Yobo
21 Yobo wamuvutudile egi:
2 “Tegelelenu muabonga ndaga ngudi muzuela;
gula muatshita ngenyi mudi gunguwalagana.
3 Henenu gale tedie* tangua ngudi muzuela;
gula ngamanesela, muajiya giwa gunguweya.
4 Ame ngudi mubogutshila* muthu ba?
Gula yakhalele ngenyi, nga ngushigo* nu khadilo dia guhuiminyina.
5 Ngutalenu, mbamudihula;
hagenu mago ha ivungu yenu.
6 Tangua ngudi mutangiza ndaga yene ngudi mubua tunga-tunga,
muila wami wagasue udi mudigita.
7 Mukunda natshi athu abola adi mulandula gukhala nu monyo,
8 Ana khala tangua diagasue nu an’awo,
ene ana mona nji ajigulu awo.
9 Jinzo jiawo jidi mu ubambi, ashigo nu woma,
Nzambi nji gashigo guahana ndola nu fimbo yenji.
10 Ngombe jiawo jia milume jidi mumitshisa ngombe jia akaji muabonga.
Ngombe jiawo jia akaji jidi muvuala muabonga guselula ndo.
11 An’awo a mala adi muzula phushi hanze gifua thundu ya imeme,
an’awo adi mukena nu gusuanguluga.
12 Adi muyimba nu gangoma nu gitare,*
gula avua dijui dia lumbinga adi musuanguluga.
14 Uvi adi muwambela Nzambi wa giamatshidia egi: ‘Tubembe getu!
Tushigo mutshigina gujiya njila jiaye.
15 Nzambi wa Ngolo Jiagasue udi nanyi hagula tumukalegele mudimo?
Itshi mbatuheta gula tuamujiya?’
16 Uvi ngudi mujiya egi ashigo nu ufumu mu umonyi wawo hakhawo.
Matangi* a muthu wabola adi gualeha nu ame.
17 Mahugo* gutshi muenda wa athu abola wana jima?
Mahugo gutshi malamba ana guabuila?
Mahugo gutshi Nzambi wana guashiya mu khabu jienji?
18 Ene anabua ndo gifua gamulenge gadi muhehumuiwa gu muhehe
nu gubua gifua isusu idi muhehumuga gu funji ba?
19 Nzambi, mbawubamba ndola ya muthu mukunda nu an’enji.
Uvi Nzambi amufute, hagula muene ajiye ndaga yene.
20 Meso enji amone luholo ludi mubola muene,
muene anue khabu jia Nzambi wa Ngolo Jiagasue.
21 Mukunda natshi muthu wabola udi gudisagesa mukunda nu ndaga mbajibuila inzo yenji gungima dienji,
gula wasala phamba nu mbeji jiazonda* mu monyo wenji.
22 Gudi nu muthu wajiya gulongesa Nzambi nga ndaga imoshi ba?*
Handaga muene wana sophesa nu ene athu adi nu lukuma luavula.
23 Muthu mumoshi wafua hadi muene nu ngolo jiavula
gashigo nga nu gima gidi gumusagesa nu udi mu guhuima,
24 tangua mashina enji a malu* adi azala pha nu maji
hadi ifuwa yenji yakola.*
25 Uvi muthu muko wafua nu gikenene giavula,*
nu gulola ndo ima yabonga nga hazonda.
26 Mukut’awo agasue mbaabanda mu fuphi,
muila wawo mbawuzala pha nu mavinyo.
27 Tala! Ngudi mujiya muabonga ndaga mudi mutangiza,
mudi muya giphungi ha gungutshita gubola.*
28 Handaga mudi muzuela egi: ‘Inzo ya muthu wa lutumbu idi gui?
Tenta yakhalele mukhala muthu wabola idi gui?’
29 Muahudilego athu ana tshita vuayaje ba?
Muana longuga ndo muabonga ima ana mona.*
30 Ana zuela egi, muthu wabola wana huluishiwa mu lusugu lua lamba,
wana huluishiwa nji mu lusugu lua khabu jiakola.
31 Nanyi mbawumubela mukunda nu khadilo dienji?
Nanyi mbawumufuta mukunda nu ndaga jiakalagala muene?
32 Tangua mbadiya muene mu malumba,
malumba enji mbaabambewa.
33 Mavu a mu baba* mbaakhala abonga mukunda nu muene,
athu agasue a ha mavu mbaamulandula*
gifua athu ajiyilego gutangewa anyi adiangele gufua gutuama dienji.
34 Mukunda natshi mudi gunguwalagana nu guwalagana gua gituhu?
Mvutu jienu jidi jia mambo!”