Yobo
14 “Muthu wavualewa gudi mukhetu wana khala nu monyo matangua azonda,
uvi matangua ene adi azala pha nu malamba.
2 Muene wana zoga gifua giyaji, gungima wana migina;*
wana lenga gifua givule-vule, gungima wana tota.
3 Yadiago, wahagi diso diaye gudi muene,
aye udi nji gumubata* hagula muene asophesewe nu aye.
4 Muenya gubola wajiya guvuala muthu gashigo nu gubola ba?*
Ndo sha!
5 Gula nga masugu a monyo wenji ahagewe gale,
nga guvula gua mbeji jienji gudi nu aye;
aye wamuhagele mudidilo hagula gabalegago.
6 Katula meso aye gudi muene hagula wajiya guheta guhuima,
uu nu tangua mbadimanesela muene lusugu luenji, gifua muenya mudimo wana heta lufuto.
7 Nu wene mutshi wana khala nu felela.
Gula wabatudiwa, gungima wana saphutshila luko,
ndombo jienji jiana landula nji gukula.
8 Gula miji yenji yabola mu mavu,
gibunji gia mutshi wene giafua nji mu mavu,
9 gula mutshi wene wavua vumba dia meya, mbawusaphutshila;
mbawuzola nji thango gifua mutshi uhe-uhe.
10 Uvi tangua muthu wana gufua, wana banda ngolo ndo;
gula muthu wabatula monyo, wanaya gui?
11 Meya adi mutota mu kianga,
meya a mu muta adi mushiginyina, muta udi mumigina.
12 Muthu nji wana banda, ganago guzuga luko.
Uu nu tangua dilu mbaditota, mbagashigo muzuga,
mbagashigo nji muzugishiwa gu tulo tuenji.
13 Oo! nga wangusuegele gami mu malumba,*
nga wangusuegele gami uu nu tangua khabu jiaye mbajihua,
nga wanguhagelele tangua dimoshi ngenyi ha gunguwunguluga!
14 Gula muthu wafua wajiya gujinga luko ba?
Mbangunengena masugu agasue anyi ngudi mutshita mudimo gu ngolo
uu nu tangua guhuluga guami mbaguza.
15 Mbawutamega, ame mbangutaya.
Mbawukhala nu nzala yakola ya gumona mudimo wa mago aye.
16 Uvi henyaha udi mulandula gutanga nganyo jiami jiagasue;
udi mutala phamba gubola guami.
17 Gubola guami gudi guagukanga mu kuba,
udi mujitshiga nji gujimbila guami nu kole.
18 Gifua luholo mulundu wana bua nu wana batuga itshinyi-itshinyi,
gifua luholo seso diana katudiwa ha fundo dienji,
19 gifua luholo meya ana bolesa maseso
nu luholo meya avula adi mubulumuga mu phushi ana nana mavu,
aye nji watotesa felela dia muthu wa ha mavu.
20 Aye wana gukalegela muthu ndaga yagasue watshigina uu nu tangua mbadifua muene;
wana bolesa muila wenji, gungima wana gumukaya mu malumba.
21 An’enji adi mutumbuishiwa, uvi muene gashigo mujiya;
adi mubua athu ashigo nu ndando, uvi muene gashigo guyikotelesa.
22 Muene wana guvua lamba phamba tangua didi muene nu muila wenji;
wana* gudila phamba hadi muene nu monyo.”