WAUT JUNGE MENSCHEN WEETEN WELLEN
Woo kaun de Bibel mie halpen? – Poat 1: En de Bibel kaust du mea finjen, aus du denkjst
Briana, waut 15 Joa es, sajcht: “Ekj hab jeprooft, de Bibel to läsen, oba soon dikjet Buak derchtoläsen wia eefach too väl!”
Jeit die daut uk soo? Dan woat dis Artikjel die halpen!
Wuarom saul ekj de Bibel läsen?
Es die daut aul enoolent, wan du doa noch mol bloos aun denkjst, de Bibel to läsen? Daut es to vestonen. De Bibel es je uk een Buak met äwa dusent Sieden un dee noch fien volljeschräwen un onen Bilda. Doawäajen jankat eenem daut veleicht dolla, Tellewizhen ooda Videos to kjikjen.
Denkj mol äwa dit: Wan du wurscht eenen oolen, grooten, wieetvollen Kausten finjen, wurscht du dan nich weeten wellen, waut doa bennen es?
De Bibel es krakjt soo aus dis wieetvolla Kausten. Doabennen finjst du een deel wieetvollen Rot, waut die halpen kaun,
goode Entscheidungen to moaken
bäta met diene Elren foadich to woaren
werkjlich goode Frind to kjrieen
bäta met diene Sorjen omtogonen.
Wuarom kaun soon oolet Buak ons vondoag dän Dach noch halpen? Wiels “aule Schreft von Gott jejäft” es (2. Timotäus 3:16, PB). Daut bediet, daut de Rot doabennen von dän kjemt, dee daut baste weet.
De Bibel es soo aus een Kausten, wua väl wieetvolla Rot bennen es
Woo saul ekj de Bibel läsen?
Eene Mäajlichkjeit es, de gaunze Bibel derchtoläsen. Soo wurscht du weeten, om waut daut enne Bibel jinkj. Oba daut jeft väl Mäajlichkjeiten, woo eena de Bibel läsen kaun. See wie mol twee Biespels:
Du kaust de 66 Bibelbieekja läsen, soo aus dee en de Bibel sent, von 1. Mose bat Openboarunk.
Du wurscht de Bibelbieekja uk eent no daut aundre läsen kjennen, soo aus daut mol passieet es.
Eene Iedee: En daut vieede Poat von daut Heft Help fa daut Bibelstudium jeft daut eene List, wua to seenen es, woo Jesus sien Läwen oppe Ieed nom Riem no jewast es.
De tweede Mäajlichkjeit es, daut du die eene Jeschicht utläst von de Bibel, waut die met diene Schwierichkjeit halpt, waut du nu hast. Biejlikj:
Wurscht du wellen Frind haben, wua du die opp veloten kust? Dan läs de Jeschicht von Jonatan un David (1. Samuel, Kapitel 18-20). Waut vonne goode Sieden haud David, daut Jonatan met dän wull Frint sennen?
Wurscht du jleichen stoakja to sennen, wan du vesocht woascht? Dan läs de Jeschicht von Josef un kjikj, woo hee tru bliewen kunn (1. Mose, Kapitel 39). Waut jeef Josef de Krauft, tru to bliewen?
Wurscht du jleichen to weeten, woo bäden die halpen kunn? Dan läs de Jeschicht von Nehemia (Nehemia, Kapitel 2). Woo weet wie, daut Gott no Nehemia sien Jebäd horcht?
Eene Iedee: Wan du de Bibel läsen deist, dan sieekj die eene Städ, wua daut ruich es un du dienen Kopp kaust bie de Sach haben.
De dredde Mäajlichkjeit es, daut du die eene Jeschicht ooda eenen Psalm ut de Bibel utläsen deist. Läs daut un dan denkj doaräwa no, woo die daut halpen kaun. Nodäm du dit jeläst hast, denkj äwa dise Froagen no:
Wuarom leet Jehova dit en de Bibel oppschriewen?
Waut lieet mie daut doaräwa, woo Jehova es un wuarom hee jewesset deit?
Woo kaun ekj dit en mien Läwen nokomen?
Eene Iedee: Proow daut mol, de Bibel to läsen. Schriew die daut opp, wanea du doamet aunfangen west, un bruck dän Bibelläsplon von opp jw.org.