Yobo
23 Yobo wamuvutudile egi:
2 “Ngudi mulandula gunyema* uu nu mangino;
ngolo jiami jiahua mukunda nu gudila.
3 Gula nga ngakhalele mujiya fundo ngajiya gumona Nzambi!
Nga ngayile ha fundo diana khala muene.
4 Ngakhalele naye gumuwambela mulonga wami
nu gumukotelesela matangi’ami agasue;
5 ngakhalele naye gujiya luholo luakhalele naye muene gunguhana mvutu
nu gulandula muabonga ndaga jidi gunguwambela muene.
6 Muene wakhalele naye gukalegela ngolo jienji jiavula ha gunguluisa ba?
Ndo sha! Wakhalele naye gungutegelela.
7 Gutuama dienji, guene mulonga wa muthu wabonga wajiya gulondewa,
nzuji wami wakhadi naye gunguzola mbala imoshi mu mulonga mayilago.
8 Uvi gula ngaya gu khanda ya mazogelo a kumbi, gashigo guene;
gula ngavutuga ngushigo gumumona.
9 Tangua didi mutshita muene ndaga gu koko dia mahidi, ame ngushigo gumumona;
gungima gula muene wabalumuga gu koko dia madia, ngushigo nji gumumona.
10 Uvi muene udi mujiya njila ngabalega.
Gula muene wangulola mbangubua gifua wolo wabonga.
11 Ikanzo yami yalandula nganyo jienji muabonga;
ngalandula njila yenji, ngayilego gu koko dia madia nga gu koko dia mahidi.
12 Ngatunyilego gutumagela mikhuala yahanele muene.
Ngabambele muabonga mbimbi jienji gubalega inyi yangutogewe ha gutshita.*
13 Gula muene wazula desizio dia gutshita ndaga imoshi, nanyi wajiya gumukanga njila?
Gula muene* watshigina gukalagala ndaga imoshi, wana guyitshita.
14 Handaga mbawutagenesa ndaga jiagasue jialondele* muene mukunda nu ame,
udi nji nu ndaga jiavula jia luholo elu jia bambi muene.
15 Gishina giene ngudi gudisagesa mukunda nu muene;
gula ngamutangiza, woma wami udi gudivudisa.
16 Nzambi wangubuisa muenya woma,
Nzambi wa Ngolo Jiagasue wanguvuisa woma.
17 Uvi phipha khenji yanguheneselego tedie,
nga yene phipha inyi yatshuigile phala yami.