Yobo
26 Yobo wamuvutudile egi:
2 “Udi mutangiza egi wakuatesele muthu gakhalelego nu ngolo ba?
Nga ndo wahuluishile mago akhalelego nu ngolo ba?
3 Udi mutangiza egi wahanele muthu gashigo nu gutema longo dia ndando ba?
Nga ndo wamonesele diago* egi aye udi watema* ba?
4 Udi mutshigina guzuela nu nanyi,
nanyi wagutumi ha guzuela ndaga jia luholo elu?*
5 Athu a gufua adi mudigita;
adi diago goshi’a meya nu ima yana khala muene.
7 Muene wasunuine dilu dia gu khanda ya nord mu githuhu,
wazenzelesele mavu mu githuhu, gima gia guakuata ndo.
8 Muene wabungishile meya mu matuta enji,
hagula ginemo gia meya gimuangigo matuta ene.
9 Muene watshuigile nguasa yenji ya ufumu hagula imonegago,
wasunuine matuta enji holu dia nguasa yene.
10 Muene wahagele mudidilo* hakatshi dia dilu nu kianga;
wahagele nji mudidilo hakatshi dia muanya nu phipha.*
11 Makunji a dilu adi gudinyigisa;
gula muene wabala adi gudihula.
12 Muene wana nyigisa meya a mu kianga mu ngolo jienji,
mu ndunge jienji wana batula shitu yakoma* ya mu kianga itshinyi-itshinyi.
13 Muene wana phelegetesa dilu nu muhehe* wenji;
koko dienji diana kobola nyoga yana khala lamba ha gukuatewa.*
14 Tala! Ndaga eji jidi phamba songi jia ndaga jiakalegele Nzambi;
tuavui phamba ndaga jiazonda diago jia mutadila!
Nanyi wajiya gukotelesa muandu wenji wakola?”