Yobo
10 “Monyo wami wangusegela.
Mbangulandula guboguta.
Mbanguzuela mukunda nu gikenene giami!*
2 Mbanguwambela Nzambi egi: ‘Uzuedigo egi ngudi nu gubola.
Nguwambele gishina udi gunguluishila.
3 Gubonga gutshi udi muheta ha gungumonesa lamba
nu gusegulula midimo ya mago aye,
tangua udi mukuatesa athu abola mu ndaga adi mutshigina gutshita?
4 Meso aye adi gifua a athu ba?
Nga udi mumona gifua luholo luana mona muthu wa ha mavu ba?
5 Masugu aye adi gifua masugu a athu a ha mavu ba?
Nga ndo ivo yaye idi gifua ivo ya muthu ba?
6 Hene udi mukamba gujimbila guami
nu gulandula gukamba gubola guami ba?
7 Udi mujiya egi ngushigo gami nu gubola;
gushigo nga muthu wajiya gunguhuluisa ha mago aye.
8 Aye wangufugile nu mago aye, aye wangulondele,
uvi henyaha udi mutshigina gungushiya diago.
9 Ngabuba, ujimbilago egi wangufugile nu mavu a wuma
uvi henyaha udi mutshigina gunguvutula mu fuluguta dia mavu.
10 Aye wangubundudilego gifua miliki ba?
Wangukoleselego nji gifua fromaje?
11 Wangufugile nu gilema nu misunyi,
watungile ifuwa yami nu mishiya hamoshi.
12 Wanguhanele monyo nu guzumba gua giamatshidia;
wabambele monyo wami muabonga.
13 Uvi wakhalele mutshigina gutshita ndaga eji mu gisuegi.*
Ngudi mujiya egi ndaga eji jidi mukatuga gudi aye.
14 Gula nga ngatshitshi gubola, nga wangumonyi,
wakhalelego naye nji gungutotesela mukunda nu gujimbila guami.
15 Gula ngatshitshi gubola, idi ndaga ya gikenene mukunda nu ame!
Ikhale ngatshitshilego gubola, ngajiyilego guzumbula muto,
handaga ngudi muvua musonyi wavula nu gikenene giavula.
16 Gula ngazumbula muto wami, udi gunguzomba gifua shitu ya khoshi,
udi mukalegela nji ngolo jiaye ha gungutshita gubola.
17 Udi mubata mathemue ahe-ahe ha gungufunda,
udi mulandula gunguvila khabu jiakola,
tangua malamba ami adi mulandula gudivudisa.
18 Mukunda natshi wanguzolele mu vumo dia mama?
Ngakhalele naye gufua gutuama egi nga muthu mumoshi angumone.
19 Yakhalele naye gukhala gifua khenji ngajingilego;
akhalele naye gunguzola mu vumo dia mama uu nu mu malumba.’
20 Masugu ami adi azonda. Nzambi angubembe mu guhuima;
akatule meso enji gudi ame, hagula ngajiya gudivua ndambo muabonga,*
21 gutuama egi nguye ha fundo dinyi ngajiyilego guvutuga luko
mu gifutshi gidi nu phipha yakola,*
22 mu gifutshi gia phipha yakola,
gifutshi gidi giazala nu phipha nu lumuamua,
fundo didi mumonega kiajiji gifua phipha.”