11. KAPITEL

Woo kaun eena daut mieeschte ut de Schreft rutschapen?

Jedrekjte Utgow

Schient die daut eenjemol schwierich, wan du eene groote Oabeit ver die hast? Veleicht vedeelst du die de Oabeit dan toom daut leichta moaken. Krakjt soo es daut uk met de Schreft läsen. Oba veleicht wundascht du: “Wua saul ekj bloos aunfangen?” En dit Kapitel woa wie eenjet unjasieekjen, waut die halpen kaun, mea Freid to haben, wan du de Schreft läst un dee studieescht.

1. Woosoo sell wie räajelmässich de Schreft läsen?

Een Mensch, waut räajelmässich “däm HARN sien Jesaz” läst, dee woat schaftich sennen un dän woat daut goot gonen (läs Psalm 1:1-3). Proow, aum Aunfank bloos een poa Minuten jieda Dach to läsen. Je dolla du met Gott sien Wuat woascht bekaunt woaren, je bäta woat die daut gonen, doabennen to läsen.

2. Woo kaun die daut Bibelläsen togood komen?

Om daut eenem daut Bibelläsen kaun togood komen, mott eena em tweschen mol stellhoolen met läsen un doaräwa nodenkjen (Josua 1:8). Wan du läst, dan äwalaj mol: Waut sajcht mie daut äwa Jehova Gott? Woo kaun ekj daut nokomen? Ooda: Woo wudd ekj aundre met disen Varsch halpen kjennen?

3. Waut kaust du doonen, daut du Tiet hast, de Schreft to läsen?

Felt die daut schwoa, Tiet to finjen toom de Schreft läsen? Väle von ons jeit daut soo. Proow, de Tiet daut baste uttonutzen (Efeesa 5:16). Du wurscht die kjennen eene Tiet faustsaten, wanea du jieda Dach west de Schreft läsen. Eenje nämen sikj tiedich zemorjes Tiet doatoo. Aundre wellen leewa lota, veleicht opp Meddach. Un noch aundre doonen daut zeowes, ea see schlopen gonen. Woont wudd fa die de baste Tiet sennen toom de Schreft läsen?

DOLLA UNJASTONEN

Lia, waut du doonen kaust, daut die daut Bibelläsen dolla intressieet. See uk, woo du die kaust fein reedmoaken, soo daut du ut dien Bibelstudium kaust daut mieeschte rutschapen.

Miere Bilda: Een Jung lieet met de Tiet, eene jewesse Sort Äten to jleichen. 1. De Jung spält met daut Äten. 2. Een poa Joa lota at dee soon Äten. 3. De Jung es noch een bät ella un jleicht daut Äten to äten. — Krakjt soo aus wie daut lieren kjennen, framdet Äten to jleichen, kjenn wie uk lieren, daut Bibelläsen to jleichen

4. Lia, daut Bibelläsen to jleichen

Daut es veleicht goanich soo leicht, aunfangen met de Bibel läsen. Oba eena kaun een Velangen doano kjrieen, krakjt soo aus eena daut lieren kaun, framdet Äten to jleichen. Läst 1. Petrus 2:2 un dan got toop dise Froag derch:

Wan du jieda Dach de Schreft läsen wurscht, jleefst du, daut die daut met de Tiet wudd scheen gonen?

Kjikjt daut VIDEO toom seenen, woo eenje daut met de Tiet jleichten, de Schreft to läsen. No daut got toop dise Froagen derch.

VIDEO: Jugentliche kjrieen Leew fa Gott sien Wuat (5:33)

Waut muak de junge Menschen en daut Video daut schwoa, de Schreft to läsen?
Waut deeden see, daut see nich noleeten met de Schreft läsen?
Waut deeden see, daut de Schreft läsen fa an intressaunt wia?

Help toom doamet aunfangen:

Läs eene Bibel, wua opp to veloten es un leicht to vestonen es. Proow mol, de Neue-Welt-Übersetzung to läsen, wan daut dee opp diene Sproak jeft ooda eene aundre Sproak, waut du goot kaust.
Läs ieescht soont, waut die daut dolste intressieet. De Plon “Fang aun de Schreft to läsen” kaun die halpen.
Moakj die daut, bat wua du jeläst hast. Bruck doatoo dän Plon en dit Buak “Bat wua ekj em Bibelläsen sie”.
Bruck de JW Library^®-App. Dee kaust du biejlikj em Fon ooda Tablet raufloden toom de Bibel irjentwua läsen ooda horchen.
Bruck daut Heft Help fa daut Bibelstudium. Doa sent Launtkoaten un Plons bennen, un daut kaun daut Bibelläsen intressaunta moaken.

5. Doo väastudieren fa daut Bibelstudium

Läst Psalm 119:34 un dan got toop dise Froag derch:

Wuarom es daut goot to bäden, ea du de Bibel läst ooda väastudieescht?

Woo kaust du daut mieeschte bie jieda Bibelstudium rutschapen? Wan du een Kapitel en dit Buak väastudieescht, dan proow daut soo aus dit to doonen:

Läs de Varzhen opp de ieeschte Sied von daut Kapitel.
Läs die de Bibelvarzhen no un proow to vestonen, woo dee met daut tooppaussen, waut doa em Buak steit.
Tieekjen de wichtje Wieed ooda Saza aun, waut de Froag beauntwuaten. Daut woat die halpen, wan du daut Kapitel ieescht met dienen Bibelliera toop derchjeist.

Miere Bilda: Eene Fru deit väastudieren fa äa Bibelstudium. A. See läst de ieeschte Sied von daut Kapitel. B. See läst sikj de Bibelvarzhen no, waut doa aunjejäft sent. C. See tieekjent wichtje Wieed un Saza en daut Kapitel.

Hast du daut jewist?

Jehova siene Zeijen haben veschiedne Bibeläwasatungen jebrukt. Oba dee jleichen besonda Die Bibel. Neue-Welt-Übersetzung, wäajens dee krakjt äwasat es un kloa to vestonen es un Gott sienen Nomen brukt. (See dän Artikjel opp jw.org “Haben Jehova siene Zeijen äare ieejne Bibel?”)

WAUT EENJE SAJEN: “De Schreft to studieren jeft mie too väl auf; ekj hab nich de Tiet ooda de Krauft doatoo.”

Waut wurscht du sajen?

KAPITEL TOOPJEFOT

Om daut du mea ut de Bibel rutschapen kaust, sat eene Tiet faust toom dee läsen. Bäd, om daut to vestonen, un doo fa jieda Bibelstudium väastudieren.

Waut hast du jelieet?

Waut woat die halpen, daut mieeschte ut de Schreft ruttoschapen?
Wanea kaust du die Tiet oppoat saten toom de Schreft läsen un studieren?
Wuarom loont sikj daut, fa jieda Bibelstudium väastudieren?

Woonen Dotem dit Kapitel derch wia:

Nemm die dit väa

Doo fa daut näakjste Bibelstudium soo väastudieren, aus daut en dit Kapitel toojerot woat.

Noch aundret:

Nemm die noch aundret väa

MEA NOSIEEKJEN

See mol eenjet, waut die halpen kaun, mea ut dien Bibelläsen ruttoschapen.

“Woo eena bie daut Bibelläsen mea rutschapen kaun” (De Woaktorm Num. 1 2017)

See mol dree Mäajlichkjeiten, woo du kaust de Schreft läsen.

“Woo kaun de Bibel mie halpen? – Poat 1: En de Bibel kaust du mea finjen, aus du denkjst” (Artikjel opp jw.org)

Unjasto die daut, woo die daut Bibelläsen kaun scheen gonen.

“Woo kaun de Bibel mie halpen? – Poat 2: Die kaun daut Bibelläsen scheen gonen” (Artikjel opp jw.org)

Kjikj mol, waut du von soone lieren kaust, waut aul lang emma de Schreft jeläst haben.

Een goodet perseeneljet Studium (2:06)