Acht Menschen komen en eene niee Welt

Noah un siene Famielje un de Tieren jinjen en dän Kausten nenn. Jehova muak de Däa too un de Räajen funk aun. Daut räajend soo sea, daut de Noahkausten aunfunk oppem Wota to schwamen. Tolatst wia de gaunze Ieed unja Wota. De schlajchte Menschen wieren nich en dän Kausten un musten aula stoawen. Oba Noah un siene Famielje wieren doabennen en Sechaheit. Jleefst nich uk, daut dee sea schaftich wieren, daut dee Jehova jehorcht hauden?

De Räajen poascht fa 40 Doag un 40 Nachten un dan hieed daut opp. Sachelkjes jinkj daut Wota rauf. Met eenst kjeem de Noahkausten opp eenen Boajch opp un bleef stonen. Oba doa wia aulawäajen noch väl Wota; doawäajen kunnen Noah un siene Famielje nich fuaz ut dän Kausten rut.

Soo bie sacht veschwunk daut Wota. Noah un siene Famielje wieren äwa een Joa en dän Kausten bennen. Dan säd Jehova, see kunnen doa rutgonen. Buten späad sikj daut no eene gaunz niee Welt. Dee wieren sea dankboa, daut Jehova an jerat haud, un doawäajen brochten dee dän een Opfa.

Jehova freid sikj äwa daut Opfa. Hee vespruak, daut hee nienich mea derch eene Äwaschwamunk aules oppe Ieed wudd enne Grunt brinjen. Aus een Tieekjen fa sien Vespräakjen leet hee toom ieeschte Mol eenen Räajenboagen aum Himmel väakomen. Hast du mol eenen Räajenboagen jeseenen?

Jehova säd uk, Noah un siene Famielje sullen Kjinja haben, daut de Ieed voll Menschen wort.