30. KAPITEL
Diene leewe Aunjehieeje kjennen wada läwen!
Wan doa wäa stoaft, dan sent wie sea bedrekjt un truarich. Doawäajen nant de Schreft dän Doot eenen Fient (1. Korinta 15:26). En daut 27. Kapitel hast du jelieet, daut Jehova disen Fient woat jewennen. Oba waut es met de Menschen, waut aul jestorwen sent? En dit Kapitel woascht du mea äwa een scheenet Vespräakjen von Jehova lieren: Hee woat millionende Menschen vom Doot oppwakjen, daut dee fa emma läwen kjennen! Kaun daut soont werkjlich jäwen? Woaren dee oppstonen toom em Himmel läwen ooda oppe Ieed?
1. Waut well Jehova fa onse Aunjehieeje doonen, waut jestorwen sent?
Jehova well de Vestorwne jieren wada toom Läwen brinjen. De trua Maun Hiob wia sikj secha, daut Gott am nich vejäten wudd, wan hee storf. Hee säd to Gott: “Dan wurscht du roopen, un ekj wudd [vom Doodenrikj] auntwuaten” (läs Hiob 14:13-15).
2. Woo weet wie, daut et mäajlich es, daut de Doodes oppstonen?
Aus Jesus oppe Ieed wia, jeef Gott am de Krauft, Menschen vom Doot opptowakjen. Jesus wuak een 12-joaschet Mejalkje vom Doot opp un eene Wätfru äaren Sän (Markus 5:41-42; Lukas 7:12-15). Lota storf Lazarus, Jesus sien Frint. Wan Lazarus uk aul vea Doag doot un begroft wia, wuak Jesus am opp. Hee bäd to Gott un säd dan: “Lazarus, komm rut!” Un “de jestorwna Maun kjeem rut”. Hee läwd! (Johanes 11:43-44). Denkj mol han, woo schaftich Lazarus siene Famielje un Frind wieren!
3. Waut vonne Hopninj jeft daut fa diene leewe Aunjehieeje, waut jestorwen sent?
De Schreft vesprakjt, daut de Menschen “vom Doot oppstonen woaren” (Aposteljeschicht 24:15). Dee, waut Jesus vom Doot oppwuak, wieren nich em Himmel jewast (Johanes 3:13). Dee freiden sikj, wada hia oppe Ieed to läwen. Jesus woat boolt millionende Menschen vom Doot oppwakjen, daut dee kjennen fa emma oppe Ieed em Paradies läwen. Jesus säd, daut aul dee, waut en Gott sien Jedajchnis sent, wudden vom Doot oppstonen; uk soone, waut von Menschen vejäten sent (Johanes 5:28-29).
DOLLA UNJASTONEN
Lia ut de Schreft, wuarom wie neiw weeten, daut Jesus de Doodes kaun oppwakjen un uk woat. See uk, wuarom die daut kaun Troost un Hopninj jäwen.
4. Jesus bewees daut, daut hee de Doodes kunn oppwakjen
See mol, waut Jesus fa sienen Frint Lazarus deed. Läst Johanes 11:14, 38-44 un dan got toop dise Froagen derch:
Woo weet wie, daut Lazarus opp iernst doot wia? (See Varsch 39.)
Wan Lazarus wia em Himmel jewast, jleefst du, wudd Jesus dän dan haben oppjewakjt toom wada oppe Ieed läwen?
5. Väle woaren vom Doot oppstonen!
Läst Psalm 37:29 un dan got toop dise Froag derch:
Wua woaren de millionende Menschen läwen, waut vom Doot oppjewakjt woaren?
Jesus woat noch väl mea Menschen vom Doot oppwakjen, aus bloos dee, waut Jehova deenden. Läst Aposteljeschicht 24:15 un dan got toop dise Froag derch:
Wäm wenschst du die, daut dee vom Doot oppstunt?
Denkj mol aun dit: Jesus kaun wäm krakjt soo leicht vom Doot oppwakjen, aus een Voda sien Kjint vom Schlop oppwakjen kaun
6. Daut oppstonen von de Doodes kaun die Troost un Hopninj jäwen
De Jeschicht en de Schreft von Jairus siene Dochta haft väle aul Troost un Moot jejäft, waut wäm haben must begrowen. Läst dise Jeschicht en Lukas 8:40-42, 49-56.
Ea Jesus Jairus siene Dochta vom Doot oppwuak, säd hee to Jairus: “Fercht die nich; jleew bloos” (see Varsch 50). Woo kaun de Hopninj, daut de Doodes oppstonen woaren, die halpen, . . .
wan doa wäa von diene Aunjehieeje jestorwen es?
wan dien Läwen en Jefoa es?
Kjikjt daut VIDEO un dan got toop de Froag derch, waut hia aunjejäft es.
Woo haft de Hopninj, daut de Doodes woaren oppstonen, Phelicity äare Elren Troost un Moot jejäft?
WAUT EENJE SAJEN: “Daut es schia nich to jleewen, daut de Menschen kjennen vom Doot oppstonen toom oppe Ieed läwen.”
Waut jleefst du?
Woonen Bibelvarsch wurscht du brucken toom bewiesen, daut de Doodes woaren oppstonen?
KAPITEL TOOPJEFOT
De Schreft vesprakjt, daut millionende Menschen woaren vom Doot oppstonen. Jehova well, daut dee wada sellen läwen, un hee haft Jesus de Macht jejäft, dee vom Doot opptowakjen.
Waut hast du jelieet?
Woo weet wie, daut Jehova un Jesus daut jankat, de Doodes wada toom Läwen brinjen?
Wua woaren de Millionende läwen, waut vom Doot oppstonen: em Himmel ooda oppe Ieed? Wuarom wurscht du daut sajen?
Wuahäa best du die secha, daut diene leewe Aunjehieeje woaren vom Doot oppstonen?
MEA NOSIEEKJEN
Lia, waut du doonen kaust, wan du truascht.
Kaun de Schreft soone werkjlich halpen, waut doa truaren?
Woo kjennen Kjinja doamet foadich woaren, wan doa wäa stoaft, dän dee väl jeräakjent haben?
Woat doa wäa vom Doot oppstonen toom em Himmel läwen? Wäa woat verheipts nich oppstonen?
“Waut es daut oppstonen von de Doodes?” (Artikjel opp jw.org)