Yobo
13 “Yadiago meso ami amonyi ndaga eji jiagasue,
matshui ami avui, ngakotelesa nji ndaga jiene.
2 Ndaga mudi mujiya ame nji ngudi gujijiya;
mushigo muangubalega.
3 Uvi ame, ngudi mutshigina guzuela nu Nzambi wa Ngolo Jiagasue;
ngudi mutshigina gubata mulonga wami gudi Nzambi.
4 Uvi mudi muzuela ndaga jiavula jia mambo mukunda nu ame;
mukut’enu agasue mudi minganga ishigo nu ndando.
5 Gula nga muahenyi genu diago tedie,
nga muamonesa egi mudi nu ndunge.
6 Ngabuba tegelelenu ndaga ngudi muzuela,
tegelelenu nji ndaga jidi muzuela ivungu yami.
7 Mbamuzuela ndaga jiabola mukunda nu Nzambi ba?
Mbamumumbila nji mambo ba?
8 Mbamukamba gukhala gukhanda yenji ba?
Mbamukamba guzuelela Nzambi wa giamatshidia ba?
9 Ndaga mbajiyila muabonga mukunda nu enue gula muene wamitala muabonga ba?
Mbamumuhuiga gifua luholo muana huiga athu ba?
10 Muene mbawumibalela* diago
gula mudi mumonesa khadilo dia gutomba-tomba mu gisuegi.
11 Lutumbu luenji mbalushigo gumivuisa woma ba?
Woma wenji nji mbawushigo gumikuata ba?
12 Mbimbi jienu jia gutema jidi gifua ishima ya fuphi;
matangi’enu adi gifua ibayi yalondewe nu mavu a wuma.
13 Henenu tedie hagula nguzuele.
Gungima ndaga yagasue yajiya gungubuila ibue gayo!
14 Mukunda natshi ngudi mumba monyo wami mu gingonza
nu ngudi mubata monyo wami ha mago?
15 Ngatshima muene wangushiya, ame mbangulandula gunengenena,
mbanguzuela mulonga wami gutuama dienji.
16 Muene mbawubua muhuluishi wami,
handaga muthu wagasue gashigo munemesa Nzambi, gajiyilego gumagana gutuama dienji.
17 Tegelelenu muabonga mbimbi jiami;
vuenu nji ndaga ngudi muzuela.
18 Talenu, ngalondega muabonga mulonga wami;
ngudi mujiya egi ngatshitshilego gubola.
19 Nanyi mbawunguluisa?
Mbangufua gula ngahena tedie!
20 Oo Nzambi wami, ngudi gugutoga phamba ima mbadi,
hagula ngudisuegigo gutuama diaye:
21 Ungumonesago luko malamba,*
ubembigo egi woma wakola ungukuate mukunda nu aye.
22 Zuela, mbanguguhana mvutu,
nga ndo ngubembe nguzuele, aye unguhane mvutu.
23 Ndaga itshi ngajimbila, gubola gutshi ngatshitshi?
Nguwambele gula ngalumbuga; nguwambele nji gubola guami.
24 Mukunda natshi udi musuega phala yaye
nu gungumona gifua ngudi mbalagaji waye?
25 Mbawuvuisa diyiji dinyi muhehe udi muhehumuna woma ba?
Nga ndo, mbawuhata diyiji dia gimigina ba?
26 Handaga udi mulandula gusonega ndaga jiabola mukunda nu ame,
udi gunguhana ndola mukunda nu gubola ngakalegele mu ulenge wami.
27 Wambi malu ami mu milulu,
udi mutala muabonga njila jiami jiagasue,
udi nji mulandula nganyo jiami.
28 Muila wa muthu wana bola gifua gima gia fukha,
gifua mulele wadiwa gu sualala.*