Yobo
22 Elifaze muenya gu Temana wamuvutudile egi:
2 “Muthu wajiya diago gukhala nu ndando gu meso a Nzambi ba?
Muthu udi nu ndunge wajiya gumukuatesa ba?
3 Nzambi wa Ngolo Jiagasue wana gudisagesa* egi aye udi muthu wabonga ba?
Nga ndo muene wana heta nga gima handaga udi ya gujinginyina gudi muene ba?
4 Muene mbawuguhana ndola
nu mbawugusophesa handaga wana gumukombelela ba?
5 Ishigo handaga ndaga jiabola wana tshita jidi jiavula
nu gubola guaye gushigo nu gisugishilo ba?
6 Handaga aye walabele gutambula ima aphangi’aye a mala akuatesele gudi aye,
udi mukatula nji athu milele yawo nu guabemba thowa.*
7 Ushigo muhana meya a gunua gudi muthu udi yaguhuila,
udi nji mutuna guhana ima ya gudia gudi muthu udi nu nzala.
8 Mavu adi ha mago a muenya ngolo,
muthu wana tshiginyiwa wana jinga muene.
9 Uvi aye wakayele akhetu a gafunda mago agituhu,
wasagesele nji ana a shiye.*
10 Gishina giene udi yagujietewa mu miheto,*
woma wakola wagukuata nji mu gisagumuisa.
11 Gishina giene wajiyilego gumona handaga guma gudi diago gula bui,
meya avula nji adi gugutshuiga.
12 Nzambi udi gosa gifua muana khala dilu gosa,
tala nji luholo themua jiagasue jidi gosa.
13 Uvi aye wazuedi egi: ‘Itshi Nzambi udi diago mujiya?
Muene wajiya gusophesa mu phipha yakola ba?
14 Matuta ana gumutshuiga hagula gamonyigo,
muene wana wenda mu dilu.’*
15 Mbawulandula njila ikulu
yawendele athu abola,
16 athu anyi ashiyiwe* gutuama dia tangua diawo,
athu anyi meya avula* ahungumuine fondasio jiawo.
17 Akhalele muwambela Nzambi wa giamatshidia egi: ‘Tubembe getu!’
Akhalele nji muzuela egi, ‘itshi Nzambi wa Ngolo Jiagasue wajiya gututshita?’
18 Uvi muene wazalesele jinzo jiawo nu ima yabonga.
(Matangi abola a luholo elu adi gualeha nu ame.)
19 Muthu wabonga mbawumona ndaga yene nu mbawusuanguluga,
muthu gatshitshilego gubola mbawalela, mbawuzuela egi:
20 ‘Mbalagaji jietu jiashiyiwe,
tshuya mbatukonda ima yawo yasalele.’
21 Kamba gumujiya mbawukhala mu guhuima;
ngenyi mbawuheta ima yabonga.
22 Tshigina mikhuala yenji,
bamba mbimbi jienji mu mutshima waye.
23 Gula wavutuga gudi Nzambi wa Ngolo Jiagasue, mbawuvutuga luholo wakhalele thomo;
gula wakatula ndaga jiabola mu tenta yaye,
24 gula wabishila wolo waye mu fuphi,
gula wabishila nji wolo wa gu Ofile mu mabengi a maseso,*
25 ngenyi Nzambi wa Ngolo Jiagasue mbawubua gifua wolo waye,
muene mbawubua nji gifua utadi waye wa siliva wabalega gubonga.
26 Handaga mutangua diene gusuanguluga guaye mbagukhala gudi Nzambi wa Ngolo Jiagasue,
mbawuthuphula nji phala yaye gudi Nzambi.
27 Mbawumububila, muene mbawugutegelela;
mbawutagenesa ndaga wamulayele.
28 Ndaga yagasue mbawutshita, mbayibinga,
muanya mbawuhenya mu njila yaye.
29 Uvi gula wazuela nu lulendo mbawuvuishiwa musonyi,
muene mbawuhuluisa muthu wa gudibulumuisa.
30 Muene mbawuhuluisa athu atshitshilego gubola;
gula mago aye adi aphelegeta, aye mbawuhuluishiwa diago.”