dee de Krauft kjricht, “dee von Gott kjemt” (2. Kor. 4:7). En disen Artikjel woa wie äwa vea Sachen räden, wuaderch Jehowa ons halpt uttohoolen. Wie woaren uk seenen, waut wie doonen motten, daut ons dise Sachen togood komen kjennen.

DAUT JEBÄD

3. Wuarom kjenn wie sajen, daut daut Jebäd een Wunda es?

³ Jehowa haft ons waut Butajeweeneljet jejäft, waut ons halpen kaun uttohoolen. Hee haft daut mäajlich jemoakt, daut wie met am vetalen kjennen, wan wie uk Sinda sent (Heb. 4:16). Denkj mol han: Wie kjennen irjentwanea to Jehowa bäden un äwa irjenteene Sach. Hee hieet ons, endoont opp waut vonne Sproak wie bäden ooda wua wie sent, soogoa wan wie wua gaunz auleen ooda enjestopt sent (Jona 2:​2-3; Apj. 16:​25-26). Wan wie mol sea besorcht sent un Jehowa daut nich sajen kjennen, woo wie ons krakjt feelen, kaun hee daut doawäajen vestonen, waut wie am sajen wellen (Reem. 8:​26-27). Daut Jebäd es werkjlich een Wunda!

4. Woo weet wie, daut et met Jehowa sienen Wellen tooppaust, wan wie om Staunthauft-Sennen bäden?

⁴ Jehowa sajcht en sien Wuat, “daut hee ons hieet, wan wie am froagen, no wautemma daut es, soo lang aus daut no sienen Wellen es” (1. Joh. 5:14). Kjenn wie Jehowa uk froagen, daut hee ons halpt uttohoolen? Jo, wiels daut stemt met sienen Wellen toop. Wuarom kjenn wie daut sajen? Wäajen wan wie en Schwierichkjeiten staunthauft bliewen, dan kaun Jehowa dän Soton eene Auntwuat jäwen (Spr. 27:11). Buta daut sajcht de Bibel, daut Jehowa daut sea jankat, “dee bietostonen, waut am met een onjedeeldet Hoat vetruen” (2. Chr. 16:9). Wie kjennen ons gaunz secha sennen, daut Jehowa de Macht un uk dän Wunsch haft, ons to halpen uttohoolen (Jes. 30:18; 41:10; Luk. 11:13).

5. Woo kaun daut Jebäd ons halpen, ruich to sennen? (Jesaja 26:3).

⁵ De Bibel sajcht, daut wan wie iernstlich äwa onse Sorjen bäden, “dan woat Gott sien Fräd, waut wieda jeit, aus waut Menschen vestonen kjennen, [onse] Hoaten un [ons] Denkjen … beschitzen” (Filip. 4:7). Sent wie doa nich sea dankboa fäa? Wan de Menschen, waut Jehowa nich deenen, Schwoaret beläwen, dan proowen dee veleicht veschiednet, om äa Vestaunt frietomoaken un von äare Trubbels to vejäten. Eenje doonen biejlikj opp eene besondre Wajch nodenkjen toom aul äare Jedanken un uk de Angst utem Vestaunt rut. Oba opp dise Wajch daut Vestaunt ladich to moaken, kaun sea jefäadlich sennen, wiels daut kaun de beese Jeista eene Jeläajenheit jäwen, waut aun eenem siene Jedanken to doonen (see uk Matäus 12:​43-45). Un wan de Menschen sikj doaderch uk ruja feelen, es daut oba nich de werkjelja Fräd, waut von Jehowa kjemt. Oba wan wie to Jehowa bäden, dan wies wie, daut wie gaunz opp am vetruen, un daut jeft ons “ennare Fräd” (läs Jesaja 26:3). Eene Wajch, woo Jehowa ons soonen Fräd jäwen kaun, es, daut hee ons aun Bibelvarzhen denkjen halpt, waut ons Troost jäwen. Dise Bibelvarzhen wiesen ons uk, woo sea hee ons leeft un woo jieren hee ons halpen well, un doaderch kjenn wie ruich sennen (Psa. 62:​2-3).

6. Waut kjenn wie doonen, daut ons daut Jebäd noch dolla togood kjemt? (See uk daut Bilt.)

⁶ Waut du doonen kaust. Wan dien Gloowen aufjeprooft woat, dan “schmiet aul diene Sorjen opp [Jehowa]” un bäd om sienen Fräd (1. Pet. 5:7). Bäd uk om de Weisheit, waut die fält, daut du met dienen Trubbel kaust foadich woaren (Spr. 2:10; 2:​11, NW). Vejät uk nich, Jehowa dankscheen to sajen en diene Jebäda (Filip. 4:6). Kjikj doano, woo Jehowa die en diene Proow biesteit, un dank am fa siene Help. Lot nich too, daut de Trubbels die doavon aufhoolen, de Säajnungen to seenen, waut du aul jekjräajen hast (Psa. 16:​5-6, NW).

GOTT SIEN WUAT

7. Wuarom kaun ons daut halpen uttohoolen, wan wie de Bibel studieren?

⁷ Jehowa haft ons sien Wuat jejäft toom ons halpen uttohoolen. De Schreft haft een deel Varzhen, waut ons vesechren, daut Jehowa ons biesteit. See wie mol een Biespel. En Matäus 6:8 sajcht daut biejlikj: “Jun Voda weet daut, waut junt fält, mau rajcht noch ea jie doarom bäden.” Jesus säd dise Wieed un hee kjant Jehowa väl bäta aus irjent sestwäa. Doawäajen kjenn wie ons gaunz secha sennen, daut Jehowa weet, waut ons fält, un daut hee ons halpen woat, wan wie derch waut Schwoaret gonen. De Bibel haft noch een deel aundre Varzhen, waut ons Krauft jäwen, om wieda uttohoolen (Psa. 94:19).

8. (a) Waut von biblischa Gruntsauz kaun ons biejlikj halpen uttohoolen? (b) Waut woat ons halpen, aun de biblische Gruntsauzen to denkjen, waut ons fälen?

⁸ De biblische Gruntsauzen kjennen ons uk halpen uttohoolen. Dee jäwen je ons weisen Rot, waut ons halpen kaun, goode Entscheidungen to moaken (Spr. 2:​6-7). Biejlikj rot de Bibel ons too, eenen Dach opp eemol to nämen, enne Städ ons äwamotich Sorjen to moaken äwa daut, waut morjen veleicht sennen woat (Mat. 6:34). Wan wie de Jewanheit haben, de Schreft to läsen un doaräwa notodenkjen, dan woat ons daut leichta sennen, aun de biblische Gruntsauzen to denkjen, waut ons bie jieda Loag fälen.

9. Woo kjennen de Jeschichten enne Bibel ons Vetruen stoakjen, daut Jehowa ons wieda halpen woat?

⁹ En de Bibel finj wie Jeschichten von Menschen, waut soo wieren aus wie un opp Jehowa vetruden un siene Help kjrieejen (Heb. 11:​32-34; Jak. 5:17). Wan wie äwa soone Jeschichten nodenkjen, dan stoakj wie ons Vetruen opp Jehowa, daut hee “onse Tooflucht uk onse Krauft [es]. Hee es eene jewenschte Help en groote Noot” (Psa. 46:2). Un wan wie doaräwa nodenkjen, woo Jehowa siene Deena en schwoare Tieden Gloowen weesen un staunthauft bleewen, brinjt ons daut bat doa, dee notodoonen (Jak. 5:​10-11).

10. Waut kaust du doonen, daut de Bibel die noch dolla togood kjemt?

¹⁰ Waut du doonen kaust. Läs de Bibel jieda Dach un hab eene List reed met Bibelvarzhen, waut die besonda halpen. Väle jleichen daut, dän Varsch fa dän Dach fuaz zemorjes to läsen. Opp dise Wajch haben dee dän Dach äwa waut toom nodenkjen, waut äant Moot jeft. Dits krakjt daut, waut eene Sesta holp, dee Mariea heet. See kjemmad sikj om äare Elren, waut beid Kjräft hauden, bat see storwen. Marie sajcht äwa dise Tiet: “Ekj deed jieda Dach aum zemorjes dän Varsch fa dän Dach läsen un doaräwa nodenkjen. Dise Jewanheit holp mie, mien Vestaunt met Jeisteljet drock to hoolen un nich bloos aun mie selfst un aun miene schwoare Loag to denkjen” (Psa. 61:3).

ONSE GLOOWESBREEDA

11. Wuarom jeft ons daut Moot to weeten, daut wie nich de Eensje sent, waut derch Proowen gonen motten?

¹¹ Jehowa jeft ons eene christelje Broodaschoft toom ons halpen uttohoolen. Auleen to weeten, daut onse “gaunze Broodaschoft oppe Welt derch aul soon Lieden gonen mott”, jeft ons de Sechaheit, daut wie nich auleen sent (1. Pet. 5:9). Onse Gloowesbreeda sent derch krakjt soone Proowen jegonen aus wie un dee sent staunthauft jebläwen. Daut bediet, daut wie daut uk kjennen! (Apj. 14:22).

12. Woo kjennen onse Gloowesbreeda ons halpen; un waut kjenn wie fa dee doonen? (2. Korinta 1:​3-4).

¹² Onse Gloowesbreeda kjennen ons dän Moot jäwen, waut ons fält toom uthoolen. Soo wia daut biejlikj bie dän Apostel Paulus. En siene Breew räd hee foaken von deejanje, waut am holpen, aus hee en sien ieejnet Hus enjestopt wia, un hee bedankt sikj doafäa. Dee jeewen Paulus dän Troost, dän Moot un de Help, waut am fäld (Filip. 2:​25, 29-30; Kol. 4:​10-11). Vondoag dän Dach beläw wie veleicht dautselwje. Wan ons Help fält toom uthoolen, dan sent onse Gloowesbreeda doa fa ons, un wan dee Help fält, dan sent wie doa fa dee (läs 2. Korinta 1:​3-4).

13. Waut holp eene Sesta uttohoolen, waut Maya heet?

¹³ Eene Sesta von Russlaunt, waut Maya heet, kjrieech väl Moot von äare Gloowesbreeda. Aune 2020 kleiwden de Poliezen äa Hus derch un lota must see uk verem Jerecht, wiels see to aundre von äaren Gloowen jerät haud. Maya sajcht: “En dise Tiet, aus ekj äwafoddat wia, deeden de Breeda un Sestren mie fonen ooda schriewen toom mie weeten loten, daut see mie väl räakjenden. Ekj wist daut aul emma, daut ekj to eene groote un leeftolje Famielje jehieed, oba von aune 2020 aun es mie daut besonda dietlich jeworden.”

14. Waut motst du doonen, om de Unjastettunk von diene Gloowesbreeda to kjrieen? (See uk daut Bilt.)

¹⁴ Waut du doonen kaust. Bliew dicht bie diene Gloowesbreeda, wan du eene Proow derchjeist. Hool die doa nich von trigj, de Eltestasch no Help to froagen. Dee kjennen “soo sennen aus Schulinj em Storm, ooda een Dak, wan de Räajen prosselt” (Jes. 32:2). Hool em Denkj, daut diene Gloowesbreeda uk derch Schwoaret gonen. Soo, wan du waut Leeftoljet fa wäm deist, dän daut doaraun fält, dan woat die daut selfst Freid jäwen un daut woat die halpen, diene ieejne Proow wieda uttohoolen (Apj. 20:35).

ONSE HOPNINJ

15. Woo holp de Hopninj Jesus; un woo woat de Hopninj ons uk halpen? (Hebräa 12:2).

¹⁵ Jehowa haft ons eene sechre Hopninj jejäft toom ons halpen, staunthauft to bliewen (Reem. 15:13). De Hopninj holp Jesus, sienen schwansten Dach en sien Läwen oppe Ieed uttohoolen (läs Hebräa 12:2). Jesus wist, daut wan hee wudd tru bliewen, dan wudd daut bewiesen, daut de Soton em Orrajchten wia, waut dee äwa Jehowa jesajcht haud. Jesus freid sikj aul, wada met sienen Voda toop to sennen un met de Tiet met siene jesaulwde Breeda toop to rejieren. Krakjt soo kaun onse Hopninj, fa emma en Gott siene niee Welt to läwen, ons uk halpen uttohoolen, krakjt endoont waut fa Schwoaret wie en dän Soton siene Welt beläwen.

16. Waut holp eene Sesta, staunthauft to bliewen; un waut kjenn wie von daut lieren, waut see säd?

¹⁶ See wie mol, woo de Hopninj fa de niee Welt eene Sesta en Russlaunt holp, waut Alla heet, aus äa Maun enjestopt wort, oba noch nich fuaz verem Jerecht kjeem. Aus dit soo wia, säd Alla: “Om de scheene Hopninj to bäden un doaräwa notodenkjen, holp mie, daut ekj nich too mootloos wort. Ekj weet, daut woat noch wada bäta woaren. Jehowa woat siene Fiend jewennen un wie woaren beloont woaren.”

17. Woo kjenn wie wiesen, daut wie dankboa sent fa de Hopninj? (See uk daut Bilt.)

¹⁷ Waut du doonen kaust. Nemm die Tiet, äwa de wundascheene Hopninj notodenkjen, waut Jehowa die vesproaken haft. Stal die väa, du best enne niee Welt un sitst de Säajnungen, waut Jehowa ons jejäft haft. Wan du daut deist, dan woat sikj die daut soo väakomen, daut diene Trubbels “mau fa een Stootje sent un leicht sent” (2. Kor. 4:17). Strenj die uk aun, to aundre von dienen Gloowen to räden. Denkj mol han, woo schwoa daut fa soone sennen mott, daut Schwoare en dän Soton siene Welt derchtogonen, onen de Hopninj von de niee Welt to haben. Veleicht wellen dee mea von dise Hopninj hieren, wan du uk bloos een kjlien Bät met dee vetalen kaust.

18. Wuarom kjenn wie doaropp vetruen, waut Jehowa vesproaken haft?

¹⁸ Nodäm daut Hiob een deel Schwierichkjeiten utjehoolen haud, säd hee to Jehowa: “Ekj bekjan, daut du aules kaust; die es nuscht ommäajlich, wan du waut plonst” (Hiob 42:2). Hiob wort en, daut Jehowa doa nuscht von aufhoolen kunn, sien Väanämen to erfellen. Dit to weeten, kaun ons uk de Krauft jäwen, staunthauft to bliewen. Saj wie mol, eene kranke Fru es gaunz mootloos, wäajen een deel Doktasch ar nich haben kunt halpen, jesunt to woaren. Oba dan finjt see eenen erfoarnen Dokta, dee doa weet, waut ar schot un woo hee ar met dise Krankheit halpen kaun. Derch dit feelt see sikj aul väl ruja, wan daut uk noch een Stoot dieren woat, bat see wada jesunt es. Nu kaun see de Krankheit uthoolen, wäajen see de Hopninj haft, daut see woat wada jesunt woaren. Krakjt soo es daut bie ons: Wie woaren onse Trubbels väl bäta uthoolen kjennen, wan wie äwa de Hopninj von daut Paradies nodenkjen.

19. Waut mott wie doonen, daut wie kjennen staunthauft bliewen?

¹⁹ Soo aus wie jeseenen haben, halpt Jehowa ons, onse Proowen uttohoolen derch daut Jebäd, sien Wuat, onse Gloowesbreeda un onse Hopninj. Wan wie aul dit woanämen, dan woat Jehowa ons halpen, jieda Proow derchtosaten, soo lang bat hee met daut Schwoare en dän Soton siene Welt een Enj jemoakt haft (Filip. 4:13).