Yobo
24 “Mukunda natshi Nzambi wa Ngolo Jiagasue gahagelego lusugu luenji lua usopheshi?
Mukunda natshi athu ana gumujiya ashigo mumona lusugu luene?
2 Athu adi musombegesa mididilo;
adi mukuya shitu ha guya gujifuga hamoshi nu shitu jiawo.
3 Adi mutambula phunda ya ana a shiye,*
adi mukuata nji ngombe ya mulume ya mukhetu wa gafunda mukunda nu mukudi.
4 Adi mushinjiga phutu ha gukatuga mu njila;
athu a ha mavu anyi ashigo nu muthu wa guakuatesa, adi naye gudisuega gutuama diawo.
5 Athu adi uphutu, adi mukamba ima ya gudia gifua phunda ya mu foto mu mavu a luselenga;
adi mukamba ima ya gudia mu mavu a luselenga mukunda nu an’awo.
6 Adi naye gukatula mbuto mu dihia* dia muthu muko,
adi mukatula mabundu mu gilanga gia vinyo gia muthu wabola.
7 Mu phipha adi mubanda thowa milele ndo;
ashigo nu mbulaketa ya guditshuiga mukunda nu guhuma.
8 Mvula ya gu mulundu idi guatebesa;
adi mujinginyina gu maseso handaga ashigo nu fundo dia gudisuega.
9 Ana ashiye adi mukatudiwa gu mele;
milele ya phutu idi mukuatewa mukunda nu mukudi,
10 adi guashinjiga ha guwenda thowa milele ndo,
adi mubata itungu ya mbuto ene nu nzala.
11 Muanya udi wakola mu lusugu, uvi ene adi mutshita mudimo wakola mu ibayi ya gilanga gia vinyo;*
adi mukama mabundu a vinyo mu gikameno gia vinyo, uvi ene nu luhungu.
12 Athu adi mutshigina gufua adi mulandula gudila mu dimbo;
athu anamana mangololo adi mukaluguga ha gutoga ukuateshi,
uvi Nzambi gashigo mumona egi ndaga yene idi yabola.*
13 Gudi nu athu adi mulumbugila muanya;
ashigo mukotelesa njila jienji,
ashigo nji mulandula njila jienji.
14 Muthu wana shiya athu udi muzuga nu gimenegena giagasue;
muene udi mushiya athu ashigo nu muthu wa guakuatesa nu phutu,
uvi mu phipha wana khala nzangi.
15 Meso a thambi adi munengenena ngueze,
muene udi muzuela egi ‘Nga muthu mbagangumonyigo!’
udi nji mutshuiga phala yenji.
16 Mu phipha adi mutobola mawina gu jinzo;
mu muanya adi gudikangela mu jinzo jiawo.
Ashigo mujiya muanya.
17 Handaga mukunda nu ene, gimenegena gidi gifua phipha yakola;
ajidila gale nu woma wa phipha yakola.
18 Uvi meya ana guahungumuna muphushi.*
Shinda diawo dia mavu mbaditewa mukumbu.
Mbaashigo muvutuga mu ilanga yawo ya vinyo.
19 Gifua luholo gikalala nu kiza giana manesela neje inyi yabua meya,
malumba* ana zula athu akalagala gubola!
20 Gin’enji mbawumujimbila; muene mbawubua ima yagudia mukunda nu mavinyo.
Mbaashigo luko gumuwunguluga.
Athu abola nji mbaaboguewa gifua mutshi.
21 Muene watshitshile gikunya* gubola,
wasagesele mukhetu wa gafunda.
22 Nzambi* mbawukalegela ngolo jienji ha gukatula enya ngolo;
ngatshima ajiya guzuga, uvi ashigo nu felela dia gukhala nu monyo.
23 Nzambi* udi guabemba ha gudishila mutshima nu gutangiza egi adi mu ubambi,
uvi meso enji adi mutala ndaga jiagasue jidi ene mutshita.*
24 Adi mukanduishiwa mukunda nu tangua diazonda, gungima adi mutota.
Adi mubulumuishiwa nu adi nji mufua gifua athu agasue;
adi mukokewa gifua isusu ya mbuto.
25 Henyaha nanyi wajiya guzuela egi ngudi muenya mambo
nga gutuna mbimbi jiami?”