Yobo
9 Yobo wamuvutudile egi:
2 “Ngudi mujiya muabonga egi idi ngenyi.
Uvi luholo lutshi muthu wa ha mavu wajiya gubinga mulonga udi nawo muene nu Nzambi?
3 Gula muthu mumoshi watshigina gusha n’enji giphapha,*
muthu muene gajiyilego guhana Nzambi mvutu nga gu muhu umoshi mukatshi dia mihu yenji 1 000.
4 Muene udi watema,* udi nji nu ngolo jiavula diago.
Gudi nu muthu wajiya gumagana gutuama dienji nga lamba dimoshi gumubuila ndo ba?
5 Muene wana katula milundu nga muthu mumoshi gujiya ndo;
mu khabu jienji wana guyibalumuna.
6 Muene udi munyigisa mavu hagula akatuge ha fundo dienji,
ngenyi makunji a mavu adi gudinyigisa.
7 Wana gumba mukhuala hagula kumbi dizogigo,
wana tshuiga nji themua;
8 udi musununa dilu muene hakhenji,
udi muwenda nji holu dia matshipha-tshipha akola a mu kianga.
9 Muene wafugile themua jia Ashe* nu jia Kesile* nu jia Kima,*
wafugile nji themua jia gu khanda ya sud ya dilu;
10 watshitshile ndaga jiakoma nu jinyi tuajiyilego gukotelesa,
ndaga jia gushimana jinyi jiajiyilego gutangewa.
11 Muene udi mubalega hehi nu ame, uvi ngushigo gumumona;
udi mubalega gutuama diami, uvi ame ngushigo mukotelesa.
12 Gula muene wakuata gima gimoshi, nanyi wajiya guzuela nga gima?
Nanyi wajiya gumuwambela egi: ‘Ndaga itshi udi mutshita?’
13 Nzambi mbagashigo mukanda khabu jienji;
ikhale athu ana kuatesa Rahabe* mbaafugamela Nzambi.
14 Hene ngudi naye gumunemesa muavula tangua ngudi gumuhana mvutu,
ngudi naye gutomba muabonga mbimbi jia guzuela!
15 Ikhale ngatshitshilego gubola, ngajiyilego gumuhana mvutu.
Uvi ngakhalele naye gububila nzuji* wami ha gunguvuila khenda.
16 Gula ngamutamega, muene mbawunguhana mvutu ba?
Ngushigo musha mutshima egi mbawutegelela dijui diami,
17 handaga muene udi gungutshiongonona nu funji yakola
udi nji mulaba guvudisa phuta jiami.
18 Muene gashigo gungubemba ha guhuima;
udi mulandula gunguzalesa nu ima ya lula.
19 Gula idi ndaga yatadila ngolo, muene udi nu ngolo.
Gula idi mulonga udi naye gusophesewa, muene udi muzuela egi: ‘Nanyi wajiya gungutamega ha gunguhula mihu?
20 Gula nga ngakalegelego gubola, nga kano diami diangufuisa milonga;
ikhale ngalandula gukhala muthu wabonga,* muene mbawuzuela egi ngudi nu gubola.
21 Ikhale ngalandula gukhala muthu wabonga,* ngushigo gudishila mutshima;
monyo wami wangusegela.
22 Ndaga jiene jiagasue jidi luholo lumoshi. Hene ngudi muzuela egi:
‘Muene wana shiya muthu gatshitshilego gubola* gifua muthu wabola.’
23 Gula meya avula adi mubulumuga muphushi ashiya athu mu gisagumuisa,
muene mbawulela athu atshitshilego gubola anyi ashigo nu felela.
24 Mavu ahanewe gale ha mago a muthu wabola;
muene udi mutshuiga meso* a manzuji a ha mavu.
Gula ishigo muene, nanyi muko?
25 Henyaha masugu ami adi muya muphushi gubalega muthu wana zula phushi;
adi muya phushi uvi ashigo mumona ndaga yabonga.
26 Masugu ene adi mudiadiumuga gifua wato walondewe nu matetete,*
gifua njila jia khuyi jidi mubulumuga phushi ha gukuata gima gia gudia.
27 Gula ngazuela egi: ‘Mbangubuita lamba mutshima,
mbangukatula gikenene gu phala yami nu mbangukhala nu gusuanguluga,’
28 mbangulandula guvua woma mukunda nu malamba ami agasue,
ngudi mujiya nji egi aye mbawushigo muzuela egi ngatshitshilego gubola.
29 Mbangukhala khuta muthu wabola.
Na mukunda natshi ngudi naye gulaba gudisagesa?
30 Gula ngaweva muila wami nu meya a neje,
nu ngaphelegetesa mago ami nu savo,
31 gungima mbawungumba mu wina,
ngenyi nu yene milele yami mbayingutuna.
32 Handaga muene gashigo muthu gifua ame hagula ngumuhane mvutu,
nu hagula tuye tusophesewe n’enji.
33 Gushigo nu muthu wajiya gutubatudila mulonga,
muthu wajiya gukhala nzuji wetu.*
34 Gula nga wabembele gungubeta*
nu gutuna gunguvuisa woma wakola,
35 nga ngazuelele n’enji guvua woma ndo,
handaga ngana khala ndo nu khadilo dia guzuela nu woma.