Yobo
27 Yobo walanduile guzuela* egi:
2 “Ngudi gudiloga mu jina dia Nzambi udi nu monyo, yago wangukalegele ndaga jiabola,
gifua mudi Nzambi wa Ngolo Jiagasue nu monyo, munu wangusagesele,
3 tangua ngudi nu monyo,
nu tangua muhehe* udi mukatuga gudi Nzambi udi mu mazulu ami,
4 ivungu yami mbayishigo muzuela ndaga jiabola;
ludimi luami nji mbalushigo mumba mambo!
5 Ngajiyilego nga hazonda guzuela egi mudi athu abonga!
Uu nu tangua mbangufua, mbangulandula* gukhala ya gujinginyina gudi* Nzambi!
6 Mbangulandula gukhala muthu wabonga, mbangushigo mubemba gukhala ngenyi;
mutshima wami mbawushigo gungubela* monyo wami wagasue.
7 Mbalagaji wami abue gifua muthu wabola,
athu adi gunguluisa nji abue gifua athu abola.
8 Felela ditshi muthu ganago gunemesa Nzambi* wana khala nadio gula washiyiwa,
nga gula Nzambi wamushiya?
9 Tangua lamba mbadimubuila,
Nzambi mbawuvua diago gudila guenji ba?
10 Nga ndo, muene mbawuheta gusuanguluga gudi Nzambi wa Ngolo Jiagasue ba?
Muene mbawutamega Nzambi tangua diagasue ba?
11 Mbangumilongesa ndaga jiatadila ngolo* jia Nzambi;
mbangushigo gumisuegela nga ndaga imoshi yatadila Nzambi wa Ngolo Jiagasue.
12 Talenu! Gula mukut’enu agasue muamonyi vizio,
na mukunda natshi mudi muzuela diago ndaga jia githuhu?
13 Diene shinda Nzambi wana hana muthu wabola,
diene nji khapho diana hana Nzambi wa Ngolo Jiagasue gudi enya khuta.
14 Gula an’enji adivudisa, mbaashiyiwa gu phogo ya khusa,
ajigulu enji mbashigo mukhala nu ima ya gudia yavula.
15 Athu mbaamuhuluisa mbaafua gu misongo yakola,
akaji’awo anyi mbaabua akhetu a gafunda mbaashigo guadila.
16 Ikhale muene wabungisa utadi wa siliva gifua fuphi
nu wabamba milele yabonga gifua wuma,
17 ikhale muene wajiya guyibungisa,
muthu wabonga mbawuyisudiga,
muthu gakalegelego gubola mbawukhaphumuna utadi wenji wa siliva.
18 Inzo idi mutunga muene idi yaleba gifua inzo* ya sualala,*
idi nji gifua gisasa gialondewa gudi mutaledi.
19 Tangua mbadiya muene mubanda mbawukhala nu umonyi, uvi mbagashigo mubungisa nga gima;
tangua mbadikangula muene meso, nga gima gimoshi mbagishigo mukhala guene.
20 Woma wakola udi gumukuata gifua luholo meya ana zala;
funji yakola idi gumuhungumuna mu phipha.
21 Funji ya gu khanda ya mazogelo a kumbi mbayimuhehumuna, ngenyi muene mbawuya;
mbayimukatula ha fundo dienji.
22 Funji yene mbayibunda gudi muene khenda ndo,
muene mbawutshita yagasue ha gulenga ngolo jia funji yene.