28. KAPITEL
Sie dankboa fa daut, waut Jehova un Jesus fa die deeden
Woo jeit die daut, wan du von eenen Frint een feinet Jeschenkj kjrichst? Dan best du secha schaftich un west dienen Frint wiesen, daut du fa daut dankboa best. Jehova un Jesus haben ons daut jratste Jeschenkj jejäft, waut et jeft. Waut es daut un woo kjenn wie wiesen, daut wie fa daut Jeschenkj dankboa sent?
1. Woo kjenn wie wiesen, daut wie dankboa sent fa daut, waut Gott un Christus fa ons deeden?
De Schreft vesprakjt, daut “aul dee, dee aun am [Jesus] jleewen”, kjennen fa emma läwen (Johanes 3:16). Woo kjenn wie daut wiesen, daut wie aun am jleewen? Derch daut, waut wie em Läwen aules doonen un woo wie daut doonen (Jakobus 2:17). Wan wie onsen Gloowen derch onse Wieed un onse Woakjen wiesen, dan woa wie jratre Frind met Jesus un sienen Voda Jehova (läs Johanes 14:21).
2. Bie woon besondret Toopkomen kjenn wie wiesen, daut wie Jehova un Jesus dankboa sent?
Dän latsten Owent ea Jesus storf, säd hee siene Nofolja, woo see noch kunnen fa sien Opfa Dankboakjeit wiesen. Hee säd, daut dee sullen een besondret Toopkomen aufhoolen, waut de Schreft “dän Harn sien Owentmol” nant. Daut es daut Aundenkjen aun Christus sienen Doot (1. Korinta 11:20). To waut fieed Jesus daut Owentmol en? Daut wia doatoo, daut de Apostel, un aule woare Christen no an, daut wudden em Denkj hoolen, daut hee sien Läwen fa ons jejäft haud. Doawäajen säd Jesus: “Doot dit om aun mie to denkjen” (Lukas 22:19). Wan du toom Owentmol kjemst, dan wiest du, daut du dankboa best, daut Jehova un Jesus ons soo sea leewen.
DOLLA UNJASTONEN
Lia, woo du noch kaust diene Dankboakjeit wiesen, daut Jehova un Jesus ons soo sea leewen. See uk, wuarom daut soo wichtich es, daut Owentmol to fieren toom aun Jesus sienen Doot denkjen.
3. Dankboakjeit wiest sikj derch Woakjen
Stal die mol väa, du best meist batem vedrinkjen un dan rat die wäa. Wurscht du daut bloos vejäten, waut deejanja fa die jedonen haud? Ooda wurscht du dän opp irjenteene Wajch proowen to wiesen, daut du dankboa best fa daut?
Bloos wäajen Jehova es daut mäajlich, daut wie kjennen fa emma läwen. Läst 1. Johanes 4:8-10 un dan got toop dise Froagen derch:
Wuarom es Jesus sien Opfa een besondret Jeschenkj?
Woo denkjst du äwa daut, waut Jehova un Jesus fa die deeden?
Woo kjenn wie wiesen, daut wie doafäa dankboa sent, waut Jehova un Jesus fa ons deeden? Läst 2. Korinta 5:15 un 1. Johanes 4:11; 5:3. No jieda Bibelvarsch got toop dise Froag derch:
Woo kjenn wie no disen Varsch no wiesen, daut wie dankboa sent?
4. Doo Jesus no
Wie kjennen onse Dankboakjeit uk wiesen, wan wie Jesus nodoonen. Läst 1. Petrus 2:21 un dan got toop dise Froag derch:
Woo wurscht du kjennen en Jesus siene Footspoaren gonen?
Jesus räakjend Gott sien Wuat väl, prädijd de goode Norecht un holp aundre
5. Wank no daut Owentmol toom aun Christus sienen Doot denkjen
Toom seenen, woo dän Harn sien Owentmol daut ieeschte Mol derchjefieet wort, läst Lukas 22:14, 19-20. Dan got toop dise Froagen derch:
Waut deeden se doa opp dän Harn sien Owentmol?
Waut stalt daut Broot un de Wien väa? (See Varsch 19 un 20.)
Jesus wull haben, daut siene Jinja daut Owentmol eemol daut Joa sullen fieren krakjt aun dän Dach, aus hee storf. Doawäajen komen Jehova siene Zeijen eemol daut Joa toop, om aun Christus sienen Doot to denkjen, soo aus Jesus daut wull haben. Toom mea von dit wichtje Toopkomen weeten, kjikjt daut VIDEO. Dan got toop de Froag derch, waut hia aunjejäft es.
Waut woat oppem Owentmol jedonen?
Daut Broot un de Wien stalen waut väa. Daut Broot stalt Jesus sienen volkomnen Menschenkjarpa väa, waut hee fa ons opfad. De Wien stalt sien Bloot väa
WAUT EENJE SAJEN: “Eena mott bloos aun Jesus jleewen, daut eena kaun jerat woaren.”
Woo wurscht du Johanes 3:16 un Jakobus 2:17 brucken kjennen toom wiesen, daut doa noch mea needich es?
KAPITEL TOOPJEFOT
Wie wiesen onse Dankboakjeit fa daut, waut Jesus fa ons deed, wan wie Gloowen haben un sienen Doodesdach fieren.
Waut hast du jelieet?
Waut es doa aules met en, aun Jesus to jleewen?
Woo wurscht du wellen diene Dankboakjeit wiesen fa daut, waut Jehova un Jesus fa die jedonen haben?
Wuarom es daut soo wichtich, oppem Owentmol to sennen toom aun Jesus sienen Doot denkjen?
MEA NOSIEEKJEN
Waut sent wie reed to doonen, wäajen Christus fa ons storf?
Lia mea doaräwa, waut Gloowen es un woo eena dän wiesen kaun.
“Wies, daut du aun Jehova siene Vespräakjungen jleefst” (De Woaktorm, Oktooba 2016)
En de Jeschicht “Nu hab ekj een reinet Läwen un feel mie goot” kaust du seenen, woo eene Fru daut holp, mea von Christus sien Opfa to lieren.
“De Schreft haft äa Läwen veendat” (De Woaktorm, 1. August 2011)
Unjasto die daut, woosoo doa oppem Owentmol bloos wesse von daut Broot un dän Wien nämen.
“Wuarom fieren Jehova siene Zeijen daut Owentmol aundasch aus aundre Gloowes?” (Artikjel opp jw.org)