Yobo

 2 “Gula nga ngavutuga gami mu ivo yabalega,

gula nga ngavutuga mu masugu anyi Nzambi wakhalele gungubamba,

 3 tangua dialemesele muene muenda wenji holu dia muto wami,

tangua kiajiji gienji giangukuatesele ha guwenda mu phipha yakola.

 4 Tangua* ngakhalele muvuala nu ngakhalele nu ngolo,

tangua ngakhalele mumona ufuta wa Nzambi mu tenta yami.

 5 Tangua Nzambi wa Ngolo Jiagasue wakhalele nu ame,

tangua an’ami* agasue akhalele gungujieta,

 6 tangua malu ami akhalele mukatshi dia manteka avula,

nu tangua maseso akhalele gunguzolela ito ya maji.

 7 Tangua ngakhalele muya gu mufulo wa dimbo

nu tangua ngakhalele mukhala ha fundo dia athu avula.

 8 Gula mavuala a mala angumona akhalele gungubembela njila,*

nga ene athu agukola akhalele muzuga nu gusala ya gumagana mu molu.

 9 Mafumu akhalele mutuna guzuela;

akhalele muhaga mago ha ivungu yawo.

10 Majui a athu a lutumbu akhalelego muvuiwa;

akhalelego muzuela nga gima.

11 Athu agasue akhalele gungutegelela,

akhalele muzuela ndaga jiabonga mukunda nu ame,

anyi akhalele gungumona, akhalele gunguzuelela.

12 Handaga ngakhalele muhuluisa phutu jiakhalele mutoga ukuateshi,

nu ana a shiye* nu muthu wagasue gakhalelego nu mukuateshi.

13 Muthu munu wakhalele mutshigina gufua wakhalele gungushimbiga,*

ngakhalele musuanguluisa nji mutshima wa mukhetu wa gafunda.

14 Ngakhalele musudiga ndaga jiabonga gifua mulele;

ndaga jiabonga ngakhalele mutshita jiakhalele gifua lopho* nu gitambala.*

15 Ngabuile meso mukunda nu gifofo,

ngabuile nji malu mukunda nu gikata.

16 Ngakhalele tata wa ana a shiye;

ngakhalele nji mukuatesa athu ngakhalelego mujiya hagula asophesewe muabonga.

17 Ngakhalele mubogola mbanga jia muthu wakhalele mutshita ndaga jiabola,

ngakhalele nji mutambula saba yakhalele gu mazo enji.

18 Ngakhalele muzuela egi: ‘Mbangufua mu inzo yami,*

masugu a monyo wami nji mbaakhala avula gifua gishegele.

19 Miji yami mbayiya uu nu mu meya,

mame mbaakhala phipha yagasue mu thango jiami.

20 Lutumbu luami mbalulandula gubua luhe-luhe,

mbangulandula nji gusonona mifula nu uta wa manana udi ha mago ami.’

21 Athu akhalele gungutegelela muabonga,

akhalele muhena tedie ha guvua malongo ami.

22 Gula ame ngazuela, akhalelego nga nu ndaga iko ya gulezela;

mbimbi jiami jiakhalele jiafula gu matshui awo.

23 Akhalele gungunengenena gifua luholo ana nengena mvula;

akhalele nji mukangula makano awo gifua mukunda nu mvula ya gisugishilo.

24 Tangua ngakhalele gualelesa akhalele gudihula;

tangua akhalele mumona phala yami yagusuanguluga yakhalele guahana gikhesa.*

25 Ngaatuamezele gifua fumu wawo,

ngakhalele gifua fumu mukatshi dia masuta enji,

ngakhalele gifua muthu udi muhana gikhesa gudi athu adi mudila.