Yobo
15 Elifaze muenya gu Temana wamuvutudile egi:
2 “Muthu watema mbawuhana mvutu nu matangi a githuhu* ba?
Nga ndo mbawuzalesa vumo dienji nu muhehe wa gukhanda ya mazogelo a kumbi ba?
3 Gubala* phamba mu mbimbi gushigo nu ndando,
ndaga udi muzuela jishigo mukuatesa nga gu gima gimoshi.
4 Handaga udi mutshita egi athu avuilago luko Nzambi woma,
udi mutuma athu ha gutuna gutangiza muavula ndaga jiatadila Nzambi.
5 Gubola guaye guene gudi gugutuma ha guzuela ngenyi,
watomba nji guzuela mbimbi nu ndunge jiabola.
6 Kano diaye gudi gugufuisa milonga, uvi ame ndo;
ivungu yaye idi gugufunda.
7 Aye muthu wa thomo wavualewa ba?
Nga ndo wavualewe gutuama dia tumilundu ba?
8 Aye wana tegelela ndaga jia gisuegi jiana zuela Nzambi ba?
Nga ndo udi mutangiza egi phamba aye muenya ndunge ba?
9 Ndaga itshi udi mujiya inyi esue tushigo mujiya?
Ndaga itshi udi mukotelesa inyi esue tushigo mukotelesa?
10 Athu adi nu jimvi nu athu agukola adi mukatshi dietu,
adi nu ivo yavula gubalega sh’aye.
11 Gikhesa gidi guguhana Nzambi gishigo giatagana mukunda nu aye ba?
Nga ndo, mbimbi jia tuluga adi guguwambela jishigo jiatagana mukunda nu aye ba?
12 Mukunda natshi udi nu lulendo nu ushigo gudikanda?
Mukunda natshi udi gututala nu khabu?
13 Handaga udi muvuila Nzambi khabu,
nu udi nji mubemba mbimbi jia luholo elu muzoga mu kano diaye.
14 Muthu wa ha mavu udi nanyi hagula akhale wa phelegeta?
Muthu wagasue wavualewe gudi mukhetu, udi nanyi hagula akhale muthu wabonga?
15 Tala! Nzambi ganago gushila athu enji a gijila mutshima,
nu diene dilu dishigo dia phelegeta gu meso enji.
16 Na itshi tuajiya guzuela mukunda nu muthu udi usala nu wabolele gale,
muthu udi munua ndaga jiabola gifua meya!
17 Ngudi guguwambela; ngutegelele!
Ngudi gugutela ndaga ngamonyi,
18 ndaga athu atema avuile gudi ash’awo,
asuegelego ndaga jiene.
19 Mavu ahanewe phamba gudi ene,
nga ngenji mumoshi gabalegelego mukatshi diawo.
20 Muthu wabola wana mona malamba masugu agasue a monyo wenji,
mu ivo yagasue yahagewe mukunda nu muenya khuta.
21 Muene udi muvua matululu adi gumuvuisa woma,
mu tangua dia guhuima, mahunji a nzangi adi gumuluisa.
22 Gashigo musha mutshima egi mbawuhuluga mu malamba;*
muene wahagewe ha gushiyiwa gu phogo ya khusa.
23 Muene udi muya nu guwungagana ha gukamba ima ya gudia*—ima yene idi gui?
Udi mujiya muabonga egi lusugu lua malamba luasuena hehi.
24 Lamba nu gikenene idi mulandula gumuvuisa woma;
adi gumusagesa gifua fumu udi hehi ha gulua ita.
25 Handaga udi muthuphula koko dienji ha guluisa Nzambi,
udi mukamba guluisa* Nzambi wa Ngolo Jiagasue;
26 Muene udi nu muto wakola, udi muya muphushi ha gumuluisa,
udi nu tshibu yenji yakoma nu yakola;
27 phala yenji idi ya gutshuiga nu maji,*
kete dienji nji didi dia guzala pha nu maji;
28 muene udi mukhala mu membo anyi mbaabua makhulu,
mu jinzo jinyi nga muthu mumoshi mbagashigo mujinga luko guene,
jinyi mbajibua thundu ya maseso.
29 Muene mbagashigo mubua muenya umonyi, umonyi wenji mbawushigo gudivudisa,
ima yenji nji mbayishigo mukhala yavula ha mavu.
30 Muene mbagashigo muhuluga mu malamba;
tshuya mbatumiginyisa galuthango genji,*
muhehe wa mu kano dia Nzambi mbawumushiya.
31 Muene gashigo naye gujimbila njila nu gusha mutshima mu ima ya githuhu,
handaga ima mbayiheta muene guene, mbayikhala nji ya githuhu;
32 ndaga yene mbayibua hadi muene nu monyo,
thango jienji mbajishigo nji musaphutshila.
33 Muene mbawubua gifua mutshi wa vinyo udi mubuisa mabundu enji adi khenji akola galego,
mbawubua nji gifua mutshi wa olive udi mubuisa iyaji yenji.
34 Handaga thundu ya athu anago gunemesa Nzambi,* yana haga ndo mabundu,
tshuya mbatukonda tenta jia athu ana tshigina gabatshi’a kano.*
35 Athu ene ana gumita lamba nu ana guvuala ndaga jiabola,
mavumo awo ana guvuala mambo.”