Kapitel 18
Sie opp emma Gott sien Frint!
Frind to woaren un to bliewen brukt Aunstrenjunk. Wan du die aunstrenjst, Gott sien Frint to woaren un to bliewen, woascht du rikjlich jesäajent woaren. Jesus säd to dee, waut aun am jleewden: „De Woarheit woat junt frie moaken“ (Johanes 8:32). Waut meent daut?
Du kaust nu aul frie sennen. Du kaust frie sennen von de faulsche Lieren un von de Läajes, waut Soton vebreet haft. Du woascht nich soo onen Hopninj sennen aus Millionen Menschen, waut Jehova nich kjanen (Reema 8:22). Gott siene Frind sent soogoa frie von de „Doodesforcht“ (Hebräa 2:14-15).
Du kaust en Gott siene niee Welt frie sennen. Stal die väa, woo wundascheen daut woat sennen, een Läwen frie von Sorjen to haben! Em Paradies oppe Ieed woa wie frie sennen von Kjrich, Krankheit un Vebräakjen; frie von Oamoot un Hunga; frie von oolt un schwak woaren un stoawen; frie von Angst, Unjadrekjunk un Ojjerajchtichkjeit. De Bibel sajcht äwa Gott: „Du deist diene Haunt op un moakst aulet Läwendje met Jnod saut“ (Psalm 145:16, JHF).
Gott siene Frind woaren opp emma läwen. Daut eewje Läwen es een wieetvollet Jeschenkj, waut Gott aul deejanje jäwen woat, waut sikj aunstrenjen, siene Frind to sennen (Reema 6:23). Denkj doa emol äwa no, waut daut eewje Läwen fa die bedieden kaun!
Du woascht Tiet haben toom väle Sachen doonen. Veleicht wudd die daut intressieren, een Musikjinstrument to spälen. Ooda veleicht west du jieren Bilda molen ooda daut Deschahauntwoakj lieren. Du kaust uk waut äwa Tieren ooda äwa Plaunten lieren. Ooda wurscht du jieren romreisen un veschiedne Jäajenden un Velkja kjanen lieren? Daut eewje Läwen woat aul daut mäajlich moaken!
Du woascht Tiet haben, met väle Menschen Frint to woaren. Wan du eewich läfst, kaust du väle Menschen kjanen lieren, waut uk Gott siene Frind jeworden sent. Du woascht dee äare Gowen un goode Ieejenschoften kjanen lieren, un see woaren uk diene Frind woaren. Du woascht an jleichen, un see woaren die uk jleichen (1. Korinta 13:8). Daut eewje Läwen woat die jenuach Tiet jäwen toom met aule Menschen Frint woaren! Oba daut Baste woat sennen: wäarent een Joahundat no daut aundre vejeit, woat diene Frintschoft met Jehova emma stoakja woaren. Sie opp emma Gott sien Frint!