Yobo
31 “Ngakotele gikotelo nu meso ami.
Na luholo lutshi ngajiya gutala gandongo nu matangi abola?
2 Gula nga ngatshitshile ngenyi, itshi Nzambi udi mu dilu mbawunguhana?
Khapho ditshi mbanguheta gudi Nzambi wa Ngolo Jiagasue udi gosa?
3 Malamba ana buila muthu udi mutshita ndaga jiabola
nu athu ana kalegela athu ako gubola.
4 Muene ganago gumona njila jiami
nu gutanga nganyo jiami jiagasue ba?
5 Ame ngawendele gale mu mambo ba?*
Malu ami ayile gale phushi ha gumba mambo ba?
6 Nzambi anguthese nu githeselo giatagana;
ngenyi muene mbawujiya egi ngudi ya gujinginyina.
7 Gula malu ami ajimbila njila
nga ndo mutshima wami walanduile gale meso ami
nga ndo mago ami abolele gale,
8 ngenyi ngukune mbuto uvi muthu muko ajidie,
ngukune nji mutshi uvi mutshi wene uvumbudiwe.*
9 Gula ngatalele gale mukaji’angane nu matangi’a abola
nu ngabandemene gale nji ha mufulo wa muthu ngana khala n’enji hehi,
10 ngenyi mukaji’ami atue mbuto mukunda nu yala muko,
mala ako nji abungise n’enji muila.*
11 Handaga mbayikhala ndaga ya musonyi diago,
mbayikhala nji gubola gudi naye guhanewa ndola gudi manzuji.
12 Mbayikhala gifua tshuya tudi mukonda ima nu guyibolesa,*
tshuya tudi mukonda nu yene miji ya* mbuto jiami jiagasue.
13 Gula ngatunyile gukalegela muenya mudimo wami wa yala
nga wa mukhetu ndaga mu luholo luabonga,
tangua diakhalele muene nu mulonga nu ame,
14 itshi ngajiya gutshita gula Nzambi wangusophesa?*
Mvutu itshi ngajiya gumuhana gula muene wanguhula mulonga umoshi?
15 Muthu wangulondele mu vumo ishigo muene waalondele nji ba?
Ishigo muene watulondele gutuama egi tuvualewe ba?
16 Gula ngatunyile guhana phutu ima akhalele nayo funu
nga ndo ngamonesele mukhetu wa gafunda lamba,*
17 gula ngadile ima yami hakhami
nu guhana ndo an’a a shiye,
18 (sendese mu ulenge wami, mun’a shiye* wakudile hehi nu ame, ngakhalele sh’enji.
Sendese mu tangua ngakhalele mona wazonda* ngakhalele mutuameji mukunda nu mukhetu wa gafunda.)
19 Gula ngamonele muthu wakhalele mufua mukunda nu guhuma handaga gashigo nu mulele
nga ndo phutu munu gashigo nu mulele wa guditshuiga.
20 Gula muene* gangushimbigilego
handaga ngamuhanelego mulele walondewe nu uvuji wa imeme yami hagula gavuigo guhuma;
21 gula ngakanele mun’a shiye ha gumusagesa
tangua diakhalele muene nu funu ya ukuateshi ha mufulo wa dimbo;*
22 gula idi ngenyi koko diami dikatuge ha phanga dibue,
koko diami dibogoge nji ha khokhona.
23 Handaga ngakhalele muvua woma wa malamba adi mukatuga gudi Nzambi,
ngakhalelego nu luholo lua gumagana gutuama dia lutumbu luenji.
24 Gula ngashile mutshima gu wolo
nga ndo ngawambelele wolo wabonga egi: ‘Ngudi gugushila mutshima!’
25 Gula ngasuangulugile nu umonyi wami wavula
mukunda nu ima yavula ngahetele;
26 gula ngamonele muanya* muhenya
nga ndo mbeji muya nu guwenda nu gubonga guayo guagasue;
27 mutshima wami wasendesele gunguhuiga,
kano diami nji diahanele koko diami beze ha guyikombelela;
28 ngenyi mbayikhala gubola gudi naye guhanewa ndola gudi manzuji,
handaga mbayimonesa egi ngatunyile Nzambi wa giamatshidia udi mu dilu.
29 Ngasuangulugile gale nu gushiyiwa gua mbalagaji wami ba?
Nga ndo ngasuangulugile handaga malamba amubuila ba?
30 Ngahanelego kano diami njila ha gutshita gubola
ha gumuta mukumbu egi afue.
31 Mala a mu tenta yami azuelelego egi:
‘Nanyi wajiya gumona muthu wadia ima yenji uvi nu gukuta ndo?’*
32 Gushigo nga ngenji* mumoshi wakhalele mubanda hanze;
ngakhalele mukangula mifulo yami gudi athu akhalele mutshita vuayaje.
33 Ngasuegele gale gubola guami gifua muana tshita athu ako ba?
Ngasuegele gale gujimbila guami mu benga dia mulele wami ba?
34 Ngavuile gale woma mukunda nu ndaga athu avula ajiya guzuela ba?
Nga ndo ngavuile gale woma mukunda nu ndaga jiabola enya fami jiko ajiya guzuela,
ha gunguhenesa tedie nga gunguvuisa woma ha guzoga hanze ba?
35 Gula nga muthu mumoshi wangutegelela!
Nga ngambi sinyatire nu jina diami mukunda nu ndaga ngazuedi.
Nzambi wa Ngolo Jiagasue anguhane mvutu!
Gula nga muthu udi gungufunda wasonegele ndaga jidi gungufundila muene mu mukanda!
36 Nga ngawubatshi ha phanga yami,
nga ngawusudiga nji gu muto gifua gipho* gia lutumbu.
37 Mbanguwambela Nzambi ndaga jiagasue ngatshitshile,
mbangusuena gudi muene nu gikhesa giagasue gifua fumu.
38 Gula mavu ami angubogutshila,
mihanga ya mavu ene yadila hamoshi;
39 gula nga ngadile mabundu enji gufuta ndo nga gima,
nga ndo gula ngatotesele felela dia fumi’awo;*
40 ngenyi mitshi ya miya inguzogele ha fundo dia mbuto jia ble
mayiji a vumba diabola azoge ha fundo dia orje.
Mbimbi jia Yobo jiasuga haha.