Yobo
11 Sofale muenya gu Naama wamuvutudile egi:
2 “Mbimbi eji jiagasue mbajisala ngenyi mvutu ndo ba?
Nga ndo guzuela muavula guajiya gubingisa muthu ba?*
3 Izuele-zuele yaye mbayihenesa athu tedie ba?
Nga muthu mumoshi mbagashigo gugubalela* mukunda nu mbimbi udi muzuela ha guweya* athu ba?
4 Handaga aye udi muzuela egi: ‘Ndaga ngudi muzuela* jidi jiabonga,
ngushigo nji nu gubola gu meso aye.’
5 Gula nga Nzambi wakhalele naye guzuela,
nu gukangula kano dienji ha guzuela nu aye!
6 Ngenyi muene wakhalele naye guguwambela ndaga jia gusuega jidi mujiya muene, handaga udi nu ndunge,
ndunge jia giamatshidia jiana khalago jialeba ha gukotelesa.
Aye wakhalele naye gukotelesa egi Nzambi wana bemba egi gubola guaye guko gubuitshiwe mutshima.
7 Wajiya gukamba gujiya ndaga jiatadila Nzambi jinyi jiana khala lamba gudi athu ha gukotelesa ba?
Nga ndo wajiya gukotelesa ndaga jiagasue jiatadila* Nzambi wa Ngolo Jiagasue ba?
8 Ndaga jiene jidi jialeha gubalega dilu. Itshi wajiya gutshita?
Jidi jialeha gubalega malumba.* Ndaga itshi wajiya gujiya?
9 Jidi jialeha gubalega mavu,
jidi nji jiakoma gubalega kianga.
10 Gula muene udi mubalega hehi wakuata muthu, waya n’enji gu tribinale,
nanyi wajiya gumutunyisa?
11 Muene wana jiya tangua athu ana gumba mambo.
Gula muene wamona ndaga jidi jiabola, mbagashigo gujitadila ba?
12 Uvi muthu waheya mbawukotelesa
phamba lusugu mbalumona muene phunda ya mu foto muvuala muthu.*
13 Wakhalele naye gulondega mutshima waye
nu gusununa mago aye gudi Nzambi.
14 Gula koko diaye didi mutshita gubola, bishila gubola guene gualeha,
ubembigo egi ndaga jiabola jikhale mu tenta jiaye.
15 Ngenyi wajiya gutuphula phala yaye guvua musonyi ndo;
wajiya nji gumagana nu gikhesa, woma ndo.
16 Gungima aye mbawubuita malamba aye mutshima;
mbawaabuita mutshima gifua meya abalega gale.
17 Monyo waye mbawubua gifua muanya wa mu midi;
nu yene phipha yenji mbayibua gifua gimenegena.
18 Mbawukhala nu gikhesa handaga felela didi guene,
mbawutala nji khanda nu khanda nu mbawubanda mu guhuima.
19 Tangua mbawubanda nga muthu mumoshi mbagashigo guguhana woma,
athu avula nji mbaakamba egi waatshigine.
20 Uvi meso a athu abola mbaaleba;
mbaashigo nji mumona fundo dia gulengela,
felela diawo nji mbadikhala phamba gufua.”*